ཧའེ་ཧོ་ཆུ་བོའི་ཆུ་རྒྱུད་ཀྱི་ས་འོག་ཆུ་བཏུངས་ནས་འཚར་ལོངས་བྱུང་བའི་ཧོ་པེ་ཞིང་ཆེན་ཞེང་ཐའེ་གྲོང་ཁྱེར་རེན་ཙེ་ཆུས་ཤིས་ཀུའུ་གྲོང་རྡལ་ཏན་ཏུའུ་ཁའོ་སྡེ་ཁུལ་གྱི་གྲོང་མི་ཀྲང་མོང་ལིན་གྱི་བསམ་པར་ལོ་ལྔ་བཅུའི་རྗེས་སུ་ལྷོ་ཆུ་བྱང་འདྲེན་བྱས་པའི་འབྲི་ཆུའི་ཆུ་འཐུང་ཐུབ་པ་འཁོར་མྱོང་མེད།

ཀྲང་མོང་ལིན་གྱིས“དེ་གོང‘རྒྱལ་ཡོངས་བསམ་ཇུས་གཅིག’ཅེས་པ་ནི་གང་ཞིག་ཡིན་པ་ཤེས་ཀྱི་མེད། རང་ཁྱིམ་སྒོ་འགྲམ་གྱི་ཁྲོན་པའི་ཆུ་བཏུངས་བ་ནས་ལྷོ་ཆུ་བྱང་འདྲེན་གྱི་འབྲི་ཆུའི་ཆུ་བཏུངས་རྗེས་རང་ཉིད་ནི‘བསམ་ཇུས་གཅིག’ལས་ཕན་པ་ཐོབ་མཁན་ཞིག་ཡིན་པ་ཤེས་བྱུང”ཞེས་བཤད།

ཧྭ་པེ་ནི་ཆུ་དཀོན་པའི་དཔེ་མཚོན་ཁུལ་ཞིག་ཡིན་ཞིང་། ས་འོག་གི་ཆུ་དུས་ཡུན་རིང་པོའི་ནང་ཚད་བརྒལ་སྔོག་འདོན་བྱས་པས་སྐབས་ཤིག་རིང་འཛམ་གླིང་གི་ཆུ་བསིམ་ཁུལ་ཆེ་ཤོས་སུ་གྱུར་ཡོད།

ཏན་ཏུའུ་ཁའོ་སྡེ་ཁུལ་གྱི་གྲོང་མི་ཀྲང་ཧོན་ཅང་གིས་བེད་མེད་དུ་བསྐྱུར་བའི་ཁྲོན་པ་རྙིང་པ་ཞིག་ལ་མཛུབ་མོ་འཛུགས་བཞིན་དུ“དེ་སྔོན་ཁྲོན་པ་དྲུས་ནས་ཆུ་འདོན་དགོས་པ་དང་། སྨི་བཅུ་གྲངས་ནས་བཅུ་ཕྲག་བར་དང་དེ་ནས་སྨི་བརྒྱ་ཉིས་བརྒྱ་བར་འདྲུ་དགོས་ཀྱི་ཡོད། ཁྲོན་པ་གཏིང་རིང་པོ་འདྲུ་བ་ནས་ཆུ་ཇེ་ཉུང་དུ་ཕྱིན་ཡོད”ཅེས་བཤད།

ལོ་68ལ་སླེབས་པའི་ཀྲང་མོང་ལིན་གྱི་ཁྱིམ་གྱི་སྒོ་རའི་ནང་ཁྲོན་པ་ཞིག་ཡོད་པ་དང་ཁྲོན་པའི་འགྲམ་དུ་ཚལ་ཞིང་ཆུང་ཆུང་ཞིག་འདུག“ཁྲོན་པ་དེ་ནི་1995ལོར་མི་གླས་ནས་དྲུས་པ་ཞིག་ཡིན་ཞིང་། 2000ལོའི་སྔ་རྗེས་སུ་ཆུ་འཐེན་མ་ཐུབ་པས་ཁྲོན་པ་སྐམ་སོང་། སྐབས་དེ་དུས་འཐུང་ཆུའང་ཧ་ཅང་དཀོན་པོ་ཡོད་པས་ཚལ་ཞིང་བེད་མེད་དུ་འཇོག་དགོས་བྱུང་སོང”

