ཤིན་ཧྭ་གསར་འགྱུར་ཁང་ནན་ཁྲང་ནས་ཟླ་9ཚེས་26ཉིན་གློག་འཕྲིན་འབྱོར་གསལ། ཟླ་9ཚེས་26ཉིན། ཀྲུང་དབྱང་དྲིལ་བསྒྲགས་པུའི་དྲིལ་བསྒྲགས་སློབ་གསོ་ཅུས་དང་འོད་ཟེར་ཉིན་རེའི་ཚགས་པར་ཁང་གིས་མཉམ་དུ་གཙོ་གཉེར་བྱས་པའི“ལྟེ་བའི་རིན་ཐང་ལྟ་བའི་འཆད་སྟེགས་ཐེངས་བརྒྱའི”བྱེད་སྒོ་ཐེངས་151པ་ཅང་ཤིས་དབྱི་ཁྲུན་གྲོང་ཁྱེར་དུ་གཉེར་ཞིང་། ཀྲུང་གོ་སྤྱི་ཚོགས་ཚན་རིག་ཁང་ཁྲིམས་རིག་པ་ཞིབ་འཇུག་སུའོ་ཡི་ཞིབ་འཇུག་པ་ཀྲི་ཀྲེན་ཧྥུང་གིས་འགོ་བརྗོད་དུ《དུས་རབས་གསར་པའི་དམངས་ཡོངས་ཀྱི་རྒྱལ་སྲུང་སློབ་གསོ་སྤུས་ཚད་མཐོ་བའི་འཕེལ་རྒྱས་ལ་ཁྲིམས་སྐྱོང་གི་འགན་ལེན་བྱེད་ཤུགས་ཆེ་རུ་གཏོང་དགོས》ཞེས་འཁོད་པའི་གཏམ་བཤད་གནང་བ་རེད།

ཀྲི་ཀྲེན་ཧྥུང་གིས་བཟོ་བཅོས་བརྒྱབ་པའི་རྒྱལ་སྲུང་སློབ་གསོའི་བཅའ་ཁྲིམས་ཀྱི་རྒྱབ་ལྗོངས་དང་དོན་སྙིང་ལ་འཆད་འགྲེལ་ཞིབ་ཕྲ་གནང་བ་དང་། གསར་དུ་བཟོ་བཅོས་བརྒྱབ་པའི་རྒྱལ་སྲུང་སློབ་གསོའི་བཅའ་ཁྲིམས་ཀྱི་སྒྲོམ་གཞི་དང་ནང་དོན་གཙོ་བོ་དང་། མངོན་གསལ་དོད་པའི་དགེ་མཚན་དང་ལམ་ལུགས་ཀྱི་གཏན་འབེབས་གལ་ཆེན་སོགས་ལ་བརྒྱུད་རིམ་ལྡན་པའི་སྒོ་ནས་གསེད་བཀྲོལ་གནང་བ་རེད། རྒྱལ་སྲུང་སློབ་གསོའི་བཅའ་ཁྲིམས་དོན་འཁྱོལ་དང་ལག་བསྟར་ལ་སྐུལ་འདེད་ཏན་ཏིག་གཏོང་བར་ཁྲིམས་སྐྱོང་གི་བྱ་ཐབས་ལ་བརྟེན་ནས་དམངས་ཡོངས་ཀྱི་རྒྱལ་སྲུང་སློབ་གསོ་མུ་མཐུད་གཏིང་ཟབ་སྤེལ་བ་དང་། སྤྱི་ཚོགས་ཡོངས་སུ་ནང་དོན་ཕུན་སུམ་ཚོགས་པ་དང་། རྣམ་པ་སྣ་ཚོགས་པ། ཁྱད་ཆོས་མངོན་གསལ་དོད་པ་བཅས་ཀྱི་མང་ཚོགས་རང་བཞིན་གྱི་རྒྱལ་སྲུང་སློབ་གསོའི་བྱེད་སྒོ་རྒྱ་ཁྱབ་སྤེལ་བ། སྤྱི་ཚོགས་ཀྱི་རྒྱལ་སྲུང་ཐོན་ཁུངས་ཀྱི་ལེགས་ཆ་གང་ལེགས་འདོན་པ་བཅས་བྱས་ཏེ། དུས་རབས་གསར་པའི་དམངས་ཡོངས་ཀྱི་རྒྱལ་སྲུང་སློབ་གསོ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས།