ལྷ་སའི་གྲོང་ཁུལ་དོན་ནས་རྒྱལ་ལམ་318བརྒྱུད་ནུབ་ཏུ་སྤྱི་ལེ་120ཙམ་བསྐྱོད་ཚེ་ཡར་ཀླུང་གཙང་འགྲམ་གྱི་མངོན་གསལ་དོད་པའི“ཤེས་རིག་གི་དྲི་བསུང་འཐུལ་བའི་ཕ་ས”ཞེས་པའི་མཚོན་རྟགས་ཀྱི་བྱང་བུ་དེ་མཐོང་བ་ཙམ་གྱིས་མི་ཚོ་རྣམས་ལ་མཚར་སྣང་ཆེན་པོ་འཕེལ་ཐུབ།

ལམ་བུ་དེ་བརྒྱུད་སྙེ་མོ་རྫོང་ཐོན་པ་མཛེས་ལྗོངས་ཁུལ་དུ་སླེབས་སྐབས་ཚོན་ཁྲ་ཅན་གྱི་གྱང་རིས་ཆེན་པོ་ཞིག་ཏུ་བོད་སྤོས་བཟོ་བའི་རྣམ་པ་མངོན་པ་དང་མཁའ་རླུང་ཁྲོད་ནས་སྨན་རྩྭའི་དྲི་ཞིམ་འཐུལ་བཞིན་ཆུ་སྒྲ་དང་བཅས“ཏག་ཏག”ཅེས་པའི་སྒྲ་གྲགས་འོང་།

ལམ་ཀྱོག་ཅིག་བརྒྱུད་རྗེས་ཤང་ཤང་ཆུ་མོའི་ནང་གི་ཆུ་འཁོར་གྱིས་ཤུག་དུམ་དང་རྡོ་ལེབ་འདྲུད་དེ་རྡབ་དཀྲུག་ཐེབས་པ་ལས་ལྡུར་ལྡུར་ཆགས།

“ཐོན་ཆུའི་བརྒྱུད་དུ་ཆུ་འཁོར་216སྤེལ་མར་བསྐྲུན་པ་ལས‘ཆུ་འཁོར་གྱི་བར་ཁྱམས’ཤིག་གྲུབ་པ”དང་སྙེ་མོ་རྫོང་རིག་གནས་དང་ཡུལ་སྐོར་ཅུས་ཀྱི་མངོན་མིན་རིག་གནས་ཤུལ་བཞག་གི་འགན་འཁུར་བ་ཉི་མ་ཆོས་སྒྲོན་གྱིས“ཤུག་པའི་འདག་སྐྱོ་ནི་སྙེ་མོའི་བོད་སྤོས་བཟོ་བར་མེད་དུ་མི་རུང་བའི་ལྷུ་ཚིགས་ཤིག་རེད ‘ཆུ་འཁོར་བར་ཁྱམས’དེའང་ཡུལ་སྐོར་བས་སྙེ་མོའི་བོད་སྤོས་བཟོ་བའི་བཟོ་རྩལ་གྱི་ལས་དོན་ཤེས་རྟོགས་བྱ་ཡུལ་ཞིག་རེད”ཅེས་བཤད།

ཆུ་འཁོར་གྱི་སྒྲ་དེ་ནི་ལོ་ཟླའི་ཁུར་གྱིས་དུད་པའི་རྒད་པོ་ཞིག་གིས་སྙེ་མོའི་བོད་སྤོས་ཀྱི་ལོ་རྒྱུས་གླེང་བ་དང་འདྲ། སྙེ་མོའི་བོད་སྤོས་ལ་ལོ་ངོ་1300ལྷག་ཙམ་གྱི་ལོ་རྒྱུས་ཡོད་པ་དང་2008ལོར་བོད་སྤོས་བཟོ་བའི་སྒྱུ་རྩལ་དེ་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མིང་གཞུང་དུ་བཅུག་ཡོད།

