ཉེ་བའི་ལོ་ཤས་རིང་། རང་ལྗོངས་ཀྱིས་དེང་རབས་ཞིང་ལས་ཐོན་ལས་དང་ལྷག་པར་དུ་སྔོ་ཚལ་ཐོན་ལས་གོང་འཕེལ་གཏོང་རྒྱུར་ཚད་མཐོའི་མཐོང་ཆེན་བྱེད་པ་དང་། གྲོང་ཁྱེར་དང་ས་ཁུལ་ཁག་གིས“ཤ་ཚལ་སྒོང་གསུམ”གྱི་ཧྲི་ཀྲང་གི་འགན་འཁྲིའི་ལམ་ལུགས་དོན་འཁྱོལ་ནན་པོ་བྱས་ཏེ་སྔོ་ཚལ་གྱི་ཐོན་སྐྱེད་བརྟན་གཏོང་དང་མཁོ་སྤྲོད་འགན་ལེན་བྱ་རྒྱུ་དེ་ཁྲོམ་ར་བརྟན་པོ་དང་། ཟོག་གོང་བརྟན་པོ། དམངས་སེམས་བརྟན་པོ་བཅས་ཀྱི་དམངས་འཚོའི་འདུ་འགོད་གལ་ཆེན་ཞིག་ཏུ་བརྩིས་ནས་དམ་འཛིན་བྱས་ཏེ་སྔོ་ཚལ་གྱི་ཐོན་སྐྱེད་དང་མཁོ་སྤྲོད་ནུས་པ་ཟམ་མི་ཆད་པར་མཐོ་རུ་བཏང་ནས་རྒྱ་ཆེའི་ཞིང་འབྲོག་མང་ཚོགས་ཀྱི་འཚོ་བའི་སྤུས་ཚད་མཐོ་རུ་གཏོང་རྒྱུར་དགེ་མཚན་ལྡན་པའི་ནུས་པ་བཏོན་ཡོད།

དེང་རབས་ཅན་གྱི་སྒྲིག་བཀོད་ལ་བརྟེན་ནས་ཚལ་ཞིང་བསྐྲུན་པ།

མའོ་ཐེང་ཞིང་ལས་གླིང་ནི་ལྷ་ས་གྲོང་ཁྱེར་ཆུ་ཤུར་རྫོང་གནམ་ཤང་ལྗང་གྲོང་ཚོར་གནས་པ་དང་། དེ་ནི་ཀུང་སིའི་ཏུང་ཧྲི་ཀྲང་ཆུ་ཤུར་རྫོང་སྔོ་ཚལ་མཐུན་ཚོགས་ཀྱི་ཚོགས་གཙོ་སང་མའོ་ཕུང་གིས་ཧྲན་ཏུང་ཚེ་འོད་དེང་རབས་ཅན་གྱི་སྒྲིག་བཀོད་སྔོ་ཚལ་གྱི་ཐོན་ལས་འཁོར་འབྲེལ་ཧྲིལ་པོའི་སྔོན་ཐོན་རྣམ་པ་བོད་དུ་ནང་འདྲེན་བྱས་པ་ཞིག་ཡིན། མིག་སྔར་བོད་དུ་བཙུགས་པའི་དེང་རབས་ཅན་གྱི་སྒྲིག་བཀོད་སྔོ་ཚལ་ཐོན་ལས་གླིང་དུ་ཉི་འོད་དྲོད་ཁང་100དང་ཚད་གཞི་མཐོ་བའི་ས་གྱང་གི་ཉི་འོད་དྲོད་ཁང་6བསྐྲུན་ཡོད།

