མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཟླ་10ཚེས་9ཉིན་གསར་འགོད་པར་མཚོ་སྔོན་ཞིང་ཆེན་དམངས་གཉེར་ཁེ་ལས་ཀྱི“ཁེ་ལས་བརྒྱ་ཡིས་གྲོང་ཚོ་བརྒྱ་དར་རྒྱས་གཏོང་བའི”བྱ་སྤྱོད་ཀྱི་ས་གནས་ས་ཐོག་གི་སྐུལ་སྤེལ་ཚོགས་འདུའི་ཐོག་ནས་ཤེས་རྟོགས་བྱུང་བར། ཞིང་ཆེན་ཡོངས་ཀྱི“ཁེ་ལས་བརྒྱ་ཡིས་གྲོང་ཚོ་བརྒྱ་དར་རྒྱས་གཏོང་བའི”བྱ་སྤྱོད་ཀྱི་འགོ་ཁྲིད་ཚོགས་ཆུང་གིས་རྒྱལ་ཡོངས་ཀྱི“ཁེ་ལས་ཁྲི་ཡིས་གྲོང་ཚོ་ཁྲི་དར་རྒྱས་གཏོང་བའི”བྱ་སྤྱོད་ཀྱི་དམིགས་ཚད་ལས་འགན་དོན་འཁྱོལ་བྱེད་ཤུགས་ཆེ་རུ་བཏང་ནས“ཁེ་ལས་བརྒྱ་ཡིས་གྲོང་ཚོ་བརྒྱ་དར་རྒྱས་གཏོང་བའི”བྱ་སྤྱོད་ལ་གོ་རིམ་ལྡན་པའི་ངང་སྐུལ་འདེད་བཏང་ཡོད། 2024ལོར་ཞིང་ཆེན་དེ་ཡོངས་སུ་དམངས་གཉེར་ཁེ་ལས་63སྲིད་འཛིན་གྲོང་ཚོ་105ཡི་ཆ་སྒྲིག་རོགས་སྐྱོར་ནང་གསར་དུ་ཞུགས་ནས་མ་དངུལ་སྒོར་དུང་ཕྱུར་4.3བཏང་བ་དང་། མི་2046ལས་ཞུགས་བྱེད་པར་སྐུལ་ཁྲིད་བྱས་པ། འཛད་སྤྱོད་རོགས་སྐྱོར་སྒོར་ཁྲི་1488.6ཟིན་པ། སྤྱི་ཕན་ཞལ་འདེབས་སྒོར་ཁྲི་340.38བརྒྱབ་པ་བཅས་རེད།

ཞིང་ཆེན་ཡོངས་ཀྱི“ཁེ་ལས་བརྒྱ་ཡིས་གྲོང་ཚོ་བརྒྱ་དར་རྒྱས་གཏོང་བའི”བྱ་སྤྱོད་སྤེལ་ཚུན། བྱ་སྤྱོད་ལམ་ལུགས་ཀྱི་སྒྲོམ་གཞི་ཟམ་མི་ཆད་པར་འཐུས་སྒོ་ཚང་དུ་ཕྱིན་པ་དང་། རྩེ་རིམ་ཇུས་འགོད་གཞི་རྩའི་ཆ་ནས་ལེགས་གྲུབ་བྱུང་བ། གཙོ་གནད་བཀོད་སྒྲིག་གཞི་རྩའི་ཆར་དོན་འཁྱོལ་བྱུང་བ། གྲོང་ཁྱེར་དང་ཀྲོའུ་ཡི་ཁྱད་ཆོས་ཟམ་མི་ཆད་པར་མངོན་པ། ཞབས་འདེགས་ལ་རྒྱབ་སྐྱོར་བྱ་རྒྱུར་སྔར་བས་དངོས་སྒྲུབ་ནུས་ལྡན་བཅས་བྱུང་ཡོད། འགོ་ཁྲིད་ཚོགས་ཆུང་གི་ཁོངས་མིའི་ཚན་པ་ཁག་གིས་འགན་ནུས་དང་འགན་འཁྲིར་དམིགས་པ་དང་། ཚན་པའི་དགེ་མཚན་མངོན་པ། ལས་ཀ་བྱེད་སྟངས་གསར་གཏོད་བྱེད་པ། ཐབས་མང་མཉམ་སྤྱོད་ཀྱིས་ཞབས་འདེགས་ལ་ཤུགས་སྣོན་རྒྱག་པ་བཅས་བྱས་ཏེ་བྱ་སྤྱོད་གཏིང་ཟབ་སྤེལ་བར་རྒྱབ་སྐྱོར་བཅས་བྱས་ཡོད། ཞིང་ཨུད་གྲོང་གསེབ་ལས་དོན་སྡེ་ཚན་གྱིས་སྣེ་ཁྲིད་ནས་ཞིང་ཨུད་ཀྱི་ཡིག་ཆ་ཨང་དང་པོ་དང་། ས་མཐོའི་གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་འཛུགས་སྐྲུན་གྱི་ལོ་ལྔའི་བྱ་སྤྱོད་ཇུས་གཞི། “ཞིང་ལས་དང་། ལུས་རྩལ། རིག་གནས། ཡུལ་སྐོར། ཚོང་ལས”བཅས་ཀྱི་ཐོན་ལས་མཉམ་འདྲེས་འཕེལ་རྒྱས་ཀྱི་ཚོད་ལྟའི་ལས་ཀའི་ཇུས་གཞི་སོགས་སྲིད་ཇུས་རང་བཞིན་གྱི་ཡིག་ཆ་རབ་དང་རིམ་པ་བཟོས་ནས་བཏོན་པ་དང་། ཞིང་ཆེན་ཞིང་ལས་དང་གྲོང་གསེབ་ཐིང་གིས་ཁྱད་ལྡན་གསོ་ཚགས་དང་། སྤྲོ་གསེང་ཡུལ་སྐོར། གྲོང་གསེབ་ཀྱི་དྲ་ཐོག་ཚོང་དོན་སོགས་གཙོ་གནད་ཁྱབ་ཁོངས་ལ་དམིགས་ཏེ། རིམ་རྩིས་བྱས་ན་མ་དངུལ་སྒོར་དུང་ཕྱུར་1.2གཏོང་རྒྱུར་མཐུན་སྦྱོར་བྱས་པ། སྒོ་རའི་དཔལ་འབྱོར་འཕེལ་རྒྱས་དང་སྤྲོ་གསེང་ཐོན་ལས་རྒྱ་ཆེར་བཏང་བ། ཞིང་ཆེན་ནོར་སྲིད་ཐིང་གིས་ནོར་སྲིད་སྦྲེལ་མཐུད་ཀྱི་གྲོང་གསེབ་དར་རྒྱས་ལ་སྐུལ་འདེད་གཏོང་བའི་ཁ་གསབ་མ་དངུལ་སྒོར་དུང་ཕྱུར་68བཀོད་སྒྲིག་བྱས་པ། ཞིང་ཆེན་རིག་གནས་ཡུལ་སྐོར་ཐིང་གིས་གྲོང་གསེབ་ཀྱི་ཡུལ་སྐོར་ཚོད་ལྟའི་གྲོང་ཚོ་དང་། གྲོང་གསེབ་ཀྱི་དམངས་སྲོལ་གནས་ཚང་། ཕྱི་རོལ་གྱི་སྐྱེ་ཁམས་སྒར་ས་སོགས་འཛུགས་སྐྲུན་རྣམ་གྲངས་46དོན་འཁྱོལ་བྱས་པར་མ་དངུལ་སྒོར་དུང་ཕྱུར་2.5བཏང་བ། ཞིང་ཆེན་ཞིང་ལས་འཕེལ་རྒྱས་དངུལ་ཁང་གིས་དབུལ་སྒྲོལ་རྫོང་42སུ་རིམ་རྩིས་བྱས་ན་དངུལ་བུན་སྒོར་དུང་ཕྱུར་17.61བཏང་བ་དང་རྒྱལ་ཁབ་རིམ་པའི་གྲོང་གསེབ་དར་རྒྱས་ཀྱི་གཙོ་གནད་རྫོང་15རུ་རིམ་རྩིས་བྱས་ན་དངུལ་བུན་སྒོར་དུང་ཕྱུར་5.03བཏང་བ། ཞིང་ཆེན་ཞིང་ལས་དངུལ་ཁང་གིས་རིམ་རྩིས་བྱས་ན“ཕྱུགས་ཟོག་དངུལ་བུན”སྒོར་དུང་ཕྱུར་16.77བཏང་བར་ཁེ་ལས་དང་ཞིང་དུད་6814ལ་ཕན་པ་ཐོབ་པ། ཞིང་ཆེན་གྱི་གྲོང་གསེབ་ཡིད་རྟོན་མཉམ་ལས་ཁང་གིས་རིམ་རྩིས་བྱས་ན་དམངས་གཉེར་ཁེ་ལས་ལ་དངུལ་བུན་སྒོར་དུང་ཕྱུར་290.32བཏང་བ་བཅས་རེད། རྒྱ་ཆེའི་དམངས་གཉེར་ཁེ་ལས་ཀྱིས“ཁེ་ལས་དང་། རྟེན་གཞི། ཞིང་དུད”བཅས་ཟུང་དུ་སྦྲེལ་བ་དང་། “ཁེ་ལས་དང་། མཉམ་ལས་ཁང་། ཞིང་དུད” “ཁེ་ལས་དང་། ཞིང་པའི་བར་ཁེ་བ། ཞིང་དུད” “ཁེ་ལས་དང་། ཁྱིམ་ཚང་གི་ཞིང་ར། ཞིང་དུད”བཅས་ཟུང་དུ་སྦྲེལ་བའི་ཐོན་ལས་ཅན་གྱི་གཉེར་སྐྱོང་བྱེད་སྟངས་སྣ་ཚོགས་འཚོལ་ཞིབ་ཧུར་ཐག་བྱས་པས་ཐོན་ལས་ཁྱད་ལྡན་ཅན་དང་། མཉམ་འདུས་ཅན། ལྗང་མདོག་ཅན་བཅས་ཀྱི་འཕེལ་རྒྱས་ཉིན་བཞིན་མངོན་གསལ་དོད་དུ་ཕྱིན་ཡོད། ཁྱད་ལྡན་ཐོན་ལས་ཀྱིས་གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་ལ་སྐུལ་ཁྲིད་བྱེད་པ་དང་། གྲོང་གསེབ་ཡུལ་སྐོར་དེ་ཐོན་ལས་དང་པོ་དང་། གཉིས་པ། གསུམ་པ་བཅས་དང་མཉམ་འདྲེས་འཕེལ་རྒྱས་ཡོང་བར་སྣུར་སྲིང་བྱེད་པ།“གྲོང་ཚོ་དང་ཁེ་ལས་མཉམ་སྐྲུན”འཕེལ་རྒྱས་ཀྱིས་ཤང་ཧྲིལ་པོ་དང་རྫོང་ཧྲིལ་པོའི་འཕེལ་རྒྱས་ལ་སྐུལ་ཁྲིད་བྱེད་པ་བཅས་བྱས་ཡོད།