འདི་ནི་ཧྲང་ཧའེ་ཡི་བོད་སྐྱོར་དགེ་རྒན་ཕན་ཅེ(གཡས་ཀྱི་དང་པོ)ཡིས་སློབ་མ་ཞིང་ནང་དུ་འཁྲིད་དེ་བསམ་བློ་ཆབ་སྲིད་ཀྱི་སློབ་ཚན་འཁྲིད་བཞིན་པ། (2021ལོའི་ཟླ་9ཚེས་14ཉིན་པར་བརྒྱབ)

འདི་ནི་གཞིས་རྩེ་གྲོང་ཁྱེར་པ་སྣམ་རྫོང་དུ་ཅི་ནན་གྲོང་ཁྱེར་གྱི་ཁག་བཅུ་པའི་བོད་སྐྱོར་ལས་བྱེད་པ་ལི་ཏུང(གཡས་ཀྱི་དང་པོ)གིས་ཡུལ་དེ་གའི་འདེབས་འཛུགས་དུད་ཚང་གི་ཞིང་པ་དང་གླེང་མོལ་བྱེད་བཞིན་པ། (2024ལོའི་ཟླ་6ཚེས་21ཉིན་པར་བརྒྱབ)

འདི་ནི་2019ལོའི་ཟླ་4ཚེས་1ཉིན་མི་རྣམས་ཀྱིས་རྒྱལ་ཡོངས་ཀྱི་བོད་སྐྱོར་འགྲེམས་ཁང་ནང་ལྟ་སྐོར་བྱེད་བཞིན་པ།

འདི་ལོ་ནི་ཁ་གཏད་བོད་སྐྱོར་ལས་དོན་སྤེལ་ནས་ལོ་30འཁོར་བའི་ལོ་རེད།

བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་ཐུགས་ཁུར་དང་གཟིགས་སྐྱོང་འོག ཀྲུང་དབྱང་གི་འབྲེལ་ཡོད་སྡེ་ཚན་དང་། བོད་སྐྱོར་ཞིང་ཆེན་དང་གྲོང་ཁྱེར། བོད་སྐྱོར་ཁེ་ལས་བཅས་ཀྱིས་རང་སོ་སོའི་ལེགས་ཆ་བཏོན་ཏེ་དམངས་འཚོ་འགན་ལེན་དང་ལེགས་སུ་གཏོང་བ་དེ་འགོ་འཛུགས་ས་དང་དོན་ལ་བབས་སར་བརྩི་རྒྱུ་མཐའ་འཁྱོངས་ཀྱིས་ཐོན་ལས་བོད་སྐྱོར་དང་། རིག་སྟོབས་བོད་སྐྱོར། མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྐུལ་འདེད་གཏོང་བ་སོགས་ལས་དོན་གྱི་གཙོ་གནད་དུ་བརྩིས་ཡོད་པ་རེད། ཁ་གཏད་བོད་སྐྱོར་ལམ་སྲོལ་བརྒྱུད་བོད་སྐྱོར་ལས་བྱེད་པ་ཁག་མང་པོས་ཏང་ཀྲུང་དབྱང་གི་ཐུགས་ཁུར་དང་རྒྱལ་ཡོངས་མི་དམངས་ཀྱི་བརྩེ་བ་གངས་ལྗོངས་ས་མཐོར་སྦྱིན་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་རྒྱུན་ཆད་མེད་པར་བརྟན་པོར་བཙུགས་ཏེ་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ནུས་ལྡན་བཏང་ཡོད།

