ཆབ་མདོ་གྲོང་ཁྱེར་གྱི་སྡོད་ཁང་འཛུགས་སྐྲུན་ཁོངས་གཏོགས་ཀྱི་བདེ་འཇགས་ལྟ་སྐུལ་གྱི་ཆེད་དོན་གསོ་སྦྱོང་འཛིན་གྲྭ་ཐེན་ཅིན་དུ་གཉེར་བ།
ཉེ་ཆར་བདེ་འཇགས་ཐོན་སྐྱེད་དོ་དམ་ལ་ཤུགས་སྣོན་རྒྱག་པ་དང་། ཆབ་མདོ་གྲོང་ཁྱེར་གྱི་སྡོད་ཁང་འཛུགས་སྐྲུན་ཁྱབ་ཁོངས་ཀྱི་ལྟ་སྐུལ་དོ་དམ་གྱི་ནུས་ཕྱོད་ཆེ་རུ་གཏོང་བའི་བདེ་འཇགས་ལྟ་སྐུལ་གྱི་ཆེད་དོན་གསོ་སྦྱོང་འཛིན་གྲྭ་ཐེན་ཅིན་དུ་གཉེར་བ་རེད། ཆབ་མདོ་གྲོང་ཁྱེར་སྡོད་ཁང་འཛུགས་སྐྲུན་ཁོངས་གཏོགས་ཀྱི་སློབ་མ་19མཉམ་དུ་འཛོམས་ནས་དུས་ཡུན་གཟའ་འཁོར་གཅིག་རིང་ཤེས་བྱ་ཧུར་ཐག་སྦྱོང་བ་དང་རང་ཉིད་ཀྱི་རྩལ་ནུས་ལ་ཞུན་བརྡར་སྤྲོས་རྒྱུ་ཡིན་པ་རེད།
སློབ་སྦྱོང་གི་གོ་སྐབས་བཟང་པོ་དེ་འདྲའི་འོག་སློབ་མ་ཚོས་རིགས་པའི་གཞུང་ལུགས་ཀྱི་འཆད་ཁྲིད་དང་། ཡུལ་དངོས་སུ་རྟོག་ཞིབ། ཚོགས་ཆུང་གི་བགྲོ་གླེང་སོགས་ཚུད་པའི་བཀོད་སྒྲིག་ཞིབ་ཚགས་ཀྱི་སློབ་ཁྲིད་བྱེད་སྒོ་རབ་དང་རིམ་པར་ཞུགས་ཏེ། རིགས་པའི་གཞུང་ལུགས་ལ་ངོས་འཛིན་སྔར་བས་ཟབ་ཏུ་གཏོང་བ་དང་ལས་སྒོའི་འཇོན་ཐང་ཆེ་རུ་གཏོང་རྒྱུ་ཡིན་པ་རེད། ཚང་མས་ལས་གནས་ཐོག་ལོག་རྗེས་ལས་ཀ་ཧུར་ཐག་བྱས་ནས་གསོན་ཤུགས་ཀྱིས་ཁེངས་པའི་ཆབ་མདོ་གྲོང་ཁྱེར་གྱི་ཆེད་དུ་རང་ཉིད་ཀྱི་སྟོབས་ཤུགས་སྐྱེས་སུ་འབུལ་གྱི་ཡིན་ཞེས་གཅིག་མཇུག་གཉིས་མཐུད་ཀྱིས་བརྗོད་པ་རེད།