འདི་ལོ་ནི་ཀྲུང་གོ་གསར་པ་དབུ་བརྙེས་ནས་ལོ་75འཁོར་བའི་ལོ་དང“ལོ་ལྔ་ཚན་བཅུ་བཞི་པའི”འཆར་འགོད་དམིགས་ཚད་མངོན་འགྱུར་བྱེད་པའི་འགག་རྩའི་ལོ་ཞིག་ཡིན་པས། དཔལ་འབྱོར་ལས་དོན་ཡག་པོ་བསྒྲུབ་རྒྱུ་ནི་གལ་འགངས་ཤིན་ཏུ་ཆེ་བ་ཞིག་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དཔལ་འབྱོར་ལས་དོན་ཡག་པོ་སྒྲུབ་པའི་འགན་འཁྲིའི་བསམ་པ་དང་དགོས་གཏུགས་ཀྱི་བསམ་པ་ཆེ་རུ་ཏན་ཏིག་བཏང་ནས་ལོ་ཧྲིལ་པོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཚད་ལས་འགན་བློ་བརྟན་འགྱུར་མེད་ངང་ལེགས་སྒྲུབ་བྱེད་དགོས་ཞེས་ནན་བཤད་ཐེངས་མང་གནང་ཡོད། མིག་སྔར་ལོ་མཇུག་བར་ཟླ་བ་གཉིས་ལྷག་ཙམ་ལས་མེད་པས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་སྟེ་ལོ་ཧྲིལ་པོའི་དམིགས་ཚད་ལས་འགན་ལེགས་སྒྲུབ་བྱེད་པའི་ལས་དོན་ཁག་རྒྱལ་ཕམ་ཐག་གཅོད་ཀྱི་མཐའ་མའི་གདོང་མཆོང་གི་དུས་སུ་སླེབས་ཡོད། ཉིན་ཤས་གོང་འཚོགས་པའི་རང་སྐྱོང་ལྗོངས་ཏང་ཨུད་རྒྱུན་ལས་ཨུ་ལྷན་གྱི་ཚོགས་འདུའི་ཐོག་ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཕྱོགས་ཡོངས་ནས་ལག་བསྟར་བྱས་ཏེ། དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་འགན་འཁྲིའི་བསམ་པ་དང་དགོས་གཏུགས་ཀྱི་བསམ་པ་ཤུགས་ཆེར་ཏན་ཏིག་གཏོང་བ་དང་། དཔལ་འབྱོར་ལས་དོན་ལེགས་སྒྲུབ་བྱེད་པའི་ཡིད་ཆེས་དང་ཆོད་སེམས་སྔར་བས་བརྟན་དུ་གཏོང་བ། ཚན་རིག་དང་མཐུན་པའི་ངང་ཕྱི་རོལ་ཡུལ་གྱི་དུས་བབ་སྟངས་འཛིན་བྱེད་པ། ལས་ཀའི་གཙོ་གནད་འབུར་དུ་ཐོན་པར་བྱེད་པ། ལས་དོན་དོན་འཁྱོལ་ལ་དམ་འཛིན་ནན་པོ་བྱེད་པ། དམ་པ་དོན་གཉེར་གྱི་སྤྱོད་ཚུལ་ཐོག་ནས་ལོ་ཧྲིལ་པོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཚད་ལས་འགན་ལེགས་སྒྲུབ་ཧུར་ཐག་བཅས་བྱས་ཏེ་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་ལ་སྐུལ་འདེད་དེ་བས་ལེགས་པ་གཏོང་དགོས་ཞེས་བསྟན་ཡོད།