དམངས་འཚོར་དམིགས་ནས་མི་སེམས་དྲོ་བར་བྱས་པ།

“མང་ཚོགས་ཀྱིས་ཡོངས་ཁྱབ་དོ་ཁུར་བྱེད་པའི་དམངས་འཚོའི་གནད་དོན་ལ་སྔར་བས་དམིགས་ཏེ་ལས་ཞུགས་དང་། སློབ་གསོ། སྤྱི་ཚོགས་འགན་བཅོལ། སྨན་བཅོས། རྒན་གསོ། བུ་བཅོལ། སྡོད་ཁང་སོགས་དམངས་འཚོའི་བྱ་བ་དངོས་ཡག་པོ་སྒྲུབ་པ་དང་བྱ་བ་རེ་རེ་བཞིན་དོན་འཁྱོལ་ལ་དམ་འཛིན་བྱས་ཏེ་མི་རིགས་ཁག་གི་མང་ཚོགས་ཀྱི་ཐོབ་སྣང་སྔར་བས་ཆེ་བ་དང་། སྐྱིད་སྣང་སྔར་བས་རྒྱུན་མཐུད་ཐུབ་པ། བདེ་འཇགས་ཚོར་སྣང་སྔར་བས་འགན་སྲུང་ཐུབ་པ་བཅས་བྱེད་དགོས”——ཞི་ཅིན་ཕིང་།

【བོད་སྐྱོར་གྱི་གཏམ་རྒྱུད】

ཀྲུང་གོ་གསོ་རིག་ཚན་རིག་ཁང་ཧྥུའུ་ཝའེ་སྨན་ཁང་ནས་ཡིན་པའི་བོད་སྐྱོར་སྨན་པ་ཡན་ཁྲའོ་ཝུའུ་བོད་ནས་ཁ་བྲལ་གྲབས་ཡོད་ཀྱང་ད་དུང་སྙིང་ཁམས་གཤགས་བཅོས་ལ་བྲེལ་བཞིན་ཡོད། དེ་ནི་ཁོང་གིས་བོད་དུ་ཕྱག་ལས་གནང་རིང་སྙིང་ཁམས་གཤགས་བཅོས་བྱེད་ཐེངས་301དེ་རེད།

ཁོང་གིས“དེ་གོང་གི་བོད་སྐྱོར་སྨན་པ་ཁག་གིས་རྨང་གཞི་བཏིང་བས་ཡུལ་འདི་གའི་སྨན་པས་གཤགས་བཅོས་ཀྱི་བརྒྱུད་རིམ་ལ་རྒྱུས་མངའ་དེ་བས་ཆེ་བ་ལོན་ཡོད། གཤགས་བཅོས་འདིར་ཆུ་ཚོད་ཕྱེད་ཀ་ཙམ་ལས་འགོར་གྱི་མེད། ད་ཆ་བོད་རང་སྐྱོང་ལྗོངས་མི་དམངས་སྨན་ཁང་ལ་ལྷན་སྐྱེས་སྙིང་ནད་སྨན་བཅོས་བྱེད་པའི་སྔོན་ཐོན་ལག་རྩལ་དང་ཕུན་སུམ་ཚོགས་པའི་ཉམས་མྱོང་ཡོད་པས། ལྷན་སྐྱེས་སྙིང་ནད་བོད་ནས་བཅོས་ཐུབ་པའི་དམིགས་ཚད་མངོན་འགྱུར་རགས་ཙམ་ཐུབ་ཡོད”ཅེས་བཤད།

“སྨན་ཁང་གིས་ཚན་ཁག་འགན་གཙང་ལེན་པའི”ལམ་སྲོལ་གཞིར་བཟུང་། རྩ་འཛུགས་ཀྱིས་འདེམས་གཏོང་བྱས་པ་བརྒྱུད་རང་སྐྱོང་ལྗོངས་མི་དམངས་སྨན་ཁང་བྲང་སྙིང་ཕྱི་བཅོས་ཚན་ཁག་ཏུ་ཧྥུའུ་ཝའེ་སྨན་ཁང་གིས་འདེམས་གཏོང་བྱས་པའི་བོད་སྐྱོར་སྨན་པ་ཞུས་ལེང་སླེབས་ཤིང་། “དེ་རྗེས་ཀྱི་ལོར་ཚན་ཁག་ཁྱེད་ལ་རྩིས་སྤྲོད་ཀྱི་ཡིན། སླད་ཕྱིན་བཅོས་ཐབས་དཀའ་བའི་ནད་གཞི་འཕྲད་ཚེ་ས་གནས་གཉིས་དབར་རྒྱང་ཁྲིད་ནད་དཔྱད་བྱས་ནས་ཐག་གཅོད་བྱེད་ཆོག”ཅེས་ཞལ་གྱེས་མཛད་སྒོར་ཡན་ཁྲའོ་ཝུའུ་ཡིས་བཤད།

