འདས་མ་ཐག་པའི་རྒྱལ་སྟོན་ངལ་གསོའི་རིང་། ནག་ཆུ་གྲོང་ཁྱེར་གསེར་རྙེད་ཆུས་མཐུན་སྒྲིལ་ཁྲོམ་གཞུང་ཁྲིམས་ཤིང་སྡེ་ཁུལ་གྱི་ཏང་དང་མང་ཚོགས་ཀྱི་ཞབས་ཞུའི་ལྟེ་གནས་སུ་དགའ་སྤྲོའི་རྣམ་པས་ཁེངས་ཤིང་། འཁྲུག་ཆ་ཧ་ཅང་དོད། མི་རིགས་ཁག་གི་མང་ཚོགས་ཀྱིས་རང་མི་རིཌ་ཀྱི་ཁྱད་ཆོས་ལྡན་པའི་གཟབ་སྤྲོས་སྤྲས་ནས་སྤྲོ་སྣང་དོད་པའི་རོལ་དབྱངས་ཀྱི་འགྱུར་ཁུག་དང་བསྟུན་ནས་སྒོར་གཞས་འཁྲབ།

ཁྲིམས་ཤིང་སྡེ་ཁུལ་གྱི་ཀྲུའུ་རེན་ལྷ་འཛིན་གྱིས“ལོ་ལྟར་གྱི་དཔྱིད་གསར་དུས་ཆེན་དང་ཟླ་མཆོད་དུས་ཆེན་སོགས་ཀྲུང་ཧྭ་མི་རིགས་ཀྱི་སྲོལ་རྒྱུན་དུས་ཆེན་སྐབས། སྡེ་ཁུལ་གྱིས་བྱེད་སྒོ་སྤེལ་ནས་མི་རིགས་ཁག་གི་གྲོང་མི་སྒྲིག་འཛུགས་བྱས་ཏེ་མཉམ་དུ་དུས་ཆེན་གཏོང་གི་ཡོད། དེ་དང་ཆབས་ཅིག་བོད་ཀྱི་ལོ་གསར་དང་སྨྱུང་གྲོལ་དུས་ཆེན་སོགས་གྲངས་ཉུང་མི་རིགས་ཀྱི་དུས་ཆེན་ལ་སྡེ་ཁུལ་གྱི་ཁྱིམ་ཚང་ཆེ་མོ་མཉམ་འཛོམས་ཀྱིས་རྟེན་འབྲེལ་ཞུ་བ་ཕུད། བོད་རིགས་དང་ཧུའེ་རིགས་ཀྱི་གྲོང་མིས་གྲོང་པ་ཁྱིམ་མཚེས་ཁྱིམ་དུ་གདན་དྲངས་ནས་ཕ་ཡུལ་གྱི་ཁྱད་ལྡན་སིལ་ཟས་ཀྱི་ཐུགས་སྤྲོ་གཏོང་གི་རེད། མི་རིགས་ཁག་གི་གྲོང་མིའི་དབར་བརྩེ་སེམས་ཟབ་མོ་ཆགས་ནས་སེ་འབྲུའི་རྡོག་ལྟར་མཐུན་སྒྲིལ་རྡོག་རྩ་གཅིག་ཏུ་བསྒྲིལ་ཡོད”ཅེས་ངོ་སྤྲོད་བྱས།

མི་རིགས་མཐུན་སྒྲིལ་གྱི་ཁྱིམ་ཚང་ཆེན་པོ་མཉམ་དུ་བསྐྱངས།

ད་ལོ་ལོ་73ལ་སླེབས་པའི་ཝང་ཨའེ་ལུན་ནི་ཨན་ཧུའེ་ནས་ཡིན་པ་དང་། 1991ལོར་ནག་ཆུར་ལས་ཀ་བྱེད་པར་ཡོང་བ་དང་། དེ་ནས་ས་གནས་དེ་གའི་བོད་རིགས་བུ་མོ་དཔའ་འཛོམས་ངོ་ཤེས་པ་དང་འབྲེལ། 1994ལོར་གཉེན་སྒྲིག་བྱས་རྗེས་ནག་ཆུར་གཞིས་ཆགས་པ་དང་1996ལོར་བུ་འཇིགས་མེད་རྡོ་རྗེ་སྐྱེས།

ཁོང་གིས“ནག་ཆུར་ཐོག་མར་སླེབས་སྐབས་བོད་སྐད་མི་གོ་བ་དང་སྤེལ་རེས་ཀྱང་ཡག་པོ་བྱེད་མི་ཐུབ་པས། འཚོ་བ་དང་ལས་ཀ་གང་ཅིར་གོམས་ཀྱི་མི་འདུག འོན་ཀྱང་ཉེ་འགྲམ་གྱི་བོད་རིགས་མང་ཚོགས་ཀྱིས་རོགས་པ་མང་པོ་བྱས་ཏེ་ང་ལ་རྒྱུན་སྤྱོད་བོད་སྐད་སློབ་པ་དང་། རྩམ་པ་དང་ཇ་བསྲུབས་མ་བཟའ་འཐུང་བྱེད་དུ་བཅུག་པ། ས་གནས་དེ་གའི་རིག་གནས་དང་གོམས་སྲོལ་འགྲེལ་བཤད་བརྒྱབ་པ་སོགས་རོགས་པ་ཡག་པོ་བྱས་བྱུང་། ཁོང་ཚོའི་སེམས་རྩ་འཁོལ་བ་དང་བབ་ཆགས་ཀྱི་གཤིས་རྒྱུད་ལས་ང་གྲོང་ཁྱེར་དེར་རིམ་བཞིན་དགའ་རུ་ཕྱིན་སོང་། ངས་ཀྱང་རང་ཉིད་ཕྱི་མི་ཞིག་ཏུ་བརྩི་གི་མེད། ཁྱིམ་ཚང་བཙུགས་རྗེས་མི་རིགས་དང་ས་ཁོངས་མི་འདྲ་བའི་ཧེ་བག་རྦད་དེ་སེལ་ཐུབ་བྱུང”ཞེས་བཤད།

ཝང་ཨའེ་ལུན་གྱིས“བཟའ་ཟླ་ད་ཆ་སྡེ་ཁུལ་གྲོང་ལྷན་གྱི་རིག་གནས་སློབ་གསོ་འཕྲོད་བསྟེན་ཨུ་ཡོན་ཡིན་པ་དང་། བུ་ནག་ཆུ་གྲོང་ཁྱེར་གསེར་རྙེད་ཆུས་སྤྱི་བདེ་ཅུས་སུ་ལས་ཀ་བྱེད་ཀྱི་ཡོད། ངས་རྒྱུན་དུ་ལས་ཀ་ཙག་ཙིག་ཁ་ཤས་བྱེད་ཀྱི་ཡོད། ནང་མི་གསུམ་གྱི་ཁྱིམ་ཚང་བདེ་སྐྱིད་ལྡན་པ་ཞིག་ཡོད། ང་ཚོས་བརྩེ་སེམས་བཅངས་ནས་ནག་ཆུའི་ས་གཞི་ཆེ་མོ་འདིའི་ཐོག་རྩ་བ་བཙུགས་ནས་ལེགས་སྐྱེས་འབུལ་གྱི་ཡིན”ཞེས་ལྷག་བསམ་རྣམ་དག་ངང་བཤད།

ཁྲིམས་ཤིང་སྡེ་ཁུལ་དུ་ཝང་ཨའེ་ལུན་ལྟ་བུའི་ཁྱིམ་ཚང་ད་དུང་མང་པོ་ཡོད། མི་རིགས་ཁག་གི་སྤུན་ཟླས་བརྩེ་དུང་ཟབ་མོས་ཁྱིམ་ཚང་ཆུང་ངུ་རེ་རེ་མཉམ་དུ་བསྐྱངས་པ་མ་ཟད། ཞི་མཐུན་དང་བདེ་སྐྱིད་ལྡན་པའི་མི་རིགས་མཐུན་སྒྲིལ་གྱི་ཁྱིམ་ཚང་ཆེ་མོ་ཡང་མཉམ་དུ་བསྐྱངས་ཡོད།

