ཉེ་བའི་ལོ་ཤས་རིང་། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་མཐའ་གཅིག་ཏུ་བྱས་ཏེ་དམངས་འཚོ་ལེགས་སུ་གཏོང་བ་དང་མི་སེམས་གཅིག་ཏུ་བསྒྲིལ་རྒྱུ་དེ་དཔལ་འབྱོར་དང་སྤྱི་ཚོཊ་འཕེལ་རྒྱས་ཀྱི་འགོ་འཛུཊ་ས་དང་དོན་ལ་བབས་སར་བརྩིས་ནས“དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་བརྒྱབ་སྟེ། མྱུར་ཚད་དང་སྤུས་ཚད་གཉིས་ཀ་ལྡན་པའི་ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་ལམ་བུ་གསར་པར་ཧུར་ཐག་བསྐྱོད་ཡོད།

“ལོ་ལྔ་ཚན་བཅུ་བཞི་པའི”ཚུན་དུ། བོད་ཀྱི་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་1900ནས་ན་ནིང་གི་སྒོར་དུང་ཕྱུར་2400བར་འཕར་བ་དང་། མི་རེའི་ཆ་སྙོམས་GDPསྒོར་ཁྲི་5.23ནས་སྒོར་ཁྲི་6བར་འཕར་བ། གྲོང་ཁྱེར་དང་གྲོང་གསེབ་ཀྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་འཕར་ཚད་ལོ་མང་རིང་རྒྱལ་ཡོངས་ཀྱི་མདུན་གྲལ་དུ་སླེབས་རྒྱུ་རྒྱུན་འཁྱོངས་ཐུབ་ཡོད་པ་རེད།

ཁྱད་ལྡན་ཐོན་ལས་ཕན་འབྲས་མངོན་གསལ་དོད། ཕྱུག་འགྱུར་ལམ་བུར་གོམ་སྟབས་སྔར་བས་བརྟན།

ཉེ་བའི་ལོ་ཤས་རིང་། བོད་ཀྱིས་རིག་གནས་ཡུལ་སྐོར་དང་། ཁྱད་ལྡན་ཞིང་འབྲོག་ལས། མཐོ་གསར་གྲངས་འཛིན། བོད་ལུགས་གསོ་རིག་སོགས་ཁྱད་ལྡན་ལེགས་ལྡན་ཐོན་ལས་རྒྱུན་མཐུད་སྟོབས་ཆེར་གཏོང་བ་དང་དུས་མཚུངས་ས་མཐོའི་ཡང་བའི་བཟོ་ལས་སོགས་གསར་དར་ཐོན་ལས་མགྱོགས་མྱུར་སྐྱེད་སྲིང་བྱས་ཏེ་སྤུས་ཚད་མཐོ་བའི་འཕེལ་རྒྱས་ལ་ནང་སྐྱེལ་སྒུལ་ཤུགས་ཆེན་པོ་བསྣན་ཡོད་པ་རེད།

འབྲི་གཡག་བཤས་གཏོང་བའི་ལོ་ཚད་དེ་སྔའི་ལོ་8ནས་12བར་ནས་ལོ་3ནས་4བར་ཐུང་དུ་ཕྱིན་པ་དང་འབྲི་གཡག་གི་རུས་པ་རྒྱུ་ཆར་བྱས་པའི་འབྲི་གཡག་གི་རུས་པའི་དཀར་ཡོལ་ཆ་ཚང་ཞིག་གི་རིན་གོང་མཐོ་ཤོས་ལ་སྒོར་ཁྲི་200ཟིན་པ་དང་། རང་རྟེན་ཞིབ་བཟོ་བྱས་པའི་ནས་ཀྱི་སོན་བཟང་སྣ་ཁ་70ལྷག་ཙམ་ཡོད་པ་རེད། རང་ལྗོངས་ཀྱིས་ཞིང་འབྲོག་ལས་འཕེལ་རྒྱས་གཏོང་བའི་ཐད་ཐོན་ལས་འཁོར་འབྲེལ་སྣུར་སྲིང་ཧུར་ཐག་བྱེད་པ་དང་ཐོན་རྫས་ཀྱི་ཟུར་སྣོན་རིན་ཐང་མཐོ་རུ་ཧུར་ཐག་བཏང་སྟེ། ཞིང་འབྲོག་ལས་ཀྱི་ཐོན་སྐྱེད་རིན་ཐང་མཐོ་རུ་གཏོང་བར་རམ་འདེགས་བྱས་པ་དང་ཞིང་འབྲོག་པའི་འབབ་འཕར་ལ་སྐུལ་འདེད་བཏང་ཡོད། དེའི་ནང་ནས་ལས་སྣོན་བྱས་ཏེ་བཟོས་པའི་ནས་ཆང་དང་། ཏན་ཞིམ། ཐུག་པ་སོགས་ཐོན་རྫས་རབ་དང་རིམ་པ་ལྗོངས་ཕྱིར་ཚོང་གི་ཡོད་པ་མ་ཟད། ད་དུང་ནེ་པ་ལ་དང་ཁ་ན་ཏ་སོགས་རྒྱལ་ཁབ་དང་ས་ཁུལ་མང་པོར་འཚོང་གི་ཡོད་པ་རེད།