2015ལོར་སྨན་བཅོས་ཤེས་ལྡན་པའི“ཚོགས་སྒྲིག་རྣམ་པའི”བོད་སྐྱོར་བྱས་པ་ནས་བཟུང་། རྒྱུན་མི་ཆད་པའི་སྨན་བཅོས་ཤེས་ལྡན་པས་རྒྱུན་མཐུད་དེ་ཚོགས་པའི་ལེགས་ཆ་དང་སྤྱི་ཡོངས་ཀྱི་ཕན་ནུས་བཏོན་ནས་ས་མཐོའི་མང་ཚོགས་ལ་སྒོ་རྩར་སྤུས་ལེགས་ཀྱི་སྨན་བཅོས་ཞབས་འདེགས་ཞུས་པ་རེད། ཉེ་བའི་ལོ་10ཡི་རིང་། སྨན་བཅོས་ལག་རྩལ་གསར་པ་དང་རྣམ་གྲངས་གསར་པ་4400ལྷག་ཙམ་གཅིག་རྗེས་གཉིས་མཐུད་ངང་ལག་ལེན་བསྟར་ནས་སྨན་བཅོས་ལག་རྩལ་གྱི་སྟོང་ཆ་2500ལྷག་ཙམ་གསབ་པ་དང་སྨན་བཅོས་ཇུས་གཞི་གསར་ཤོས་སྣ་ཚོགས་གངས་ལྗོངས་ས་མཐོར་ལག་ལེན་བསྟར་ཡོད་པ་རེད།

ལོ་བརྒྱའི་ཇུས་ཆེན་འགོད་པར་སློབ་གསོ་རྩ་བར་འཛིན་དགོས། ཀྲེ་ཅང་བོད་སྐྱོར་གྱི་ཁ་གཏད་རོགས་སྐྱོར་གྱི་གཙོ་གནད་རྣམ་གྲངས་ཡིན་པའི་ལྷ་ས་ནག་ཆུའི་མཐོ་རིམ་སློབ་འབྲིང་དང་པོའི་2024ལོའི་མཐོ་རྒྱུགས་ཀྱི་སྦྱངས་འབྲས་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད་པ་སྟེ། སྤྱིའི་ཆར་རྒྱུགས་འཕྲོད་ཚད་100%ཟིན་ཞིང་། དངོས་གཞིའི་ཚན་ཁག་ལ་རྒྱུགས་འཕྲོད་ཚད་96%ལས་བརྒལ་བ་དང་གཙོ་གནད་དངོས་གཞིའི་ཚན་ཁག་ལ་རྒྱུགས་འཕྲོད་ཚད་69%ཙམ་ཟིན་ཡོད་པ་རེད། ཀྲེ་ཅང་ནས་ཡིན་པའི་བོད་སྐྱོར་དགེ་རྒན་ཝུའུ་ཕེང་ཧྥེ་ཡིས“ང་ཚོས་སྤུས་ལེགས་ཀྱི་སློབ་ཁྲིད་ལ་བརྟེན་ནས་ས་གནས་འདི་གའི་སློབ་མ་གསོ་སྐྱོང་བྱེད་པ་དང་དུས་མཚུངས་ཀྲེ་ཅང་གི་སློབ་ཁྲིད་འདུ་ཤེས་དང་ཉམས་མྱོང་ས་གནས་འདི་གའི་དགེ་རྒན་ལ་བསླབས་ཏེ་ཕྱོགས་བསྡུས་བྱང་ཚད་མཐོ་བའི་ས་གནས་འདི་གའི་དགེ་རྒན་དཔུང་ཁག་ཅིག་གསོ་སྐྱོང་བྱེད་ཀྱི་ཡོད”ཅེས་བཤད།

