1954ལོར་ཤིན་ཅང་ཐོན་སྐྱེད་འཛུགས་སྐྲུན་པིང་ཐོན་བཙུགས་པ་དང་། ལོ་70ཡི་རིང་བཙུགས་མ་ཐག་གི་དབུལ་ཞིང་ཕོངས་པ་ནས་2023ལོའི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་3700ཙམ་ཟིན་པ་དང་གྲམ་ཐང་དུ“གྲོང་ཁྱེར་གསར་པ”ཞིག་ཆགས་པ་ནས་གྲོང་ཁྱེར་12ཐེན་ཧྲན་རི་བོའི་ལྷོ་བྱང་དུ་ཁྱབ་པ་ལ་སོགས་པིང་ཐོན་འདི་ཉིད་ཉིན་རེ་བཞིན་རྣམ་པ་གསར་པ་ཐོན་བཞིན་ཡོད།

2022ལོར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཤིན་ཅང་ཐོན་སྐྱེད་འཛུགས་སྐྲུན་པིང་ཐོན་དུ་བརྟག་ཞིབ་གནང་སྐབས། པིང་ཐོན་གྱི་འཐབ་ཇུས་གནས་བབ་གཞན་གྱིས་ཚབ་བྱེད་ཐབས་བྲལ་བ་ཞིག་རེད། རེ་བར་ཚང་མས་པིང་ཐོན་གྱི་སྙིང་སྟོབས་དར་སྤེལ་བཏང་སྟེ་མུ་མཐུད་འབད་བརྩོན་དང་། སྒྱུར་བཅོས་གཏིང་ཟབ་ཏུ་གཏོང་བ། ཏན་ཏན་ཏིག་ཏིག ཡང་འབད་བསྐྱར་འབད་བཅས་བྱས་ནས་པིང་ཐོན་འདི་ཉིད་དེ་བས་སྟོབས་ལྡན་དང་དེ་བས་དར་རྒྱས་ཡོང་བ་བྱ་རྒྱུའི་རེ་བ་ཡོད་ཅེས་ནན་བཤད་གནང་བ་རེད།

ལོ་70རིང་དམག་སྡོད་ས་སློག་གིས་མཐའ་མཚམས་བསྲུངས་བ།

“ངེས་པར་དུ་བརྟན་སྲུང་བྱེད་མཁན་ཡོད་དགོས”ཞེས་ཝུའེ་ཏེ་ཡིའུ་ཡིས་ནུབ་ཕྱོགས་ཀྱི་མཐའ་མཚམས་ལམ་ཐིག་ལ་མཛུབ་མོ་བཙུགས་ནས་བཤད། “བདུན་གཅིག་བྱས་རྗེས་གཟེངས་རྟགས”ཐོབ་མཁན་ཞིག་ཡིན་པའི་ཁོང་གིས་ལོ་དྲུག་ཅུའི་རིང་ཉིན་གཅིག་ལྟར་མཐའ་མཚམས་ལ་སྐོར་གཡེང་དང་མཐའ་མཚམས་བསྲུངས་ཡོད། ལོ་མང་རིང་མཐའ་མཚམས་དུམ་བུ་དེ་བརྟན་ལྷིང་བྱུང་ནས་མི་དང་ཕྱུགས་རིགས་ས་མཚམས་ལས་བརྒལ་བའི་དོན་རྐྱེན་གཅིག་ཀྱང་ཐོན་མྱོང་མེད།

1964ལོར་ལོ་24ལ་སླེབས་མ་ཐག་པའི་ཝུའེ་ཏེ་ཡིའུ་ཡིས་འབོད་སྐུལ་དང་ལེན་ཞུས་ཏེ་དེ་སྔའི་པེ་ཅིང་དམག་ཁུལ་ནས་ཤིན་ཅང་ཐོན་སྐྱེད་འཛུགས་སྐྲུན་པིང་ཐོན་གྱི་ཧྲི་ཤོག་དགུ་པའི་ཐོན་161ལ་ལས་སྒྱུར་བྱས། ད་བར། ཝུའེ་ཏེ་ཡིའུ་ཡིས་མེས་རྒྱལ་གྱི་ནུབ་བྱང་མཐའ་མཚམས་ལམ་ཐིག་ཐོག་ལོ་60རིང་བརྟན་སྲུང་བྱས་པ་དང་རྐང་ཐང་མར་བསྐྱོད་པའི་ལམ་ཐག་སྤྱི་ལེ་ཁྲི་20ཟིན་ཡོད།