གྲངས་འཛིན་དཔལ་འབྱོར་ཁྱབ་ཁོངས་སུ་བོད་ཀྱིས་མུ་ཟི་ཉུང་བ་དང་། སྐམ་ཤས་ཆེ་བ། དྲོད་ཚད་དམའ་བ། གསོ་རླུང་དཀོན་པ་བཅས་དམིགས་བསལ་གནམ་གཤིས་ཀྱི་ལེགས་ཆར་བརྟེན་ནས་གྲངས་གཞི་ཆེན་པོའི་ལྟེ་གནས་མང་པོ་ཞིག་ས་ཆ་དེ་གར་གཞིས་ཆགས་པའི་ཡིད་དབང་བཀུག་ཡོད།

གྲངས་གཞི་ལས་མངོན་པར། ཉེ་བའི་ལོ་གསུམ་རིང་། བོད་ཀྱི་གྲངས་འཛིན་དཔལ་འབྱོར་གྱི་འཕར་ཐང་ཆ་སྙོམས་འཕར་ཚད་14%རྒྱུན་འཁྱོངས་ཐུབ་པ་དང་། 2023ལོར་ལོ་རྒྱུས་ཀྱི་ཟིན་ཐོ་གསར་པ་བཏོད་ནས་སྒོར་དུང་ཕྱུར་250.98ཟིན་པ་དེ་དུས་མཚུངས་ལས་19.3%འཕར་ནས་གྲངས་འཛིན་དཔལ་འབྱོར་དེ་ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་སྒུལ་ཤུགས་གསར་པར་གྱུར་ཡོད།

ལྷ་ས་གྲོང་ཁྱེར་གཡུ་ཐོག་ལམ་དུ་གནས་པའི་ས་མཐོའི་ཐབ་ཆས་ཐད་ཚོང་ཁང་གི་ལས་མི་མིག་དམར་སྒྲོལ་དཀར་གྱིས་ཉིན་ལྟར་སྐུ་མགྲོན་མང་པོར་སྣེ་ལེན་ཞུ་གི་ཡོད།

“ཚོང་ཁང་དུ་ཡོང་མཁན་ཚང་མ་གངས་ལྷ་མེ་ཏོག་རྟགས་ཅན་གྱི་ས་མཐོའི་ཐབ་ཆས་སྐོར་སྐད་ཆ་འདྲི་བའམ་ཡང་ན་ཉོ་བར་ཡོང་མཁན་ཤ་སྟག་རེད”ཅེས་མིག་དམར་སྒྲོལ་དཀར་གྱིས་བཤད།

