ཉེ་ཆར། “པི་ཡ་ཏི”དང་། “ཁྲང་ཨན” “མིང་ཅུའེ”སོགས་རང་རྒྱལ་གྱིས་བཟོས་པའི་ནུས་རྒྱུ་གསར་པའི་རླངས་འཁོར་སྐྱིད་གྲོང་འགག་སྒོར་གྲ་སྒྲིག་ཨང་བསར་བྱས་ནས་ནེ་པ་ལར་དབོར་རྩིས་ཡོད་པ་རེད། ནུས་རྒྱུ་གསར་པའི་རླངས་འཁོར་ཕྱིར་གཏོང་བྱེད་པ་དེ་སྐྱིད་གྲོང་འགག་སྒོའི་ཕྱི་ཕྱོགས་ཚོང་དོན་གྱི་བཀྲག་མདངས་འཚེར་སར་རིམ་བཞིན་གྱུར་ནས་ཕྱིར་གཏོང་གི་དུས་བབ་ལེགས་སུ་ཕྱིན་པ་དང་ཚོང་དོན་གྱི་རིན་ཐང་བསྟུད་མར་ཟིན་ཐོ་གསར་པ་བཏོད་དེ་བོད་ཀྱི་ཕྱི་ཕྱོགས་ཚོང་དོན་གྱི་འཕར་གཞི་གསར་པར་གྱུར་ཡོད།

འགག་སྒོ་ལས་ཁུངས་ཀྱིས་བསྡོམས་རྩིས་བྱས་པར་གཞིགས་ན། འདི་ལོའི་ཟླ་དང་པོ་ནས་དགུ་པའི་བར་སྐྱིད་གྲོང་འགག་སྒོས་རང་རྒྱལ་གྱིས་བཟོས་པའི་ནུས་རྒྱུ་གསར་པའི་རླངས་འཁོར་5231ཕྱིར་གཏོང་བྱས་པར་ཚོང་དོན་གྱི་རིན་ཐང་སྒོར་དུང་ཕྱུར་6.66ཟིན་ནས་ཕྱིར་གཏོང་བྱེད་ཚད་ཉེ་བའི་ལོ་གསུམ་རིང་གི་ཟིན་ཐོ་གསར་པ་བཏོད་ཡོད་པ་རེད།

“ཀྲུང་གོའི་ནུས་རྒྱུ་གསར་པའི་རླངས་འཁོར་ལ་ནེ་པ་ལ་ནས་ཧ་ཅང་དགའ་པོ་བྱེད་ཀྱི་ཡོད། མིག་སྔར་ནེ་པ་ལའི་ཁྲོམ་གཞུང་ནས་མཐོང་བའི་ནུས་རྒྱུ་གསར་པའི་རླངས་འཁོར་མང་ཆེ་བ་ནི་ཀྲུང་གོས་ཐོན་སྐྱེད་བྱས་པ་ཡིན་པ་དང་སྤུས་རྟགས་ཀྱང་རིམ་བཞིན་མང་དུ་ཕྱིན་ཡོད། ལག་རྩལ་ཡིན་ནའང་འདྲ་ཡང་ན་མཐུད་སྐྱོད་ཡིན་ནའང་འདྲ་གང་ལྟར་ཚང་མར་ཁྲོམ་རའི་འགྲན་རྩོད་ནུས་པ་ཆེ་ཙམ་ལྡན་ཡོད”ཅེས་ནུས་རྒྱུ་གསར་པའི་རླངས་འཁོར་ཕྱིར་གཏོང་སྒོ་ཁྲལ་གནས་ཞུ་ཀུང་སིའི་ལས་ཚབ་ལས་དོན་པ་ལི་ཁྲའོ་ཧྭ་ཡིས་བརྗོད།

ངོ་སྤྲོད་བྱས་པར་གཞིགས་ན། ནུས་རྒྱུ་གསར་པའི་རླངས་འཁོར་ཕྱིར་གཏོང་ལ་རམ་འདེགས་བྱ་ཆེད། སྐྱིད་གྲོང་འགག་སྒོས་རང་རྒྱལ་གྱིས་བཟོས་པའི་ནུས་རྒྱུ་གསར་པའི་རླངས་འཁོར་བཟོ་སྐྲུན་ལས་རིགས་འཕེལ་རྒྱས་མགྱོགས་མྱུར་ཕྱིན་པ་དང་དེ་བཞིན་ནེ་པ་ལའི་ནུས་རྒྱུ་གསར་པའི་རླངས་འཁོར་གྱི་དགོས་མཁོ་ཆེ་རུ་ཟམ་མི་ཆད་པར་འགྲོ་བའི་དོན་དངོས་དང་ཟུང་འབྲེལ་གྱིས《ནུས་རྒྱུ་གསར་པའི་རླངས་འཁོར་ནུས་ཆེའི་ཕྱིར་གཏོང་ལ་རྒྱབ་སྐྱོར་བྱེད་པའི་བྱ་ཐབས་ཁག་དྲུག》བཏོན་པ་རེད། རང་རྒྱལ་གྱིས་བཟོས་པའི་ནུས་རྒྱུ་གསར་པའི་རླངས་འཁོར་ཕྱིར་གཏོང་འདུན་ཞུའི་ཆེད་དོན་སྐར་ཁུང་བཙུགས་ནས་རང་རྒྱལ་གྱིས་བཟོས་པའི་ནུས་རྒྱུ་གསར་པའི་རླངས་འཁོར་ཕྱིར་གཏོང་ཐད་ཆུ་ཚོད་24ཡི་རིང་གི་ལྗང་མདོག་བགྲོད་ལམ་བཏོད་དེ“སྔ་སྣུར་དུ་འདུན་ཞུ་དང་། འབྱོར་མ་ཐག་ཞིབ་བཤེར། དཔང་ཡིག་རྐྱང་པར་བརྟེན་ནས་སྔོན་ཚུད་ཞིབ་དཔྱད”སོགས་སྟབས་བདེའི་བྱ་ཐབས་ལག་ལེན་བསྟར་རྒྱུ་ཡིན་པ་རེད། བོད་རང་སྐྱོང་ལྗོངས་ཀྱིས་རང་རྒྱལ་གྱིས་བཟོས་པའི་ནུས་རྒྱུ་གསར་པའི་རླངས་འཁོར་ཕྱིར་གཏོང་བྱེད་པའི“གཞུང་ལམ་དང་ལྕགས་ལམ་མཉམ་སྐྱེལ”བྱེད་སྟངས་ཐོག་མར་གསར་གཏོད་བྱས་ནས་རང་རྒྱལ་གྱིས་བཟོས་པའི་ནུས་རྒྱུ་གསར་པའི་རླངས་འཁོར་ཐོན་སྐྱེད་འཁོར་ཁང་ནས་འགག་སྒོ་བར་དུ་ནེ་པ་ལར་ཕྱིར་གཏོང་བྱེད་པར་ཉིན་10ཙམ་ལས་འགོར་གྱི་མེད་པས་ཁེ་ལས་ཀྱི་ཟོག་འགྲེམས་མ་གནས་ཆུང་དུ་ངེས་ཅན་ཕྱིན་ཡོད་པ་རེད།