མངོན་གསལ་དོད་པའི་གྲུབ་འབྲས་ཐོག་ནས“ཚོགས་སྒྲིག་རྣམ་པའི”སློབ་གསོའི་བོད་སྐྱོར་ལས་ཐོན་པའི་ནུས་པ་ཧ་ཅང་ཆེན་པོ་མངོན་གྱི་ཡོད།

2016ལོའི་ཟླ་4པར། “ཚོགས་སྒྲིག་རྣམ་པའི”སློབ་གསོའི་བོད་སྐྱོར་ཤེས་ལྡན་པ་ཁག་དང་པོ་བོད་དུ་འབྱོར་བ་རེད། མིག་སྔའི་བར། ཁ་གཏད་རོགས་སྐྱོར་ཞིང་ཆེན་དང་གྲོང་ཁྱེར་17གྱིས་རིམ་རྩིས་བྱས་ན་སློབ་གསོའི་བོད་སྐྱོར་ཤེས་ལྡན་པ་མི་ཐེངས་2100ལྷག་ཙམ་བཏང་ནས་བོད་ཀྱི་སློབ་གྲྭ་འབྲིང་ཆུང་21ལ་ཁ་གཏད་རོགས་སྐྱོར་བྱས་པ་དང་། ས་གནས་དེ་གའི་དགེ་རྒན་2500ལྷག་ཙམ་དང་ཚོགས་པ་150ལྷག་ཙམ་འཁྲིད་རོགས་བྱས་པས་བོད་ཀྱི་མི་རིགས་ཁག་གི་སློབ་མ་ཚོར་སློབ་ཁྲིད་ཀྱི་སྤུས་ལེགས་ཐོན་ཁུངས་ལོངས་སུ་སྤྱོད་རྒྱུ་བྱུང་ཡོད།

རྒྱུན་མཐུད་འབད་འཐབ་བྱས་ནས་ཐོན་ལས་སྐྱེད་སྲིང་བྱས་པ།

“དགེ་སྤེལ་སྐྱོན་སྤོང་དང་། ཡུལ་བབ་དང་བསྟུན་པ། སྒྱུར་བཅོས་སྒོ་དབྱེ་ཟབ་ཏུ་གཏོང་བ། ལྕགས་ལམ་དང་གཞུང་ལམ་དང་དེ་བཞིན་རྨང་གཞིའི་སྒྲིག་བཀོད་གལ་ཆེན་མགྱོགས་པོ་བསྐྲུན་པ། ཁྱད་ལྡན་ཐོན་ལས་འཕེལ་རྒྱས་གཏོང་བ། རྒྱལ་ཁབ་ཀྱི་ནུས་རྒྱུ་གཙང་མའི་རྟེན་གཞི་མགྱོགས་པོ་བསྐྲུན་པ། འཕེལ་རྒྱས་དང་བདེ་འཇགས་ལ་སྤྱི་འདོམས་བཅས་བྱས་ཏེ། བོད་ཀྱི་དོན་དངོས་དང་འཚམ་པའི་སྤུས་ཚད་མཐོ་བའི་འཕེལ་རྒྱས་ཀྱི་ལམ་བུ་ཞིག་གཏོད་དགོས”—ཞི་ཅིན་ཕིང་།

