རྒྱལ་ཁབ་མང་པོའི་རིགས་གཅིག་མཁས་ཅན་དང་མཁས་དབང་གིས།
སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་ལ་སྐུལ་འདེད་གཏོང་བར་ཐབས་ཇུས་བཏོན་པ།
ཤིན་ཧྭ་གསར་འགྱུར་ཁང་ཤིས་ཨན་ནས་གློག་འཕྲིན་འབྱོར་གསལ། ཚེས་14ཉིན་གྱི་ཕྱི་དྲོ། སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་གྱི་བགྲོ་གླེང་ཚོགས་འདུ་ཧྲའན་ཤིས་ཤིས་ཨན་དུ་འཚོགས་ཤིང་། རྒྱལ་ཁབ་མང་པོའི་ཇུས་འདོན་ཚོགས་པའི་མཁས་དབང་གིས་མིག་སྔའི་དུས་བབ་འོག་སྲིད་ཇུས་འབྲེལ་གཏུག་ལ་ཤུགས་སྣོན་རྒྱག་པ་དང་། རྒྱལ་སྤྱིའི་མཉམ་ལས་ཟབ་ཏུ་གཏོང་བ། སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་ལ་སྐུལ་འདེད་གཏོང་བ་བཅས་ཀྱི་ཐད་ཐབས་འདོན་ཇུས་འབུལ་བྱས་ཡོད་པ་རེད།
ལོ་11གི་རིང་། “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དེ་དེང་སྐབས་འཛམ་གླིང་དུ་དགའ་བསུ་ཆེ་ཤོས་ཐོབ་པའི་རྒྱལ་སྤྱིའི་སྤྱི་པའི་ཐོན་རྫས་དང་གཞི་ཁྱོན་ཆེ་ཤོས་ཀྱི་རྒྱལ་སྤྱིའི་མཉམ་ལས་ལས་སྟེགས་ཤིག་ཏུ་འཕེལ་རྒྱས་ཕྱིན་ཡོད། ཚོགས་ཞུགས་སྐུ་མགྲོན་གྱིས་དེང་སྐབས་འཛམ་གླིང་གི་གནས་བབ་ལ་འཕོ་འགྱུར་གཏིང་ཟབ་འགྲོ་བཞིན་ཡོད་པ་དང“རྒྱུད་གཅིག་ལམ་གཅིག”གི་གྲོས་འགོས་ཐུན་མོང་ཐོག་རྒྱལ་ཁབ་ཀྱི་དཔལ་འབྱོར་འཕེལ་རྒྱས་ཀྱི་གཏིང་ཤུགས་སྐུལ་སློང་དང་། མཉམ་ལས་ཀྱི་འཕར་གཞི་གསར་པ་སྐྱེད་སྲིང་། སྒོ་དབྱེ་རྣམ་པའི་འཛམ་གླིང་གི་དཔལ་འབྱོར་གཏོད་རྒྱུར་སྐུལ་འདེད་གཏོང་བ་བཅས་ལ་ཕན་ཐོགས་ཡོད་པའི་ངོས་འཛིན་བྱས་པ་རེད།
ཨ་རིའི་ལོ་ངོ་སྟོང་གི་འཆར་གཞིའི་ཇུས་འདོན་ཚོགས་པ་ཨེ་ཤེ་ཡ་ལྷོ་མའི་རྒྱང་ལྟ་དྲ་རྒྱའི་མཐོ་རིམ་ཞིབ་འཇུག་པ་དང་ལག་བསྟར་ཏུང་ཧྲི་གཅིག་ལྕོགས་ཡིན་པའི་ཨ་སང་ཅཱ·ཨ་པེ་ཡཱ་ཀུའུ་ན་སའེ་ཁེ་ལཱ་ཡིས“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོས་སི་རི་ལན་ཁ་དང་མཐའ་འཁོར་རྒྱལ་ཁབ་ལ་ཐེབས་པའི་ཤུགས་རྐྱེན་ཐད་ཞིབ་འཇུག་བྱེད་པར་ཡུན་རིང་གཞོལ་ཡོད། ཁོང་གིས། ཀྲུང་གོས་སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་ལ་རྒྱབ་སྐྱོར་བྱེད་པའི་བྱ་སྤྱོད་བརྒྱད་ཀྱིས་སི་རི་ལན་ཁར་དཔྱད་གཞིར་འཛིན་ས་ནུས་ལྡན་ཞིག་མཁོ་འདོན་བྱས་ཡོད། མཉམ་སྐྲུན་རྒྱལ་ཁབ་ཀྱིས་མི་རྩ་བར་འཛིན་པའི་དེང་རབས་ཅན་འཛུགས་སྐྲུན་ལ་མུ་མཐུད་གཞོལ་ནས་ཚོང་དོན་མཉམ་ལས་དང་། མི་ཆོས་རིག་གནས། གསར་གཏོད་སྒྱུར་བཅོས་སོགས་ཀྱི་ཐད་གྲུབ་འབྲས་གསར་པ་ཐོབ་རྒྱུའི་རེ་སྒུག་བྱེད་ཀྱི་ཡོད་ཅེས་བརྗོད།
མ་ལེ་ཞི་ཡའི་ཨེ་ཤེ་ཡ་གསར་པའི་འཐབ་ཇུས་ཞིབ་འཇུག་ལྟེ་གནས་ཀྱི་ལས་འཛིན་དཔོན་ཞུས་ཆིང་ཆི་ཡིས། ཀྲུང་གོས་མཉམ་སྐྲུན་རྒྱལ་ཁབ་ལ“སྦྲེལ་མཐུད་དམ་ཟབ”བྱེད་ཤུགས་ཆེ་རུ་གཏོང་རོགས་དང་གོ་ལ་ཧྲིལ་པོའི་སྒུལ་བདེའི་དྲ་རྒྱ་མགྱོགས་མྱུར་རིམ་སྤོར་ལ་སྐུལ་འདེད་གཏོང་རོགས་བྱས་པ་མ་ཟད། མཉམ་སྐྲུན་རྒྱལ་ཁབ་དང་མཉམ་དུ་མི་ཐབས་རིག་ནུས་དང་། གྲངས་གཞི་ཆེན་མོ། སྤྲིན་རྩིས་སོགས་ཁྱབ་ཁོངས་ཀྱི་མཉམ་ལས་ལའང་ཤུགས་སྣོན་བརྒྱབ་སྟེ་ཕན་ཚུན་ཡིད་ཆེས་དང་མཉམ་དུ་བཅོས་སྐྱོང་བྱེད་པའི་གོ་ལ་ཧྲིལ་པོའི་གྲངས་འཛིན་བཅོས་སྐྱོང་མ་ལག་ཐུན་མོང་ཐོག་བསྐྲུན་ཡོད་ཅེས་བརྗོད། “དེ་དང་ཆབས་ཅིག་ཀྲུང་གོའི་གློག་བརྙན་བརྙན་འཕྲིན་དང་། རོལ་རྩེད། རོལ་དབྱངས། རྩོམ་རིག་བཅས་འཛམ་གླིང་རྒྱལ་ཁབ་ཁག་ཏུ་བརྒྱུད་སྤེལ་བྱས་ནས་རིག་གནས་སྤེལ་རེས་ཀྱི་ཐབས་ལམ་གསར་པ་གཏོད་བཞིན་ཡོད”ཅེས་ཞུས་ཆིང་ཆི་ཡིས་བརྗོད།