སྡེ་ཁུལ་དཔེ་ཁང“སེམས་སྦྲེལ་ཟམ་པར”བསྒྱུར་པ།

“དྲོ་སྐྱིད་ལྡན་པའི་སྡེ་ཁུལ་དཔེ་ཁང”དེ་ཁྲིམས་ཤིང་སྡེ་ཁུལ་གྱི་རིག་གནས་སྤེལ་རེས་ཀྱི་བར་མཐོངས་ཤིག་ཡིན་པའི་ངོས་ནས་དཔེ་དེབ་སྣ་ཁ་འཛོམས་པོ་ཡོད། དཔེ་ཁང་དུ་བསམ་བློ་ཆབ་སྲིད་དང་། མཚན་ཉིད་རིག་པ་དང་ཆོས་ལུགས། ལོ་རྒྱུས་དང་ས་ཁམས། རིག་གནས་སྒྱུ་རྩལ་སོགས་ཀྱི་དཔེ་དེབ་སྣ་ཁ་1000ལྷག་ཙམ་ཡོད།

“ཕྲུ་གུ་མི་ཉུང་བ་ཞིག་གི་ཕ་མ་ལས་བྲེལ་ཆེ་བས་དུས་རྒྱུན་སྤོ་བོ་ལགས་དང་རྨོ་བོ་ལགས་ཀྱིས་ལྟ་རྟོག་བྱེད་ཀྱི་ཡོད། རྒན་རྒོན་ལ་སྦྱོང་ཚན་ཟུར་ཁྲིད་བྱེད་ཁོམ་དང་ནུས་པ་མེད་པར་བརྟེན་དཔེ་ཁང་དེ་ཕྲུ་གུ་ཚོའི‘སློབ་ཁང་གཉིས་པར’གྱུར་ཡོད། གཟའ་འཁོར་རེའི་གཟའ་ཕུར་བུར་ལས་ཐག་བཅད་རྗེས་སྡེ་ཁུལ་གྱི་ལས་དོན་པས་རེས་མོས་བྱས་ནས་དཔེ་ཁང་དུ་སྡེ་ཁུལ་གྱི་ཕྲུ་གུ་ཚོར་སྦྱོང་ཚན་ཟུར་ཁྲིད་བྱེད་པར་ཡོང་གི་ཡོད”ཅེས་ལྷ་འཛིན་གྱིས་བཤད།

དེས་མ་ཚད་འདི་ལོའི་དབྱར་ཁའི་གུང་གསེང་རིང“དྲོ་སྐྱིད་ལྡན་པའི་སྡེ་ཁུལ་དཔེ་ཁང”གི་སྟེགས་བུ་སྤྱད་དེ་ཁྲིམས་ཤིང་སྡེ་ཁུལ་གྱིས“ཕུན་སུམ་ཚོགས་པའི་གུང་གསེང་རིང་ལག་གདང་སྦྲེལ་བའི”གཅེས་སེམས་སློབ་སྐྱོར་བྱེད་སྒོ་སྤེལ་བ་རེད།

ཡུལ་མི་ཚོའི་དགའ་བསུ་ཆེན་པོ་ཐོབ་པའི“དྲོ་སྐྱིད་ལྡན་པའི་སྡེ་ཁུལ་དཔེ་ཁང”དུ་ཡོང་མཁན་སྔར་བས་མང་དུ་ཕྱིན་ནས་དེ་ཉིད་ཁོངས་གཏོགས་ཁུལ་གྱི་མི་རིགས་ཁག་གི་གྲོང་མིའི“སེམས་སྦྲེལ་ཟམ་པར”གྱུར་ཡོད།

ཁ་གཏད་རོགས་སྐྱོར་གྱིས་འཕེལ་རྒྱས་ལ་སྐུལ་འདེད་བཏང་བ།

ཁྲིམས་ཤིང་སྡེ་ཁུལ་གྱི་གྲོང་མིའི་ཚོམས་ཆེན་དུ་སྲིད་འཛིན་རྣམ་པའི་འདུ་ཤེས་དོར་ནས་ཁམས་གཙང་སྟབས་བདེའི་ཇུས་འགོད་དང་ཁྱིམ་ཚང་རྣམ་པའི་མཛེས་བཟོའི་ཁྱད་ཆོས་སྤྱད་དེ་གཞུང་ལས་ཞབས་ཞུ་ཁུལ་དང་། སོས་དལ་སྒུག་ཁུལ། རང་རྟེན་ཞབས་ཞུ་ཁུལ་སོགས་བཟོས་ནས་དྲོ་སྐྱིད་དང་བག་ཕེབས་ཀྱི་ཚོར་སྣང་ཞིག་ཁྱོན་ཡོངས་ནས་མངོན་པར་བྱས་ཡོད།