གླིང་ཁུལ་གྱི་དྲོད་ཁང་ཆེ་མོས་རིག་ནུས་ཅན་གྱི་ཐོག་ནས་འདེབས་འཛུགས་གྲངས་གཞིར་ལྟ་ཞིབ་ཚད་ལེན་དང་རང་འགུལ་ཅན་གྱི་སྒོ་ནས་ཁོར་ཡུག་སྙོམས་སྒྲིག་ཚོད་འཛིན་ཐུབ་པ་མ་ཟད། ཁོར་ཡུག་དང་སྐྱེ་དངོས་ཀྱི་ལྟ་ཞིབ་ཚད་ལེན་གྲངས་གཞིར་གཞིགས་ནས་ཚད་ལྡན་ཅན་གྱི་ཐོན་སྐྱེད་བྱེད་ཐུབ་ཀྱི་ཡོད། ཆུ་ལུད་གཞི་གཅིག་ཅན་དང་། ཞིང་ལུད་གསར་པ། ལྗང་མདོག་སྔོན་འགོག་ཚོད་འཛིན་སོགས་ཀྱི་ལག་རྩལ་གླིང་ཁུལ་དུ་སྤྱོད་ཚད་100%ཟིན་པ་དེ་ནི་རང་ལྗོངས་སུ་ལྗང་མདོག་བཟའ་བཅའི་ལག་ཁྱེར་ཐོག་མར་ཐོབ་པ་མ་ཟད། ལྗང་མདོག་ལག་ཁྱེར་རག་མང་ཤོས་ཀྱི་ཁེ་ལས་ཤིག་ཡིན།

གཞན་ཡང་པ་སྣམ་རྫོང་དང་། བསམ་གྲུབ་རྩེ་ཆུས། ཆུ་ཤུར་རྫོང་། སྣེ་གདོང་ཆུས་སོགས་སུ་གྲགས་ཅན་གྱི་ཆེད་ལས་སྔོ་ཚལ་ཐོན་སྐྱེད་རྟེན་གཞི་ཁག་གཅིག་ཐོན་ཞིང་། ནུས་ཆེའི་ཉི་འོད་དྲོད་ཁང་དང་དྲོད་ཁང་ཆེ་མོ་སོགས་ཀྱི་སྒྲིག་བཀོད་འཕེལ་རྒྱས་བཏང་བ་དེས་སྔོ་ཚལ་ཐོན་སྐྱེད་ཀྱི་ཆ་རྐྱེན་ལེགས་སུ་ཤུགས་ཆེན་ཕྱིན་ནས་2023ལོར་ལྗོངས་ཡོངས་ཀྱི་སྔོ་ཚལ་འདེབས་འཛུགས་ཀྱི་སྣ་ཁ་100ལྷག་ཙམ་བར་མང་དུ་ཕྱིན་པ་དང་། སྒྲིག་བཀོད་སྔོ་ཚལ་ཐོན་འབབ་ཀྱིས་ལྗོངས་ཡོངས་ཀྱི་སྔོ་ཚལ་ཐོན་འབབ་ཀྱི་40%ཙམ་བཟུང་ཡོད།

ཞིང་ལས་ལག་རྩལ་གྱིས་ཐོན་ལས་འཕེལ་རྒྱས་ལ་རམ་འདེགས་བྱས་པ།

“འདིའི་ནང་ཧོང་ཀྭ་བཏབ་ཡོད། ཧོང་ཀྭ་ཡི་རྩྭ་ཕྲན་མ་བཏོགས་ན་སྐྱེ་འཚར་བཅུད་འདང་གི་མེད”ཅེས་ཞིང་ལས་ལག་རྩལ་མི་སྣས་ཧོང་ཀྭ་ཡི་རྩྭ་ཕྲན་འཐོག་གིན་དུ་བན་ཚང་གྲོང་ཚོའི་འདེབས་འཛུགས་དུད་ཚང་ལ་དེ་ལྟར་བཤད།

