ལྷ་ས་གྲོང་ཁྱེར་གྱི་ཙག་ཙིག་ཚོང་ཁང་གི་དཔལ་འབྱོར་དབྱར་མཚོ་རྒྱས་པ་ལྟར་འཕེལ་རྒྱས་བྱུང་བ།
ཙག་ཙིག་ཚོང་ཁང་ནི་དངོས་ཚན་དཔལ་འབྱོར་གྲུབ་པའི་རྨང་གཞི་ཡིན་ཞིང་། ལས་རིགས་མང་པོ་དང་འབྲེལ་བ་ཡོད་ལ་ཁྱིམ་ཚང་ཁྲི་སྟོང་མང་པོར་ཞབས་འདེགས་ཞུ་བཞིན་ཡོད། ཁུལ་ཆུང་གི་སྒོ་ཁའི་མདུན་གྱི་གོང་ཁེ་ལ་སྟབས་བདེ་བའི་སྒོ་རྩིས་ཚོང་ཁང་ནས་འཚོ་བར་མཛེས་རྒྱན་སྤྲོས་པའི་མེ་ཏོག་ཚོང་ཁང་བར་དང་དེ་ནས་ཕ་ཡུལ་གྱི་རོ་བཅུད་ལྡན་པའི་ཞིམ་ཟས་ཟ་ཁང་བར་འཁྲུག་ཆ་དོད་པའི་ཙག་ཙིག་ཚོང་ཁང་གིས་དམངས་ལ་ཕན་པའི་ཚོང་ཆུང་ཆུང་རྒྱག་གི་ཡོད་མོད། དེ་ལས་གྲོང་ཁྱེར་འཕེལ་རྒྱས་ཀྱི་གསོན་ཤུགས་ཆེན་པོ་མངོན་བཞིན་ཡོད།
སྟབས་བདེའི་ཙག་ཙིག་ཚོང་ཁང་ལས་འཚོ་བར་སྟབས་བདེ་བསྐྲུན་པ།
ལྷ་སའི་སྲང་ལམ་ཆེ་ཆུང་གང་སར་མཐོང་རྒྱུ་ཡོད་པའི་སྟབས་བདེའི་ཚོང་ཁང་དེ་དག་གིས་གྲོང་མི་ཚོའི་རྒྱུན་གཏན་གྱི་འཚོ་བའི་ཁ་ཚ་དགོས་གཏུགས་ཀྱི་དགོས་མཁོ་བསྐངས་པས། དེའི་སྟབས་བདེ་དང་ཤ་ཚའི་ཞབས་ཞུར་འཛད་སྤྱོད་པའི་དགའ་བསུ་ཆེན་པོ་ཐོབ་ཡོད།
དངོས་ཟོག་ཁ་གསར་ལ་ཐག་ཉེ་བ་དང་སྦྱིན་བདག་རྣམ་འགྱུར་ཡག་པའི་དབང་གིས་གྲོང་མི་མང་པོས་སྟབས་བདེའི་ཚོང་ཁང་ནས་ཅ་དངོས་ཉོ་དགའ་པོ་བྱེད་པ་དང་དེ་དག་གིས་གྲོང་མིའི་གཞི་རྩའི་འཚོ་བའི་དགོས་མཁོ་བསྐངས་པ་མ་ཟད། ད་དུང་ཞབས་འདེགས་ཞུ་སྟངས་ཟམ་མི་ཆད་པར་རིམ་སྤོར་བྱས་པ་བརྒྱུད། གྲོང་པ་ཁྱིམ་མཚེས་དབར་དེ་བས་འཆམ་མཐུན་དང་དྲོ་སྐྱིད་ལྡན་པར་གྱུར་ཡོད། ལྷ་ས་གྲོང་ཁྱེར་ཁྲེང་ཀོན་ཆུས་གྲོང་ཤར་ཁུལ་ཆུང་དང་པོའི་སྒོ་ཁར་གྲོང་མི་ཨ་ཅག་མོང་ལགས་ཀྱིས་གསར་འགོད་པར་ཁུལ་ཆུང་གི་སྒོ་ཁའི་སྟབས་བདེའི་ཚོང་ཁང་གི་སྦྱིན་བདག་སེམས་རྩ་ཧ་ཅང་འཁོལ་བ་དང་གྲོང་མིར་རིན་པ་མི་དགོས་པར་བསྐུར་མ་ཉར་རོགས་བྱེད་ཀྱི་འདུག་པས། གཞུང་ལས་ལ་འགྲོ་མཁན་མང་པོ་ཞིག་གི་དཀའ་ངལ་དངོས་ཐག་གཅོད་ཐུབ་ཡོད། “སྔོན་ཆད་བསྐུར་མ་འབྱོར་སྐབས་ལེན་མཁན་མེད་པའི་སེམས་ཁྲལ་འདུག