ལྗོངས་ཕྱིའི་ལག་རྩལ་ནང་འདྲེན་བྱས་ནས་ས་མཐོའི་དོན་དངོས་དང་འཚམ་ཐུབ་པ་བྱུང་ཞིང་། རང་སྐྱོང་ལྗོངས་ཀྱིས་རང་རྟེན་ཞིབ་བཟོ་དང་ཐོན་སྐྱེད་བྱས་པའི“གངས་ལྷ་མེ་ཏོག”དང“སྐལ་བཟང་མེ་ཏོག”རྟགས་ཅན་གྱི་ས་མཐོའི་ཐབ་ཆས་ཀྱི་སྤུས་རྟགས་གཉིས་ཀྱིས་ས་མཐོར་ལྟོ་ཆས་འཚོས་དཀའ་བ་དང་། འཚོས་འགོར་བ། ཆུ་འཁོལ་མའི་དྲོད་ཚད་ཏུའུ་100ཟིན་གྱི་མེད་པ་བཅས་ཀྱི་གནད་དོན་ཐག་གཅོད་ཐུབ་པ་དང་། ཐོན་སྐྱེད་བྱས་ནས་ལོ་གཉིས་ལྷག་ཙམ་སོང་ཚུན་ཚོང་ཟོག་སྣ་ཁ་ཁྲི་84བཙོངས་པས། ས་མཐོའི་ཐབ་ཆས་ཀྱིས་སྣེ་ཁྲིད་དུ་བྱས་པའི་ས་མཐོའི་ཡང་བའི་བཟོ་ལས་དེ་རང་ལྗོངས་ཀྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་སྟོབས་ཤུགས་གལ་ཆེན་ཞིག་ཏུ་གྱུར་ཡོད།

མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ། འཆམ་མཐུན་མཉམ་གནས་འཕེལ་རྒྱས་ལས་ལ་གཞོལ།

ལོ་ངོ་1300ལྷག་ཙམ་གྱི་ལོ་རྒྱུས་ལྡན་པའི་ལྷ་སའི་བར་སྐོར་ནང་རྒྱ་རིགས་དང་། བོད་རིགས། ཧུད་རིགས། མོན་པ་རིགས་སོགས་མི་རིགས་20ལྷག་ཙམ་འཚོ་སྡོད་བྱེད་པ་དང་། གྲོང་མིའི་སྒོ་ར་ཆེ་ཆུང་100ལྷག་ཙམ་ནང་འཚོ་སྡོད་བྱེད་མཁན་ཚོས་མཉམ་དུ་འཚོ་སྡོད་དང་། མཉམ་དུ་སློབ་སྦྱོང་བྱེད་པ། མཉམ་དུ་ལས་ཀ་བྱེད་པ། མཉམ་དུ་དགའ་བདེའི་དཔལ་ལ་རོལ་བ་བཅས་ནི“ཇ་དང་ཚྭ་བཞིན”བརྩེ་སེམས་ལྷག་པར་ཟབ།

ཀླུ་སྒུག་སྡེ་ཁུལ་གྱི་བགྲེས་སོང་ཞུས་ཕུའུ་ཅིན་ནི་ཅང་སུའུ་ནས་ཡིན་པ་དང་། ལོ་ཤས་གོང་སྟབས་མི་ལེགས་པར་རླངས་འཁོར་གྱི་ལས་འཛོལ་ཐོན་ནས་དབང་པོ་སྐྱོན་ཅན་ཆགས་པས། ཁོང་དང་བཟའ་ཟླའི་འཚོ་བར་སྐབས་ཤིག་རིང་དཀའ་ངལ་མང་པོ་འཕྲད་ཡོད། སྡེ་ཁུལ་གྱི་གྲོང་མི་དང་ལས་དོན་མི་སྣའི་ཐུགས་ཁུར་དང་རོགས་རམ་འོག་རྒན་རྒོན་གཉིས་ཀྱི་འཚོ་བ་རིམ་བཞིན་ལེགས་སུ་ཕྱིན་ཡོད། ཞུས་ཕུའུ་ཅིན་གྱིས“ཁོང་ཚོ་གཉེན་ཉེ་མིན་ཡང་གཉེན་ཉེ་ལས་ཀྱང་ལྷག་པ་ཡོད”ཅེས་རྟག་ཏུ་ཤོད་ཀྱི་ཡོད།