ཆུ་འཐག་དང་ཕན་ཚུན་མཛེས་རྒྱན་དུ་གྱུར་བ་ནི་བོད་བཟོའི་སྒོ་ར་དེ་དག་ཡིན་ཞིང་། སྒོ་ར་ཆུང་ངུ་ཞིག་གི་མདའ་གཡབ་སྟེང་སྐལ་བཟང་ཚེ་རིང་གིས་སྐྱིལ་ཀྲུང་དུ་བསྡད་དེ་ལག་གཡོན་མས་རྭ་ཅོ་བཟུང་བ་དང་གཡས་པའི་མཐེ་བོང་གིས་འདག་སྐྱོ་མནན་ནས་མྱུར་ཚད་སྙོམས་པོས་འགུལ་མ་ཐག་འདག་སྐྱོ་དེ་དག་ལས་སྦོམ་ཕྲ་སྙོམ་པའི་བོད་སྤོས་རེ་རེ་བཞིན་ཐོན།

རྣམ་ཀུན་ཡུལ་སྐོར་བས་ཀྱང་རྭ་ཅོ་བཟུང་ནས་ཚོད་ལྟ་བྱེད་མྱོང་བ་དང་། ཤུགས་ཚད་སྙོམས་པོ་མེད་ཚེ་སྦོམ་ཕྲ་མི་སྙོམས་པ། མྱུར་ཚད་སྙོམས་པོ་མ་བྱུང་ཚེ་ཆད་འགྲོ་གི་ཡོད། དེ་ལྟར་རང་ཉིད་ཀྱིས་ཚོད་ལྟ་བྱས་སྟབས་ཚང་མས་སྤོས་བཟོ་བའི་ལག་རྩལ་ལ་བསྔགས་བརྗོད་ཚད་མེད་བྱེད་བཞིན་ཡོད།

“ངས་ལོ་14ཡི་སྐབས་ཕ་མེས་ཚོའི་གམ་ནས་བོད་སྤོས་བཟོ་སྟངས་སྦྱངས་པ་དང་ལོ་32རིང་ལས་ཀ་འདིའི་རྒྱུན་བསྐྱངས་པ་ཡིན”ཞེས་སྐལ་བཟང་ཚེ་རིང་གིས་བཤད་པ་དང་ཁོང་གིས་ཡུལ་སྐོར་བས་དངོས་སུ་ཉམས་ལེན་བྱས་པ་ལས་སྙེ་མོའི་སྤོས་བཟོ་རྩལ་ལ་དེ་བས་རྒྱུས་མངའ་བྱུང་བ་དང་དེས་ན་སྙེ་མོའི་སྤོས་ལ་སྨན་རྒྱུ་མང་པོ་འདུས་པ་ནི་ཚང་མས་དེ་གདམ་ག་བྱེད་པའི་རྒྱུ་རྐྱེན་གཙོ་བོ་རེད་ཅེས་བཤད།

སྐལ་བཟང་ཚེ་རིང་གིས་རིམ་པ་དང་ཕན་ནུས་མི་འདྲ་བར་བརྟེན་ནས་སྤོས་ཀྱི་རྒྱུ་ཆར་ཁ་ཆེ་ཤ་སྐམ་དང་། སུག་སྨེལ། ཙན་དན། ཨ་གར་སོགས་སྨན་རྒྱུ་སྣ་ཚོགས་སྦྱོར་རྟ་བྱས་ཡོད། ལོ་མང་སྤོས་བཟོ་རིང་དུད་ཚང་ཚང་མས་ཉམས་མྱོང་གཞིར་བཟུང་རང་ཉིད་ཀྱི་ཐུན་མོང་མ་ཡིན་པའི་རྫས་སྦྱོར་བྱེད་སྟངས་གསོག་འཇོག་བྱས་པ་དང་སྦྱོར་རྟ་བྱེད་སྟངས་དེ་རིགས་ཁྱིམ་རྒྱུད་དུ་ངག་ཐོག་ནས་རྒྱུན་འཛིན་བྱས་ཡོད།

