འདི་ནི་སྒྲོག་འགྲེལ་པས་མང་ཚོགས་ལ་དྲིལ་བསྒྲགས་དེབ་སྤྲོད་བཞིན་པ།

ལོ་སྟོད་དུ་ལྷོ་ཁ་གྲོང་ཁྱེར་འཕྲལ་སྡོམ་དོ་དམ་ཅུས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱས་ནས“འཕེལ་རྒྱས་དང་བདེ་འཇགས་སྤྱི་འདོམས”མཐའ་འཁྱོངས་དང་། “གནད་སྨིན་བྱེད་ཐབས་བཅོ་ལྔ”དང“རྩ་བཅོས་གཉིས”ཀྱི་བླང་བྱ་དོན་འཁྱོལ་གཏིང་ཟབ། “དོན་ཆེན་བཞི”དང“འཛུགས་གཏོད་བཞི”དེ་བཞིན་གྲོང་ཁྱེར་ཡོངས་ཀྱི“ལྗོངས་ཡོངས་ཀྱི་མདུན་གྲལ་དུ་སླེབས་པ་དྲུག”གི་འཐབ་ཇུས་དམིགས་ཚད་བཅས་ལ་དམ་པོར་དམིགས་པ། བདེ་འཇགས་ཐོན་སྐྱེད་དང་གནོད་འཚེ་སྔོན་འགོག་དང་ཉུང་གཏོང་གི་དུས་བབ་རྒྱུན་མཐུད་བརྟན་པོའི་ངང་ཚོད་འཛིན་བྱས་ཏེ་ལྷོ་ཁ་གྲོང་ཁྱེར་གྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྲ་ཞིང་བརྟན་པའི་བདེ་འཇགས་འགན་ལེན་བྱས་ཡོད།

བདེ་འཇགས་ཐོན་སྐྱེད་ཀྱི་འགོག་སྲུང་འཛིང་རགས་བརྟན་དུ་བཏང་བ།

ལྷོ་ཁ་གྲོང་ཁྱེར་གྱིས་བདེ་འཇགས་ཐོན་སྐྱེད་ཀྱི་འགན་འཁྲི་དོན་འཁྱོལ་བྱེད་པ་དེ་རྩ་བཅོས་འགག་སྒྲོལ་གྱི་ལས་འགན་ཨང་དང་པོར་བརྩིས་ནས《བདེ་འཇགས་ཐོན་སྐྱེད་དང་གནོད་འཚེ་སྔོན་འགོག་དང་ཉུང་གཏོང་གི་ལྷོ་ཁ་གྲོང་ཁྱེར་སྲིད་གཞུང་གི་འགོ་ཁྲིད་ཀྱི་འགན་འཁྲི་དང་ལས་འགན་གསལ་ཐོ》དང་དེ་བཞིན《ལྷོ་ཁ་གྲོང་ཁྱེར་གྱི་གཙོ་གནད་ཁོངས་མིའི་ཚན་པའི་2024ལོའི་བདེ་འཇགས་ཐོན་སྐྱེད་དང་གནོད་འཚེ་སྔོན་འགོག་དང་ཉུང་གཏོང་གི་གཙོ་གནད་ལས་འགན་གསལ་ཐོ》བཟོས་ནས་བཀྲམ་ཏེ་རིམ་ཁག་འགོ་ཁྲིད་དང་ཁོངས་མིའི་ཚན་པའི་འགན་འཁྲི་ཁ་གསལ་བཟོས་པ་རེད།

བདེ་འཇགས་ཀྱི་མངོན་མེད་རྐྱེན་ངན་སེལ་ཆེད། ལྷོ་ཁ་གྲོང་ཁྱེར་གྱིས་གཏེར་རི་དང་། ཉེན་ཡོད་རྫས་འགྱུར་དངོས་པོ། ཤོག་སྦག་སོགས་གཙོ་གནད་ལས་རིགས་ཁྱབ་ཁོངས་ལ་དམིགས་ནས“རིམ་བཤེར་རྣམ་པའི”བདེ་འཇགས་ཐོན་སྐྱེད་ཀྱི་གྲལ་བཤེར་ཆེན་པོའི་བྱེད་སྒོ་རབ་དང་རིམ་པ་སྤེལ་ཡོད། གྲལ་བཤེར་ཞིབ་ཚགས་བྱས་པ་བརྒྱུད། གཏེར་རིའི་མངོན་མེད་རྐྱེན་ངན་377དང་ཉེན་ཡོད་རྫས་འགྱུར་དངོས་རྫས་དང་ཤོག་སྦག་གི་མངོན་མེད་རྐྱེན་ངན་330ཤེས་རྟོགས་བྱུང་བ་དང་གནས་327བཅོས་སྒྲིག་བྱས་པས་བཅོས་སྒྲིག་གི་ཕན་འབྲས་མངོན་གསལ་དོད་པོ་ཐོན་ཡོད།