གཞིས་རྩེ་གྲོང་ཁྱེར་དཔའ་རྩལ་ཤང་བན་ཚང་གྲོང་ཚོའི་སྔོ་ཚལ་ཐོན་ལས་འཕེལ་རྒྱས་ཕྱིན་པ་དེ་ཧྲན་ཏུང་ཞིང་ཆེན་ཅི་ནན་གྲོང་ཁྱེར་གྱི་བོད་སྐྱོར་ལས་བྱེད་པས་ལྗོངས་ཕྱི་ནས་ཆེད་ལས་སྔོ་ཚལ་ལག་རྩལ་མཛུབ་ཁྲིད་པ་ནང་འདྲེན་བྱས་ཏེ་དཔའ་རྩལ་ཤང་དུ་ཡུན་རིང་གནས་སྡོད་བྱས་ནས་མང་ཚོགས་ལ་སྔོ་ཚལ་འདེབས་འཛུགས་ལག་རྩལ་དམར་ཁྲིད་བྱས་པ་ལས་བྱུང་ཡོད། མིག་སྔའི་བར་བན་ཚང་གྲོང་ཚོར་མཉམ་ལས་ཁང་དང་དེ་བཞིན་མི་སྒེར་གྱི་དྲོད་ཁང་ཆེ་མོ་174ཡོད་པ་དང་། ཤིང་འབྲས་དང་སྔོ་ཚལ་འདེབས་ཁྱོན་མུའུ་74.34ཟིན་པ། ཤིས་ཀྭ་དང་། ཀྲོ་མ་ཀྲུ སུར་པན། ཧོང་ཀྭ ཏཱ་པད་ཚལ་སོགས་ཤིང་འབྲས་དང་སྔོ་ཚལ་སྣ་ཁ་10ལྷག་ཙམ་ཡོད་པ། དྲོད་ཁང་རེའི་ལོ་རེའི་ཆ་སྙོམས་ཡོང་འབབ་སྒོར་ཁྲི་1.7ནས་2.3བར་ཟིན་པ། ཆ་སྙོམས་དུད་ཚང་རེར་དྲོད་ཁང་ཆེ་མོ་4ཡོད་པ། ལོར་སྔོ་ཚལ་ཐོན་འབབ་ཏུན་540ཟིན་པ་བཅས་རེད། ཤིང་འབྲས་དང་སྔོ་ཚལ་ཐོན་ལས་རྒྱ་སྟོབས་ཆེ་རུ་གཏོང་ཆེད། གྲོང་ཚོའི་མཉམ་སྡེབ་ཀྱིས་པ་སྣམ་གྱི་གཞུང་དྲང་སྔོ་ཚལ་འདེབས་འཛུགས་ཞིང་པའི་ཆེད་ལས་མཉམ་ལས་ཁང་བཙུགས་པས་ཐོན་སྐྱེད་ཆེད་ལས་ཅན་ལ་སྐུལ་འདེད་ནུས་ལྡན་ཐེབས་པ་དང་གྲོང་མིའི་ཡོང་འབབ་མང་དུ་ཕྱིན་ནས་ཤིང་འབྲས་དང་སྔོ་ཚལ་ཐོན་ལས་དེ་བན་ཚང་གྲོང་ཚོའི་ཁྱད་ལྡན་ཀ་རྟེན་ཐོན་ལས་སུ་རིམ་བཞིན་འགྱུར་བཞིན་ཡོད།

མིག་སྔར་རང་ལྗོངས་ཀྱི་སྔོ་ཚལ་ཐོན་སྐྱེད་དེ་སྲོལ་རྒྱུན་གྱི་ལག་རྩལ་ནས་དེང་རབས་ཀྱི་ལག་རྩལ་དུ་བསྒྱུར་བའི་བར་བརྒལ་གྱི་དུས་སྐབས་སུ་གནས་ཡོད། རང་སྐྱོང་ལྗོངས་ཞིང་ལས་དང་གྲོང་གསེབ་ཐིང་གིས་ཞིང་འབྲོག་ལས་ཚན་རྩལ་གཤམ་སྐྱོད་ཀྱི་ལག་རྩལ་འགན་ལེན་ལས་དོན་ཚོགས་ཆུང་གི་ནུས་པ་བཏོན་ཏེ། དུས་ཐོག་ཏུ་ལག་རྩལ་རིགས་གཅིག་མཁས་ཅན་མངགས་གཏོང་བྱས་པ་དང་རང་སྐྱོང་ལྗོངས་དང་། གྲོང་ཁྱེར། རྫོང་བཅས་རིམ་ཁག་ཞིང་ལས་ཚན་རྩལ་མི་སྣ་སྒྲིག་འཛུགས་བྱས་ནས་སྔོ་ཚལ་ཐོན་སྐྱེད་རྟེན་གཞིར་བསྐྱོད་དེ་སྔོ་ཚལ་ལྗང་མདོག་དང་སྟབས་བདེ་ཅན་གྱི་འདེབས་འཛུགས་དོ་དམ་ལག་རྩལ་བེད་སྤྱོད་དང་ཁྱབ་གདལ་གཏོང་རྒྱུར་ཤུགས་སྣོན་རྒྱག་པ་དང་། ལུགས་མཐུན་གྱི་ལུད་རྒྱག་པ་དང་ཞིང་སྨན་བེད་སྤྱོད་གཏོང་རྒྱུར་ཁྲིད་སྟོན་བྱས་ཏེ་སྔོ་ཚལ་གྱི་སྤུས་ཚད་ལེགས་སུ་བཏང་ཡོད།