ཉེ་བའི་ལོ་ཤས་རིང་། བོད་ཀྱིས་རྒྱལ་ཡོངས་ཀྱི་སྔོན་དུ་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་གཏོད་སྲོལ་ཡིག་དང་འཆར་འགོད་བཏོན་པ་དང་། མི་རིགས་མཐུན་སྒྲིལ་ཡར་ཐོན་འཛུགས་གཏོད་ཐད་རང་སྐྱོང་ལྗོངས་དང་། ས་ཁུལ་དང་གྲོང་ཁྱེར། རྫོང་དང་ཆུས། ཤང་དང་གྲོང་རྡལ། གྲོང་ཚོ་དང་སྡེ་ཁུལ་བཅས་ཕྱོགས་ཡོངས་ལ་ཁྱབ་ནས་མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་རྒྱ་ཁྱབ་བྱུང་ཡོད།

དམངས་འཚོའི་བྱ་བ་དངོས་ལས་མི་སེམས་དྲོད། བདེ་སྐྱིད་སྟོན་གྲངས་རིམ་བཞིན་མཐོ་རུ་སོང་།

དམངས་འཚོ་འགན་ལེན་དང་ལེགས་སུ་གཏོང་བ་ནི་སྤུས་ཚད་མཐོ་བའི་འཕེལ་རྒྱས་ཀྱི་རིན་ཐང་དོན་གཉེར་བྱེད་པ་ཞིག་རེད། བོད་ཞི་བས་བཅིངས་འགྲོལ་བཏང་ཚུན། རང་ལྗོངས་ཀྱི་ཆུ་དང་། གློག ལམ། འཕྲིན་གཏོང་། སྡོད་ཁང་སོགས་རྨང་གཞིའི་སྒྲིག་བཀོད་ཀྱི་ཆ་རྐྱེན་ཇེ་ལེགས་སུ་ཕྱིན་པ་དང་། མི་རིགས་ཁག་གི་མང་ཚོགས་ཀྱི་འཚོ་བར་ཆུ་ཟོམ་ནས་ཆུ་ཀ་ལ་དང་། སྣུམ་བཞུ་ནས་གློག་སྒྲོན། ས་རྡོའི་ལམ་ནས་སྣུམ་ནག་ལམ། སྦྲ་གུར་ནས་རྫ་གཡམ་ཐོག་ཅན་གྱི་ཁང་པ་བཅས་བར་གྱི་འགྱུར་ལྡོག་ཧ་ཅང་ཆེན་པོ་བྱུང་ཡོད།

ལྷོ་ཁ་གྲོང་ཁྱེར་སྣ་དཀར་རྩེ་རྫོང་ཕུ་མ་བྱང་ཐང་ཤང་གི་ལོ་68ལ་སླེབས་པའི་མཚོ་མོས་སྔོན་ཆད་བསམ་ཡང་མི་ཕོད་པའི་འཚོ་བ་ཞིག་སྐྱེལ་བཞིན་ཡོད། སྔོན་ཆད་སྡོད་སའི་ཁང་པ་ནི་སྤྱིལ་བུ་ཡིན་པ་དང་རྒྱ་ཆུང་ལ་ཆུ་ཀ་ལ་དང་གློག་སྒྲོན་གཏན་ནས་མེད། ད་ཆ་སྨི་ངོས་གྲུ་200ཡོད་པའི་གསོ་རླུང་མཁོ་འདོན་གྱི་འབྱོར་འབྲིང་སྡོད་ཁང་དུ་སྤོས་པས། ཆུ་དང་། གློག ལམ། འཕྲིན་གཏོང་། དྲ་བ་སོགས་ལེ་ལག་སྒྲིག་བཀོད་ཆ་ཚང་ཡོད་པ་རེད།