ལྷོ་ཁ་གྲོང་ཁྱེར་གྱིས་གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་ཀྱིས་བདེ་འཇགས་ཐོན་སྐྱེད་ཀྱི་གཅིག་སྡུད་ཉེན་སེལ་འགག་སྒྲོལ་གྱི་བཅོས་སྒྲིག་ཆེན་པོ་དང་དེ་བཞིན་ཆེད་དོན་བྱ་སྤྱོད་སྣ་ཚོགས་ཏན་ཏིག་སྤེལ་བ་དང་། ལས་འཛོལ་གྱི་མངོན་མེད་རྐྱེན་ངན་གྱི་གྲངས་གཞིའི་མཛོད་འཛུགས་པ་དང་འཐུས་སྒོ་ཚང་དུ་བཏང་བར་བརྟེན་མངོན་མེད་རྐྱེན་ངན་གྲལ་བཤེར་དང་། ཐོ་འགོད། ཚོད་སྐོར། སྙན་སེང་། ལྟ་སྐུལ་ཚོད་འཛིན། བཅོས་སྒྲིག ཐོ་སུབ་བཅས་ཀྱི་བརྒྱུད་རིམ་ཧྲིལ་པོའི་དོ་དམ་མངོན་འགྱུར་བྱུང་ཡོད། འདི་ལོའི་ཟླ་6ཚེས་18ཉིན་བར་རིམ་རྩིས་བྱས་ན་གྲོང་ཁྱེར་ཡོངས་སུ་མངོན་མེད་རྐྱེན་ངན་5062གྲལ་བཤེར་བྱས་པ་དང་གནས་4619བཅོས་སྒྲིག་བྱས་ཏེ་བཅོས་སྒྲིག་བྱེད་ཚད་91.3%ཟིན་ཡོད།

འཕྲལ་སྡོམ་དོ་དམ་མ་ལག་ལེགས་སུ་བཏང་བ།

རྙོག་འཛིང་ཆེ་ལ་འགྱུར་ལྡོག་མང་བའི་འཕྲལ་སྡོམ་གྱི་འགྲན་སློང་ལ་ཕྱོགས་ནས་ལྷོ་ཁ་གྲོང་ཁྱེར་གྱིས་འཕྲལ་སྡོམ་དོ་དམ་མ་ལག་རྒྱུན་ཆད་མེད་པར་ལེགས་སུ་བཏང་བ་དང་འཕྲལ་སྡོམ་དང་ལེན་གྱི་མྱུར་ཚད་དང་དངོས་འཐབ་ནུས་པ་ཆེ་རུ་བཏང་སྟེ། འགག་རྩའི་དུས་སྐབས་སུ་དོན་ཐུབ་པ་དང་། སྒྲུབ་ཐུབ་པ། རྒྱལ་ཁ་ཐོབ་པ་བཅས་བྱས་ཡོད།

ཉིན་ཤས་གོང་། ལྷོ་ཁ་གྲོང་ཁྱེར་སྣེ་གདོང་ཆུས་གནོད་འཚེ་སྔོན་འགོག་དང་ཉུང་གཏོང་ཨུ་ལྷན་གྱིས་རྩེད་ཐང་ཁྲོམ་གཞུང་སོགས་སྡེ་ཚན་དང་མཉམ་དུ་ཞོར་སྐྱོན་གྱི་ས་གཤིས་གནོད་འཚེར་ཁ་གཏད་གཅོག་པའི་དངོས་འཐབ་ནང་སྦྱོང་བྱས་ཤིང་། ནང་སྦྱོང་གི་བརྒྱུད་རིམ་ཧྲིལ་པོར་སྔོན་བརྡ་མི་གཏོང་བ་དང་། བརྡ་ཐོ་མི་གཏོང་བ། དུས་ཐོག་ཏུ་དཔྱད་འདེམས་བཅས་བྱས་ནས་གནོད་འཚེའི་གནས་ཚུལ་ངོ་མ་ཐོན་པ་ལྟར་བྱས་ཡོད། རྩེད་ཐང་ཁྲོམ་གཞུང་གིས་བཀོད་འདོམས་མ་ལག་མགྱོགས་མྱུར་བཙུགས་ནས་མང་ཚོགས་ཁ་འགྲེམས་དང་གནས་ཚུལ་ཐོན་ས་བཀག་སྡོམ་བྱས་ཡོད། ཆུ་ཚོད་ཕྱེད་ཀའི་ནང་རོགས་སྐྱོབ་སྟོབས་ཤུགས་ཁག་གཅིག་སྡུད་བྱས་ནས་འགྲིམ་འགྲུལ་དོ་དམ་དང་ཁོར་ཡུག་ལྟ་ཞིབ་ཚད་ལེན་སོགས་ཆེད་དོན་བྱ་སྤྱོད་ཆེན་པོ་དགུ་མཉམ་དུ་སྤེལ་ཡོད། མེ་ཟོན་རུ་ཁག་གིས་ལད་མོའི་ནང་སྦྱོང་ནང་གི་རྨས་མ་6བསྐྱབས་ཤིང་། ད་ཐེངས་ཀྱི་ནང་སྦྱོང་ནང་ཁྱོན་མི་ཐེངས་330ལྷག་ཙམ་དང་རླངས་འཁོར་58ལྷག་ཙམ། སྒྲིག་ཆས་ཆིག་སྟོང་ལྷག་ཙམ་སྤྱད་ཡོད།

