བྲག་ཡིབ་ཆུས་བུ་ཆུ་ཤང་རྒྱ་རྭ་ཁ་གྲོང་ཚོས།
མཉམ་སྡེབ་དཔལ་འབྱོར་སྟོབས་ཆེར་བཏང་ནས་དམངས་ཕྱུག་འབབ་འཕར་ལ་སྣེ་ཁྲིད་བྱས་པ།
གྲོང་ཚོའི་མཉམ་སྡེབ་དཔལ་འབྱོར་སྟོབས་ཆེར་གཏོང་ཆེད། རྒྱ་རྭ་ཁ་གྲོང་ཚོས་ཕུན་སུམ་ཚོགས་པའི་ནགས་སའི་ཐོན་ཁུངས་ལ་བརྟེན་ནས་སྟར་སྡོང་འདེབས་འཛུགས་ཐོན་ལས་འཕེལ་རྒྱས་ཤུགས་ཆེན་བཏང་བ་མ་ཟད། གཉིས་ལྡན་དུད་སྦྲེལ་ཚན་པར་བྱས་ཏེ་ས་གནས་དེ་གའི་མང་ཚོགས་སྟར་ཀའི་ཐོན་ལས་གླིང་གི་རྣམ་གྲངས་ལ་ཞུགས་རྒྱུར་ལྕག་སྐུལ་ཧུར་ཐག་བྱས་ནས་རང་ཁྱིམ་གྱི་སྒོ་རྩར་ལས་ཞུགས་འབབ་འཕར་ཐུབ་པ་བྱས་ཡོད། ཉེ་ཆར་བྲག་ཡིབ་ཆུས་བུ་ཆུ་ཤང་རྒྱ་རྭ་ཁ་གྲོང་ཚོས་གྲོང་མིའི་ཚོགས་ཆེན་འཚོགས་ནས་དངུལ་སྨར་སྤྲོད་པའི་མཛད་སྒོ་འཚོགས་ཏེ་མང་ཚོགས་སྟར་ཁའི་ཐོན་ལས་གླིང་གི་རྣམ་གྲངས་འཛུགས་སྐྲུན་ལ་ཞུགས་པའི་གླ་ཆ་དང་འཛུགས་སྐྲུན་ལ་སྤྱད་པའི་འཕྲུལ་འཁོར་གྱི་གླ་ཆ་སྤྲད་པ་རེད།
གླ་ཆ་སྤྲོད་པའི་བརྒྱུད་རིམ་དྲང་པོ་དྲང་གཞག་ཡོང་ཆེད། གྲོང་ཚོའི“ཨུ་ལྷན་གསུམ”དང“གཉིས་ལྡན་དུད་སྦྲེལ”གྱི་སྤྱི་མིས་གླ་ཆ་མ་སྤྲད་གོང་ཚོགས་འདུ་ཐེངས་མང་འཚོགས་ནས་ཁྱིམ་ཚང་ཁག་ལས་ཀར་ཞུགས་པའི་ཉིན་གྲངས་ལ་ཞིབ་བསྡུར་བྱས་པ་དང་འབྲེལ། “གྲོས་བཞི་དང་ཡོངས་བསྒྲགས་གཉིས”ཀྱི་གོ་རིམ་གཞིར་བཟུང་། གྲོས་ཆོད་ཡོངས་བསྒྲགས་དང་ལག་བསྟར་འབྲས་བུ་ཡོངས་བསྒྲགས་བྱས་པ་མ་ཟད། བརྒྱུད་རིམ་ཧྲིལ་པོར་མང་ཚོགས་ཀྱི་ལྟ་སྐུལ་ཕྱོགས་ཡོངས་ནས་དང་ལེན་བྱས་ཏེ་གྲོང་ཚོ་རིམ་པའི་ཐབས་ཇུས་གལ་ཆེན་ལམ་ལུགས་ཅན་དང་། དམངས་གཙོ་ཅན། ཚན་རིག་ཅན། ཚད་ལྡན་ཅན་བཅས་སུ་དངོས་འབྲེལ་འགྱུར་ཐུབ་པ་བྱས་ཡོད།
ངོ་སྤྲོད་བྱས་པར་གཞིགས་ན། གོམ་སྟབས་རྗེས་མར། བུ་ཆུ་ཤང་རྒྱ་རྭ་ཁ་གྲོང་ཚོས་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དང་གྲོང་གསེབ་དར་རྒྱས་འབྲེལ་མཐུད་ནུས་ལྡན་བྱེད་པའི་སྲིད་ཇུས་ཀྱི་གོ་སྐབས་ལ་དམ་འཛིན་ནན་པོ་བྱས་ཏེ། སྲིད་ཇུས་དྲིལ་བསྒྲགས་ཀྱིས་ཁྲིད་སྟོན་བྱེད་ཤུགས་ཆེ་རུ་བཏང་བ་དང་ཁྲིམས་མཐུན་དང་སྒྲིག་སྲོལ་དང་མཐུན་པའི་སྒོ་ནས་ཐོན་ལས་དང་རྨང་གཞིའི་སྒྲིག་བཀོད་འཛུགས་སྐྲུན་རྣམ་གྲངས་ལ་ཞིང་འབྲོག་མང་ཚོགས་ཧུར་ཐག་ཞུགས་པར་ཁྲིད་སྟོན་བྱས་ཏེ་མང་ཚོགས་ཀྱི་ལས་ཞུགས་འབབ་འཕར་གྱི་ཐབས་ལམ་རྒྱུན་ཆད་མེད་པར་རྒྱ་ཆེར་བཏང་བ་རེད།