ཟླ་10པའི་ཐོ་རེངས་ཤིག་ལ། ཝེ་ཐེ་ནམ་གྱི་རྒྱལ་ས་ཧ་ནོ་དབྱིའི་ཏུང་དབྱིན་མེ་འཁོར་བབས་ཚུགས་སུ་གློག་འོད་རབ་ཏུ་འཚེར་བ་དང་འདེགས་འཁོར་ཕར་འགྲོ་ཚུར་འོང་བྱས་ཏེ་ཀྲུང་ཝེ་དུས་གཏན་མེ་འཁོར་ཐོག་དོས་སྒམ་རེ་རེ་བཞིན་བླུགས་རྗེས་ཤིང་ཆ་ཏུན་500ལྷག་ཙམ་བླུགས་པའི་ཆེད་གཏོང་མེ་འཁོར་ཀྲུང་གོའི་ཀོང་ཤིས་སུ་སྐྱོད་པའི་དུང་བརྡ་གྲགས།

དེ་ནི་ཀོང་ཤིས་ཁྲུང་ཙོ་ལི་ཝུན་ཤོག་འདམ་ཐོན་རྫས་ཚད་ཡོད་ཀུང་སིས་ཝེ་ཐེ་ནམ་གྱི་ལྷོ་རྒྱུད་ནས་ཉོས་པའི་ཤོག་བཟོའི་མ་བཅོས་རྒྱུ་ཆ་རེད། ཝེ་ཐེ་ནམ་རྒྱལ་སྤྱིའི་སྐམ་སའི་གྲུ་ཁ་གཉེར་སྐྱོང་མ་རྐང་ཀུང་སིའི་ཏུང་ཧྲི་ཀྲང་ཀྲང་ཚུན་ཝུའེ་ཡིས“དེ་སྔ་དུས་གཏན་མེ་འཁོར་མང་པོ་ཞིག་ནི་དངོས་ཟོག་ཙག་ཙིག་མཉམ་དུ་བླུགས་པའི་ཟོག་འདྲེན་མེ་འཁོར་ཡིན་མོད། ད་ཆ་དུས་གཏན་མེ་འཁོར་གྱི་ཟོག་སྒྲོམ་མང་པོ་ཞིག་དངོས་ཟོག་སྣ་ཁ་གཅིག་ཡིན་པ་མ་ཟད། ང་ཚོས་ད་དུང་ཞིང་ལས་ཐོན་རྫས་སོགས་ཀྱི་ཆེད་གཏོང་མེ་འཁོར་སྣ་ཚོགས་བཀོད་སྒྲིག་ཀྱང་བྱས་ཡོད”ཅེས་བརྗོད།

ཟླ་ཤས་རིང་། ཀྲང་ཚུན་ཝུའེ་ཡིས་མི་རིང་བར་གཏོང་ཉེར་ཡོད་པའི་བེ་ཏ་སོས་པའི་ཆེད་གཏོང་མེ་འཁོར་ཝེ་ཐེ་ནམ་ལྷོ་རྒྱུད་ཀྱི་བེ་ཏའི་ཐོན་ཁུལ་གཙོ་བོར་ཐེངས་མང་བསྐྱོད་ཡོད། འདི་ལོའི་ཟླ་8པར། ཀྲུང་ཝེ་ཕྱོགས་གཉིས་པོས་ཝེ་ཐེ་ནམ་གྱི་བེ་ཏ་སོས་པ་ཀྲུང་གོར་ཕྱིར་གཏོང་བྱེད་པའི་འབྲེལ་ཡོད་གྲོས་ཆོད་ལ་མིང་རྟགས་བཀོད་པས་ཝེ་ཐེ་ནམ་གྱི་བེ་ཏ་སོས་པ་ཀྲུང་གོར་ཕྱིར་གཏོང་བྱེད་ཉེར་ཡོད་པ་རེད། “ཀྲུང་ཝེའི་དུས་གཏན་མེ་འཁོར་གྱི་འཁོར་སྐྱོད་ལས་སྟེགས་ཤིག་ཡིན་པའི་ངོས་ནས་ང་ཚོས་ཀྱང་ཝེ་ཐེ་ནམ་གྱི་བེ་ཏ་སོས་པ་ཀྲུང་གོར་ཕྱིར་གཏོང་ཐུབ་ཆེད་མྱུར་བགྲོད་འཁོར་ལམ་ཞིག་བསྐྲུན་རྒྱུའི་གྲ་སྒྲིག་བྱེད་བཞིན་ཡོད”