འཕྲལ་སྡོམ་དཔུང་ཁག་གི་དངོས་འཐབ་འཇོན་ཐང་ཆེ་རུ་གཏོང་ཆེད། ལྷོ་ཁ་གྲོང་ཁྱེར་གྱིས《2024ལོའི་ལོ་འཁོར་གྱི་གྲོང་ཁྱེར་ཡོངས་ཀྱི་འཕྲལ་སྡོམ་ནང་སྦྱོང་ལས་དོན་ཡག་པོ་བསྒྲུབ་རྒྱུའི་སྐོར་གྱི་བརྡ་ཐོ》དུས་ཐོག་ཏུ་བཀྲམ་པ་དང་འབྲེལ་། མ་དངུལ་སྒོར་ཁྲི་93ལྷག་ཙམ་བཏང་ནས་རིགས་ཁག་གི་འཕྲལ་སྡོམ་ནང་སྦྱོང་བྱེད་སྒོ་ཐེངས་824སྒྲིག་འཛུགས་བྱས་ཏེ་སྤེལ་བ་དང་ནང་སྦྱོང་ལ་མི་ཐེངས་ཁྲི་3.7ལྷག་ཙམ་ཞུགས་ཡོད།

གནོད་འཚེ་སྔོན་འགོག་དང་ཉུང་གཏོང་ཤེས་བྱ་དྲིལ་བསྒྲགས་བྱས་པ།

རྒྱལ་ཡོངས་ཀྱི་གནོད་འཚེ་སྔོན་འགོག་དང་ཉུང་གཏོང་ཉིན་མོ་ཐེངས་16པ་དང“བདེ་འཇགས་ཐོན་སྐྱེད་ཟླ་བ”ཐེངས་23པའི་སྐབས་སུ་ལྷོ་ཁ་གྲོང་ཁྱེར་གྱིས་གསར་གཏོད་ལ་བརྟེན་ནས“མི་ཚང་མས་བདེ་འཇགས་ལ་སྣང་ཆེན་དང་། མི་ཚང་མས་འཕྲལ་སྡོམ་ཤེས་པ་བྱས་ནས་ཚེ་སྲོག་གི་བགྲོད་ལམ་ཤར་གཏོང་ཐུབ་པའི”བརྗོད་དོན་གཙོ་བོར་དམ་པོར་དམིགས་ཏེ་གསོན་ཉམས་དོད་པའི་བདེ་འཇགས་དྲིལ་བསྒྲགས་སློབ་གསོའི་བྱེད་སྒོ་རབ་དང་རིམ་པ་ཇུས་འགོད་ཞིབ་ཚགས་བྱས་པ་རེད།

མིག་སྔའི་བར། བྱེད་སྒོའི་ཕན་འབྲས་ཆེ་རུ་ཕྱིན་ནས་དྲིལ་བསྒྲགས་དཔྱད་ཡིག་དང་དངོས་རྫས་ཁྲི་6ལྷག་ཙམ་སྤྲད་པ་དང་། ས་གནས་ས་ཐོག་ཏུ་མང་ཚོགས་མི་ཐེངས་2600ལྷག་ཙམ་གྱི་དོགས་གཞིར་ལན་བརྒྱབ་པ་མ་ཟད། 《ལྷོ་ཁ་གྲོང་ཁྱེར་གྱི་བདེ་འཇགས་ཐོན་སྐྱེད་ཐེར་འདོན་བྱ་དགའི་ལག་བསྟར་བྱ་ཐབས》གཞིར་བཟུང་། ཐེར་འདོན་བྱ་དགའ་སྒོར་34500ཐོག་མར་སྤྲད་པར་བརྟེན་ཐེར་འདོན་བྱ་དགའི་ལམ་སྲོལ་ལོ་རྒྱུས་རང་བཞིན་གྱི་སྒོ་ནས་ཚད་བརྒལ་བྱུང་བ་དང་བདེ་འཇགས་ལྟ་སྐུལ་ནང་ཞུགས་མཁན་སྤྱི་དམངས་ཀྱི་ཧུར་བརྩོན་རང་བཞིན་ཆེ་རུ་ཕྱིན་ཡོད།