འདེབས་ཁྱོན་ཆེ་རུ་བཏང་ནས་སྔོ་ཚལ་གྱི་མཁོ་སྤྲོད་འགན་ལེན་བྱས་པ།

2024ལོའི་དགུན་དཔྱིད་བརྗེ་རེས་ཀྱི་དུས་སུ་ཆབ་མདོ་གྲོང་ཁྱེར་གྱིས་དྲོད་འཛིན་ནུས་པ་ཆེ་རུ་གཏོང་དགོས་པའི་དྲོད་ཁང་ལ་ཉམས་བཟོ་བྱས་ནས་སྤུས་ཚད་དང་ཕན་འབྲས་ཆེ་རུ་བཏང་ཡོད། བོད་ཀྱི་དགུན་དཔྱིད་སྔོ་ཚལ་ཐོན་སྐྱེད་ཀྱི་ཁྱད་ཆོས་དང་ཟུང་འབྲེལ་བྱས་ཏེ་རྫོང(ཆུས)ཁག་གི་བེད་མེད་སྔོ་ཚལ་དྲོད་ཁང་ཆེ་མོའི(ཞིང་དུད་ཀྱི་རང་སྤྱོད་དྲོད་ཁང་ཚུད་པ)ཐོན་སྐྱེད་སླར་གསོ་བྱེད་ཤུགས་ཆེ་རུ་བཏང་ནས་སྔོ་ཚལ་དུས་ཐོག་ཏུ་འདེབས་པ་དང་འདེབས་ཁྱོན་ཆེ་རུ་བཏང་སྟེ་ནུས་ཤུགས་ཡོད་རྒུས་སྔོ་ཚལ་གྱི་མཁོ་སྤྲོད་འགན་ལེན་བྱས་ཡོད།

ཉེ་བའི་ལོ་ཤས་རིང་རང་ལྗོངས་ཀྱིས་ལྗོངས་ཡོངས་ཀྱི་བེད་མེད་དྲོད་ཁང་སླར་གསོ་བེད་སྤྱོད་བྱེད་པའི་ལས་དོན་ལ་མུ་མཐུད་སྐུལ་འདེད་བཏང་སྟེ《ལྗོངས་ཡོངས་ཀྱི་བེད་མེད་རྨོ་ཞིང་དང་བེད་མེད་དྲོད་ཁང་སླར་གསོ་བེད་སྤྱོད་བྱེད་པའི་ལས་དོན་ལ་མུ་མཐུད་སྐུལ་འདེད་གཏོང་རྒྱུའི་ཇུས་གཞི》བཀྲམ་ནས་ལྗོངས་ཡོངས་ཀྱི་བེད་མེད་སྔོ་ཚལ་སྒྲིག་བཀོད་ཀྱི་གྲངས་འབོར་དང་། ངོ་བོ། རྒྱ་ཁྱོན། བེད་མེད་དུ་སྐྱུར་བའི་རྒྱུ་རྐྱེན་སོགས་ཀྱི་ཞིབ་ཕྲའི་གནས་ཚུལ་སྔར་བས་མཐིལ་རྟོགས་ཞིབ་དཔྱད་བྱས་པ་དང་། གྲོང་ཁྱེར་དང་ས་ཁུལ་ཁག་གིས་བེད་མེད་དུ་སྐྱུར་བའི་སྔོ་ཚལ་སྒྲིག་བཀོད་བེད་སྤྱོད་བྱེད་པའི་ཇུས་གཞི་བཟོས་ནས་དག་ཐེར་ལས་དོན་ལ་མུ་མཐུད་སྐུལ་འདེད་བཏང་ཡོད།

