ཚེས་11ཉིན། གུང་གཞོན་སྡེ་ཚོགས་ཀྲུང་དབྱང་དང་། སློབ་གསོ་པུའུ། རྒྱལ་ཡོངས་ལོ་ཆུང་བྱིས་པའི་ལས་དོན་ཨུ་ལྷན་བཅས་ཀྱིས་པེ་ཅིང་དུ་ཀྲུང་གོ་ལོ་ཆུང་གདོང་ལེན་རུ་ཁག་བཙུགས་ནས་ལོ་75འཁོར་བར་རྟེན་འབྲེལ་ཞུ་བའི་བཞུགས་མོལ་ཚོགས་འདུ་འཚོགས་པ་རེད། ཚོགས་འདུའི་ཐོག་ལོ་ཆུང་བྱིས་པ་དང་ལོ་ཆུང་གདོང་ལེན་རུ་ཁག་གི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། ཏང་གི་འགོ་ཁྲིད་འོག་གི་ཀྲུང་གོ་ལོ་ཆུང་བྱིས་པའི་ལས་འགུལ་གྱི་འཕེལ་རྒྱས་ལོ་རྒྱུས་ཀྱི་ལམ་བུ་དང་ལོ་ཆུང་གདོང་ལེན་རུ་ཁག་བཙུགས་ནས་ལོ་75སོང་རིང་གི་གཞི་རྩའི་ཉམས་མྱོང་ལ་ཕྱིར་མིག་བལྟས་པ་དང་། དུས་རབས་གསར་པ་དང་རྒྱང་ལམ་གསར་པའི་ལོ་ཆུང་གདོང་ལེན་རུ་ཁག་གི་ལས་དོན་དང་བྱ་གཞག་འཕེལ་རྒྱས་ལ་རྒྱང་ལྟ་བྱས་པ་རེད།

ཚོགས་འདུའི་ཐོག་ནན་བཤད་བྱས་དོན། རྒྱང་ལམ་གསར་པར་ལོ་ཆུང་གདོང་ལེན་རུ་ཁག་གིས་རྒྱལ་ཡོངས་ཀྱི་སློབ་གསོའི་ཚོགས་ཆེན་གྱི་དགོངས་དོན་ལག་བསྟར་གཏིང་ཟབ་བྱེད་པ་དང་། ཏང་གི་བྱ་གཞག་ལ་ཤུལ་འཛིན་མཁན་ཡོད་པའི་རྩ་བའི་ཇུས་ཆེན་དེར་གཞི་ཚུགས་པ། ལས་ཀ་གཙོ་བོར་དམིགས་པ་དང་རང་འགན་ཐེག་པ་འཁུར་ལེན་བཅས་བྱས་ནས། ཏང་ཆེད་མི་སྐྱོང་བའི་གཟི་བརྗིད་འགན་འཁྲི་དེ་བས་ལེགས་པོ་ཁུར་དགོས། ཆབ་སྲིད་ཀྱི་སྣེ་ཁྲིད་བྱེད་ཤུགས་ཆེ་རུ་བཏང་ནས་གཞོན་ནུ་ལོ་ཆུང་སློབ་མར་མར་ཁེ་སི་རིང་ལུགས་ཀྱི་དད་མོས་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དད་སེམས། ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་གདེང་ཚོད་བཅས་བརྟན་དུ་གཏོང་རྒྱུའི་སློབ་གསོ་ཁྲིད་སྟོན་བྱེད་དགོས། མི་སྣ་གསོ་སྐྱོང་གི་སྦྲེལ་ཐག་འགོ་ནས་མཇུག་བར་ཁྱབ་པར་བྱས་ཏེ་ལོ་ཆུང་གདོང་ལེན་རུ་མི་སྡེ་ཚོགས་དང་ཏང་ནང་ཞུགས་པའི་ཆབ་སྲིད་ཀྱི་ཡིད་སྨོན་ཆེ་རུ་གཏོང་བ་དང་གུང་གཞོན་སྡེ་ཚོགས་ལ་ཕུལ་བྱུང་བ་མང་པོ་འོས་སྦྱོར་བྱས་ཏེ་ཏང་ལ་སྐྱོན་བྲལ་དང་གསོན་ཤུགས་ལྡན་པའི་གཞོན་སྐྱེས་སྐྱོང་དགོས། ལམ་ལུགས་དང་ལམ་སྲོལ་འཐུས་སྒོ་ཚང་དུ་བཏང་ནས་ཏང་གི་འགོ་ཁྲིད་འོག་ལོ་ཆུང་བྱིས་པའི་བྱ་གཞག་ལ་ཁུར་མཉམ་ལེན་དང་དོན་སྤྱི་སྒྲུབ་ཀྱི་ལས་ཀའི་རྣམ་པ་ཆགས་པར་མུ་མཐུད་སྐུལ་འདེད་གཏོང་དགོས། རིམ་པ་ཁག་གི་ལོ་ཆུང་གདོང་ལེན་རུ་ཁག་གི་ལས་དོན་ཨུ་ལྷན་དང་། གཞི་རིམ་གྱི་ལོ་ཆུང་གདོང་ལེན་རུ་ཁག་རྩ་འཛུགས། ལོ་ཆུང་གདོང་ལེན་རུ་ཁག་གི་ཟུར་ཁྲིད་པའི་དཔུང་ཁག་སོགས་རང་ངོས་འཛུགས་སྐྱོང་བྱེད་ཤུགས་ཆེ་རུ་བཏང་སྟེ། བྱང་ཚད་མཐོ་ལ་ཆེད་ལས་ཅན་གྱི་ལོ་ཆུང་གདོང་ལེན་རུ་ཁག་གི་ཟུར་ཁྲིད་པའི་དཔུང་ཁག་ཅིག་འཛུགས་སྐྱོང་བྱེད་དགོས།

བཞུགས་མོལ་ཚོགས་འདུའི་ཐོག་ལོ་ཆུང་གདོང་ལེན་རུ་ཁག་གི་ཟུར་ཁྲིད་པ་དང་ལོ་ཆུང་གདོང་ལེན་རུ་མིའི་འཐུས་མི་སོགས་དབར་སྤེལ་རེས་བྱས་པ་རེད།