2013ལོར། ཏན་ཏུའུ་ཁའོ་སྡེ་ཁུལ་གྱིས་གཅིག་སྡུད་ཆུ་མཁོ་འདོན་ལས་གྲྭ་ལག་ལེན་བསྟར་འགོ་བཙུགས་ནས་ཆུ་མཁོ་འདོན་གྱི་མདོང་དྲ་བསྐྲུན། མདོང་དྲ་བསྐྲུན་རྗེས་ཆུ་ཀ་ལ་ཁྱིམ་ཚང་ཚང་མར་ཁྲིད་ཐུབ་པ་བྱུང་ནས་ཕྲག་པ་དང་ལག་པར་བརྟེན་ནས་ཆུ་དབོར་བའི་དཀའ་ངལ་དངོས་སུ་བསལ་ཡོད།

ཆུ་ཀ་ལ་ཁྲིད་པ་ལས་ཆུ་མཁོ་འདོན་བྱེད་སྟངས་ལ་འགྱུར་ལྡོག་བྱུང་ཡང་ཆུ་ཁུངས་ལ་འགྱུར་ལྡོག་བྱུང་མེད། ཅིང་ཅིན་ཅིའི་ཐང་གཤོངས་ཁུལ་དུ་ས་འོག་ཆུ་ལོ་རེར་ཆ་སྙོམས་ཚད་བརྒལ་སྔོག་འདོན་བྱེད་ཚད་སྨི་རྒྱ་དཔངས་གྲུ་བཞི་མ་དུང་ཕྱུར་68ཟིན་གྱི་ཡོད་པ་དང་། ས་འོག་གི་ཆུ་ཁོ་ནར་བརྟེན་ན་འཐུང་ཆུ་མཁོ་འདོན་བྱེད་ཐབས་བྲལ་ཡོད།

2014ལོའི་ཟླ་12པར། ལྷོ་ཆུ་བྱང་འདྲེན་གྱི་དབུས་རྒྱུད་ཀྱི་དུས་ཐེངས་དང་པོའི་ལས་གྲྭར་ཆུ་དངོས་སུ་དྲངས་ཐུབ་ནས་ཧོ་ནན་དང་། ཧོ་པེ། པེ་ཅིང་། ཐེན་ཅིན་བཅས་ལ་ཆུ་མཁོ་འདོན་བྱས་ཡོད། ཆུ་དྲངས་པའི་ལོ་10ཡི་རིང་ཧྭ་པེའི་ས་འོག་ཆུའི་ཆུ་གནས་ཚད་གཞི་མཐོ་རུ་ཤུགས་ཆེན་ཕྱིན་པ་དང་། 2023ལོའི་ལོ་མཇུག་དང་2018ལོའི་དུས་མཚུངས་དང་བསྡུར་ན་ཧོ་པེ་ཞིང་ཆེན་གྱི་གཏིང་ཚད་ཐུང་བའི་ཚད་བརྒལ་སྔོག་འདོན་ཁུལ་གྱི་ཆུ་གནས་ཚད་གཞི་སྨི་3.01སླར་གསོ་ཐུབ་ཡོད་ཅིང་། ཀྲང་མོང་ལིན་དང་ཁོང་གི་ཁྱིམ་མཚེས་རྣམས་ནི་ཐད་ཀར་ཕན་པ་ཐོབ་མཁན་གྱི་གྲས་རེད།

“ཉེ་བའི་ལོ་ཤས་རིང་། རེན་ཙེ་ཆུས་ཀྱིས་གྲོང་གསེབ་ཀྱི་འཚོ་བའི་ཆུ་འགོ་དང་གཙང་ཆུ་བརྗེ་རེས་ཀྱི་ལས་གྲྭ་ལག་བསྟར་བྱས་ཡོད”རེན་ཙེ་ཆུས་ཆུ་དོན་ཅུས་ཀྱི་ཅུས་ཀྲང་གཞོན་པ་ཀྲའོ་ཏུང་པོ་ཡིས་2022ལོའི་ལོ་མཇུག་ཏུ་ཏན་ཏུའུ་ཁོའོ་སྡེ་ཁུལ་གྱིས་ཆུ་འགོ་བརྗེ་རེས་བྱས་ནས་གྲོང་མིའི་འཐུང་ཆུ་དེ་ཁྲོན་པའི་ཆུ་ལེན་པ་ནས་ལྷོ་ཆུ་བྱང་འདྲེན་གྱི་འབྲི་ཆུའི་ཆུར་བསྒྱུར་ཡོད་ཅེས་ངོ་སྤྲོད་བྱས།

