གྲངས་འཛིན་གྲོང་གསེབ་འཛུགས་སྐྲུན་དང་དྲ་སྦྲེལ་བེད་སྤྱོད་རྒན་འཕྲོད་སྒྱུར་བཀོད་བྱ་སྤྱོད་སོགས་ཀྱི་སྐུལ་འདེད་འོག གྲོང་གསེབ་དང་ཐག་རིང་ལུང་ཁུག་ས་ཁུལ་གྱི་མང་ཚོགས་དང་དེ་བཞིན་རྒན་རྒོན་དང་དབང་པོ་སྐྱོན་ཅན་སོགས་ཚོགས་སྤྱི་དྲ་རྒྱའི་སྤྱི་ཚོགས་ནང་མགྱོགས་མྱུར་ཞུགས་ཐུབ་ཡོད། དེ་དང་དུས་མཚུངས་མིག་སྔར་གྲངས་འཛིན་ཅན་གྱི་འཕེལ་རྒྱས་དོ་སྙོམས་མེད་པའི་སྣང་ཚུལ་སྔར་བཞིན་གནས་པས། ཚོགས་སྤྱི་མི་འདྲ་བའི་གྲངས་འཛིན་ཐོན་ཁུངས་ཐོབ་ཐབས་དང་བེད་སྤྱོད་སོགས་ཐད་ཀྱི་བྱང་ཚད་དང་རྩལ་ནུས་ཀྱི་ཧེ་བག་སེལ་བ་དེས་མིའི་ཕྱོགས་ཡོངས་ཀྱི་འཕེལ་རྒྱས་ལ་སྐུལ་འདེད་གཏོང་བ་དང་དྲ་རྒྱའི་རྒྱལ་ཁབ་སྟོབས་ཆེན་དང་གྲངས་འཛིན་ཀྲུང་གོ་འཛུགས་སྐྲུན་བྱེད་པར་ནུས་པ་གལ་ཆེན་ལྡན་ཡོད།

《“ལོ་ལྔ་ཚན་བཅུ་བཞི་པའི”གྲངས་འཛིན་དཔལ་འབྱོར་འཕེལ་རྒྱས་འཆར་འགོད》ནང“དམངས་ཡོངས་ཀྱི་གྲངས་འཛིན་བྱང་ཚད་དང་རྩལ་ནུས་ཆེ་རུ་གཏོང་དགོས”ཞེས་བཏོན་ཡོད། འཆར་འགོད་ཁྱབ་བསྒྲགས་བྱས་ནས་ལོ་3ཙམ་སོང་རིང་། ས་ཁུལ་མང་པོ་ཞིག་གིས་བྱེད་ཐབས་ནུས་ལྡན་བཏོན་ནས་གྲོང་གསེབ་དང་ཐག་རིང་ལུང་ཁུག་ས་ཁུལ་གྱི་མང་ཚོགས་དང་གཙོ་གནད་ཚོགས་སྤྱིའི་གྲངས་འཛིན་བྱང་ཚད་དང་རྩལ་ནུས་གོང་མཐོར་བཏང་བ་དང་། གྲངས་འཛིན་གྱི་ཧེ་བག་མེད་པའི་ཁོར་ཡུག་སྐྲུན་པ་དང་ཀུན་ཕན་བསྟུན་མཁས་ཀྱི་སྤྱི་ཕན་ཞབས་འདེགས་ཞུས་ཏེ། དམངས་ཡོངས་ཀྱིས་གྲངས་འཛིན་ཅན་གྱི་འཕེལ་རྒྱས་གྲུབ་འབྲས་མཉམ་སྤྱོད་ཐུབ་རྒྱུར་སྐུལ་འདེད་བཏང་བ་རེད།

