ཤིན་ཧྭ་གསར་འགྱུར་ཁང་པེ་ཅིང་ནས་ཟླ་10ཚེས་14ཉིན་གློག་འཕྲིན་འབྱོར་གསལ། ཟླ་10ཚེས་14ཉིན་གྱི་ཕྱི་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཞལ་ཆད་ལྟར་ཧིན་རྡུ་ཉི་ཞི་ཡའི་ཙུང་ཐུང་ཙུའོ་ཁོའོ་དང་ཞལ་པར་ཐོག་ནས་བཀའ་མོལ་གནང་བ་རེད།

ཞི་ཅིན་ཕིང་གིས་གསུངས་དོན། ཁྱེད་ཀྱིས་ཙུང་ཐུང་གི་འགན་བཞེས་ནས་ལོ་10ཡི་རིང་ཀྲུང་གོར་འཚམས་འདྲི་ཐེངས་8གནང་མྱོང་ཡོད། ང་དང་ཁྱེད་ཞལ་འཛོམས་ཐེངས་12བྱུང་སྟེ། རྒྱལ་ཁབ་གཉིས་པོའི་སྣེ་ཁྲིད་ནས་ལས་དབང་གཅིག་མཐུན་ཚོགས་པའི་ལེའུ་གསར་པ་མཉམ་དུ་རྩོམ་འགོ་ཚུགས་པ་དང་ཕྱོགས་ཡོངས་ནས་འཐབ་ཇུས་མཉམ་ལས་ཀྱི་རྣམ་པ་གསར་པ་བཏོད་ཡོད། ཁྱེད་ཀྱིས་ཀྲུང་ཧིན་རྒྱལ་ཁབ་གཉིས་པོའི་མཛའ་གྲོགས་བྱ་གཞག་ཆེད་ལེགས་སྐྱེས་གལ་ཆེན་ཕུལ་བར་ཀྲུང་གོ་ཕྱོགས་ཀྱིས་ཚད་མཐོའི་བསྔགས་བརྗོད་བྱེད་ཀྱི་ཡོད། ཧིན་རྡུ་ཉི་ཞི་ཡའི་སྐབས་གསར་པའི་སྲིད་གཞུང་གིས་ཀྲུང་གོར་འཛིན་པའི་མཛའ་གྲོགས་སྲིད་ཇུས་རྒྱུན་འཛིན་བྱས་ཏེ་ཀྲུང་ཧིན་རྒྱལ་ཁབ་གཉིས་པོའི་ལས་དབང་གཅིག་མཐུན་ཚོགས་པ་འཛུགས་རྒྱུ་ཆུ་ཚད་དེ་བས་མཐོ་བའི་ཕྱོགས་སུ་མུ་མཐུད་བསྐྱོད་པར་སྐུལ་འདེད་གཏོང་ཐུབ་པའི་ཡིད་ཆེས་ཡོད།

ཞི་ཅིན་ཕིང་གིས་ནན་བཤད་གནང་དོན། ཀྲུང་གོ་ཕྱོགས་ཀྱིས་ཧིན་རྡུ་ཉི་ཞི་ཡ་ཕྱོགས་དང“རྒྱུད་གཅིག་ལམ་གཅིག”སྤུས་ཚད་མཐོ་བའི་སྒོ་ནས་མཉམ་སྐྲུན་བྱེད་པ་དང་། ཅ་ཁར་ཐ་ནས་དབན་ལུང་བར་གྱི་མྱུར་བགྲོད་ལྕགས་ལམ་མུ་མཐུད་གཉེར་སྐྱོང་ཡག་པོ་བྱེད་པ། མཉམ་ལས་ཀྱི་བཀྲག་མདངས་འཚེར་ས་དེ་བས་མང་བ་གཏོད་པ་བཅས་བྱས་ནས་རྒྱལ་ཁབ་གཉིས་པོའི་མཉམ་ལས་ཀྱིས་རྒྱལ་ཁབ་གཉིས་པོའི་མི་དམངས་ལ་དེ་བས་ལེགས་པའི་ཕན་པ་བསྐྲུན་འདོད་ཡོད། སང་ལོ་ནི་དབན་ལུང་གྲོས་ཚོགས་འཚོགས་ནས་ལོ་70འཁོར་བའི་ལོ་ཡིན་ཞིང་། ཀྲུང་གོ་ཕྱོགས་ཀྱིས་ཧིན་རྡུ་ཉི་ཞི་ཡ་དང་མཉམ་དུ་ཞི་བདེ་མཉམ་གནས་ཀྱི་རྩ་དོན་དོན་ཚན་ལྔ་དང་དབན་ལུང་གི་སྙིང་སྟོབས་དར་སྤེལ་གཏོང་བ་དང་། གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཀྱི་མཐུན་སྒྲིལ་མཉམ་ལས་ལ་སྐུལ་འདེད་གཏོང་བ། རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཐུན་མོང་ཁེ་ཕན་སྲུང་སྐྱོང་བཅས་བྱས་ནས། ས་ཁུལ་དང་ཐ་ན་འཛམ་གླིང་གི་འཕེལ་རྒྱས་དང་། དར་རྒྱས། བརྟན་ལྷིང་བཅས་ལ་སྐུལ་སྤེལ་གཏོང་འདོད་ཡོད།

ཙུའོ་ཁོའོ་ཡིས་གསུངས་དོན། འདས་ཟིན་པའི་ལོ་10ཡི་རིང་། ང་དང་ཀྲུའུ་ཞི་ཞི་ཅིན་ཕིང་དབར་མཛའ་གྲོགས་ཀྱི་འབྲེལ་བ་ཟབ་མོ་བཙུགས་ཏེ་རྒྱལ་ཁབ་གཉིས་པོའི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་དང་ཁྱབ་ཁོངས་ཁག་གི་གཉིས་ཁེ་མཉམ་ལས་ལ་གྲུབ་འབྲས་གལ་ཆེན་ཐོབ་པར་སྣེ་ཁྲིད་བྱས་ཡོད། ཀྲུང་གོ་ཕྱོགས་ཀྱིས་ཧིན་རྡུ་ཉི་ཞི་ཡའི་དཔལ་འབྱོར་འཕེལ་རྒྱས་ལ་ལེགས་སྐྱེས་ཧུར་ཐག་ཕུལ་བར་ཐུགས་རྗེ་ཆེ་ཞུ་རྒྱུ་ཡིན་ལ། ཅ་ཁར་ཐ་ནས་དབན་ལུང་བར་གྱི་མྱུར་བགྲོད་ལྕགས་ལམ་དེ་ཕྱོགས་གཉིས་པོས“རྒྱུད་གཅིག་ལམ་གཅིག”མཉམ་སྐྲུན་བྱེད་པའི་མཉམ་ལས་ཀྱི་དཔེ་མཚོན་དུ་གྱུར་ཡོད། ཧིན་རྡུ་ཉི་ཞི་ཡའི་སྐབས་གསར་པའི་སྲིད་གཞུང་གི་འགོ་ཁྲིད་འོག་རྒྱལ་ཁབ་གཉིས་པོའི་འབྲེལ་བ་འཕེལ་རྒྱས་ཀྱི་དུས་བབ་བཟང་པོ་མུ་མཐུད་རྒྱུན་འཁྱོངས་ཐུབ་རྒྱུ་ཡིན་པ་ང་ལ་ཡིད་ཆེས་ཡོད།