“ཆུ་འདི་ཡག་པོ་འདུག”ཀྲང་མོང་ལིན་གྱི་བཟའ་ཟླ་སུན་ཀྲེ་ཙིས་ཁོལ་མ་ཐག་པའི་ཆུ་ཧུའུ་གང་སྟོན་བཞིན་དུ“ཆུ་བསྐོལ་ནའང་ཆུ་དྲེག་མི་འདུག”ཅེས་བཤད།

ས་འོག་གི་ཆུ་བཏུངས་བ་ནས་འབྲི་ཆུའི་ཆུ་བཏུངས་བའི་བར་ནི“ཐོན་ཁུངས་སྔོག་འདོན”བྱས་པ་ཞིག་ཡིན་པས་ཆུའི་ཐོན་ཁུངས་ལ་གཅེས་འཛིན་དང་ཆུའི་ཐོན་ཁུངས་བེད་སྤྱོད་ཡག་པོ་གཏོང་དགོས་པ་མ་ཟད། གྲོན་ཆུང་ཡང་ཡག་པོ་བྱེད་དགོས། 2014ལོ་ཚུན་ཧོ་པེའི་གྲོང་གསེབ་ཏུ་ནུས་ཆེ་གྲོན་ཆུང་གི་ལག་རྩལ་ཁྱབ་གདལ་ཧུར་ཐག་བཏང་བ་དང་ཚད་གཞི་མཐོ་བའི་ཞིང་ཁ་འཛུགས་སྐྲུན་བྱས་ཡོད། དེ་དང་ཆབས་ཅིག་ས་འོག་ཆུ་སྔོག་འདོན་བྱེད་ཚད་ཉུང་དུ་བཏང་ནས་ཞེང་ཐའེ་གྲོང་ཁྱེར་ཁོ་ནས་རིམ་རྩིས་བྱས་ན་རིགས་ཁག་གི་ཆུ་འཐེན་ཁྲོན་པ་44176སྤྱོད་མཚམས་བཞག་པ་དང་དོ་དམ་ཚོད་འཛིན་བྱས་ཡོད།

“གྲོན་ཆུང་དང་། འདྲེན་གཏོང་། ཁ་གསབ། གསོག་འཇོག དོ་དམ”བཅས་ཀྱི་ཕྱོགས་བསྡུས་ཐབས་ཇུས་ལག་ལེན་བསྟར་བས་ཧོ་པེ་ཞིང་ཆེན་གྱི་ས་འོག་ཆུའི་ཆུ་གནས་ཚད་གཞི་མི་ཆག་པར་རིམ་བཞིན་མཐོ་རུ་ཕྱིན་ཡོད།

ད་ལྟའི་ཧོ་པེའི་གྲོང་གསེབ་ཏུ་ཁྲོན་པ་ཉུང་དུ་ཕྱིན་ཞིང་ཆུ་ཞེང་ཆེ་རུ་ཕྱིན་ཡོད།

ཞེང་ཐའེ་དཔལ་འབྱོར་གསར་སྤེལ་ཁུལ་དུ་འོད་ཆེམ་ཆེམ་དུ་འཕྲོ་བའི་པའེ་ཆོན་མཚེའུ་ཡི་ཆུ་ངོས་སུ་ཆུ་བྱ་རྣམས་ཅི་དགར་རོལ་བཞིན་ཡོད་པ་དང་། མཚེའུ་སྒྲོལ་བའི་པའེ་ཆོན་མཚེའུ་ཟམ་ཆེན་ཐོག་ཡུལ་སྐོར་བ་རྣམས་འཆམ་འཆམ་དུ་སྐྱོད་བཞིན་པ། ཆུ་བྱ་འགའ་ཆུ་ངོས་དང་འདམ་རྩྭའི་གསེབ་ཏུ་རྩེད་འཇོར་རོལ་བཞིན་མཆིས།

པའེ་ཆོན་མཚེའུ་གཅིག་པུ་མ་ཡིན་པར་2021ལོ་ཚུན་ཉེ་འགྲམ་གྱི་དེ་སྔོན་སྐམ་པའི་ཧའེ་ལུང་རྫིང་བུ་དང་མུ་ཏིག་ཆུ་མིག་སོགས་གཅིག་རྗེས་གཉིས་མཐུད་ངང་སླར་གསོ་བྱུང་ནས་མཚེའུ་ཡི་ཆུ་ཁ་བརྟན་དུ་ཕྱིན་ཏེ་ཉ་དང་ཞ་སྨི་སྐྱེ་འཕེལ་བྱ་ཡུལ་ཏུ་གྱུར་པ་མ་ཟད། ཆུ་བྱའི་ཡིད་དབང་ཡང་བཀུག་ཡོད།