【བོད་སྐྱོར་གྱི་གཏམ་རྒྱུད】

ཟླ་9པའི་ཚེས་ཤར་དུ་ལྗོངས་ཡོངས་ཀྱི་སྒྲིག་བཀོད་སྔོ་ཚལ་རྟེན་གཞི་ཆེ་ཤོས་ཡོད་པའི་གཞིས་རྩེ་གྲོང་ཁྱེར་པ་སྣམ་རྫོང་གིས་དྲོད་ཁང་གི་སྔོ་ཚལ་འདེབས་འཛུགས་ཀྱི་གྲུབ་ཆ་ལེགས་སྒྲིག་བྱེད་འགོ་བཙུགས།

ཧྲན་ཏུང་ཞིང་ཆེན་ཅི་ནན་གྲོང་ཁྱེར་གྱི་ཁག་བཅུ་པའི་བོད་སྐྱོར་ལས་བྱེད་པ་ལི་ཏུང་གིས“ང་ཚོས་ཁྲོམ་རར་གཞིགས་ནས་འདེབས་འཛུགས་ཀྱི་གྲུབ་ཆ་ལེགས་སྒྲིག་བྱས་ཏེ་ལྗོངས་ཕྱིའི་སྔོ་ཚལ་དང་དུས་ཁྱད་ཡོད་པར་བྱས་པ་དང་། ལྗོངས་ཕྱི་ནང་གི་ཁྲོམ་ར་དང་དེ་བས་འབྲེལ་བ་ཟབ་མོ་བཙུགས་ཏེ་དཔལ་འབྱོར་གྱི་ཕན་འབྲས་ཆེ་ཤོས་ཐོན་པར་བྱས་ནས་མང་ཚོགས་ལ་ཡོང་འབབ་དེ་བས་མང་བ་གཏོད་རྒྱུ་ཡིན”ཞེས་བཤད།

པ་སྣམ་རྫོང་གི་དྲོད་ཁང་སྔོ་ཚལ་ཐོན་ལས་ལ་འཕེལ་རྒྱས་ཆེན་པོ་བྱུང་བ་ཧྲན་ཏུང་གི་བོད་སྐྱོར་སྟོབས་ཤུགས་དང་ཁ་འབྲལ་ཐབས་མེད། ཅི་ནན་གྲོང་ཁྱེར་གྱི་བོད་སྐྱོར་ལས་བྱེད་པའི་རྒྱུན་མཐུད་སྐུལ་འདེད་འོག་པ་སྣམ་རྫོང་གི་ད་ཡོད་སྔོ་ཚལ་འདེབས་ཁྱོན་མུའུ་ཁྲི་1.74ཟིན་པ་དང་ལོ་རེའི་སྔོ་ཚལ་ཐོན་འབབ་ཏུན་ཁྲི་6.6ཙམ་དང་ལོ་རེའི་ཐོན་རྫས་རིན་ཐང་སྒོར་དུང་ཕྱུར་3ཙམ་ཟིན་གྱི་ཡོད་པ་རེད། སྔོ་ཚལ་འདེབས་འཛུགས་ཡོང་འབབ་ཀྱིས་རྫོང་ཡོངས་ཀྱི་ཞིང་འབྲོག་པ་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་ཀྱི་16%ཙམ་བཟུང་ཡོད་པ་རེད།

ལྷོ་ཁ་གྲོང་ཁྱེར་ནི་ཡར་ཀླུང་གཙང་པོའི་ངོགས་སུ་གནས་ཤིང་། ནུབ་ནི་གཞིས་རྩེ་གྲོང་ཁྱེར་དང་འབྲེལ་ཡོད། ཉེ་བའི་ལོ་ཤས་རིང་། ཧུའུ་པེ་ཞིང་ཆེན་གྱིས་ཐོན་ལས་འཕེལ་རྒྱས་གཏོང་རྒྱུ་དེ་ཁ་གཏད་བོད་སྐྱོར་གྱི་རྨང་བརྟན་ཐབས་ཇུས་སུ་བརྩིས་ནས་ལྷོ་ཁ་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱས་ཡོད།

