ཧྲེན་དབྱང་གིས་རྩལ་ནུས་འགྲན་བསྡུར་ཆེན་པོའི་གྲུབ་འབྲས་གཞན་སྒྱུར་ནུས་ལྡན་ཐུབ་པར་སྐུལ་འདེད་བཏང་བ།
ད་ལོ་ནས་བཟུང་། ལེའོ་ཉིང་ཞིང་ཆེན་ཧྲེན་དབྱང་གྲོང་ཁྱེར་གྱིས་བྱ་ཐབས་མང་པོ་སྤྱད་དེ་རྩལ་ནུས་འགྲན་བསྡུར་ཆེན་པོའི་གྲུབ་འབྲས་གཞན་སྒྱུར་ནུས་ལྡན་ཡོང་བར་སྐུལ་འདེད་བཏང་ཡོད། མིག་སྔའི་བར། ཧྲེན་དབྱང་གྲོང་ཁྱེར་གྱིས་གཉེར་བའི་རིམ་ཁག་རྩལ་ནུས་འགྲན་བསྡུར་ཁྲོད་ནས་གྲུབ་འབྲས་ཁག་160ལྷག་ཙམ་གཞན་སྒྱུར་ནུས་ལྡན་དང་ཁྱབ་གདལ་ཐུབ་ནས་ཐོན་སྐྱེད་སྒྲུབ་རིམ་དང་པོར་བསྐྱལ་བ་རེད།
“ང་ཚོས་འགྲན་བསྡུར་ཆེན་པོ་བྱ་ཡུལ་སློབ་ཁྲིད་བྱ་ཡུལ་དུ་བསྒྱུར་ནས་འགྲན་བསྡུར་ཆེན་པོའི་ཚད་གཞི་སློབ་ཁྲིད་ཀྱི་ཚད་གཞིར་སྒྱུར་བ་དང་འབྲེལ་སློབ་གསོའི་འཁོར་འབྲེལ་དང་། ཐོན་ལས་ཀྱི་འཁོར་འབྲེལ། ཤེས་ལྡན་པའི་འཁོར་འབྲེལ། དེ་བཞིན་གསར་གཏོད་ཀྱི་འཁོར་འབྲེལ་བཅས་བསྡུ་སྒྲིལ་དམ་ཟབ་བྱས་ཏེ་རྩལ་ནུས་འགྲན་བསྡུར་ཆེན་པོའི་གྲུབ་འབྲས་གཞན་སྒྱུར་ལ་འདེགས་སྐྱོར་ནུས་ལྡན་བྱེད་ཀྱི་ཡིན”ཞེས་ཧྲེན་དབྱང་གྲོང་ཁྱེར་མི་སྤྱི་ཅུས་ཀྱི་ཏང་ཙུའི་ཧྲུའུ་ཅི་དང་ཅུས་ཀྲང་ཝང་ཀྲི་ཀང་གིས་བརྗོད།
ཧྲེན་དབྱང་གིས་ཤེས་ལྡན་པའི་འཁོར་འབྲེལ་སྣེ་འདྲེན་དུ་བྱས་ཏེ་ཐོན་ལས་འཁོར་འབྲེལ་ལ་ཞབས་འདེགས་ཞུ་བ་དང་། སློབ་གསོའི་འཁོར་འབྲེལ་ལེགས་སུ་གཏོང་བ། གསར་གཏོད་ཀྱི་འཁོར་འབྲེལ་ལ་སྐུལ་སློང་བྱེད་པ་བཅས་ཀྱི་མཉམ་འདྲེས་འཕེལ་རྒྱས་ལམ་སྲོལ་བཙུགས་པ་བརྒྱུད། ཉེ་འཁོར་གྱི་ས་གནས་རིམ་པའི་གྲོང་ཁྱེར་མཉམ་དུ་ཞུགས་པའི“སྲིད་གཞུང་དང་། སློབ་གྲྭ ཁེ་ལས”བཅས་ཀྱི་གནའ་འབྲེལ་བཙུགས་ཏེ་སློབ་ཁེ་མཉམ་ལས་ཀྱི་ལས་སྟེགས་བསྐྲུན་ནས་ཁྲོམ་རའི་ཐོན་ཁུངས་བཀོད་སྒྲིག་དང་སྲིད་གཞུང་གི་སྲིད་ཇུས་ཀྱི་མཛུབ་ཁྲིད་ལ་བརྟེན་ནས་རྟེན་གཞི་དང་། མི་སྤྱོད། དགེ་རྒན། གསོ་སྦྱོང་། འགྲན་བསྡུར་ཆེན་པོའི་གྲུབ་འབྲས་བཅས་ཕྱོགས་ལྔ་ཡི་ཐད་ཐོན་ཁུངས་མཉམ་སྤྱོད་ཐུབ་པར་བྱས་ཡོད།
ཧྲེན་དབྱང་གིས་ད་དུང་ལག་རྩལ་བཟོ་པའི་སློབ་གླིང་གི་སློབ་ཁྲིད་སྒྱུར་བཅོས་ལ་སྐུལ་འདེད་ཧུར་ཐག་བཏང་ནས་འགྲན་བསྡུར་གྱི་ཚད་གཞི་དང་སློབ་ཁྲིད་ཀྱི་ཚད་གཞི་དང་། འགྲན་བསྡུར་བྱ་ཡུལ་དང་སློབ་ཁྲིད་བྱ་ཡུལ། འགྲན་བསྡུར་དངོས་སྦྱོང་བྱེད་སྟངས་དང་སློབ་ཁྲིད་དངོས་སྦྱོང་བྱེད་སྟངས་སོགས་འབྲེལ་མཐུད་ནུས་ལྡན་ཐུབ་པར་སྐུལ་འདེད་བཏང་བ་དང་འབྲེལ། “བསྒྲུབ་རྒྱུ་ཁས་ལེན་དང་གནད་དོན་ཐག་གཅོད་རྒྱུའི་འགན་འཁུར་བ”སོགས་ཀྱི་བྱེད་སྟངས་སྤྱད་དེ་རྩལ་ནུས་ཤེས་ལྡན་པ་ཁེ་ལས་ལ་དཀའ་ངལ་སྣ་ཚོགས་སེལ་རོགས་བྱེད་དུ་བཅུག་པ་དང་ཚན་ཞིབ་གསར་གཏོད་ཀྱི་གྲུབ་འབྲས་ཀྱིས་ཁེ་ལས་དེ་བས་མང་བར་ཞབས་འདེགས་ཞུ་རུ་བཅུག་ཡོད།