ད་ལོ་ཚུན་དུ་རང་སྐྱོང་ལྗོངས་ཏང་ཨུད་ཀྱིས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་ནན་ཏན་བྱས་ཏེ་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཧུར་ཐག་བཏང་བས། ལྗོངས་ཡོངས་ཀྱི་དཔལ་འབྱོར་འཁོར་སྐྱོད་སྤྱིར་ན་བརྟན་པོ་བྱུང་བ་དང་དཔལ་འབྱོར་སྟོན་གྲངས་གཙོ་བོ་འཕར་བའི་རྣམ་པ་བཟང་པོ་རྒྱུན་འཁྱོངས་ཐུབ་ཡོད། ལོ་སྟོད་དུ་ལྗོངས་ཡོངས་ཀྱི་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་1189.45ཟིན་པ་དེ་དུས་མཚུངས་ལས་6.1%འཕར་ནས་འཕར་ཚད་རྒྱལ་ཡོངས་ཀྱི་ཨང་གཉིས་པར་སླེབས་པ་དང་། གྲོང་ཁྱེར་དང་གྲོང་རྡལ་གྱི་ཡུལ་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་དང་གྲོང་གསེབ་ཀྱི་ཡུལ་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་6.4%དང་8.4%སོ་སོར་འཕར་ནས་འཕར་ཚད་རྒྱལ་ཡོངས་ཀྱི་མདུན་གྲལ་དུ་སླེབས་པ། གཏན་འཇགས་རྒྱུ་ནོར་ལ་མ་འཇོག་དང་། གཞི་ཁྱོན་ཡན་གྱི་བཟོ་ལས་ཀྱི་རིན་ཐང་འཕར་མ། དངོས་ཟོག་ཕྱིར་གཏོང་ནང་འདྲེན་གྱི་བསྡོམས་འབོར། སྤྱིར་བཏང་གི་སྤྱི་པའི་སྔོན་རྩིས་ཡོང་འབབ་སོགས་ཀྱི་སྟོན་གྲངས་འཕར་ཚད་ཀྱང་རྒྱལ་ཡོངས་ཀྱི་ཨང་དང་པོར་སླེབས་པ་དེ་ཐོག་ནས་བོད་ཀྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་འགྲོ་བའི་རྣམ་པ་མངོན་ཡོད། སྔོན་དཔག་བྱས་ན། དུས་ཚིགས་དང་པོ་ནས་གསུམ་པའི་བར་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་དང་། གཏན་འཇགས་རྒྱུ་ནོར་མ་འཇོག གཞི་ཁྱོན་ཡན་གྱི་བཟོ་ལས་ཀྱི་རིན་ཐང་འཕར་མ། གྲོང་ཁྱེར་དང་གྲོང་གསེབ་ཀྱི་ཡུལ་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སོགས་དཔལ་འབྱོར་སྟོན་གྲངས་གཙོ་བོ་སྔར་བཞིན་ཅུང་མགྱོགས་པོ་འཕར་ནས་རྒྱལ་ཡོངས་ཀྱི་མདུན་གྲལ་དུ་སླེབས་རེ་ཡོད་པ་རེད།

