ཉིན་ཤས་གོང་། གསར་འགོད་པས་རང་སྐྱོང་ལྗོངས་ཚོང་དོན་ཐིང་ནས་ཤེས་རྟོགས་བྱས་པར། འདས་མ་ཐག་པའི་རྒྱལ་སྟོན་ངལ་གསོའི་རིང་། ལྗོངས་ཡོངས་ཀྱི་འཛད་སྤྱོད་ཁྲོམ་རའི་གསོན་ཤུགས་དང་འཛད་སྤྱོད་ཀྱི་མི་མངོན་པའི་སྟོབས་ཤུགས་གང་ལེགས་མངོན་ཞིང་། ས་ཁུལ(གྲོང་ཁྱེར)ཁག་གི་ཚོང་དོན་སྡེ་ཚན་གྱིས་ལྟ་ཞིབ་ཚད་ལེན་བྱས་པའི་གྲངས་གཞི་ལས་མངོན་པར། རྒྱལ་སྟོན་ངལ་གསོའི་རིང་། ལྗོངས་ཡོངས་ཀྱི་ཚོང་དོན་ཁྱབ་ཁོངས་ཀྱིས་གཙོ་གནད་ལྟ་ཞིབ་ཚད་ལེན་བྱས་པའི་སིལ་ཚོང་དང་བཟའ་བཏུང་ཁེ་ལས་47གྱི་བྲིན་ཚོང་ཡོང་འབབ་སྒོར་དུང་ཕྱུར་1.24ཟིན་ནས་དུས་མཚུངས་ལས་22.1%འཕར་ཡོད་པ་རེད།

རྒྱལ་སྟོན་གོང་རང་ལྗོངས་ཀྱིས་ཕྱོགས་ཡོངས་ནས་གཞི་རྒྱ་ཆེན་པོས་སྒྲིག་ཆས་དང་འཛད་སྤྱོད་ཐོན་རྫས་རྙིང་པ་གསར་བརྗེས་དང་། རླངས་འཁོར་རྙིང་པ་མེད་པར་བཟོ་བ་དང་གསར་བརྗེས་དང་སྒེར་གྱི་རླངས་འཁོར་རྙིང་པ་གསར་བརྗེས། ཁྱིམ་སྤྱོད་གློག་ཆས་དང་གློག་སྒུལ་རྐང་འཁོར་རྙིང་པ་གསར་བརྗེས། ཁྱིམ་ཆས་གསར་པ་བརྗེས་ནས་རིག་ནུས་ཁྱིམ་ཆས་སྤྱོད་པར་སྐུལ་འདེད་གཏོང་བ། ས་མཐོའི་ཐབ་ཆས་རྙིང་པ་གསར་བརྗེས། ཟོག་འདྲེན་རླངས་འཁོར་རྙིང་པ་མེད་པར་བཟོ་བ་དང་གསར་བརྗེས། ནུས་རྒྱུ་གསར་པའི་སྤྱི་སྤྱོད་རླངས་འཁོར་དང་སྒུལ་ཤུགས་གློག་རྫས་རྙིང་པ་གསར་བརྗེས་བཅས་ལ་རྒྱབ་སྐྱོར་བྱས་ནས་འཛད་སྤྱོད་ཀྱི་གསོན་ཤུགས་འཕེལ་བར་བྱས་ཡོད། དུས་ཆེན་རིང་རང་ལྗོངས་ཀྱི་ཚོང་དོན་སྡེ་ཚན་གྱིས་འཛད་སྤྱོད་ཐོན་རྫས་རྙིང་པ་གསར་བརྗེས་ཀྱི་སྲིད་ཇུས་ལག་བསྟར་ཤུགས་ཆེན་བྱས་ནས་འཛད་སྤྱོད་པར་ཐད་ཀར་ཕན་པ་ཐོབ་པར་བྱས་ཡོད།

དུས་ཆེན་རིང་རང་ལྗོངས་ཀྱི་ཚོང་དོན་སྡེ་ཚན་གྱིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་མཐའ་གཅིག་ཏུ་བྱས་ནས་རྫོགས་ལྡན་གཟའ་འཁོར་གྱི་དུས་ཚོད་དམ་འཛིན་བྱས་ཏེ་ཐབས་བརྒྱ་ཇུས་སྟོང་ངང་རྒྱལ་སྟོན་ངལ་གསོའི་རིང་གི་འཛད་སྤྱོད་ཁྲོམ་ར་འཁྲུག་ཏུ་བཏང་སྟེ་ཁྲོམ་རའི་གསོན་ཤུགས་འཕེལ་བར་བྱས་ཤིང་། ས་གནས(གྲོང་ཁྱེར)ཁག་གི་ཁྱབ་ཁོངས་ཁག་གིས“དུས་ཆེན་དང་བྲིན་ཚོང”དང་། “ལུས་རྩལ་དང་བྲིན་ཚོང” “ཞིམ་ཟས་དང་བྲིན་ཚོང” “ཡུལ་སྐོར་དང་བྲིན་ཚོང”སོགས་མཉམ་འབྲེལ་བྱེད་ཐབས་ལ་དམིགས་པ་མ་ཟད། “སྲིད་གཞུང་གིས་ཁ་གསབ་བྱེད་པ་དང་། ཁེ་ལས་ཀྱིས་ཁེ་བཟང་སྤྲོད་པ། མང་ཚོགས་ལ་ཕན་པ་ཐོབ་པ”བཅས་ཀྱི་བྱེད་ཐབས་སྤྱད་ཁར། རྣམ་པ་སྣ་ཚོགས་དང་ནང་དོན་ཕུན་སུམ་ཚོགས་པའི་འཛད་སྤྱོད་ལ་སྐུལ་འདེད་གཏོང་བའི་བྱེད་སྒོ་སྒྲིག་འཛུགས་བྱས་ནས། ནུས་ཤུགས་ཡོད་རྒུས་རང་ལྗོངས་ཀྱི་འཛད་སྤྱོད་ཁྲོམ་ར་འཁྲུག་ཏུ་འགྲོ་བར་སྐུལ་འདེད་བཏང་ཡོད།