གཙོ་གནད་ཚོགས་སྤྱི་གྲངས་འཛིན་འཚོ་བ་དང་མཉམ་འདྲེས་མགྱོགས་པོ་ཐུབ་པར་བྱས་པ།

“མི་ལུས་ཚོར་ཆས་དེ་ཉལ་ཁང་དང་། ཚོམས་ཆེན། གསང་སྤྱོད་བཅས་ཀྱི་གློག་སྒྲོན་ལ་མཐུད་ཐུབ། ཚོར་ཆས་འགྲམ་ནས་སོང་ཚེ་གློག་སྒྲོན་རང་འགུལ་ངང་སྤར་ཐུབ”ཧྲང་ཧའེ་གྲོང་ཁྱེར་ཁྲང་ཉིང་ཆུས་ཤན་ཞ་གྲོང་གསར་ཁྲོམ་གཞུང་སྡེ་ཁུལ་རྒན་རྒོན་གྱི་ཕྱོགས་བསྡུས་ཞབས་ཞུའི་ལྟེ་གནས་ཀྱི“བློ་རིག་ཚོམས་ཆེན”དུ་ཁྲང་ཉིང་ཆུས་ལས་ཞོར་སློབ་ཆེན་གྱི་དགེ་རྒན་གྱིས་སྡེ་ཁུལ་གྱི་རྒན་རྒོན་ལ་རིག་ནུས་ཁྱིམ་སྤྱོད་གློག་ཆས་སྤྱོད་སྟངས་ངོ་སྤྲོད་བྱེད་བཞིན་ཡོད།

རྒན་རྒོན་ཚོགས་སྤྱིའི་གྲངས་འཛིན་བྱང་ཚད་དང་རྩལ་ནུས་གོང་མཐོར་གཏོང་རྒྱུ་ནི་རྒན་རྒོན་གྲངས་འཛིན་འཚོ་བར་མགྱོགས་མྱུར་གོམས་པ་དང་གྲངས་འཛིན་འགོག་རྐྱེན་སེལ་རྒྱུར་རམ་འདེགས་བྱེད་པའི་ཕྱོགས་གལ་ཆེན་ཞིག་རེད། ཀྲུང་གོ་དྲ་སྦྲེལ་འཕེལ་རྒྱས་ཐེབས་རྩ་ལྷན་ཚོགས་ཀྱིས་སྤྱི་ཕན་རྣམ་གྲངས་སྤེལ་ནས་སྡེ་ཁུལ་100ལ་རྒན་རྒོན་གྱི་གྲངས་འཛིན་བྱང་ཚད་མཐོ་རུ་གཏོང་བའི་ལས་དོན་སྤེལ་རོགས་བྱེད་རྩིས་ཡོད། དེ་བཞིན་ཀྲུང་གོ་ཚན་རྩལ་མཐུན་ཚོགས་ཀྱིས་ཚན་རྩལ་ཁྱབ་གདལ་བྱ་སྤྱོད་སྤེལ་བ་དང་། རྒན་རྒོན་གྱི་ཚན་རྩལ་སློབ་ཆེན་གཏོད་པ། དང་བླངས་ཞབས་ཞུའི་ཚན་རྩལ་ཁྱབ་གདལ་འཆད་ཁྲིད་ཚོགས་པ་འཛུགས་པ། འཆད་ཁྲིད་དང་། གསོ་སྦྱོང་འཛིན་གྲྭ གླེང་སྟེགས་སོགས་ཀྱི་བྱེད་སྒོ་སྤེལ་བ་རེད། རྒྱལ་ཡོངས་བུད་མེད་མཉམ་འབྲེལ་ལྷན་ཚོགས་ཀྱིས“བུད་མེད་དང་བླངས་ཉི་འོད་བྱ་སྤྱོད”ལག་ལེན་བསྟར་ནས་རྒན་རྒོན་བུད་མེད་ཚོས་རིག་ནུས་ལག་ཐོགས་ཁ་པར་དང་རིག་ནུས་ཁྱིམ་སྤྱོད་གློག་ཆས་སོགས་གྲངས་འཛིན་ཐོན་རྫས་བེད་སྤྱོད་སློབ་སྦྱོང་བྱེད་རྒྱུར་རོགས་རམ་བྱས་ཡོད།

གྲངས་འཛིན་ཁྱབ་གདལ་གཏོང་བའི་བརྒྱུད་རིམ་ཁྲོད་དོ་ཁུར་བྱེད་དགོས་པའི་ཚོགས་སྤྱི་ནི་རྒན་རྒོན་ཁོ་ན་མིན།

