ཉེ་ཆར་ལྷ་ས་གྲོང་ཁྱེར་སེམས་དྲོད་ཚ་ནུས་ཞབས་ཞུ་ཚད་ཡོད་ཀུང་སིས(གཤམ་དུ“སེམས་དྲོད་ཀུང་སི”ཞེས་བསྡུ་རྒྱུ)སྟོད་ལུང་བདེ་ཆེན་ཆུས་གདོང་དཀར་ཁྲོམ་གཞུང་འཆམ་མཐུན་གླིང་སྡེ་ཁུལ་དང་མཉམ་དུ་དེ་གའི་གྲོང་མི་དུད་ཚང་1170ལ་ས་མཐོར་སྤྱོད་ཆོག་པའི་འབར་རླངས་ཀྱི་ཐབ་ཆས་རིན་པ་མི་དགོས་པར་སྒྲིག་སྦྱོར་བྱས་པ་དང་ཆབས་ཅིག འབར་རླངས་ཤེས་བྱ་དྲིལ་བསྒྲགས་ཀྱང་བྱས་པར་རྒྱ་ཆེའི་གྲོང་མི་ཚོའི་གདེང་འཇོག་བཟང་པོ་ཐོབ་པ་རེད།

སྒྲིག་སྦྱོར་བྱེད་སྐབས་ལས་དོན་མི་སྣས་སྒྲིག་ཆས་རེ་རེ་བཞིན་སྒྲིག་སྦྱོར་ཞིབ་ཚགས་བྱས་པ་དང་དུས་མཚུངས་བཀོལ་སྤྱོད་བྱེད་སྟངས་འགྲེལ་བཤད་ཞིབ་ཕྲ་བརྒྱབ་ནས། འབར་རླངས་ཀྱི་ཐབ་ཆས་ཚང་མ་བདེ་འཇགས་དང་བརྟན་པོའི་ངང་འཁོར་སྐྱོད་ཐུབ་པའི་འགན་ལེན་བྱས་ཏེ་གྲོང་མིས་བློ་བདེ་པོའི་ངང་སྤྱོད་ཐུབ་པར་བྱས་ཡོད། སྡེ་ཁུལ་དུ་སེམས་དྲོད་ཀུང་སིས་འབར་རླངས་ཀྱི་ཤེས་བྱ་དྲིལ་བསྒྲགས་ས་ཚིགས་བཙུགས་ཏེ། དྲིལ་བསྒྲགས་ལག་དེབ་སྤྲོད་པ་དང་བེད་སྤྱོད་བྱེད་སྟངས་ངོ་སྤྲོད་སོགས་ཀྱི་བྱ་ཐབས་སྣ་ཚོགས་བརྒྱུད། གྲོང་མིར་འབར་རླངས་བདེ་འཇགས་ངང་སྤྱོད་པའི་རྒྱུན་ཤེས་དང་། འཕྲལ་སྡོམ་ཐག་གཅོད་བྱ་ཐབས། དེ་བཞིན་རྒྱུན་གཏན་གྱི་སྲུང་སྐྱོང་དང་བདག་སྐྱོང་བྱེད་སྟངས་སོགས་ཀྱི་ཤེས་བྱ་ཁྱབ་གདལ་བཏང་ཡོད། ད་ཐེངས་ཀྱི་བྱེད་སྒོས་སྡེ་ཁུལ་གྱི་གྲོང་མིར་ཡུན་རིང་འཕྲད་པའི་འབར་རླངས་ཀྱི་ཐབ་ཆས་སྒྲིག་སྦྱོར་གྱི་དཀའ་གནད་ཐག་གཅོད་བྱས་པ་མ་ཟད། ད་དུང་གྲོང་མིའི་བདེ་འཇགས་ཀྱི་འདུ་ཤེས་དང་རང་ངོས་འགོག་སྲུང་གི་ནུས་པ་སྔར་བས་ཆེ་རུ་བཏང་ཡོད་པ་རེད།

ཤེས་རྟོགས་བྱུང་བར་གཞིགས་ན། སྡེ་ཁུལ་གྱི་གྲོང་མིའི་སོལ་རླངས་སྤྱོད་དཀའ་བའི་གནད་དོན་ཐག་གཅོད་བྱས་ནས་གྲོང་མིའི་འཚོ་བའི་སྤུས་ཚད་མཐོ་རུ་གཏོང་ཆེད། འཆམ་མཐུན་གླིང་སྡེ་ཁུལ་གྱིས་གྲོང་མིའི་དགོས་མཁོ་དང་ལེན་ཧུར་ཐག་བྱས་ཏེ་མ་དངུལ་སྒོར་ཁྲི་90ལྷག་ཙམ་བཏང་ནས་གྲོང་མིར་འབར་རླངས་ཀྱི་ཐབ་ཆས་1170སྤྲད་པ་རེད། འབར་རླངས་ཀྱི་ཐབ་ཆས་སྒྲིག་སྦྱོར་བྱས་པས་འབར་རླངས་བདེ་འཇགས་ངང་སྤྱོད་ཚད་དང་སྤུས་ཚད་ལ་འགན་ལེན་ནུས་ལྡན་ཐུབ་ནས། མང་ཚོགས་ཀྱི་བདེ་སྐྱིད་སྟོན་གྲངས་སླར་ཡང་མཐོ་རུ་འགྲོ་རྒྱུ་རེད།