ས་བབ་མཐོ་ཚད་སྨི་4300ཡན་གྱི་ས་མཐོའི་སྐོར་གླེང་སྐབས་མི་མང་པོ་ཞིག་གི་བག་ཆགས་ཟབ་ཤོས་ནི་རང་བྱུང་ཁོར་ཡུག་ཞན་པ་དང་། ས་རྒོད་སྐྱ་མོ། བྱེ་རླུང་འཚུབ་པ་བཅས་ཡིན་སྲིད། འོན་ཀྱང་གཞིས་རྩེ་གྲོང་ཁྱེར་གཏིང་སྐྱེས་རྫོང་ཀོ་ལྕག་ཤང་དུ་རྣམ་པ་གཞན་ཞིག་མཐོང་རྒྱུ་འདུག ཉེ་ཆར། གསར་འགོད་པ“ཇོ་རིའི་བུ་ཕྲུག་ཚོས་བསྐལ་བཟང་བསུ། རྒྱང་ལམ་གསར་པར་འབད་འབུངས་བྱེད”ཅེས་པའི་བཅར་འདྲི་ཚོགས་ཆུང་དང་མཉམ་དུ་ཀོ་ལྕག་ཤང་དུ་སྐྱོད་སྐབས་དེ་སྔའི་སྐྱ་ཐེར་ཐེར་གྱི་བྱེ་ཐང་དུ་སྐྱེ་སྟོབས་ཀྱི་དཔལ་འབར་བའི་གླ་ཚེར་གྱི་ནགས་ཚལ་ཡོད་པ་མཐོང་བྱུང་།

ས་བབ་མཐོ་བའི་ས་ཆར་ཤིང་འཛུགས་ནགས་བཟོ་བྱེད་པར་དཀའ་ངལ་ཇི་ཙམ་ཡོད་དམ་ཞེ་ན། “རླུང་བུ་ལྡང་ཚེ་རྡོ་གསེག་འཁྱེར། ས་རྒོད་སྐྱ་མོར་རྩྭ་མི་སྐྱེ”འདི་ནི་དེ་སྔ་ས་ཆ་འདིའི་རྣམ་པ་རེད། མཉམ་དུ་ཡོད་པའི་ལས་དོན་པས་ངོ་སྤྲོད་བྱས་པར་གཞིགས་ན། ས་ཆ་འདི་གར་རྡོ་གསེག་དང་གྲམ་རྡོ་མང་བ་དང་བྱེ་རླུང་ལྡང་ཆེ་བས་བཞའ་ཚན་དང་ས་བཅུད་ཤོར་བའི་སྣང་ཚུལ་ཚབས་ཆེན་པོ་ཡོད། ཤིང་འཛུགས་ནགས་བཟོ་བྱེད་ཐེངས་རེ་ནི་ས་གནས་དེ་གའི་ལས་བྱེད་པ་དང་མང་ཚོགས་ཀྱི་ངོས་ནས་བརྗོད་ན་འགྲན་སློང་ཧ་ཅང་ཆེན་པོ་ཞིག་རེད།

འོན་ཀྱང་ཀོ་ལྕག་ཤང་ཏང་ཨུད་དང་སྲིད་གཞུང་གིས་ཕྱིར་བཤོལ་མ་བརྒྱབ་པར་དཀའ་ངལ་གདོང་་བསུས་ཀྱིས་ལས་བྱེད་པ་དང་མང་ཚོགས་མཉམ་དུ་ཤིང་འཛུགས་ནགས་བཟོ་བྱས་ནས་ས་གནས་དེ་གའི་སྐྱེ་ཁམས་དང་སྡོད་མལ་ཁོར་ཡུག་ལེགས་སུ་བཏང་བ་རེད།

“གནམ་གཤིས་ངན་པས་མང་ཚོགས་ཀྱི་ཐོན་སྐྱེད་དང་འཚོ་བར་ཤུགས་རྐྱེན་ཆེན་པོ་ཐེབས་ཡོད། ཕྱོགས་མང་པོ་ནས་བརྟག་ཞིབ་བྱས་པ་བརྒྱུད་ང་ཚོས་2022ལོའི་ཟླ་4པ་ནས་བཟུང་གསོན་ཚད་མཐོ་བ་དང་འཕྲོད་ཚད་ཡག་པའི་གླ་ཚེར་སྡོང་སོན་1000ཚོད་འདེབས་བྱས་པ་ཡིན། ཚང་མའི་སེམས་ཤུགས་གཅིག་སྒྲིལ་འོག་གླ་ཚེར་སྡོང་སོན་1000ཚོད་འདེབས་ལེགས་སྒྲུབ་བྱུང་བ་རེད། དེས་ན་ང་ཚོས་འདེབས་འཛུགས་གཞི་ཁྱོན་མུ་མཐུད་ཆེ་རུ་བཏང་བས་མིག་སྔའི་བར་འདེབས་འཛུགས་བྱེད་ཚད་ཁྲི་1.3ལྷག་ཙམ་ཟིན་ཡོད”ཅེས་ཀོ་ལྕག་ཤང་ཏང་ཨུད་ཀྱི་ཧྲུའུ་ཅི་ལི་ཁྲེན་གྱིས་ངོ་སྤྲོད་བྱས།