ཉེ་བའི་ལོ་ཤས་རིང་ཀྲུང་དབྱང་དྲ་འཕྲིན་གཞུང་དོན་ཁང་སོགས་སྡེ་ཚན་13གྱིས་ཚན་པ་78བདམས་ནས་དམངས་ཡོངས་ཀྱི་གྲངས་འཛིན་བྱང་ཚད་དང་རྩལ་ནུས་གསོ་སྦྱོང་རྟེན་གཞིར་བརྩིས་ཤིང་། དེའི་གྲས་ཤིག་ཡིན་པའི་ཅི་ལིན་ཞིང་ཆེན་དབང་པོ་སྐྱོན་ཅན་ལས་རིགས་ལག་རྩལ་གསོ་སྦྱོང་ལྟེ་གནས་ཀྱིས་གྲངས་འཛིན་རྩལ་ནུས་གོང་མཐོར་གཏོང་བའི་བྱ་ཐབས་ལ་སྣང་ཆེན་བྱས་ཏེ་དབང་པོ་སྐྱོན་ཅན་གྱི་ལས་ཞུགས་ཐབས་ལམ་གསར་པ་གསར་འབྱེད་བྱས་ནས། སྔ་རྗེས་སུ་དྲ་རྒྱའི་ཐད་གཏོང་དང་། བརྙན་ཐུང་བཟོ་བ། ཚོང་དོན་པར་ལེན། ལག་ཐོགས་ཁ་པར་ཉམས་བཟོ་སོགས་ལས་རྣམ་གསར་པའི་དངོས་སྦྱོང་ཁང་བཙུགས་པ་རེད།

གྲངས་འཛིན་བྱང་ཚད་མཐོར་གཏོང་གི་སློབ་གསོའི་ལས་སྟེགས་བཏོད་པ།

2023ལོའི་ཟླ་9པར་ཀུའེ་ཀྲོའུ་ཡི་སློབ་ཆེན་ཁག་གཅིག་གི་ལོ་རིམ་དང་པོའི་སློབ་མ་གསར་པས་དྲ་ཐོག་སློབ་ཚན་ལས་སྟེགས་བརྒྱུད“སློབ་མ་གསར་པའི་གྲངས་འཛིན་བྱང་ཚད་ཀྱི་སློབ་ཚན་དང་པོའི”འབྲེལ་ཡོད་ནང་དོན་སློབ་སྦྱོང་བྱས་པ་རེད།

“སློབ་མ་གསར་པའི་གྲངས་འཛིན་བྱང་ཚད་ཀྱི་སློབ་ཚན་དང་པོ”ནི་དེ་སྔ་ཧྭ་ཏུང་དགེ་འོས་སློབ་ཆེན་གྱིས་སློབ་ཆེན་ལོ་རིམ་དང་པོའི་སློབ་མ་གསར་པར་བཀོད་སྒྲིག་བྱས་པའི་གྲངས་འཛིན་བྱང་ཚད་མཐོར་གཏོང་གི་སློབ་ཚན་ཞིག་ཡིན་ཞིང་། 2023ལོ་ནས་བཟུང་སློབ་ཚན་དེ་ཀུའེ་ཀྲོའུ་ཚོང་ལས་སློབ་གླིང་དང་ཀུའེ་ཀྲོའུ་ནོར་དཔལ་སློབ་ཆེན་སོགས་ཀུའེ་ཀྲོའུ་ཞིང་ཆེན་གྱི་སློབ་ཆེན་10ལ་ཕྱོགས་ནས་ཁྱབ་གདལ་བཏང་བ་དང་སློབ་མ་གསར་པ་ཁྲི་3.8ལྷག་ཙམ་གྱིས་འབྲེལ་ཡོད་ལས་སྟེགས་ཐོག“སློབ་མ་གསར་པའི་གྲངས་འཛིན་བྱང་ཚད་ཀྱི་སློབ་ཚན་དང་པོ”ཉན་ནས་གྲངས་འཛིན་ཅན་གྱི་སློབ་སྦྱོང་ནུས་པ་ཆེ་རུ་བཏང་བ་རེད།

