བོད་སྡོད་དཔུང་སྡེ་ཞིག་གིས།
དངོས་འཐབ་ལ་བརྟེན་ནས་དམག་འཐབ་འཇོན་ཐང་ལ་ཞུན་བརྡར་བྱས་པ།
ཉེ་ཆར་བོད་སྡོད་དཔུང་སྡེ་ཞིག་གིས་ཕྱི་རོལ་གྱི་སྦྱོང་བརྡར་བྱ་ཡུལ་དུ་ཁོངས་གཏོགས་ཀྱི་བཟོ་དམག་ཡན་ལག་རུ་ཁག་སྒྲིག་འཛུགས་བྱས་ཏེ་ས་མཐོའི་ཉིན་མཚན་དབྱེར་མེད་ཀྱི་དངོས་འཐབ་ནང་སྦྱོང་བྱས་པ་རེད།
ཐོལ་བྱུང་གི་དམིགས་བསལ་གནས་ཚུལ་ལ་གཞིགས་ཏེ། ས་གནས་ས་ཐོག་གི་བཀོད་འདོམས་པས་འཕྲལ་མར་བཀའ་བཏང་བ་དང་འཐབ་འཛིང་མི་སྣས་འཕྲལ་མར་སྔོན་གཏན་འཁེལ་བའི་ཇུས་གཞི་ལྟར་ལག་བསྟར་བྱས་ནས་ལས་སྒྲུབ་ཁུལ་དུ་ལམ་སེང་བསྐྱོད་པ་དང་། ས་གཤིས་ཀྱི་ཆ་རྐྱེན་མགྱོགས་མྱུར་རྩད་ཞིབ་བྱས་པ། ཡུར་བུའི་ཉེན་ཟོན་ཁོར་ཡུག་ལ་ལྟ་ཞིབ་བྱས་པ་བརྒྱུད། མཐར་ཟམ་པ་རྒྱག་པའི་ལས་འགན་བདེ་བླག་ངང་སྒྲུབ་ཐུབ་པ་རེད།
སྦྱོང་བརྡར་བྱ་ཡུལ་དུ་དཔྱད་ཞིབ་ཚོགས་ཆུང་གིས་ས་མཐོའི་མཐོ་གྲང་ཁོར་ཡུག་གི་ཁྱད་ཆོས་གཞིར་བཟུང་། མི་མེད་གནམ་གྲུའི་མྱུལ་ཞིབ་ལ་ངོ་རྒོལ་བྱེད་པ་དང་། ལམ་དུམ་མྱུར་བཟོ། ལམ་འགག་གཏོར་བ། ཟམ་པ་རྒྱག་པ་སོགས་ཀྱི་སྦྱོང་བརྡར་ནང་དོན་ལ་དམིགས་ནས་སྐབས་བསྟུན་མཛུབ་ཁྲིད་བཀོད་འདོམས་བྱས་པ་དང་དམིགས་བསལ་གནས་ཚུལ་གཅིག་རྗེས་གཉིས་མཐུད་ངང་ཐོན་པར་གཞིགས་ནས་དཔོན་དམག་གི་གཡུལ་སའི་སྟབས་བསྟུན་ནུས་པ་སྔར་བས་ཆེ་རུ་བཏང་ཡོད།
སྦྱོང་བརྡར་མཇུག་འགྲིལ་རྗེས། དཔུང་སྡེ་དེའི་སྦྱོང་བརྡར་ནང་ཞུགས་པའི་དཔོན་དམག་གིས་འཆར་གཞིར་སྤྱི་འདོམས་དང་། ཐབས་ཇུས་བཀོད་སྒྲིག སྦྱོང་བརྡར་སྒྲིག་འཛུགས་ལག་བསྟར་སོགས་ཀྱི་ནང་དོན་ལ་དམིགས་ནས་བསྐྱར་དྲན་བྱས་ཏེ་ཞན་ཆ་དང་མི་འདང་སར་དབྱེ་ཞིབ་ནན་ཏན་བྱས་པ་དང་ལེགས་གཏོང་བྱ་ཐབས་རེ་རེ་བཞིན་བཏོན་པ་མ་ཟད། ད་དུང་དམིགས་སུ་ཤུགས་སྣོན་རྒྱག་དགོས་པའི་གསོ་སྦྱོང་ནང་དོན་བཟོས་ཏེ་ཞན་ཆ་བསལ་བ་རེད།