2003ལོར་ཧྭ་ཤིན་ཨར་འདམ(བོད་ལྗོངས)ཚད་ཡོད་ཀུང་སི་ལྷོ་ཁ་གྲོང་ཁྱེར་ཟངས་རི་རྫོང་དུ་བཙུགས་ཤིང་། དེ་ནི་ཧུའུ་པེས་ཐོན་ལས་བོད་སྐྱོར་ལག་བསྟར་བྱེད་པའི་གཙོ་གནད་ཁེ་ལས་ཤིག་རེད། ཁེ་ལས་དེས་ལྗང་མདོག་ཁོར་ཡུག་སྲུང་སྐྱོང་གི་འདུ་ཤེས་རྒྱུན་འཛིན་བྱས་པའི་རྨང་གཞིའི་ཐོག་ཐོན་སྐྱེད་བྱས་པའི་ཨར་འདམ་ཐོན་རྫས་སྣ་ཚོགས་གོང་དཀར་གནམ་ཐང་དང་། ལྷ་ཉིང་ལྕགས་ལམ། ཆུ་ཤུགས་གློག་ཁང་གསར་སྤེལ་རྣམ་གྲངས་སོགས་གཙོ་གནད་ལས་གྲྭར་རྒྱ་ཁྱབ་ངང་སྤྱད་པས་བོད་ལ་ཡོད་པའི་རྒྱལ་ཁབ་ཀྱི་གཙོ་གནད་ལས་གྲྭའི་འཛུགས་སྐྲུན་མ་གནས་དམའ་རུ་བཏང་ཡོད། རིམ་རྩིས་བྱས་ན་2023ལོའི་ལོ་མཇུག་བར་ཧྭ་ཤིན་ཨར་འདམ་ཚད་ཡོད་ཀུང་སིར་བཟོ་ལས་ཀྱི་ཐོན་རྫས་རིན་ཐང་སྒོར་དུང་ཕྱུར་182.44བྱུང་སྟེ་ས་གནས་དེ་གར་ཁྲལ་འབབ་སྒོར་དུང་ཕྱུར་22བཅལ་ནས་ས་གནས་དེ་གའི་གློག་ཤུགས་དང་། སྐྱེལ་འདྲེན། གཏེར་ལས། ཞབས་ཞུ་སོགས་ཐོན་ལས་འཕེལ་རྒྱས་ལ་སྐུལ་ཁྲིད་བྱས་པ་རེད།

ཐོན་ལས་བོད་སྐྱོར་རྣམ་གྲངས་དེ་བས་མང་བར་ནུས་ཤུགས་ཡོད་རྒུས་སྐུལ་འདེད་གཏོང་བཞིན་ཡོད་ཅིང་། ལོ་30ཡི་རིང་ཁ་གཏད་རོགས་སྐྱོར་ཞིང་ཆེན་དང་གྲོང་ཁྱེར་དང་ཀྲུང་དབྱང་ཁེ་ལས་ཀྱིས“ལྷ་སའི་པད་ཁའི་སྣུམ”དང་། “ལྷོ་ཁའི་བོད་སྒོང”“ཉིང་ཁྲིའི་ཇ་ལོ”ལ་སོགས་རོགས་སྐྱོར་བྱ་ཡུལ་གྱི་ཐོན་ཁུངས་ཀྱི་ལེགས་ཆ་དང་འཕེལ་རྒྱས་ཀྱི་མི་མངོན་པའི་སྟོབས་ཤུགས་སྔོག་འདོན་གཏིང་ཟབ་ཀྱིས་ཐོན་ལས་འཕེལ་རྒྱས་ལ་བརྟེན་ནས་རོགས་སྐྱོར་བྱ་ཡུལ་གྱི་འཕེལ་རྒྱས་ཀྱི་ནང་སྐྱེས་སྒུལ་ཤུགས་འཕེལ་བར་བྱས་ཏེ་གངས་ལྗོངས་ས་མཐོ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་བ་རེད།