ཝེ་ཐེ་ནམ་ལྕགས་ལམ་སྤྱི་ཁྱབ་ཀུང་སིའི་མངའ་འོག་གི་ཝེ་ཐེ་ནམ་ལྕགས་ལམ་སྐྱེལ་འདྲེན་དང་ཚོང་དོན་མ་རྐང་ཀུང་སིའི་སྤྱི་ཁྱབ་ཅིང་ལི་གཞོན་པ་རོན་ཧོང་དབྱིན་གྱིས་ཤིན་ཧྭ་གསར་འགྱུར་ཁང་གི་གསར་འགོད་པར་ཀྲུང་ཝེའི་དུས་གཏན་མེ་འཁོར་2017ལོ་ནས་གཏོང་འགོ་ཚུགས་ཤིང་། དང་ཐོག་གཙོ་བོ་རྒྱུན་མཁོའི་དངོས་ཟོག་སྐྱེལ་འདྲེན་བྱེད་ཀྱི་ཡོད་པ་དང་ད་ཆ་དངོས་ཟོག་སྣ་ཁ་300ལྷག་ཙམ་བར་མང་དུ་ཕྱིན་ཡོད། ཝེ་ཐེ་ནམ་གྱིས་ཕྱིར་གཏོང་བྱས་པའི་ཐོན་རྫས་ནང་ཞིང་ལས་ཐོན་རྫས་དང་། གློག་རྡུལ་ཐོན་རྫས། འཁལ་འཐག་ཐོན་རྫས་སོགས་ཡོད་པ་དང་ཀྲུང་གོས་ཝེ་ཐེ་ནམ་ལ་སྐྱེལ་འདྲེན་གཙོ་བོ་བྱེད་པའི་ནང་ལས་སྣོན་བཟོ་སྐྲུན་ལས་རིགས་ལ་མཁོ་བའི་མ་བཅོས་རྒྱུ་ཆ་དང་འཛུགས་སྐྲུན་རྒྱུ་ཆ་སོགས་ཡོད་པ་རེད།

རོན་ཧོང་དབྱིན་གྱིས་ཀྲུང་ཝེའི་དབར་གྱི་དུས་གཏན་མེ་འཁོར་ཕྱོགས་གཉིས་དབར་ཕན་ཚུན་བཏང་ནས་ཝེ་ཐེ་ནམ་གྱི་དངོས་ཟོག་ཀྲུང་གོའི་ཞིང་ཆེན་དང་གྲོང་ཁྱེར་20ལྷག་ཙམ་ལ་དབོར་རྒྱུ་མ་ཟད། ཀྲུང་གོ་དང་ཡོ་རོབ་ཀྱི་དུས་གཏན་མེ་འཁོར་དང་མཉམ་དུ་ཨེ་ཤེ་ཡ་དབུས་མ་དང་ཡོ་རོབ་རྒྱལ་ཁབ་ཏུ་དབོར་རྒྱུ་རེད། ཀྲུང་གོའི་དངོས་ཟོག་ཝེ་ཐེ་ནམ་དུ་དབོར་བ་མ་ཟད། ད་དུང་ཝེ་ཐེ་ནམ་བརྒྱུད་ལོ་སི་དང་། ཐེ་ལན། ཁམ་ཕུ་ཁྲེ། མ་ལེ་ཞི་ཡ་སོགས་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་ཏུ་དབོར་རྒྱུ་རེད་ཅེས་ངོ་སྤྲོད་བྱས་པ་རེད།

རོན་ཧོང་དབྱིན་གྱིས“རྒྱལ་ཁབ་གཉིས་པོའི་ལྕགས་ལམ་སྡེ་ཚན་གྱི་དྲིལ་བསྒྲགས་ཁྱབ་གདལ་དང་དེ་བཞིན་ཞབས་ཞུའི་རྒྱབ་སྐྱོར་བྱས་མཐར་ཁེ་ལས་དེ་བས་མང་བས་ལྕགས་ལམ་སྐྱེལ་འདྲེན་གདམ་ག་བྱེད་ཀྱི་ཡོད། ཀྲུང་ཝེའི་དུས་གཏན་མེ་འཁོར་ཡོད་པ་ལས་དངོས་ཟོག་སྐྱེལ་འདྲེན་གྱི་དུས་ཚོད་ཐུང་དུ་དང་ཁེ་ལས་ཀྱི་མ་གནས་དམའ་རུ་ཕྱིན་ནས་རྒྱལ་ཁབ་གཉིས་པོའི་དབར་གྱི་ཚོང་དོན་འགྲོ་འོང་ལ་སྐུལ་འདེད་ནུས་ལྡན་ཐེབས་ཡོད”ཅེས་བརྗོད།