ཤེས་རྟོགས་བྱུང་བར་གཞིགས་ན། “སྒོ་དབྱེ་རྣམ་པའི་དྲ་རྒྱའི་སློབ་ཚན་ཆེན་པོ་ནུབ་རྒྱུད་དུ་སྤེལ་བའི་འཆར་གཞི”ལག་བསྟར་བྱས་ཚུན། ཤར་རྒྱུད་ས་ཁུལ་གྱི་མཐོ་སློབ་ཀྱིས་རིམ་རྩིས་བྱས་ན་ནུབ་རྒྱུད་ཀྱི་མཐོ་སློབ་ལ་སྒོ་དབྱེ་རྣམ་པའི་དྲ་རྒྱའི་སློབ་ཚན་ཁྲི་20.7མཁོ་འདོན་དང་དེ་བཞིན་དྲ་ཐོག་སློབ་ཚན་གྱི་ཞབས་འདེགས་ཞུས་པར་ནུབ་རྒྱུད་ཀྱི་སློབ་མ་མི་ཐེངས་དུང་ཕྱུར་5.9ལ་ཕན་པ་ཐོབ་པ་རེད།

ཁྲུང་ཆིང་དུ་ལི་ཅ་བློ་རིག་སྤྱི་གླིང་གིས“5G+ཟོག་འབྲེལ་དྲ་རྒྱ”བརྗོད་དོན་གཙོ་བོར་བྱས་པའི་བློ་རིག་སྤྱི་གླིང་བསྐྲུན་ནས་ལྟ་སྐོར་བ་ཚོས་གྲངས་འཛིན་འཚོ་བ་དང་འབྲེལ་བ་ཡོད་པའི་ཤེས་བྱ་དང་རྩལ་ནུས་གསོན་ཉམས་དོད་པོས་སློབ་སྦྱོང་བྱ་རྒྱུར་རོགས་རམ་བྱས་པ་དང་། ཉིང་ཞ་རུ་ཉིང་ཞ་གཞོན་ནུ་ལོ་ཆུང་གི་ཚན་རྩལ་སློབ་གསོ་དང་ཚན་རིག་ཁྱབ་གདལ་བྱེད་སྒོའི་དྲ་ཐོག་ཞབས་ཞུའི་ལས་སྟེགས་ཀྱིས་གཞོན་ནུ་ལོ་ཆུང་ལ་གྲངས་འཛིན་སློབ་ཚན་མཁོ་འདོན་བྱས་པ། ཤིན་ཅང་དུ་ཤིན་ཅང་སློབ་གསོ་སློབ་གླིང་ཚོད་ལྟའི་སློབ་ཆུང་གིས་སློབ་མ་སྒྲིག་འཛུགས་བྱས་ཏེ་ཤིན་ཅང་ཚན་རྩལ་ཁང་དུ་བསྐྱོད་དེ“ཚན་རྩལ་ལྟ་སྦྱོང་ཉིན་གཅིག”གི་བྱེད་སྒོ་སྤེལ་བ་རེད།

གྲངས་འཛིན་རྩལ་ནུས་ཞིང་པའི་ཕྱུག་འགྱུར་ནུས་པ་གསར་པར་བསྒྱུར་བ།

བསྡོམས་རྩིས་བརྒྱབ་པར་གཞིགས་ན། 2023ལོའི་ལོ་མཇུག་བར་རང་རྒྱལ་གྱི་གྲོང་གསེབ་ས་ཁུལ་དུ་དྲ་སྦྲེལ་ཁྱབ་གདལ་གཏོང་ཚད་66.5%ཟིན་ཡོད། གྲངས་འཛིན་ལག་རྩལ་དེ་སྔར་བྱུང་མྱོང་མེད་པའི་མྱུར་ཚད་ཐོག་ནས་གྲོང་གསེབ་ས་ཁུལ་དུ་ཁྱབ་གདལ་བཏང་སྟེ། གྲོང་གསེབ་ས་ཁུལ་གྱི་མང་ཚོགས་ཀྱི་གྲངས་འཛིན་བྱང་ཚད་དང་རྩལ་ནུས་གོང་མཐོར་གཏོང་བཞིན་ཡོད་པ་དང་དགོས་མཁོ་ཉིན་བཞིན་ཆེ་རུ་འགྲོ་བཞིན་ཡོད།