བོད་སྐྱོར་སྙིང་སྟོབས་རྒྱུན་ཆད་མེད་པར་དར་སྤེལ་བཏང་བ།

“བོད་སྐྱོར་སྙིང་སྟོབས་ནི་ཀྲུང་གོ་གུང་ཁྲན་ཏང་གི་བླ་ན་མེད་པའི་སྙིང་སྟོབས་ཤིག་དང་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་མངོན་གསལ་དོད་པའི་ལེགས་ཆ་ཞིག་ཡིན། གསོ་རླུང་དཀོན་ཡང་སྙིང་སྟོབས་མི་ཉམས་པའི་སྙིང་སྟོབས་དེ་ནི་གསར་བརྗེའི་ཕུགས་བསམ་དགུང་ལས་མཐོ་བ་དེ་ཡིན། ཁྱེད་ཚོ་ས་མཐོར་ཡོད་པས་སྙིང་སྟོབས་ས་མཐོ་ལས་མཐོ་བ་ཡོད”—ཞི་ཅིན་ཕིང་།

【བོད་སྐྱོར་གྱི་གཏམ་རྒྱུད】

བོད་དུ་ཡོང་ནས་ལོ་ཕྱེད་ཙམ་སོང་ཡང་ཀྲེ་ཅང་ཞིང་ཆེན་ཉིང་པོ་གྲོང་ཁྱེར་གྱི་བོད་སྐྱོར་སྨན་པ་ཝུའུ་ཅ་ཧན་སྔར་བཞིན་ས་བབ་མཐོ་ཚད་སྨི་4000ལྷག་ཙམ་ཡོད་པའི་ནག་ཆུ་གྲོང་ཁྱེར་འབྲི་རུ་རྫོང་དུ་འཕྲོད་ཀྱི་མེད།

ཝུའུ་ཅ་ཧན་གྱིས་གསོ་རླུང་དཀོན་པའི་ཁོར་ཡུག་ཏུ་རང་ཉིད་ཀྱི་ཨ་མ་ལི་པའེ་ཨེན་གྱི་སྐབས་དེ་དུས་ཀྱི་དཀའ་ཚེགས་གཞི་ནས་ཚོར། ལོ་30ལྷག་ཙམ་གྱི་གོང་། སྐབས་དེ་དུས་ཉིང་པོ་གྲོང་ཁྱེར་བུད་མེད་དང་བྱིས་པའི་སྨན་ཁང་གི་གཙོ་བཅོས་སྨན་པ་ཡིན་པའི་ལི་པའེ་ཨེན་གྱིས་རང་འགུལ་ངང་བོད་དུ་འགྲོ་རྒྱུའི་མིང་ཐོ་བཀོད་ནས་ལོ་གཉིས་ནང་ཁྱིམ་དུ་ཐེངས་གཅིག་ཀྱང་ལོག་མྱོང་མེད།

ཡུན་རིང་རང་ཉིད་ཀྱི་ཨ་མ་དང་མ་འཕྲད་རྐྱེན་སྐབས་དེ་དུས་ལོ་ན་ཕྲ་བའི་ཝུའུ་ཅ་ཧན་གྱིས་ཉིན་ཐོ་བྲིས་ནས་ཨ་མར་དྲན་སེམས་མཚོན་པར་བྱེད་པ་སྟེ། “ཨ་མ་ས་བབ་མཐོ་ཚད་སྨི་4500ཡོད་པའི་ས་མཐོར་སྨན་པ་བྱེད་ཀྱི་ཡོད། ཆེན་པོ་ཆགས་རྗེས་ང་རང་ཡང་ཁོང་དང་འདྲ་བར་ས་མཐོར་སྨན་པ་བྱེད་པར་འགྲོ་གི་ཡིན”ཞེས་བྲིས་ཡོད། དེ་ལྟར་ལོ་མང་སོང་རྗེས་ཝུའུ་ཅ་ཧན་གྱིས་ཨ་མའི་ཤུལ་འཛིན་ནས་ནད་བཅོས་སྲོག་སྐྱོབ་ཀྱི་ལས་འགན་དང་དུ་བླངས།