ད་ཆ་ཁྱིམ་གྱི་སྒོ་ཁའི་སྟབས་བདེའི་ཚོང་ཁང་ནས་ཉར་རོགས་བྱེད་ཀྱི་ཡོད་པས་སྟབས་ཧ་ཅང་བདེ་པོ་འདུག མཚམས་རེ་ལས་ཀ་གྲོལ་ཕྱི་ནའང་ཁྱིམ་དུ་ལོག་ཞོར་དུ་བསྐུར་མ་ལེན་ཆོག་པས་སེམས་ཁྲལ་གཏན་ནས་མི་འདུག”ཅེས་བཤད།
མེ་ཏོག་ཚོང་ཁང་གིས་མཛེས་སྡུག་ལྡན་པའི་འཚོ་བར་མཛེས་རྒྱན་སྤྲས་པ།
མིག་སྔར་མི་རྣམས་ཀྱི་འཚོ་བའི་ཆུ་ཚད་མཐོ་རུ་འགྲོ་བ་དང་བསྟུན་ནས་རང་ཉིད་ལ་སྤྲོ་སྣང་སྦྱིན་པའི་དཔལ་འབྱོར་འཕེལ་རྒྱས་མྱུར་པོ་ཕྱིན་ནས་མེ་ཏོག་སོས་པ་ཉོ་རྒྱུ་དེ་དུས་ཆེན་སྐབས་ཀྱི་ལག་རྟགས་ནས་མི་རྣམས་ཀྱི་རྒྱུན་གཏན་གྱི་འཚོ་བར་རིམ་བཞིན་འགྱུར་བཞིན་ཡོད། “ཙག་ཙིག་ཚོང་ཁང་གི་དཔལ་འབྱོར”གྱི་གྲུབ་ཆ་གལ་ཆེན་ཞིག་ཡིན་པའི་མེ་ཏོག་ཚོང་ཁང་གིས་འཕེལ་རྒྱས་ཀྱི་གོ་སྐབས་དམ་འཛིན་བྱས་པ་མ་ཟད། ད་དུང་གྲོང་མིའི་འཚོ་བར་མཛེས་རྒྱན་སྤྲས་པ་དང་ཐུན་མོང་མ་ཡིན་པའི་མཛེས་རིག་གི་ཡིད་དབང་འཕྲོག་ཤུགས་བསྣན་ཡོད།
ལྷ་ས་གྲོང་ཁྱེར་ཉི་འོད་གླིང་ཕྲན་ཉེ་འགྲམ་གྱི་མེ་ཏོག་ཚོང་ཁང་ཞིག་ཏུ་སླེབས་སྐབས་མཁའ་རླུང་ཁྲོད་མེ་ཏོག་གི་དྲི་ཞིམ་འཐུལ་འོང་བ་དང་མེ་ཏོག་སོས་པ་དང་རྩི་ཤིང་སྡེབ་སྦྱོར་ཞིབ་ཚགས་བྱས་པར་འཛད་སྤྱོད་པས་དགའ་པོ་བྱེད་ཀྱི་ཡོད། ལྷ་སའི་དབན་ལིས་ཁྱིམ་གཞིས་ཁུལ་ཆུང་གི་གྲོང་མི་ཚེ་ལགས་ཀྱིས་མེ་ཏོག་ཚོང་ཁང་དེར་ཧ་ཅང་དགའ་པོ་བྱེད་པ་དང་། ཁོང་གིས་གསར་འགོད་པར་གཟའ་མཇུག་གི་ངལ་གསོའི་སྐབས་ཡིན་ནའང་འདྲ་ཡང་ན་ལས་ཀ་གྲོལ་ནས་ཁྱིམ་དུ་ལོག་པའི་ལམ་བར་ཡིན་ཡང་རུང་། མེ་ཏོག་ཚོང་ཁང་དེ་ལས་རང་ཉིད་ཀྱིས་དགའ་པོ་བྱེད་པའི་མེ་ཏོག་སོས་པ་འགའ་རེ་ཉོས་ཚེ་སེམས་ཧ་ཅང་སྐྱིད་པོ་འདུག “སྔོན་ཆད་མེ་ཏོག་ཉོས་ཀྱང་ཕལ་ཆེ་བ་དགའ་ཉེ་སྤུན་མཆེད་ལ་འབུལ་གྱི་ཡོད་པ་དང་། ད་ཆ་ཕལ་ཆེ་བ་རང་ཉིད་ཀྱི་འཚོ་བར་མཛེས་རྒྱན་སྤྲས་ཏེ་ལུས་བདེ་སེམས་སྐྱིད་ཡོང་བའི་ཆེད་དུ་རེད” “མེ་ཏོག་ཚོང་ཁང་འདི་ལས་གཉེར་བྱེད་འགོ་བཙུགས་ཚུན། སྐབས་རེ་མེ་ཏོག་སོས་པ་ཆག་པ་རེར་རིན་གོང་སྒོར་བཅུ་ལྷག་ཙམ་ལས་མི་དགོས་པའི་ཁར་ཉིན་གང་སྤྲོ་སྣང་དོད་པོ་ཡོང་གི་འདུག”ཅེས་བཤད།
ཞིམ་ཟས་ཚོང་ཁང་ལས་ཕ་ཡུལ་ལ་བཅངས་པའི་དྲན་སེམས་མཚོན་པ།
ལྷ་སའི་ཁྲོམ་གཞུང་དང་སྲང་ལམ་གང་སར་ཞིམ་ཟས་ཚོང་ཁང་གྲངས་མེད་ཡོད་པ་དང་དེ་དག་མངོན་ཆུང་ཡང་རྟག་ཏུ་མི་ཚོར་བརྗེད་དུ་མི་རུང་བའི་ཕ་ཡུལ་གྱི་བྲོ་བ་སྦྱིན་གྱི་ཡོད།
ལྷ་སའི་གཙང་བྲན་ལམ་གྱི་ཁྲུང་ཆིང་རྒྱ་ཐུག་ཟ་ཁང་ཞིག་ནས་འཐུལ་འོང་བའི་དྲི་ཞིམ་ལས་མི་རྣམས་རང་ཤུགས་ངང་དེར་འཛུལ་གྱི་ཡོད་ཅིང་། ཟ་ཁང་རྒྱ་ཆེན་པོ་མེད་རུང་གཙང་སྦྲ་དོད་ལ་སྐྱིད་སྣང་དོད་པ་ཞིག་ཡོད་པ་དང་། ཟ་ཁང་གི་སྦྱིན་བདག་གིས་གཡོས་སྦྱོར་ལས་ལ་བྲེལ་བཞིན་བདག་མོས་མགྲོན་པོར་ཁ་ཡ་བྱེད་ཀྱིན་ཚལ་ཐོ་བཀོད་པ་དང་མགྲོན་པོ་ཚོས་ངང་རྒྱུད་རིང་པོས་ཞིམ་ཟས་སྒུག་བཞིན་མཆིས། “འདི་གར་ཐུག་པ་འཐུང་བར་ཡོང་རིམ་བཞིན་ཁྱིམ་དུ་སླེབས་པའི་ཚོར་སྣང་ཞིག་ཡོང་གི་འདུག”ཅེས་ཁྲུང་ཆིང་ནས་ཡིན་པའི་ཀྲང་ལགས་ཀྱིས་གསར་འགོད་པར་མྱོང་ཚོར་ཟབ་མོས་བཤད་པ་དང་། ལོ་གཉིས་ཀྱི་གོང་ཁོང་ལས་སྒྱུར་བྱས་ནས་ལྷ་སར་སླེབས་པ་དང་རྟག་ཏུ་ཕ་ཡུལ་དྲན་སྐབས་ཟ་ཁང་དེར་ཡོང་ནས་ཐུག་པ་ཚ་སོབ་སོབ་ཅིག་བཏུང་ཚེ་སེམས་པ་ལྷོད་དུ་འབབ་ཀྱི་ཡོད། ཀྲང་ལགས་ཀྱིས“ཟ་ཁང་དེའི་སྦྱིན་བདག་ནི་ས་སྐྱེས་རྡོ་སྐྱེས་ཀྱི་ཁྲུང་ཆིང་བ་ཞིག་ཡིན་སྟབས་ཐུག་པའི་བྲོ་བ་འཁྲུལ་མེད་རེད་འདུག ཕ་ཡུལ་གཅིག་པ་མང་པོ་ཞིག་དེ་གར་ཡོང་རྒྱུར་དགའ་པོ་བྱེད་པ་དང་དེ་ལྟར་རྒྱུས་མངའ་བྱུང་རྗེས་ཚང་མ་གྲོགས་པོར་གྱུར་ཡོད”ཅེས་བཤད།