ལོ་70ཡི་རིང་མཐའ་མཚམས་ཀྱི་བརྟན་ལྷིང་སྲུང་སྐྱོང་དང་ཤིན་ཅང་འཕེལ་རྒྱས་དང་འཛུགས་སྐྲུན་བྱེད་མཁན་སྟོབས་ཤུགས་གལ་ཆེན་ཞིག་ཡིན་པའི་ངོས་ནས་པིང་ཐོན་བ་མི་རབས་ནས་མི་རབས་ཕྱོགས་བཞི་མཚམས་བརྒྱད་ནས་ཐེན་ཧྲན་རི་བོའི་འདབས་སུ་འཛོམས་ཤིང་། ཁོང་ཚོས་འཁྱགས་པ་ཟ་བ་དང་གངས་ཁྲོད་ཉལ་བ་དང་། བྱེ་རླུང་དང་འཐབ་ནས་དཀའ་བ་ཚད་མེད་སྤྱད་ཡོད། ཝུའེ་ཏེ་ཡིའུ་དང་འདྲ་བའི་ལས་བཟོ་མང་ཚོགས་རྣམས“ས་མཚམས་རྡོ་རིང་གསོན་པོ་བཞིན”དང་སྦྱར་དཀར་ཆུང་ཆུང་རེ་རེ་དང་འདྲ་བར་མེས་རྒྱལ་གྱི་མཐའ་མཚམས་སུ་གཞི་ཚུགས་ནས་མཐའ་མཚམས་ཀྱི་བདེ་འཇགས་སྲུང་སྐྱོང་བྱེད་བཞིན་ཡོད།

ལྷག་བསམ་རྣམ་དག་གིས་འགན་འཁྲི་དང་ལས་འགན་བསྒྲུབས་པ།

པིང་ཐོན་གྱི་དོ་དམ་ཁྱབ་ཁོངས་ནང་གི་ལེ་དབར་སྟོང་གི་མཐའ་མཚམས་ལམ་ཐིག་ཐོག་སྐོར་གཡེང་མཐའ་སྲུང་ལས་སྒྲུབ་ཀྱི་རྒྱུན་འཛིན་པ་ཡོད་ཅིང་། 2017ལོར་ཝུའེ་ཞ་ཡིས་ཧྲན་ཏུང་གི་ལས་ཀ་ནས་དགོངས་པ་ཞུས་ཏེ་མི་ཚོགས་ཧ་ཅང་ཉུང་བའི་ཀྲུང་གོ་དང་ཧ་སག་སི་ཐན་གྱི་མཐའ་མཚམས་སུ་ཡོང་ནས་ལོ་ན་རྒས་པའི་ཕ་ཝུའེ་ཏེ་ཡིའུ་ཡི་ཤུལ་འཛིན་ནས་པིང་ཐོན་གྱི་ལས་བཟོ་དང་མཐའ་སྲུང་བ་ཞིག་ཏུ་གྱུར། པིང་ཐོན་གྱི་ཧྲི་ཤོག་བཅུ་པའི་ཐོན་185པའི་མཐའ་མཚམས་ཀྱི་མ་ཅུན་ཝུའུ་ཁྱོ་ཤུག་གི་སོ་ལྟ་ཁང་གི་འགྲམ་དུ་མཐའ་སྲུང་ལས་སྒྲུབ་བྱ་ཡུལ་ཞིག་བཙུགས་ནས་མི་གཉིས་གཅིག་གིས་གཅིག་ལ་བརྟེན་པ་དེ་མི་ཁྱུ་ཞིག་གི་ལྟ་སྲུང་ལ་གྱུར་ཡོད།

