“རང་གི་ཕ་མར་བསྙེན་བཀུར་བྱེད་པ་བཞིན་གཞན་གྱི་ཕ་མ་ལའང་བརྩི་བཀུར་ཞུ་དགོས” “དབུ་དཀར་གྱི་རླབས་རྒྱུན”དང་བསྟུན་ནས་རྒན་རྒོན་ཚོ་བདེ་སྐྱིད་ཀྱི་ཚེ་མཇུག་ལ་ཇི་ལྟར་རོལ་བ་དང་མཛེས་སྡུག་ལྡན་པའི་འཚོ་བར་ལོངས་སྤྱོད་ཇི་ལྟར་བྱེད་པ་དེ་ཁྱིམ་ཚང་ཚང་མའི་བསམ་འདུན་ཞིག་ཏུ་གྱུར་ཡོད་པ་མ་ཟད། སྤྱི་ཚོགས་ཡོངས་ཀྱིས་ཐུན་མོང་ཐོག་འབད་བརྩོན་བྱེད་པའི་དམིགས་ཚད་ཅིག་ཏུའང་གྱུར་ཡོད། ཉེ་བའི་ལོ་ཤས་རིང་། ལྷ་ས་གྲོང་ཁྱེར་གྱིས་རྒན་རྒོན་ཚོའི་དགོས་མཁོ་དང་རེ་སྒུག་ལ་དམིགས་ནས་རྒན་གསོའི་ཞབས་ཞུའི་མ་ལག་ཟམ་མི་ཆད་པར་འཐུས་སྒོ་ཚང་དུ་གཏོང་བ་དང་། རྒན་གསོའི་ཞབས་ཞུ་མཁོ་སྤྲོད་ལེགས་སུ་གཏོང་བ། རྒན་གསོའི་ཞབས་ཞུ་ཁྱབ་རྒྱ་ཆེ་རུ་གཏོང་བ། རྒན་གསོའི་ཞབས་ཞུའི་སྤུས་ཚད་མཐོ་རུ་གཏོང་བ་བཅས་བྱས་ནས་རྒན་རྒོན་རྣམས་ཚེ་མཇུག་བདེ་སྐྱིད་ལྡན་པའི་འཚོ་བ་སྐྱེལ་ཐུབ་པ་བྱས་ཡོད།

རྒན་འཕྲོད་སྒྱུར་བཀོད་ཀྱིས་ཁྱིམ་སྡོད་རྒན་གསོ་དེ་བས་བློ་བདེ་རུ་བཏང་བ།

འོ་བརྒྱལ་ཐང་སྡེ་ཁུལ་གྱི་དམངས་སྲིད་ཆེད་བསྐོས་པ་ཟླ་བ་ལྷ་མོས་ངོ་སྤྲོད་བྱས་པར་གཞིགས་ན། བགྲེས་སོང་རྣམ་རྒྱལ་འདི་ལོ་ལོ་78ལ་སླེབས་ཡོད་པ་དང་། ཚང་སྟོང་རྒན་རྒོན་ཞིག་ཡིན་ཞིང་། སྐབས་རེར་སྤུན་མཆེད་ཚོས་ལྟ་རྟོག་བྱེད་པ་ཕུད། རྣམ་ཀུན་ཁོང་གཅིག་པུར་འཚོ་བ་སྐྱེལ་གྱི་ཡོད། ལོ་ན་རིམ་བཞིན་རྒས་པ་དང་བསྟུན་ནས་ཁོང་གི་རྒྱུན་གཏན་གྱི་འཚོ་བའི་ཐད་སྟབས་བདེ་མེད་པར་གསང་སྤྱོད་དུའང་ལག་སྐྱོར་བསྒར་མེད་པས་བགྲེས་སོང་བརྡབ་ཉེན་ཆེན་པོ་ཡོད་པ་རེད།