“མཁོ་མཁན་གྱི་དགོས་མཁོར་དབྱེ་ཞིབ་ཇི་ལྟར་བྱེད་པ་དང་ཐོན་ཟོག་བྲིན་ཁ་རྒྱུག་པོ་ཡོང་བ་ཇི་ལྟར་བྱ་རྒྱུ་དེ་ཐོན་ཟོག་བྲིན་ཚོང་ཁྲོད་ཀྱི་འགག་རྩ་རེད”ཅེས་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཀྲོའུ་རུ་ཡུལ་མི་སྒྲོལ་མས་ཐད་གཏོང་ཟོག་ཚོང་སྐོར་གྱི་གསོ་སྦྱོང་འཆད་ཁྲིད་ཅིག་ཉན་བཞིན་ཡོད།

གསོ་སྦྱོང་སློབ་ཚན་དེ་ནི་གྲོང་གསེབ་ཀྱི་བུད་མེད་ལ་དཔལ་འབྱོར་ནུས་པ་སྦྱིན་པའི་རྣམ་གྲངས་ཤིག་རེད། ངོ་སྤྲོད་བྱས་པར་གཞིགས་ན། རྣམ་གྲངས་དེས“དྲ་ཐོག་དང་དྲ་ཕྱི་གཉིས་ཀྱི་ལས་གཏོད་ནུས་སྤྲོད་གསོ་སྦྱོང་དང་། བུད་མེད་ཀྱི་ལས་གཏོད་གསོ་སྦྱོང་མཛུབ་ཁྲིད། ལས་གཏོད་གཉེར་སྐྱོང་ཐོན་ཁུངས་སྦྲེལ་མཐུད་བཅས་ཟུང་དུ་འབྲེལ་བའི་རྣམ་པ་སྤྱད་དེ་སི་ཁྲོན་དང་། ཀུའེ་ཀྲོའུ། ཡུན་ནན། ཧྲའན་ཤིས། ཀན་སུའུ་སོགས་ཞིང་ཆེན་མང་པོའི་གྲོང་གསེབ་ཀྱི་བུད་མེད་ལ་གྲངས་འཛིན་བྱང་ཚད་དང་རྩལ་ནུས་མཐོར་གཏོང་དང་དེ་བཞིན་ལས་ཞུགས་ལས་གཏོད་ཀྱི་གསོ་སྦྱོང་བྱེད་ཀྱི་ཡོད་པ་རེད།

དྲ་ཐོག་ཏུ་ཐད་གཏོང་བྱེད་པ་ཕུད་གྲོང་གསེབ་ས་ཁུལ་དུ་རིག་ནུས་སྒྲིག་ཆས་བེད་སྤྱོད་དང་དྲ་རྒྱ་དང་གྲངས་གཞིའི་བདེ་འཇགས་སོགས་རྒྱུན་གཏན་གྱི་གྲངས་འཛིན་འཚོ་བ་དང་འབྲེལ་བ་ཡོད་པའི་ཤེས་བྱ་ཁྱབ་གདལ་གྱི་བྱེད་སྒོ་ཡང་ཇེ་མང་དུ་འགྲོ་བཞིན་ཡོད།

གྲངས་འཛིན་སྤྱི་ཚོགས་ནང་མི་ཚང་མ་ཞུགས་པ་དང་གྲངས་འཛིན་གྲུབ་འབྲས་ཚང་མས་ལོངས་སུ་སྤྱོད། གྲངས་འཛིན་ཐོན་ཁུངས་མཁོ་སྤྲོད་ཉིན་བཞིན་ཕུན་སུམ་ཚོགས་སུ་འགྲོ་བ་དང་། གྲངས་འཛིན་འཕེལ་རྒྱས་ཁོར་ཡུག་རིམ་བཞིན་ལེགས་སུ་འགྲོ་བ། དམངས་ཡོངས་ཀྱི་གྲངས་འཛིན་བྱང་ཚད་དང་རྩལ་ནུས་གོང་མཐོར་རྒྱུན་ཆད་མེད་པར་འགྲོ་བ་བཅས་དང་བསྟུན་ནས་གྲངས་འཛིན་ཤེས་དཔལ་གྱི་འོད་སྣང་མི་དེ་བས་མང་བའི་འཚོ་བར་འཕྲོ་ངེས་རེད།