སྡོང་སོན་འདེབས་འཛུགས་ལེགས་སྒྲུབ་བྱུང་ཡང་ཕྱིན་ཆད་བདག་སྐྱོང་བྱ་རྒྱུ་དེ་ཤང་ཏང་ཨུད་དང་སྲིད་གཞུང་ལ་འཕྲད་པའི་དཀའ་གནད་གཞན་ཞིག་ཏུ་གྱུར།

“ང་ཚོས‘གྲོག་མའི་ནགས་ཚལ’རྣམ་གྲངས་ཀྱི་ཉམས་མྱོང་དཔྱད་གཞིར་བཟུང་ནས་ལས་བྱེད་ལས་བཟོ་དང་སྤྱི་ཚོགས་ཀྱི་གཅེས་སེམས་མི་སྣས‘རང་མོས་ངང་གསོ་ཉར་དང་ཞལ་འདེབས་དངུལ་གྲབས་གསོག་བྱེད་པའི’རྣམ་པ་བཏོན་ཡོད། གསོ་ཉར་བྱེད་མཁན་གྱིས་སྡོང་སོན་ལ་མིང་འདོགས་པ་དང་གསོ་ཉར་གྱི་གློག་རྡུལ་ལག་ཁྱེར་ལེན་ཆོག་ལ་སྐད་འཕྲིན་སྤྱི་རྟགས་ནས་གསོ་ཉར་གྲོན་དངུལ་སྤྱོད་ཚུལ་དང་དེ་བཞིན་སྡོང་སོན་སྐྱེ་ཚུལ་ལ་ལྟ་ཆོག”ཅེས་ཀོ་ལྕག་ཤང་སྐྱེ་ཁམས་ལས་དོན་གྱི་འགན་གཉེར་ཤང་ཀྲང་གཞོན་པ་བཀྲ་ཤིས་ཀྱིས་དེ་ལྟར་བརྗོད།

མིག་སྔའི་བར་ས་གནས་དེ་གའི་ལས་བྱེད་ལས་བཟོ་དང་སྤྱི་ཚོགས་ཐོག་གི་གཅེས་སེམས་མི་སྣ་200ལྷག་ཙམ་གྱིས་སྡོང་སོན་རྐང་446གསོ་ཉར་བྱས་པ་དང་ཞལ་འདེབས་དངུལ་སྒོར་ཁྲི་4ལྷག་ཙམ་གྲབས་གསོག་བྱས་ཡོད་པ་རེད།

གྲབས་གསོག་བྱས་པའི་དངུལ་རྣམས་ས་གནས་དེ་གའི་སྐྱེ་ཁམས་མཉམ་ལས་ཁང་གིས་གཅིག་གྱུར་ཐོག་དོ་དམ་དང་བེད་སྤྱོད་བྱས་པས་སྡོང་སོན་བདག་སྐྱོང་གི་ཆུ་ཚད་མཐོ་རུ་ནུས་ལྡན་ཕྱིན་ཡོད་པ་རེད།

ཀོ་ལྕག་ཤང་གྲུ་ཁ་གྲོང་ཚོའི་གྲོང་མི་ཁྱུང་མོས“ལོ་ལྟར་གྱི་སྐྱེ་ཁམས་ལས་གནས་ཀྱི་ཁ་གསབ་རོགས་དངུལ་ཕུད། ངས་ད་དུང་མཉམ་ལས་ཁང་དུ‘ཤིང་ནགས’བདག་སྐྱོང་གི་འགན་འཁུར་གྱི་ཡོད་པས། ལག་རྩལ་སྦྱོང་ཐུབ་པ་མ་ཟད། ཟླ་རེའི་ཡོང་འབབ་ཀྱང་མང་དུ་ཕྱིན་སོང”ཞེས་བཤད།

གླ་ཚེར་བཏབ་པ་བརྒྱུད་ཀོ་ལྕག་ཤང་གི་སྔོ་ཁེབས་ཁྱབ་ཚད་མངོན་གསལ་དོད་པོས་མཐོ་རུ་ཕྱིན་ཡོད་པ་རེད། “གླ་ཚེར་མང་དུ་འགྲོ་བ་དང་བསྟུན་ནས་ཐལ་རྡུལ་ཉུང་དུ་ཕྱིན་ནས་འཚོ་བར་ཤུགས་རྐྱེན་ཐེབས་ཚད་ཀྱང་རིམ་བཞིན་ཆུང་དུ་འགྲོ་གི་ཡོད། དེ་ནི་སྔ་ལྟས་ཡག་པོ་ཞིག་རེད”ཅེས་གྲུ་ཁ་གྲོང་ཚོའི་གྲོང་མི་ཕུར་བུ་ཚེ་རིང་གིས་རེ་བས་ཁེངས་བཞིན་བཤད།