འོ་བརྒྱལ་ཐང་སྡེ་ཁུལ་གྱི་ལས་དོན་མི་སྣས་དུད་ཚང་དུ་འཚམས་འདྲི་བྱེད་རིང་གནས་ཚུལ་དེ་ཤེས་རྟོགས་བྱུང་ཞིང་། དེ་རྗེས་འབྲེལ་ཡོད་སྡེ་ཚན་དང་འབྲེལ་བ་ཧུར་ཐག་བྱས་ནས་འདི་ལོའི་ཟླ་7པར་ལྷ་ས་གྲོང་ཁྱེར་ཁྲེང་ཀོན་ཆུས་དམངས་སྲིད་ཅུས་ཀྱིས་རྒན་རྒོན་རྣམ་རྒྱལ་གྱི་ཁྱིམ་སྡོད་ཁོར་ཡུག་ལ་ས་གནས་ས་ཐོག་ཏུ་དཔྱད་དཔོག་བྱས་ཏེ་རྒན་རྒོན་གྱི་དགོས་མཁོ་ཤེས་རྟོགས་གསལ་པོ་བྱས་རྗེས་རྣག་ཐོག་གཙག་འཁེལ་གྱིས་ཁྱིམ་སྡོད་ཀྱི་རྒན་འཕྲོད་སྒྱུར་བཀོད་ལས་དོན་ལ་སྐུལ་འདེད་བཏང་ཡོད།

གསར་འགོད་པར་ཤེས་རྟོགས་བྱུང་བར་གཞིགས་ན། ལྷ་ས་གྲོང་ཁྱེར་དམངས་སྲིད་སྡེ་ཚན་གྱིས་ཁང་པའི་འགྲོ་ལམ་དང་། སྡོད་ཁང་། ཐབ་ཚང་། གསང་སྤྱོད་སོགས་འཚོ་བའི་ཁུལ་དང་དེ་བཞིན་ཁྱིམ་ཆས་བཀོད་སྒྲིག འཚོ་བའི་རམ་འདེགས་ཡོ་བྱད་སོགས་ལེགས་སྒྲིག་གམ་ཡང་ན་སྒྱུར་བཀོད་ངེས་ཅན་བྱས་ནས་རྒན་རྒོན་གྱི་འཚོ་བའི་གོམས་གཤིས་དང་འཚམ་པར་བྱས་ཡོད།

ད་ཆ་བགྲེས་སོང་རྣམ་རྒྱལ་གྱི་གསང་སྤྱོད་ནང་ལག་སྐྱོར་བསྒར་ཡོད་པ་མ་ཟད། ཁྱིམ་དུ་གསོ་རླུང་གཏོང་ཆས་དང་། ཛ་དྲག་གི་སྐྱོབ་རོགས་འབོད་ཆས། དུ་ཚོར་ཉེན་བརྡ་གཏོང་ཆས་སོགས་ཀྱང་སྒྲིག་སྦྱོར་བྱས་ཡོད། “རྒན་རྒོན་ལ་ཁྱིམ་དུ་ཛ་དྲག་གི་གནས་ཚུལ་འཕྲད་ཚེ་བརྡ་གཏོང་འཕྲུལ་ཆས་མནན་ཆོག་གི་ཡོད། བརྡ་གཏོང་འཕྲུལ་ཆས་ཀྱི་བརྡ་གྲགས་མ་ཐག་ང་ཚོའི་དྲ་མིག་གི་ལས་དོན་མི་སྣ་འཕྲལ་མར་རྒན་རྒོན་གྱི་ཁྱིམ་དུ་བསྐྱོད་ཀྱི་ཡོད”ཟླ་བ་ལྷ་མོས་རྒན་འཕྲོད་སྒྱུར་བཀོད་ཆུང་ངུ་བྱས་པ་བརྒྱུད་རྒན་རྒོན་ཚོའི་འཚོ་བའི་དཀའ་གནད་ཐག་གཅོད་ཏན་ཏིག་ཐུབ་ཡོད་པས་བགྲེས་སོང་རྣམ་རྒྱལ་གྱིས་ཁྱིམ་སྡོད་རྒན་གསོའི་སྟབས་བདེ་དང་དྲོ་སྐྱིད་ཚོར་ཐུབ་པ་བྱུང་ཡོད་ཅེས་གསར་འགོད་པར་བཤད།