2017ལོར་རྒྱལ་ཁབ་ལྕགས་ལམ་ནན་ཉིང་ཅུས་ཀྱིས་ནན་ཉིང་ནས་ཧ་ནོ་དབྱིའི་བར་ས་ཁོངས་སྒྲོལ་བའི་དོས་སྒམ་གྱི་དུས་གཏན་མེ་འཁོར་ཐོག་མ་དེ་བདེ་བླག་ངང་བཏང་བ་རེད། མེ་འཁོར་གཏོང་འགོ་ཚུགས་མ་ཐག་ཟླ་རེར་ཐེངས་5རེ་ཡང་མི་གཏོང་བ་ནས་འདི་ལོའི་ཟླ་དང་པོ་ནས་བདུན་པའི་བར་ཟླ་རེར་གཏོང་མང་ཤོས་སུ་ཐེངས་3སླེབས་པའི་བར་ཀྲུང་ཝེའི་དུས་གཏན་མེ་འཁོར་གཏོང་མང་དུ་ཤུགས་ཆེན་ཕྱིན་ཡོད་པ་རེད། གྲངས་གཞི་ལས་མངོན་པར། ཟླ་9ཚེས་30ཉིན་བར། འདི་ལོ་ཀོང་ཤིས་ནས་གཏོང་འགོ་ཚུགས་པའི་ཀྲུང་ཝེའི་དུས་གཏན་མེ་འཁོར་གྱིས་དངོས་ཟོག་སྐྱེལ་འདྲེན་བྱེད་ཚད་ཚད་ལྡན་དོས་སྒམ་ཁྲི་1ལས་བརྒལ་ནས་ཚད་ལྡན་དོས་སྒམ་10380ཟིན་ཏེ་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད་པ་རེད།

2024ལོའི་ཟླ་དང་པོར། ཀྲུང་ཝེ་རྒྱལ་ཁབ་གཉིས་ཀྱི་ལྕགས་ལམ་ཀུང་སིས་ཀྲུང་ཝེའི་དུས་གཏན་མེ་འཁོར་གྱི་ལམ་ཚད་ཧྲིལ་པོའི་དུས་ཚོད་རེའུ་མིག་གྲོས་མོལ་བྱས་ནས་གཏན་འཁེལ་བྱས་ཏེ་སྐྱེལ་འདྲེན་དུས་ཚོད་ཐུང་དུ་ཤུགས་ཆེན་བཏང་ཡོད། ཀྲུང་གོའི་ནན་ཉིང་ལྷོ་ཚུགས་ནས་ཝེ་ཐེ་ནམ་གྱི་ཨན་ཡོན་བབས་ཚུགས་བར་གྱི་སྐྱེལ་འདྲེན་གྱི་དུས་ཡུན་ཆུ་ཚོད་40ལྷག་ཙམ་ནས་མགྱོགས་ཤོས་ཀྱི་ཆུ་ཚོད་14བར་ཐུང་དུ་ཕྱིན་པས། ཀྲུང་ཝེའི་དུས་གཏན་མེ་འཁོར་གྱི་སྐྱེལ་འདྲེན་ལས་ཆོད་མངོན་གསལ་དོད་པོས་ཆེ་རུ་ཕྱིན་ཡོད་པ་རེད།

རོན་ཧོང་དབྱིན་གྱིས། ཝེ་ཐེ་ནམ་སྲིད་གཞུང་དང་ལྕགས་ལམ་ཀུང་སིས་མེ་འཁོར་བབས་ཚུགས་དང་ཟོང་ར་སོགས་ལྕགས་ལམ་གྱི་རྨང་གཞིའི་སྒྲིག་བཀོད་སྔར་བས་འཐུས་སྒོ་ཚང་དུ་བཏང་སྟེ་ཀྲུང་གོའི་ལྕགས་ལམ་དང་སྦྲེལ་མཐུད་བྱེད་པར་ཤུགས་སྣོན་བརྒྱབ་ནས་རྒྱལ་ཁབ་གཉིས་པོའི་དབར་གྱི་སྐྱེལ་འདྲེན་ནུས་པ་ཆེ་རུ་གཏོང་རྩིས་ཡོད་ཅེས་བརྗོད།