འཛམ་གླིང་ཐོག་ས་བབ་མཐོ་ཤོས་ཀྱི་སྲིད་འཛིན་ཤང་ཞིག་ཡིན་པའི་ངོས་ནས་རང་སྐྱོང་ལྗོངས་ཀྱི་སྐུལ་འདེད་ཤུགས་ཆེན་འོག་ཕུ་མ་བྱང་ཐང་ཤང་ལ་གཅིག་སྡུད་ཐོག་དྲོད་རླངས་མཁོ་འདོན་དང་གསོ་རླུང་མཁོ་འདོན་ལས་གྲྭ་ལག་བསྟར་བྱས་པ་རེད། “ད་ཆ་ཤང་གི་དུད་ཚང་283ལ་དྲོད་རླངས་དང་གསོ་རླུང་མཁོ་འདོན་ཐུབ་ཡོད”ཅེས་ཕུ་མ་བྱང་ཐང་ཤང་ཏང་ཨུད་ཀྱི་ཧྲུའུ་ཅི་གཞོན་པ་ལི་ཡུན་ལུང་གིས་བཤད།

2023ལོའི་ལོ་མཇུག་ཏུ་སླེབས་སྐབས་ལྗོངས་ཡོངས་ཀྱི་གྲོང་ཁྱེར་དང་གྲོང་རྡལ་གྱི་དྲོད་རླངས་མཁོ་འདོན་རྣམ་གྲངས་ལ་མ་འཇོག་བྱེད་ཚད་རིམ་རྩིས་བྱས་ན་སྒོར་དུང་ཕྱུར་283ཟིན་པ་དང་ལོར་ཆ་སྙོམས་མ་དངུལ་སྒོར་དུང་ཕྱུར་20ཙམ་བཏང་ཞིང་། མིག་སྔར་ལྗོངས་ཡོངས་སུ་དྲོད་རླངས་མཁོ་འདོན་རྣམ་གྲངས་ཁྱབ་ཚད་མི་འབོར་ཁྲི་70ཙམ་ཟིན་ཡོད་པ་རེད།

གཅིག་སྡུད་ཐོག་དྲོད་རླངས་དང་གསོ་རླུང་མཁོ་འདོན་གྱི་འདུ་འགོད་ལག་ལེན་བསྟར་བ་ཕུད། ལྷ་གཞིས་རིམ་མཐོའི་གཞུང་ལམ་ཆ་ཚང་ལ་རླངས་འཁོར་ཤར་གཏོང་ཐུབ་པ་དང་། ས་བབ་མཐོ་བའི་ཞིང་འབྲོག་ཁུལ་དུ་དུས་ཚིགས་རང་བཞིན་གྱི་ཆུ་ཆད་པའི་གནད་དོན་ཐག་གཅོད་ཐུབ་པ། གློག་མཁོ་འདོན་བྱེད་ཚད་མཐོ་རུ་ཕྱིན་པ། འོད་སྐུད་དྲ་ཆེན་དང་4Gབརྡ་རྟགས་ཁྱོན་ཡོངས་ལ་ཁྱབ་པ་སོགས་དམངས་འཚོའི་འདུ་འགོད་རབ་དང་རིམ་པ་ལག་ལེན་བསྟར་བ་དེས་བོད་ཀྱི་མི་རིགས་ཁག་གི་མང་ཚོགས་རྣམས“འཐུང་ཆུ་ལེན་དཀའ་བ་དང་། གློག་སྤྱོད་དཀའ་བ། འགྲོ་སྐྱོད་དཀའ་བ། འཕྲིན་གཏོང་ཁྱབ་དཀའ་བ”བཅས་ཀྱི་ལོ་རྒྱུས་མཇུག་འགྲིལ་ནས་སྐྱིད་སྣང་དོད་ལ་སྟབས་བདེ་བའི་དེང་རབས་ཅན་གྱི་འཚོ་བ་སྐྱེལ་བཞིན་ཡོད། 2024ལོར་བོད་ཀྱིས་མ་དངུལ་སྒོར་དུང་ཕྱུར་121.4བཏང་སྟེ“དམངས་འཚོའི་འདུ་འགོད་ཆེན་པོ་བཅུ”ལག་ལེན་གཏིང་ཟབ་བསྟར་བ་དང་དམངས་འཚོའི་བྱ་བ་དངོས་ཁག་21ལག་བསྟར་བྱས་ནས་སྤུས་ཚད་མཐོ་བའི་འཕེལ་རྒྱས་ལ་དམངས་འཚོའི་རྨང་གཞི་བརྟན་པོ་བཏིང་ཡོད་པ་རེད།