ས་མིང་ནི་གྲོང་གསེབ་བཅོས་སྐྱོང་དང་མང་ཚོགས་ཀྱི་ཐོན་སྐྱེད་དང་འཚོ་བ་དང་ཁ་འབྲལ་ཐབས་མེད་པའི་རྨང་གཞིའི་ཆ་འཕྲིན་ཡིན། ཉེ་བའི་ལོ་ཤས་རིང་། གྲོང་གསེབ་ས་ཆའི་ངེས་གནས་ཞིབ་ཕྲ་བའི་མི་རྣམས་ཀྱི་དགོས་མཁོ་ཇེ་ཆེར་འགྲོ་བཞིན་ཡོད་པས། གྲོང་ཚོ་ཞིག་ལ་གྲོང་ཚོའི་མིང་ཡོད་པ་ཙམ་གྱིས་དགོས་མཁོ་སྐོང་ཐུབ་ཀྱི་མེད། གྲོང་ཚོའི་ཉེ་འཁོར་གྱི་འགྲོ་ལམ་དང་། གྲོང་ཚོའི་སྲང་ལམ། རི་ཆུ་ནགས་ཞིང་མཚེའུ་རྩྭ་བྱེ་བཅས་དང་དེ་བཞིན་སྒྲིག་བཀོད་སྣ་ཚོགས་ཚང་མར་ཚད་དང་ལྡན་པའི་མིང་འདོགས་དགོས་ཀྱི་ཡོད། ཉིན་ཤས་གོང་། དམངས་སྲིད་པུའི་འབྲེལ་ཡོད་འགན་འཁུར་བས་ན་ནིང་ནས་བཟུང“གྲོང་གསེབ་ཀྱི་མིང་འདོགས་བྱ་སྤྱོད”སྤེལ་འགོ་ཚུགས་པ་ནས་འདི་ལོའི་ཟླ་8པའི་བར་རྒྱལ་ཡོངས་སུ་གྲོང་གསེབ་ཀྱི་ས་མིང་ཁྲི་43ཚད་ལྡན་དུ་བཏང་བ་དང་གྲོང་གསེབ་ཀྱི་ས་མིང་མཚོན་རྟགས་ཁྲི་33བཙུགས་ཡོད་ཅེས་ངོ་སྤྲོད་བྱས་པ་རེད།

“གྲོང་གསེབ་ཀྱི་མིང་འདོགས་བྱ་སྤྱོད”སྤེལ་བའི་བརྒྱུད་རིམ་ནང་ས་ཁུལ་ཁག་གིས“མིང་མེད་པའི་ས་ཆ”དང་། “ས་ཆ་གཅིག་ལ་མིང་མང་བ” ས་མིང་ཚད་ལྡན་མེད་པ་སོགས་ཀྱི་གནད་དོན་ལ་གྲལ་བཤེར་བྱས་པ་རེད། “མིང་མེད་པའི་ས་ཆར”ཚད་ལྡན་གྱི་མིང་བཏགས་པ་མ་ཟད། ལམ་བྱང་དང་། སྲང་ལམ་གྱི་བྱང་བུ། ཐོག་ཁང(སྒོ་རྟགས)བྱང་བུ་བཅས་ཚད་ལྡན་བཟོས་ཡོད། དམངས་སྲིད་པུའི་འབྲེལ་ཡོད་འགན་འཁུར་བས་ངོ་སྤྲོད་བྱས་པར་གཞིགས་ན། འདི་ལོའི་ཟླ་8པའི་བར་རྒྱལ་ཡོངས་སུ་ཐོག་ཁང་གི་བྱང་བུ་དང་སྒོ་རྟགས་ཁྲི་1442བསྒར་བ་དང་གྲོང་གསེབ་ཁུལ་དུ“མིང་མེད་པའི་ས་ཆ”དང“ས་ཆ་གཅིག་ལ་མིང་མང་བ”སོགས་ཀྱི་གནད་དོན་རྒྱུན་མཐུད་ལེགས་བཅོས་བྱས་ཡོད་པ་རེད། ས་གནས་ཁག་གཅིག་ཏུ་ད་དུང་རྩ་གཉིས་ཨང་རྟགས་ཀྱི་མཚོན་བྱང་བཙུགས་ཡོད་པས་རྩ་གཉིས་ཨང་རྟགས་བཤེར་ན་དྲ་ཐོག་ནས་ལས་དོན་སྒྲུབ་ཐུབ་ཀྱི་ཡོད་པ་རེད།