གྲོང་མིའི་ཚོམས་ཆེན་བསྐྲུན་པ་དེ་ནི་ཁྲིམས་ཤིང་སྡེ་ཁུལ་གྱིས“དབྱིན་ཤིའུ་རྣམ་པར”སློབ་སྦྱོང་དང་དཔྱད་གཞིར་འཛིན་པའི་གྲུབ་འབྲས་ཤིག་རེད། 2023ལོར་ཀྲེ་ཅང་ཅ་ཤིང་གྲོང་ཁྱེར་གྱི་བོད་སྐྱོར་ལས་དོན་ཚོགས་ཆུང་གི་མཐུན་སྦྱོར་སྦྲེལ་མཐུད་འོག ཁྲིམས་ཤིང་སྡེ་ཁུལ་དང་ཀྲེ་ཅང་ཅ་ཤིང་གྲོང་ཁྱེར་ཤིའུ་ཀྲོའུ་ཆུས་གྲོང་གསར་ཁྲོམ་གཞུང་དབྱིན་ཤིའུ་སྡེ་ཁུལ་དབར“ཆ་སྒྲིག་མཉམ་སྐྲུན”གྱི་གྲོས་མཐུན་བཞག་ཡོད།

གསེར་རྙེད་ཆུས་ཨུད་ཀྱི་རྒྱུན་ཨུ་ཆུས་ཨུད་གཞུང་ལས་ཁང་གི་ཀྲུའུ་རེན་ཡུས་ལེས“ཟླ་8པར་གྲོང་གསར་ཁྲོམ་གཞུང་གི་འཐུས་མི་ཚོགས་པ་དང་བཅས་པ་རྟོག་ཞིབ་དང་སྤེལ་རེས་བྱེད་པར་ཡོང་བ་མ་ཟད། ཆ་སྒྲིག་མཉམ་སྐྲུན་མ་དངུལ་སྒོར་ཁྲི་10ཞལ་འདེབས་བརྒྱབ་ཡོད། སྡེ་ཁུལ་གྱི་ཆ་སྒྲིག་བྱེད་སྟངས་ནི་བརྩེ་སེམས་ཀྱི་དར་སྐུད་ལྟ་བུ་ཞིག་དང་འདྲ་བར་ཅ་ཤིང་དང་གསེར་རྙེད་ཆུས་གཉིས་དམ་པོར་སྦྲེལ་ཡོད། སྡེ་ཁུལ་ཆ་སྒྲིག་གི་ལག་ལེན་ནི་ཁ་གཏད་རོགས་སྐྱོར་ལས་དོན་གྱི་ཚོད་ལྟ་གསར་པ་ཞིག་ཡིན་ལ། མི་རིགས་མཐུན་སྒྲིལ་ཡར་ཐོན་བྱ་གཞག་གི་བསྡུས་རིས་གསོན་ཉམས་དོད་པོ་ཞིག་དེ་བས་ཀྱང་ཡིན། དེས་བོད་སྐྱོར་ལོ་30ཡི་རིང་མི་རིགས་ཁག་གི་མི་དམངས་ཀྱིས་ལག་གདང་སྦྲེལ་ནས་ཐུན་མོང་ཐོག་མདུན་སྐྱོད་བྱས་པའི་བརྩེ་བ་ཟབ་མོ་བདེན་དཔང་ཐུབ་ལ། ཀྲུང་ཧྭ་མི་རིཌ་ཀྱི་སྣ་མང་གཞི་གཅིག་དང་ཕྱར་བ་གྲུ་འདེཌ་ཀྱི་སྙིང་སྟོབས་རླབས་པོ་ཆེ་ཡང་མངོན་ཐུབ”ཅེས་བརྗོད།