ད་ཕན་ལོ་ཤས་རིང་པིང་ཐོན་གྱི་མཐའ་མཚམས་ཀྱི་རྨང་གཞིའི་སྒྲིག་བཀོད་ཟམ་མི་ཆད་པར་འཐུས་སྒོ་ཚང་དུ་སོང་ནས་མཐའ་མཚམས་ཀྱི་སྒྲིག་བཀོད་དང་། མཐའ་སྲུང་བཀོད་འདོམས་ལྟེ་གནས། ཚོད་འཛིན་ཤེས་ཚོར་མ་ལག་སོགས“རིག་ལྡན་མཐའ་སྲུང”གོམ་སྟབས་གཅིག་མཚུངས་ངང་བསྐྲུན་པ་དང་དབྱེ་བཤེར་དང་། རག་སྒྲུག སྔོན་བརྡ། བཀག་འགོག་བཅས་ཀྱི“སྲུང་བཅད”བཞི་ཟམ་མི་ཆད་པར་བརྟན་པོ་བསྐྲུན་པར་རིང་ཚད་སྤྱི་ལེ་2019ཟིན་པའི་མཐའ་མཚམས་ལམ་ཐིག་ཐོག་མི་དང་། ལག་རྩལ། དངོས་རྫས་བཅས་ཟུང་འབྲེལ་གྱི་འགོག་སྲུང་མངོན་འགྱུར་བྱུང་ཡོད།

བརྟན་ལྷིང་སྲུང་སྐྱོང་དང་མཐའ་མཚམས་སྲུང་སྐྱོང་གི་འགན་འཁྲི་དང་ལས་འགན་སྒྲུབ་པའི་སྟོབས་ཤུགས་གལ་ཆེན་ཞིག་ཡིན་པའི་ངོས་ནས་པིང་ཐོན་ཡུལ་དམག་གིས་ཉེན་སྐྱོབ་གེགས་སེལ་དང་། བརྟན་ལྷིང་སྲུང་སྐྱོང་། མཐའ་སྲུང་མཐའ་བརྟན་བཅས་ཀྱི་ཐད་ཐོག་མཐའ་བར་གསུམ་དུ་ནུས་པ་གལ་ཆེན་བཏོན་ཡོད།

པིང་ཐོན་བསྡོམས་རྩིས་ཅུས་ཀྱི་གྲངས་གཞི་ལས་མངོན་པར་གཞིགས་ན། 2023ལོར་པིང་ཐོན་གྱི་ཐོན་སྐྱེད་རིན་ཐང་བསྡོམས་འབོར་གྱིས་ཤིན་ཅང་གི་ལྔ་ཆ་གཅིག་བཟུང་ནས་སྒོར་དུང་ཕྱུར་3696ཟིན་ཡོད་པ་རེད། གླེང་རིན་ཡོད་པ་ཞིག་ནི། ན་ནིང་པིང་ཐོན་གྱི་མི་རེའི་ཆ་སྙོམས་ཐོན་སྐྱེད་རིན་ཐང་བསྡོམས་འབོར་སྒོར་ཁྲི་10ལས་ཐོག་མར་ཚད་བརྒལ་བྱུང་ནས་རྒྱལ་ཡོངས་ཀྱི་ཆ་སྙོམས་ཆུ་ཚད་ལས་བརྒལ་བ་དང་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་ཁྲི་4ལྷག་ཙམ་ཟིན་ཡོད་པ་རེད།

ད་ཆའི་པིང་ཐོན་གྱིས་རང་ངོས་ཀྱི་ཁྱད་ཆོས་ལྡན་པའི་དེང་རབས་ཅན་གྱི་ཐོན་ལས་མ་ལག་བསྐྲུན་པ་དང་2023ལོར་པིང་ཐོན་གྱི་འབྲུ་རིགས་ཐོན་སྐྱེད་ཀྱིས་རྒྱལ་ཡོངས་གཞི་ཁྱོན་གྱི་0.39%ཟིན་ནས་རྒྱལ་ཡོངས་ཀྱི་ཐོན་འབབ་བསྡོམས་འབོར་འཕར་ཚད་ལ་ལེགས་སྐྱེས་10.2%ཕུལ་བ་དང་། སྲིང་བལ་ཐོན་འབོར་གྱིས་རྒྱལ་ཡོངས་ཀྱི་གསུམ་ཆ་གཅིག་ཙམ་ཟིན་པ། བཟོ་ལས་ཀྱི་སྭེལ་དང་བདར་མང་སྭེལ་གྱི་ཐོན་འབོར་གྱིས་རྒྱལ་ཡོངས་ཀྱི་21.9%དང་17.2%སོ་སོར་ཟིན་པ་བཅས་རེད།