ཟླ་8ཚེས་7ཉིན་བར་ལྗོངས་ཡོངས་ཀྱི་བེད་མེད་དྲོད་ཁང་མུའུ་653སླར་གསོ་བེད་སྤྱོད་བྱས་ནས་ལེགས་སྒྲུབ་བྱེད་ཚད་72.3%ཟིན་ཡོད། བེད་མེད་དྲོད་ཁང་བེད་སྤྱོད་གང་ལེགས་བྱས་པ་བརྒྱུད། འབྲུ་རིགས་ཀྱི་ཐོན་འབབ་འགན་ལེན་བྱེད་པ་དང་དུས་མཚུངས་ཤིང་འབྲས་དང་སྔོ་ཚལ་སོགས་ཀྱི་དཔལ་འབྱོར་སྐྱེ་དངོས་མཁོ་སྤྲོད་བྱེད་ཚད་ཆེ་རུ་ནུས་ལྡན་ཕྱིན་ནས་ཞིང་འབྲོག་པའི་ཡོང་འབབ་མང་དུ་ཕྱིན་ཡོད།

“གོམ་སྟབས་རྗེས་མར་ང་ཚོས་སྔོ་ཚལ་ཐོན་ལས་འཕེལ་རྒྱས་དང་ལྷག་པར་དུ་སྒྲིག་བཀོད་སྔོ་ཚལ་ཐོན་ལས་འཕེལ་རྒྱས་ཀྱི་འབྲེལ་ཡོད་རོགས་སྐྱོར་སྲིད་ཇུས་ཞིབ་འཇུག་བྱས་ནས་བཏོན་ཏེ། རྨང་གཞིའི་སྒྲིག་བཀོད་འཛུགས་སྐྲུན་ལ་སྔར་བས་ཤུགས་སྣོན་རྒྱག་པ་དང་། མ་དངུལ་གྱི་རྒྱབ་སྐྱོར་བྱེད་ཤུགས་ཆེ་རུ་གཏོང་བ། ལག་རྩལ་ཞབས་ཞུའི་འགན་ལེན་ལ་ཤུགས་སྣོན་རྒྱག་པ་བཅས་བྱས་ནས་གྲོང་ཁྱེར་ཉེ་འཁོར་གྱི་སྔོ་ཚལ་རྟེན་གཞི་དང་། ཕྱི་ཕྱོགས་རྣམ་པའི་སྔོ་ཚལ་ཐོན་སྐྱེད་རྟེན་གཞི། རིག་ནུས་རྩེར་སོན་ཐོན་སྐྱེད་རྟེན་གཞི་བཅས་འཛུགས་སྐྲུན་ལ་གཙོ་གནད་ཐོག་སྐུལ་འདེད་གཏོང་རྒྱུ་ཡིན། ཆུ་འདྲེན་ལུད་རྒྱག་དང་། མྱུག་གསོ་མཐུད་སྦྱོར། སྤོ་འཛུགས། བརྔ་བསྡུ་སོགས་སྔོ་ཚལ་ཐོན་སྐྱེད་ཀྱི་འགག་རྩའི་ལྷུ་ཚིགས་ལ་ཞིང་འབྲོག་པས‘གོ་ཐུབ་པ་དང་། ཤེས་ཐུབ་པ། སྤྱོད་ཐུབ་པ’བཅས་ཀྱི་ལག་རྩལ་ཁྱབ་གདལ་ཞབས་ཞུ་སྒྲིག་འཛུགས་བྱས་ཏེ་ཚད་ལྡན་ཅན་གྱི་ཐོན་སྐྱེད་ཆུ་ཚད་མཐོ་རུ་གཏོང་བ་དང་གེགས་འགོག་གེགས་སེལ་གྱི་བྱ་ཐབས་དོན་འཁྱོལ་བྱ་རྒྱུ་ཡིན”ཞེས་ལྗོངས་ཞིང་ལས་དང་གྲོང་གསེབ་ཐིང་གི་འབྲེལ་ཡོད་འགན་འཁུར་བས་བཤད།