“བརྩེ་སེམས་ཟ་ཁང”ཡག་པོ་གཉེར་ནས་རྒན་རྒོན་ཚོའི་ཟས་སྤྱོད་ཐད་རམ་འདེགས་བྱེད་པ།

“ངའི་བུ་ནམ་རྒྱུན་ལས་བྲེལ་ཆེན་པོ་འདུག ང་དང་བཟའ་ཟླ་ལོ་ན་རྒས་པ་དང་བསྟུན་ནས་གཟུགས་པོ་ཡག་པོ་མེད་པ་མ་ཟད། འགྲོ་སྐྱོད་བྱེད་པར་ཡང་སྟབས་བདེ་མེད་པས་ཁ་ལག་བཟོ་ཁག་པོ་འདུག”ལྷ་ས་གྲོང་ཁྱེར་ཁྲེང་ཀོན་ཆུས་གྲྭ་བཞི་ཁྲོམ་གཞུང་གྲྭ་བཞི་གྲོང་གསར་སྡེ་ཁུལ་དུ་སྡོད་པའི་བགྲེས་སོང་རྡོ་རྗེས་སྒོ་རྩའི“བརྩེ་སེམས་ཟ་ཁང”ལ་བསྔགས་བརྗོད་ཚད་མེད་བྱེད་བཞིན་དུ“སྡེ་ཁུལ་དུ‘བརྩེ་སེམས་ཟ་ཁང’བཙུགས་པ་ནས་བཟུང་ང་དང་བཟའ་ཟླའི་ཁ་ལག་ཐད་སེམས་ཁྲལ་གང་ཡང་བྱེད་དགོས་ཀྱི་མི་འདུག ཉིན་ལྟར་ཚལ་སོས་པ་ཡོད་པའི་ཁར་ལྷད་མེད་པས་ཧ་ཅང་སྟབས་བདེ་པོ་འདུག”ཅེས་བཤད།

ཉིན་ཤས་གོང་གསར་འགོད་པར་གྲྭ་བཞི་གྲོང་གསར་སྡེ་ཁུལ་གྱི“བརྩེ་སེམས་ཟ་ཁང”དུ་སྐྱོད་སྐབས་ཟ་ཁང་གི་ཁོར་ཡུག་གཙང་ཞིང་གྲལ་འགྲིག་ལ་ཁ་ལག་གི་དྲི་ཞིམ་འཐུལ་ཡོང་གི་འདུག དགུང་ཟས་བཟའ་རིང་རྒན་རྒོན་ཚོ་མི་གཉིས་རེ་གསུམ་རེ་བྱས་ནས་ཁ་ལག་ཟ་ཞོར་དང་ཁ་བརྡ་གློད་ཞོར་གདོང་ནས་དགའ་སྤྲོའི་འཛུམ་མདངས་འཕྱུར་བཞིན་མཆིས། འདི་ལོའི་ལོ་སྟོད་དུ་གྲྭ་བཞི་གྲོང་གསར་སྡེ་ཁུལ་དང་ཚ་རོང་ཚང་སྲོལ་རྒྱུན་ཇ་ཁང་གིས་དེ་སྔའི་བོགས་གཏོང་གན་རྒྱའི་རྨང་གཞིའི་ཐོག་མཉམ་ལས་བྱས་ཏེ“གྲོང་གསར་གྱི་བརྩེ་སེམས། རིན་མེད་ཀྱི་ཞལ་ལག”ཅེས་པའི་སྡེ་ཁུལ་གྱི“བརྩེ་སེམས་ཟ་ཁང”བཏོད་ནས་སྡེ་ཁུལ་གྱི་གྲོང་མི་དང་ལྷག་པར་དུ་རྒན་རྒོན་ཚོར་དངོས་དངོས་རྗེན་རྗེན་གྱི་སྟབས་བདེ་བསྐྲུན་ཡོད། “ཟ་ཁང་གི་སྒོ་ཕྱེ་བ་ནས་བཟུང་ང་ཚོས་ཁོངས་གཏོགས་ཁུལ་གྱི་དབང་པོ་སྐྱོན་ཅན་དང་། མ་མཐའི་འཚོ་བ་འགན་ལེན་གྱི་དུད་ཚང་། མི་ཧྲེང་རྒན་རྒོན། གཞིས་ལུས་བྱིས་པ་བཅས་ལ་རིན་མི་དགོས་པའི་ཁ་ལག་མཁོ་འདོན་བྱེད་ཀྱི་ཡོད་པ་མ་ཟད། གྲོང་མིའི་ཁྱིམ་དུ་བསྐྱོད་ནས་གྲལ་བཤེར་བྱས་ཏེ་རིན་པ་སྤྲོད་མི་དགོས་པའི་གཱ་སྤྲད་ནས་རྒན་རྒོན་དེ་བས་མང་བ་ཟ་ཁང་དུ་ཡོང་བའི་དགའ་བསུ་ཡང་ཞུ་གི་ཡོད། གལ་སྲིད་འགྲོ་སྐྱོད་སྟབས་བདེ་མེད་པའི་རྒན་རྒོན་ཡོད་ཚེ་སྔ་སྣུར་ནས་སྒོ་རྩར་ཁ་ལག་སྐྱེལ་བའི་ཞབས་ཞུ་སྔོན་མངགས་བྱེད་ཆོག”“རྒན་རྒོན་ཚོས་ཟ་ཁང་དེ་རང་ཉིད་ཀྱི་ཁྱིམ་ལྟར་དུ་བརྩིས་ནས་ཁ་ལག་ཟ་བ་དང་ཅི་འཕྲོས་མོལ་འཕྲོས་བྱེད་པར་ཡོང་རྒྱུའི་རེ་བ་བྱེད་ཀྱི་ཡོད”ཅེས་གྲྭ་བཞི་གྲོང་གསར་སྡེ་ཁུལ་གྱི་འབྲེལ་ཡོད་འགན་འཁུར་བས་བཤད།

ཉིན་མོའི་ལྟ་སྐྱོང་ལྟེ་གནས། རྒན་རྒོན་ཚོའི་སྒོ་འགྲམ་གྱི“བདེ་སྐྱིད་ས་ཚུགས”

ཟླ་10ཚེས་12ཉིན་གྱི་སྔ་དྲོའི་ཆུ་ཚོད་11ཙམ་དུ་གསར་འགོད་པ་ལྷ་སའི་གྲོང་ཁུལ་གཙོ་བོར་གནས་པའི་ཁྲེང་ཀོན་ཆུས་ཚེ་སྨོན་གླིང་གི་རྒན་རྒོན་ཚོའི་ཉིན་མོའི་ལྟ་སྐྱོང་ལྟེ་གནས་ཀྱི་སྒོ་འཛུལ་མ་ཐག་དེ་གར་ཡོ་ག་སྦྱོང་བཞིན་པའི་རྒན་རྒོན་ཚོར་གསར་འགོད་པའི་ཡིད་དབང་རབ་ཏུ་འཕྲོག ཁོང་ཚོ་ཡོ་གའི་གདན་ཐོག་ཏུ་བསྡད་དེ་དགེ་རྒན་དང་མཉམ་དུ་ཡོ་ག་སྦྱོང་བཞིན་འདུག

བཟའ་བཏུང་ཞབས་ཞུའི་ཁུལ་དུ་རྒན་རྒོན་ཚོས་ཇ་མངར་མོ་འཐུང་བ་དང་ཁ་ཟས་ཟ་བཞིན་ཕན་ཚུན་ཅི་འཕྲོས་མོལ་འཕྲོས་བྱེད་བཞིན་འདུག “ཉིན་མོའི་ལྟ་སྐྱོང་ལྟེ་གནས་ཁྱིམ་དང་ཐག་ཉེ་བས་ཧ་ཅང་སྟབས་བདེ་པོ་འདུག ལྟ་སྐྱོང་ལྟེ་གནས་སུ་སླེབས་པ་ནས་བཟུང་ངས་གྲོགས་པོ་གསར་པ་མང་པོ་ཞིག་ངོ་ཤེས་བྱུང་། འདི་གར་ཚང་མས་ཅི་འཕྲོས་མོལ་འཕྲོས་དང་རོལ་རྩེད་ལ་རོལ་བཞིན་ཡོད་པ་མ་ཟད། ཉིན་ལྟར་སྣ་མང་ཕུན་སུམ་ཚོགས་པའི་བྱེད་སྒོ་ཡང་ཡོད་པས་ཚེ་མཇུག་གི་འཚོ་བ་ཧ་ཅང་སྐྱིད་པོ་འདུག”ཅེས་ལྷ་ས་གྲོང་ཁྱེར་ཁྲེང་ཀོན་ཆུས་སྐྱིད་རས་སྡེ་ཁུལ་དུ་སྡོད་པའི་སྒྲོལ་མ་གཡང་འཛོམས་ཀྱིས་གསར་འགོད་པར་དེ་ལྟར་བཤད། འདི་ལོ་ལོ་77ལ་སླེབས་པའི་སྒྲོལ་མ་གཡང་འཛོམས་ནི་ཚེ་སྨོན་གླིང་གི་ཉིན་མོའི་ལྟ་སྐྱོང་ལྟེ་གནས་ཀྱི་གྲོགས་པོ་རྙིང་པ་ཞིག་ཡིན་ཞིང་། དེ་གར་ཁོང་གིས་ལྟེ་གནས་ནས་མཁོ་འདོན་བྱས་པའི་ཕྱོགས་ཡོངས་ཀྱི་ཞབས་ཞུ་ལོངས་སུ་སྤྱོད་བཞིན་སྣ་མང་ཕུན་སུམ་ཚོགས་པའི་རོལ་རྩེད་བྱེད་སྒོར་ཞུགས་ནས་འཚོ་བ་ཧ་ཅང་སྐྱིད་པོ་ཞིག་སྐྱེལ་བཞིན་ཡོད།