འབད་འབུངས་ཡར་བརྩོན་གྱིས་སླར་ཡང་མདུན་སྐྱོད་བྱས་པ།

ཀྲུང་གོའི(ཤིན་ཅང)རང་མོས་ཚོང་དོན་ཚོད་ལྟ་ཁུལ་གྱི་སྒོ་བྱང་བཀལ་རྗེས་པིང་ཐོན་གྱིས་བློ་ཁོག་ཆེན་པོས་སྔོན་ལ་ལག་བསྟར་དང་སྔོན་ལ་ཚོད་ལྟ་བྱེད་པ་དང་། ལམ་ལུགས་གསར་གཏོད་ལ་སྐུལ་འདེད་རྒྱུན་མཐུད་གཏོང་བ། ཚོང་དོན་མ་འཇོག་ཞབས་ཞུ་སྟབས་བདེ་ཅན་ལ་སྐུལ་འདེད་ཧུར་ཐག་གཏོང་བ་བཅས་བྱས་ནས་ཕྱི་ཕྱོགས་སྒོ་དབྱེའི་མཐོ་ས་གསར་པ་བཏོད་ཡོད། 2024ལོའི་ཟླ་6པའི་བར་པིང་ཐོན་ཁུལ་ཁོངས་ཀྱི་ཁྲོམ་རའི་གཉེར་སྐྱོང་བྱེད་པོ་8000ཟིན་པ་དེ་2023ལོའི་ཟླ་11པར་རང་མོས་ཚོང་དོན་ཚོད་ལྟའི་ཁུལ་གྱི་སྒོ་བྱང་འགེལ་སྐབས་དང་བསྡུར་ན་བྱེད་པོ་1100ལྷག་ཙམ་མང་དུ་ཕྱིན་པ་དང་། རྣམ་གྲངས་ཁག་35གསར་དུ་དོན་འཁྱོལ་བྱས་པ། བསྡོམས་མ་དངུལ་སྒོར་དུང་ཕྱུར་154བཏང་བ་བཅས་ལས་པིང་ཐོན་གྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་ཆེན་པོ་བསྣན་ཡོད།

ཤིན་ཅང་གིས་ཧྲི་ཧོ་ཙེ་གྲོང་ཁྱེར་དུ་བསྡོམས་མ་དངུལ་སྒོར་དུང་ཕྱུར་8བཏང་བའི་མི་མེད་གནམ་གྲུ་དང་མཁའ་འགྲུལ་གནམ་གྲུ་ཆེ་གྲས་ཀྱི་ཐོན་སྐྱེད་རྟེན་གཞིའི་རྣམ་གྲངས་མི་རིང་བར་ཐོན་སྐྱེད་ཚོད་ལྟ་བྱེད་འགོ་ཚུགས་རྒྱུ་རེད། རྣམ་གྲངས་ཀྱི་འགན་འཁུར་བ་ཀྲུང་ཀྲེ་ཡུང་གིས་ངོ་སྤྲོད་བྱས་པར་གཞིགས་ན། རྣམ་གྲངས་དེའི་གྲས་སུ་མི་མེད་གནམ་གྲུའི་མ་ལག་དང་མི་བཞུགས་མཁའ་འགྲུལ་གནམ་གྲུ་ཞིབ་སྤེལ་དང་ཐོན་སྐྱེད་བཟོ་སྐྲུན་ཚུད་ཡོད་པ་དང་ལོ་5ཡི་ནང་ལོ་རེར་མི་མེད་གནམ་གྲུ་ཆེ་གྲས་150ཐོན་སྐྱེད་བྱེད་པའི་ནུས་པ་རིམ་བཞིན་ལྡན་རྒྱུ་དང་ཐོན་ཚད་ལོན་རྗེས་ལོ་རེའི་ཐོན་རྫས་རིན་ཐང་སྒོར་དུང་ཕྱུར་20ཟིན་རྒྱུ་རེད།