“ཁྱིམ་ཚང་ཚང་མའི་རྫས་སྦྱོར་བྱེད་སྟངས་མི་འདྲ་བར་བརྟེན་བོད་སྤོས་བཟོ་བར་གཅིག་གྱུར་གྱི་ཚད་གཞི་མེད་པའི་ཁར་སྙེ་མོའི་བོད་སྤོས་ཀྱི་སྙན་གྲགས་ཆེ་བར་བརྟེན་ཕྱི་ཕྱོགས་ཀྱི་བོད་སྤོས་མང་པོ་ཞིག་སྙེ་མོའི་སྤོས་ཡིན་ཁུལ་བྱེད་ཀྱི་ཡོད”ཅེས་སྙེ་མོ་རྫོང་རིག་གནས་དང་ཡུལ་སྐོར་ཅུས་ཀྱི་ཏང་ཙུའི་ཧྲུའུ་ཅི་ཤུའེ་ཡུང་གིས་བཤད་པ་དང“སྙེ་མོའི་སྤོས”ཀྱི་སྤུས་རྟགས་སྲུང་སྐྱོང་ཡག་པོ་བྱ་ཆེད་2021ལོར་སྙེ་མོ་རྫོང་གིས་སྲོལ་རྒྱུན་གྱི་སྙེ་མོའི་སྤོས་ཀྱི་གནའ་བོའི་རྫས་སྦྱོར་རིམ་སྤོར་བྱེད་པའི་རྣམ་གྲངས་རེ་ཞུ་ལེགས་གྲུབ་བྱུང་ནས་པེ་ཅིང་གྲོང་ཁྱེར་ཧྲུན་དབྱི་ཆུས་ཀྱི་རོགས་སྐྱོར་འོག་སྙེ་མོའི་སྤོས་ཚུད་པའི“སྙེ་མོའི་རྩེར་ཕུད་གསུམ”སོགས་སྲོལ་རྒྱུན་གྱི་སྒྱུ་རྩལ་བརྩམས་ཆོས་ཀྱི་པར་དབང་ཐོ་འགོད་བྱས་པ་རེད། འདི་ལོའི་ཟླ་3ཚེས་1ཉིན་ནས་བཟུང《བོད་སྤོས》ཀྱི་རྒྱལ་ཁབ་ཀྱི་ཚད་གཞི་དངོས་སུ་ལག་བསྟར་བྱས་པ་དང་བོད་སྤོས་ཐོན་ལས་འཕེལ་རྒྱས་ལ་གོ་སྐབས་གསར་པ་འཕྲད་ཡོད།

ཡུལ་སྐོར་བ་མང་དུ་ཕྱིན་པ་དང་། སྙན་གྲགས་ཆེ་རུ་ཕྱིན་པ། ཁྲོམ་རར་ཁས་ལེན་ཐོབ་པ་བཅས་ལག་ཤེས་སྒྱུ་རྩལ་དེར་བརྟེན་ནས་ཐོན་པའི་མང་ཚོགས་ཀྱི་འཚོ་བ་ཇེ་ཡག་ཏུ་ཕྱིན་ཡོད། ཉམས་དོད་པའི་ཐོག་སོ་ཉིས་ལྡན་གྱི་བོད་བཟོའི་ཁང་པའི་ནང་ཁྱིམ་སྤྱོད་གློག་ཆས་དང་ཁྱིམ་ཆས་སྣ་ཚོགས་གང་དགོས་དེ་འཛོམས་ཡོད་ཅིང་། སྒོ་རའི་ཕྱི་རོལ་དུ་ད་དུང་རླངས་འཁོར་ཆུང་གྲས་ལ་སོགས་བཞག་ཡོད། སྐལ་བཟང་ཚེ་རིང་གིས“དྲ་ཐོག་ཚོང་དོན་གྱི་ལས་སྟེགས་ལ་བརྟེན་ནས་བོད་སྤོས་བོད་ལྗོངས་ཙམ་མ་ཟད། ད་དུང་རྒྱལ་ནང་གི་ཞིང་ཆེན་མང་པོར་བྲིན་ཚོང་བྱེད་ཀྱི་ཡོད”ཅེས་བཤད།

སྙེ་མོ་རྫོང་གིས་ད་ཕན་ལོ་ཤས་རིང་བོད་སྤོས་རིག་གནས་ཀྱི་ཐོན་ལས་དེ་སྣེ་འདྲེན་ཐོན་ལས་དང་རྫོང་དར་དམངས་ཕྱུག་གི་ཀ་རྟེན་ཐོན་ལས་སུ་བརྩིས་པས། རྫོང་དེ་ཡོངས་སུ་བོད་སྤོས་མཉམ་ལས་ཁང་7དང་། བོད་སྤོས་ཁེ་ལས་2 བོད་སྤོས་ཐོན་ལས་གླིང་1བཅས་ཡོད་པ་རེད། འདི་ལོའི་ལོ་སྟོད་དུ་རྫོང་དེའི་བོད་སྤོས་ཀྱི་ཐོན་རྫས་རིན་ཐང་སྒོར་ཁྲི་2370ཙམ་ཟིན་ཡོད།