ཉིན་མོའི་ལྟ་སྐྱོང་ལྟེ་གནས་ཀྱིས་རིན་པ་དམའ་བའམ་རིན་པ་སྤྲོད་མི་དགོས་པར་ཁྲེང་ཀོན་ཆུས་ཀྱི་ལོ་60ཡན་གྱི་ལོ་ན་མཐོ་བའི་རྒན་རྒོན་དང་། ཁེར་ཧྲེང་ཚང་སྟོང་རྒན་རྒོན། དབང་པོ་སྐྱོན་ཅན་རྒན་རྒོན། གཟིགས་སྐྱོང་བྱ་ཡུལ་རྒན་རྒོན། མ་མཐའི་འཚོ་བའི་འགན་ལེན་རྒན་རྒོན། ཡོང་འབབ་དམའ་བའི་རྒན་རྒོན་བཅས་དང་། དེ་བཞིན་ཁོངས་གཏོགས་ཁུལ་གྱི་ཉིན་མོར་ལྟ་སྐྱོང་བྱེད་དགོས་པའི་རང་སྐྱ་འཕེར་བ་དང་། རང་སྐྱ་ཕྲན་བུ་འཕེར་བ། ནུས་པ་ཤོར་བ་བཅས་ཀྱི་རྒན་རྒོན་ལ“ཉིན་མོའི་ལྟ་སྐྱོང་དང་ཁྱིམ་སྡོད་ཟུང་འབྲེལ”གྱི་འཚོ་བའི་ལྟ་སྐྱོང་དང་། རྒན་ཕན་རྒན་སྐྱོར། སེམས་གསོ་གཏོང་བ་སོགས་ཀྱི་གཅིག་འཐུས་རྣམ་པའི“5+N”ཞབས་འདེགས་ཞུ་གི་ཡོད།

རྒན་རྒོན་གྱི་ཉིན་མོའི་ལྟ་སྐྱོང་ལྟེ་གནས་ནི་རྒན་གསོའི་ཞབས་ཞུའི་སྤུས་ཚད་མཐོར་གཏོང་ལ་སྐུལ་འདེད་གཏོང་བའི་དམངས་ཕན་འདུ་འགོད་ཅིག་ཡིན་ཞིང་། ཆེད་ལས་ཅན་དང་གཉེན་ཉེའི་ཞབས་ཞུ་བྱས་པ་བརྒྱུད། རྒན་རྒོན་ཚོར་རྒས་དུས་བརྟེན་ས་ཡོད་པ་དང་། རྒས་དུས་འཚོ་རྟེན་ཡོད་པ། རྒས་དུས་སེམས་པ་སྐྱིད་པ་བཅས་མངོན་འགྱུར་ཐུབ་ཡོད། ཉེ་བའི་ལོ་ཤས་རིང་། ལྷ་ས་གྲོང་ཁྱེར་གྱིས་རྒན་རྒོན་གྱི་རྒན་གསོའི་ཞབས་ཞུའི་དགོས་མཁོར་དམིགས་ནས་རིམ་པ་མང་བའི་རྒན་གསོའི་ཞབས་ཞུའི་མ་ལག་འཐུས་སྒོ་ཚང་དུ་བཏང་སྟེ། རྒན་རྒོན་གྱི་ཉིན་མོའི་ལྟ་སྐྱོང་ལྟེ་གནས་དེ་རྒན་རྒོན་ཚོའི་སྒོ་འགྲམ་གྱི“བདེ་སྐྱིད་ས་ཚིགས”ཤིག་ཏུ་ཧུར་ཐག་བཏོད་ནས་རྒན་རྒོན་དེ་བས་མང་བས་རང་ཁྱིམ་གྱི་སྒོ་འགྲམ་དུ་དེ་བས་སྤུས་ལེགས་དང་དེ་བས་ཤ་ཚ་བའི་ཞབས་ཞུ་ལོངས་སྤྱོད་ཀྱིས་བདེ་སྐྱིད་ཀྱི་ཚེ་མཇུག་ལ་རོལ་ཐུབ་པ་བྱས་ཡོད།