ལྗང་མདོག་ཐཱན་ཉུང་ཁྱབ་ཁོངས་སུ་པིང་ཐོན་གྱིས་རྒྱལ་ཡོངས་ཀྱི་ཐཱན་འབུད་ཉོ་ཚོང་ཁྲོམ་ར་འཛུགས་སྐྲུན་ནང་ཧུར་ཐག་ཞུགས་པ་དང་། ཐཱན་ཚད་མཐོ་ཤོས་དང་ཐཱན་ཚད་སྙོམ་སྦྱོར་ལ་སྐུལ་འདེད་བརྟན་པོ་གཏོང་བ། ཐོན་ལས་ཀྱི་གྲུབ་ཆ་བཟང་སྒྲིག་རིམ་སྤོར་དང་། ནུས་རྒྱུའི་གྲུབ་ཆ་ལྗང་མདོག་ཕྱོགས་སྒྱུར། འགྲིམ་འགྲུལ་གྲུབ་ཆ་དྭངས་གཙང་དང་ཐཱན་ཉུང་ལེགས་སྒྲིག་བཅས་ལ་སྐུལ་འདེད་ཤུགས་ཆེན་བཏང་ཡོད། 2023ལོར་པིང་ཐོན་ལྗང་མདོག་བཟོ་སྐྲུན་གྱི་ཐོན་རྫས་རིན་ཐང་གིས་གཞི་ཁྱོན་ཡན་གྱི་བཟོ་སྐྲུན་ལས་རིགས་ཀྱི་ཐོན་རྫས་རིན་ཐང་བསྡུར་ཚད་ཀྱི་38.9%ཟིན་པ་དེ་རྒྱལ་ཡོངས་ཀྱི་ཆ་སྙོམས་ཆུ་ཚད་དང་བསྡུར་ན་བརྒྱ་ཆའི་གྲངས་22ཙམ་གྱིས་མཐོ་བ་ཡོད་པས་དཔེ་སྟོན་ཁྲིད་སྟོན་གྱི་ནུས་པ་བཏོན་ཡོད།

ཆུ་བེད་ལས་གྲྭ་དང་། གཞུང་ལམ་འགྲིམ་འགྲུལ། ནུས་རྒྱུའི་སྒྲིག་བཀོད་སོགས་ནི་ཤིན་ཅང་གི་སྔོན་ཐོན་ཐོན་སྐྱེད་ནུས་ཤུགས་ཀྱི་སྣེ་ཁྲིད་པ་ཡིན་པས་པིང་ཐོན་གྱིས་དུས་ཡུན་རིང་པོའི་ནང་རྨང་གཞིའི་སྒྲིག་བཀོད་གལ་ཆེན་མཉམ་སྐྲུན་མཉམ་སྤྱོད་བྱེད་པ་དང་། དམག་དཔུང་དང་ས་གནས་མཉམ་འདྲེས་ལ་སྐུལ་འདེད་གཏོང་བ། པིང་ཐོན་གྱི་སྟོབས་ཤུགས་ཆེ་རུ་གཏོང་བ་བཅས་བྱས་ནས་འགན་འཁྲི་དང་ལས་འགན་དེ་བས་ལེགས་པའི་ངང་སྒྲུབ་པར་རྨང་གཞི་བརྟན་པོ་བཏིང་ཡོད།

སྒྱུར་བཅོས་ཀྱི་སྒུལ་ཤུགས་ལ་བརྟེན་ནས་པིང་ཐོན་ལ་ཉེ་བའི་ལོ་ཤས་རིང་ཞིང་ལས་དེང་རབས་ཅན་གྱི་འཕེལ་རྒྱས་དང་ཁྱད་ལྡན་ལེགས་ཆའི་ཐོན་ལས་ཀྱི་འཕེལ་རྒྱས་ཁྲོད་ཚད་བརྒལ་མང་པོ་བྱུང་ཡོད། ཐེ་མོན་ཀོན་གྲོང་ཁྱེར་དུ་མུའུ་སྟོང་ཟིན་པའི་དཔྱིད་འདེབས་མ་རྨོས་ལོ་ཏོག་གི་མུའུ་རེའི་ཐོན་ཚད་སྤྱི་རྒྱ་1000ལས་བརྒལ་ནས་བྱེ་འགྱུར་ས་ཞིང“མུའུ་རེར་འབྲུ་རིགས་ཏུན་རེ་ཐོན་པའི་ས་ཞིང”དུ་ཐོག་མར་གྱུར་ཡོད། དེའང་པིང་ཐོན་གྱིས་དེང་རབས་ཞིང་ལས་ཀྱི་ཡང་རྩེར་ཟམ་མི་ཆད་མེད་པར་སྙེགས་པ་དང་། ཤིན་ཅང་གི་འཕེལ་རྒྱས་ལ་རམ་འདེགས་བྱེད་པ། རྒྱལ་ཁབ་ཀྱི་ཇུས་ཆེན་ལ་ཞབས་འདེགས་ཞུ་བ་བཅས་ཀྱི་བསྡུས་རིས་ཤིག་རེད།