ཉིང་ཁྲི་གྲོང་ཁྱེར་གྱིས“2024ལོའི་ཉིང་ཁྲིའི་ཡར་ཀླུང་གཙང་པོའི་སྐྱེ་ཁམས་རིག་གནས་ཡུལ་སྐོར་དུས་ཆེན”ལ་བརྟེན་ནས་ཉིང་ཁྲིའི་དམངས་སྲོལ་འཁྲབ་སྟོན་དང་། རྒྱལ་སྟོན་གྱི་གླིང་གཏོང་བྱེད་སྒོ རོལ་དབྱངས་འདུ་ཚོགས། ཀོ་ཕིག་གློག་བརྙན་སྟོན་པ། མངོན་མིན་རིག་གནས་ཤུལ་བཞག་ཉམས་ལེན་དང་ཚོང་འདུས་སོགས་རིག་གནས་དང་། ཡུལ་སྐོར། ལུས་རྩལ་བཅས་ཚོང་ལས་མཉམ་འདྲེས་ཀྱི་འཛད་སྤྱོད་སྟོན་མོ་གཟབ་རྒྱས་16བཤམས་ཡོད། ཆབ་མདོ་གྲོང་ཁྱེར་གྱིས“རྒྱལ་སྟོན་དགའ་གཏོང་། འཛད་སྤྱོད་ལ་རོལ”ཞེས་པའི་འཛད་སྤྱོད་ལ་སྐུལ་འདེད་གཏོང་བའི་བྱེད་སྒོ་དེ“ལྷད་མེད་བརྩེ་སེམས་ཀྲུང་གོར་བཅངས”ཞེས་པ་བརྗོད་དོན་གཙོ་བོར་བྱས་ཏེ་རྒྱན་གོས་དང་། ཞིམ་ཟས་སོགས་ཁྱད་ལྡན་ཚོང་ཟོག་འགྲེམས་སྟོན་བྱས་པ་མ་ཟད། བྱ་དགའ་ཡོད་པའི་འགྲན་བསྡུར་དང་རིག་རྩལ་འཁྲབ་སྟོན་སོགས་ཀྱི་བྱེད་སྒོ་སྤེལ་ནས་དུས་ཆེན་རིང་གི་འཛད་སྤྱོད་རྣམ་པ་འཁྲུག་ཏུ་བཏང་ཡོད། ནག་ཆུ་གྲོང་ཁྱེར་གྱིས་སྒྲིག་འཛུགས་བྱས་ནས་སྤེལ་བའི“སྟོན་དུས་ཀྱི་བྱང་ཐང་། དགའ་སྤྲོ་མཉམ་འཛོམས”ཞེས་པའི་འཛད་སྤྱོད་ལ་སྐུལ་འདེད་གཏོང་བའི་བྱེད་སྒོ་སྤེལ་བར་བརྟེན་འཛད་སྤྱོད་ཀྱི་ཡོང་འབབ་སྒོར་ཁྲི་380.04ཟིན་ཡོད།

གཞན་ཡང་། དུས་ཆེན་རིང་རང་ལྗོངས་ཀྱིས་བསྟུད་མར“སྐྱ་ནམ་རྒྱས་པའི་བོད་ལྗོངས། ལུས་རྩལ་བྱེད་སྒོར་རོལ”ཞེས་པ་དང་། “སྤྲོ་སྣང་ལྡན་པའི་བོད་གསར། གཞིས་རྩེར་ཡུལ་སྐོར་བྱེད” “བདེ་སྐྱིད་ལྡན་པའི་བོད་ལྗོངས། སྤྲོ་སྣང་ལྡན་པའི་འཚོ་བ”བཅས་ཀྱི་ས་མཐོའི་ཞིང་ལས་ཁྱད་ལྡན་ཐོན་ཟོག་འཛད་སྤྱོད་ལ་སྐུལ་འདེད་གཏོང་བའི་ཆེད་དོན་འདུ་ཚོགས་དང་།“ཚོང་སྐྱོར་དམངས་ཕན། རླངས་འཁོར་ཉོ་བར་སྤྲོ”ཞེས་པའི་རླངས་འཁོར་གསར་པ་ཉོ་བ་སོགས་ཀྱི་བྱེད་སྒོ་རབ་དང་རིམ་པ་སྤེལ་ནས་དུས་ཆེན་རིང་མང་ཚོགས་ཀྱི་འཛད་སྤྱོད་དགོས་མཁོ་ཆེས་ཆེར་བསྐངས་ཡོད།