ཉེ་ཆར། ལྷ་ས་གོང་དཀར་རྒྱལ་སྤྱིའི་གནམ་ཐང་གི་གནམ་ལྕོག་གསར་པ་དངོས་སུ་སྤྱོད་འགོ་ཚུགས་ཤིང་། གནམ་ལྕོག་གསར་པ་ནི་རང་རྒྱལ་རྒྱལ་ནང་གི་ས་མཐོ་ཡང་མཐོའི་གནམ་ལྕོག་ཁྲོད་ཀྱི་འཛུགས་སྐྲུན་རྒྱ་ཁྱོན་ཆེ་ཤོས་དང་མཐོ་ཚད་མཐོ་ཤོས་ཀྱི་གནམ་ལྕོག་ཅིག་རེད།

ཤེས་རྟོགས་བྱུང་བར་གཞིགས་ན། གནམ་ལྕོག་གསར་པའི་ལས་གྲྭར་ཁྱོན་མ་དངུལ་སྒོར་ཁྲི་9559བཏང་ཞིང་2023ལོའི་ཟླ་1ཚེས་6ཉིན་ལས་འགོ་བཙུགས་པ་དང་2024ལོའི་ཟླ་6ཚེས་27ཉིན་ལས་མཇུག་འགྲིལ་ནས་ཞིབ་བཤེར་རྩིས་ལེན་བྱས་པ་རེད། གསར་དུ་བསྐྲུན་པའི་གནམ་ལྕོག་དང་དེ་བཞིན་ཞོར་གཏོགས་ཁང་པའི་སྤྱིའི་འཛུགས་སྐྲུན་རྒྱ་ཁྱོན་ལ་སྨི་ངོས་གྲུ་6004ཡོད་པ་དང་ས་སྟེང་དུ་ཐོག་སོ་11ཡོད། གནམ་ལྕོག་གསར་པའི་མཐོ་ཚད་ལ་སྨི་55.6ཡོད་པ་དེས་མཐོང་ཟུར་ཏུའུ་0.8ཀྱི་དགོས་མཁོ་སྐོང་ཐུབ་ཀྱི་ཡོད་པས་དོ་དམ་ཚོད་འཛིན་གྱི་མཐོང་རྒྱ་དེ་བས་ཡངས་པ་དང་དེར་གནམ་ལྕོག་གི་དོ་དམ་ཚོད་འཛིན་བྱེད་ས་དང་། གྲབས་ཉར་གྱི་དོ་དམ་ཚོད་འཛིན་བྱེད་ས། ས་ངོས་ཀྱི་དོ་དམ་ཚོད་འཛིན་བྱེད་ས་སོགས་དོ་དམ་ཚོད་འཛིན་བྱེད་ས་11བཀོད་སྒྲིག་བྱས་ཡོད་པ་རེད།

“གནམ་ལྕོག་གསར་པར་འཕྲིན་གཏོང་དང་། ཕྱོགས་སྟོན། ལྟ་ཞིབ། གནམ་གཤིས་སོགས་རྩེར་སོན་ལག་རྩལ་འདུས་པ་དང་། བར་སྣང་དོ་དམ་CDMམ་ལག་དང་། གྲངས་འཛིན་བར་སྣང་དོ་དམ་གྱི་འདུས་གྲུབ་མ་ལག གྲབས་ཉར་གཙོ་བོའི་གནམ་ལྕོག་དོ་དམ་ཚོད་འཛིན་གྱི་རང་འགུལ་ཅན་གྱི་མ་ལག་སོགས་གསར་སྣོན་བྱས་པ། སྒྲིག་ཆས་རང་རྒྱལ་ནས་ཐོན་སྐྱེད་བྱེད་ཚད་མཐོ་བ་བཅས་ཡོད་པས་མ་ལག་བདེ་འཇགས་དང་ལག་རྩལ་རང་བརྟེན་ཚོད་འཛིན་ནུས་ལྡན་ཐུབ་པ་དང་། ཚད་མཐོའི་རང་འགུལ་ཅན་དང་རིག་ནུས་ཅན་མངོན་འགྱུར་བྱུང་བ། ལས་སྒྲུབ་ཁོར་ཡུག་ཇེ་ལེགས་སུ་ཕྱིན་པ། དོ་དམ་ཚོད་འཛིན་མི་སྣས་མཁའ་ལམ་དང་ས་ངོས་འཁོར་སྐྱོད་ཀྱི་སྒུལ་ཚུལ་སྔར་བས་གསལ་པོ་ཤེས་པ། མཁའ་ལམ་དོ་དམ་གྱི་ཞབས་ཞུའི་ནུས་པ་དང་དང་ལེན་མྱུར་ཚད་སྔར་བས་མཐོ་རུ་ཕྱིན་པ་བཅས་ལས་གནམ་ཐང་འཁོར་སྐྱོད་ཀྱི་འགན་ལེན་ནུས་པ་དང་ལས་ཕྱོད་སྔར་བས་ཆེ་རུ་འགྲོ་རྒྱུ་རེད”ཅེས་དམངས་སྤྱོད་མཁའ་འགྲུལ་བོད་ལྗོངས་ཁུལ་ཅུས་ཀྱི་ཅུས་ཀྲང་ལི་ཧུང་གིས་བཤད།