བབ་བསྟུན་འཕྲལ་སྒྲུབ་དང་ཡང་འབད་བསྐྱར་འབད་ཀྱིས་མིག་སྔའི་དཔལ་འབྱོར་ལས་དོན་ཡག་པོ་སྒྲུབ་པ་དང་བློ་བརྟན་འགྱུར་མེད་ངང་ལོ་ཧྲིལ་པོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཚད་ལས་འགན་ལེགས་སྒྲུབ་བྱེད་དགོས་ཤིང་། ལྗོངས་ཡོངས་ཀྱི་གོང་འོག་ཚང་མས་བསམ་བློ་དང་བྱ་སྤྱོད་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཛུབ་སྟོན་གལ་ཆེན་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཐོག་གཅིག་གྱུར་ཡོང་བ་དང་ལྗོངས་ཏང་ཨུད་ཀྱིས་ཁ་གསལ་བཟོས་པའི་ལས་ཀའི་བླང་བྱ་དང་ཞིབ་ཕྲའི་དམིགས་ཚད་ལས་འགན་ཐོག་གཅིག་གྱུར་ཡོང་བ་བྱས་ནས། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱས་ཏེ། འཕེལ་རྒྱས་ཚང་མར་མི་རིགས་མཐུན་སྒྲིལ་ཡར་ཐོན་གྱི་དོན་སྙིང་ལྡན་པ་དང་། གཅིག་གྱུར་སྲུང་སྐྱོང་དང་ཁ་ཕྲལ་ལ་ངོ་རྒོལ་བྱེད་པའི་དོན་སྙིང་ལྡན་པ། དམངས་འཚོ་ལེགས་གཏོང་དང་མི་སེམས་གཅིག་སྒྲིལ་གྱི་དོན་སྙིང་ལྡན་པ། མི་རིགས་ཁག་གི་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཆེ་རུ་གཏོང་རྒྱུར་ཕན་ཐོགས་ཡོད་པ། དུས་བབ་གསལ་རྟོགས་དང་ཡིད་ཆེས་འཕེལ་བར་བྱེད་པ། བློ་བརྟན་འགྱུར་མེད་དང་བློ་རྩེ་གཅིག་སྒྲིམ་གྱིས་དམིགས་ཚད་དོན་འཁྱོལ་དང་ལས་འགན་ལེགས་སྒྲུབ་ལ་དམ་འཛིན་བྱེད་པ། མཐའ་མའི་གདོང་མཆོང་གི་དུས་སུ་མྱུར་ཚད་མགྱོགས་སུ་གཏོང་བ་དང་གྲུབ་འབྲས་གསར་པ་ཧུར་ཐག་གཏོད་པ་བཅས་བྱས་ནས། ལོ་ཧྲིལ་པོའི་དམིགས་ཚད་ལས་འགན་ཕུན་སུམ་ཚོགས་པོའི་ངང་ལེགས་གྲུབ་ཡོང་བར་འགན་ལེན་བྱེད་དགོས།

ནུས་ལྡན་གྱི་མ་འཇོག་རྒྱུན་མཐུད་ངང་རྒྱ་ཆེར་གཏོང་བ་དང་། འཕེལ་རྒྱས་ཀྱི་རང་འགུལ་དབང་ཆར་སྟངས་འཛིན་ནན་པོ་བྱེད་པ། རྣམ་གྲངས་འཆར་འགོད་དང་སྦྲགས་ཏེ་ལག་བསྟར་བྱེད་པ་དང་མ་དངུལ་གཞི་རྒྱུ་རྣམ་གྲངས་དང་མཉམ་དུ་གཏོང་རྒྱུ་མཐའ་འཁྱོངས་བྱེད་པ། ནུས་ཤུགས་ཡོད་རྒུས་གཙོ་གནད་རྣམ་གྲངས་གཅིག་སྡུད་འགག་སྒྲོལ་ལ་དམ་འཛིན་ཡག་པོ་བཅས་བྱས་ནས་རྣམ་གྲངས་དོན་འཁྱོལ་དང་རྣམ་གྲངས་ལ་སྐུལ་འདེད་གཏོང་བའི་ཐད་ཤུགས་སྣོན་རྒྱག་དགོས། དེང་རབས་ཅན་གྱི་ཐོན་ལས་མ་ལག་སྐྲུན་མགྱོགས་སུ་གཏོང་བ་དང་། བོད་ཀྱི་ཁྱད་ལྡན་ལེགས་ཆའི་ཐོན་ཁུངས་ལ་གཞི་ཚུགས་པ། སྲོལ་རྒྱུན་གྱི་ཐོན་ལས་ཕྱོགས་སྒྱུར་རིམ་སྤོར་ལ་སྐུལ་འདེད་གཏོང་བ། ལག་རྩལ་སྒྱུར་བཀོད་དང་གསར་གཏོད་ལ་སྐུལ་འདེད་གཏོང་བར་ཤུགས་སྣོན་རྒྱག་པ་བཅས་བྱས་ཏེ་དཔལ་འབྱོར་འཕེལ་རྒྱས་ལ་སྒུལ་ཤུགས་གསར་པ་སྣོན་དགོས། ནང་མཁོ་རྒྱ་སྐྱེད་ལ་མུ་མཐུད་དམ་འཛིན་བྱེད་པ་དང་། གཞི་ཁྱོན་ཆེ་བའི་སྒྲིག་ཆས་གསར་སྒྱུར་དང་འཛད་རྫས་གསར་རྙིང་བརྗེ་བར་སྐུལ་འདེད་གཏོང་བ། སྲིད་ཇུས་ཀྱི་གནད་འཁེལ་རང་བཞིན་དང་རྒྱུན་མཐུད་རང་བཞིན་ལ་ཤུགས་སྣོན་རྒྱག་པ་བཅས་བྱས་ནས་མཁོ་སྤྲོད་ཕན་ཚུན་སྐུལ་སྤེལ་དང་ཐོན་འཚོང་མཉམ་སྤེལ་ལ་སྐུལ་འདེད་གཏོང་དགོས། ཚོང་གཉེར་ཁོར་ཡུག་མུ་མཐུད་ལེགས་སུ་གཏོང་བ་དང་།“གློད་སྡོམ་ཞབས་གསུམ”གྱི་སྒྱུར་བཅོས་གཏིང་ཟབ་ཏུ་གཏོང་བ། ཚོང་འགུགས་མ་འདྲེན་གྱི་སྲིད་ཇུས་དང་བྱེད་ཐབས་སྔར་བས་འཐུས་སྒོ་ཚང་དུ་གཏོང་བ། ཚོང་འགུགས་མ་འདྲེན་གྱི་ཉིན་བརྒྱའི་འགག་སྒྲོལ་བྱ་སྤྱོད་ལག་བསྟར་བྱེད་པ། “གཉིས་འགུགས་གཉིས་འདྲེན”གྱི་ལས་དོན་གཏིང་ཟབ་སྤེལ་བ། སྒོ་དབྱེའི་ལས་སྟེགས་སྟོབས་ཆེར་གཏོང་བ་བཅས་བྱས་ཏེ་སྒོ་དབྱེའི་གསོན་ཤུགས་སྔར་བས་ཆེ་རུ་གཏོང་དགོས། ལས་ཞུགས་དང་འབབ་འཕར་གྱི་ལས་དོན་ཡག་པོ་སྒྲུབ་པ་དང་། སློབ་ཆེན་སློབ་ཐོན་སློབ་མའི་ལས་ཞུགས་ཐབས་ལམ་མུ་མཐུད་རྒྱ་ཆེར་གཏོང་བ། གཙོ་གནད་མི་ཚོགས་ཀྱི་ལས་ཞུགས་ལས་དོན་དང་ཡོང་འབབ་དམའ་བའི་ཚོགས་སྤྱིའི་རོགས་སྐྱོབ་དང་རོགས་སྐྱོར་ཏན་ཏིག་ངང་ཡག་པོ་སྒྲུབ་པ། གྲོང་ཁྱེར་དང་གྲོང་གསེབ་ཀྱི་ཡུལ་མིའི་འབབ་འཕར་ལ་སྐུལ་འདེད་གཏོང་བའི་ཞིབ་ཕྲའི་བྱ་ཐབས་དོན་འཁྱོལ་ཞིབ་ཚགས་བཅས་བྱེད་དགོས།

ལྗོངས་ཡོངས་ཀྱི་རིམ་ཁག་སྡེ་ཚན་ཁག་གིས་དཔལ་འབྱོར་ལས་དོན་གྱི་རྩ་འཛུགས་འགོ་ཁྲིད་དང་སྤྱི་འདོམས་མཐུན་སྦྱོར་ལ་ཤུགས་སྣོན་བརྒྱབ་སྟེ། ལོ་ཧྲིལ་པོའི་དམིགས་ཚད་ལས་འགན་ལ་དམ་པོར་དམིགས་པ་དང་དཔལ་འབྱོར་འཁོར་སྐྱོད་ཀྱི་ལྟ་ཞིབ་ཚད་ལེན་དང་དབྱེ་ཞིབ་བཀོད་གཏོང་ལ་ཤུགས་སྣོན་བརྒྱབ་ནས་ལས་ཀའི་རྒྱང་ལྟའི་རང་བཞིན་དང་དམིགས་སའི་རང་བཞིན་སྔར་བས་ཆེ་རུ་གཏོང་དགོས། རིམ་ཁག་འགོ་ཁྲིད་ལས་བྱེད་པས་ཞི་ཅིན་ཕིང་གི་དཔལ་འབྱོར་དགོངས་པ་སློབ་སྦྱོང་དང་བེད་སྤྱོད་ཡག་པོ་བྱེད་པ་དང་ཁྲོམ་རའི་དཔལ་འབྱོར་སྐོར་གྱི་ཤེས་བྱ་སློབ་སྦྱོང་ནན་ཏན་བྱས་ཏེ། དཔལ་འབྱོར་འཕེལ་རྒྱས་ཀྱི་ཆོས་ཉིད་དང་། དཔལ་འབྱོར་གྱི་གནས་བབ་འགྱུར་ལྡོག ས་ཁུལ་འཕེལ་རྒྱས་ཀྱི་དོན་དངོས། དཔལ་འབྱོར་སྲིད་ཇུས་བཅས་ཀྱི་ངོས་འཛིན་དང་ཤེས་རྟོགས་གཏིང་ཟབ་ཏུ་གཏོང་བ་དང་དཔལ་འབྱོར་གྱི་ལས་དོན་ལ་འགོ་ཁྲིད་བྱེད་པའི་འཇོན་ཐང་དང་ཆུ་ཚད་རྒྱུན་ཆད་མེད་པར་མཐོ་རུ་བཏང་ནས་དཔལ་འབྱོར་གྱི་ལས་དོན་བསྒྲུབ་རྒྱུར་བྱང་ཆུབ་པ་བྱེད་དགོས། ལས་དོན་བསྒྲུབ་རྒྱུ་ཨང་དང་པོར་འཇོག་རྒྱུ་མཐའ་འཁྱོངས་ཀྱིས“གཞི་རིམ་དུ་སྐྱོད་པ་བཞིའི”ཕུལ་བྱུང་སྲོལ་རྒྱུན་དར་སྤེལ་གཏོང་བ་དང་གཞི་རིམ་གྱི་འཐབ་ས་དང་པོར་བཅར་འདྲི་དང་བརྟག་ཞིབ་ལ་བསྐྱོད་དེ་དོན་འཁྱོལ་ལ་དམ་འཛིན་བྱེད་འདོད་པའི་རང་རྟོགས་དང་། དོན་འཁྱོལ་ལ་དམ་འཛིན་བྱེད་ཕོད་པའི་འགན་ཁུར་གྱི་བསམ་པ། དོན་འཁྱོལ་ལ་དམ་འཛིན་བྱེད་ཤེས་པའི་འཇོན་ཐང་བཅས་ཀྱི་ཐོག་ནས་ལས་འགན་རེ་རེ་བཞིན་དོན་ཐོག་ཏུ་འཁྱོལ་བར་བྱེད་དགོས།

ང་ཚོས་མདུན་དུ་སྐྱོད་པའི་ངར་ཤུགས་ཐོག་ནས་མྱུར་ཚད་མགྱོགས་སུ་གཏོང་བ་དང་། ཞུམ་མེད་མདུན་སྐྱོད་ཀྱི་ངར་ཤུགས་ཐོག་ནས་སྔོན་ཐོན་བརྩོན་ལེན་བྱེད་པ། དམ་འཛིན་མཐའ་གཅིག་ཏུ་བྱེད་པའི་ངར་ཤུགས་ཐོག་ནས་སྙེག་བརྒལ་བྱེད་པ་བཅས་བྱས་ཏེ་འཕེལ་རིམ་ལ་དམ་འཛིན་དང་། སྤུས་ཚད་མཐོར་གཏོང་། ཕན་འབྲས་ཆེར་གཏོང་བཅས་ཀྱི་ཐད་ཤུགས་བརྒྱབ་ནས་ལས་དོན་ཁག་ལ་དམ་འཛིན་ནན་པོ་དང་དོན་ཐོག་ཏུ་དངོས་སུ་འཁྱོལ་བར་བྱེད་པ་དང་དངོས་སྒྲུབ་ཀྱི་གྲུབ་འབྲས་ཐོག་ནས་2024ལོའི་ཕུལ་བྱུང་གི་རྒྱུགས་ལན་ཕུལ་ཏེ་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་ལ་སྐུལ་འདེད་གཏོང་བར་བོད་ལྗོངས་ཀྱི་སྟོབས་ཤུགས་སྐྱེས་སུ་འབུལ་དགོས།