ས་མཐོའི་དཀའ་ཚེགས་ཆེ་བའི་ཁོར་ཡུག་ཏུ་ཡུན་རིང་ལས་ཀ་བྱས་ནས་བོད་སྐྱོར་ལས་བྱེད་པ་ཁག་གཅིག་གི་ཚེ་སྲོག་ཀྱང་ནམ་ཡང་བོད་དུ་སྐྱེས་སུ་ཕུལ་ཡོད།

ཉིང་ཁྲི་གྲོང་ཁྱེར་ཀླུ་ནང་གྲོང་རྡལ་དུ་ཡོད་པའི་རྒྱལ་ཡོངས་ཀྱི་བོད་སྐྱོར་འགྲེམས་སྟོན་ཁང་ནང་ཁ་གཏད་བོད་སྐྱོར་བྱས་ཚུན་སྟབས་མི་ལེགས་པར་སྐུ་གཤེགས་པའི་བོད་སྐྱོར་ལས་བྱེད་པའི་འདྲ་པར་བསྒྲིགས་ཡོད་པ་སྟེ། ཧྲང་ཧའེ་གྲོང་ཁྱེར་གྱི་ཁག་གཉིས་པའི་བོད་སྐྱོར་ལས་བྱེད་པ་ཧྲའོ་ཧའེ་ཡུན་དང་། ཨན་ཧུའེ་ཞིང་ཆེན་གྱི་ཁག་གཉིས་པའི་ཚོགས་སྒྲིག་རྣམ་པའི་བོད་སྐྱོར་སྨན་པ་ཀྲའོ་ཅུས། པེ་ཅིང་གྲོང་ཁྱེར་གྱི་ཁག་ལྔ་པའི་བོད་སྐྱོར་ལས་བྱེད་པ་ཁྲེན་པེ་ཤིན་སོགས་མང་པོ་ཞིག་སྐུ་གཤེགས་སྐབས་ཁ་ཆེམས་ཚིག་གཅིག་ཀྱང་འཇོག་ཁོམ་མ་བྱུང་ཡང་དཔའ་ཉམས་ལྡན་པའི་བློ་སྟོབས་དུས་ནམ་ཡང་རི་ཀླུང་ཀུན་ཏུ་བཞག་ནས་ཡོད།

དྲག་ཆར་རླུང་འཚུབ་ཀྱིས་འགོག་ཐབས་བྲལ་བའི་བགྲང་བྱ་སུམ་ཅུའི་ནང་བོད་སྐྱོར་ལས་བྱེད་པ་ཁག་དང་ཁག་གིས་སྔ་འཛིན་ཕྱི་གཏོད་ཀྱིས་ལང་ཚོ་དང་། རྔུལ་ཆུ། ཐ་ན་ཚེ་སྲོག་བཅས་སྐྱེས་སུ་ཕུལ་ནས་ས་གནས་འདི་གའི་རྒྱ་ཆེའི་ལས་བྱེད་མང་ཚོགས་དང་ལག་སྦྲེལ་སེམས་མཐུན་གྱིས“གསོ་རླུང་དཀོན་ཡང་སྙིང་སྟོབས་མི་ཉམས་པ་དང་། དཀའ་ཚེགས་ཆེ་ཡང་དཀའ་སྡུག་ལ་མི་སྐྲག་པ། ས་བབ་མཐོ་ལ་བསམ་པའི་གོ་རྟོགས་དེ་བས་མཐོ་བ”བཅས་ཀྱི་བརྗིད་ཆེའི་ལོ་རྒྱུས་སྙན་ངག་ཅིག་བརྩམས་ཡོད།