ཞིང་ལས་དངུལ་ཁང་ནག་ཆུ་ཡན་ལག་དངུལ་ཁང་གིས་ཞིང་དུད་ལ་བཏང་བའི་དངུལ་བུན་སྒོར་དུང་ཕྱུར་60ལྷག་ཙམ་ཟིན་པ།
ཉེ་ཆར། གསར་འགོད་པས་ཞིང་ལས་དངུལ་ཁང་ནག་ཆུ་ཡན་ལག་དངུལ་ཁང་ནས་ཤེས་རྟོགས་བྱས་པར། དངུལ་ཁང་དེའི་ཞིང་དུད་དངུལ་བུན་སླར་ཡང་ཟིན་ཐོ་གསར་པ་བཏོད་དེ་སྒོར་དུང་ཕྱུར་60ཡི་འགག་སྒོ་ཆེན་པོ་ལས་བདེ་བླག་ངང་བརྒལ་བ་དེ་ཐོག་ནས་ཞིང་ལས་དངུལ་ཁང་ནག་ཆུ་ཡན་ལག་དངུལ་ཁང་གིས“ཞིང་གསུམ”ལ་ཞབས་འདེགས་ཞུ་བའི་ལས་དོན་ཐད་ལམ་ཚད་རྡོ་རིང་གསར་པ་ཞིག་བཙུགས་པ་མཚོན་ཡོད།
ཤེས་རྟོགས་བྱུང་བར་གཞིགས་ན། ཞིང་ལས་དངུལ་ཁང་ནག་ཆུ་ཡན་ལག་དངུལ་ཁང་གིས་དངུལ་རྩའི་ཐོན་རྫས་གསར་གཏོད་དང་། དངུལ་བུན་གྱི་བརྒྱུད་རིམ་ལེགས་གཏོང་། འདུན་ཞུའི་ཐབས་ལམ་མང་དུ་གཏོང་བ། འཇུག་འཐུས་ཚད་གཞི་དམའ་རུ་གཏོང་བ་སོགས་ཀྱི་བྱེད་ཐབས་ལ་བརྟེན་ནས་ཞིང་འབྲོག་པའི་དཔྱིད་རྨོད་དཔྱིད་གྲབས་དང་ལུ་གུ་སྐྱེ་བསུ་སོགས་ཐོན་སྐྱེད་གཉེར་སྐྱོང་གི་དངུལ་རྩའི་ཞབས་ཞུའི་དགོས་མཁོ་བསྐངས་ཏེ། ཞིང་འབྲོག་ལས་ཐོན་སྐྱེད་གཉེར་སྐྱོང་བརྟན་པོའི་ངང་འཕེལ་རྒྱས་འགྲོ་བར་སྐུལ་འདེད་བཏང་ནས། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དེ་གྲོང་གསེབ་དར་རྒྱས་དང་འབྲེལ་མཐུད་ནུས་ལྡན་ཐུབ་པར་བྱས་ཡོད།
ཉེ་བའི་ལོ་ཤས་རིང་། ཞིང་ལས་དངུལ་ཁང་ནག་ཆུ་ཡན་ལག་དངུལ་ཁང་གི་ལས་དོན་མི་སྣ་ཡོངས་གཞི་རིམ་དུ་བསྐྱོད་དེ་ཞིང་འབྲོག་དུད་ཚང་གི་དངུལ་བུན་གྱི་དགོས་མཁོ་དངོས་དང་དངུལ་བུན་གྱི་སྤྱོད་སྒོ་ཤེས་རྟོགས་གང་ལེགས་བྱས་ནས། རང་སོའི་ཁྱད་ཆོས་ལྡན་པའི་དངུལ་བུན་གྱི་འཆར་གཞི་ཞིབ་ཚགས་བཟོས་ཡོད་པ་རེད། མཐར་ཞིང་འབྲོག་དུད་ཚང་གི་དངུལ་བུན་གྱི་དགོས་མཁོ་དངོས་དང་དངུལ་བུན་འཇལ་བའི་ནུས་པ་གཞིར་བཟུང་། རིགས་དང་རིམ་པ་དབྱེ་ནས་ནག་ཆུའི་དོན་དངོས་དང་འཚམ་པའི་ཡིད་རྟོན་མ་ལག་འཛུགས་པ་དང་དེ་བཞིན“བྱང་བུ་བཞིའི”དངུལ་བུན་སོགས་ཀྱི་ཐོན་རྫས་བཏོད་དེ་ཞིང་འབྲོག་པའི་ཐོན་སྐྱེད་གཉེར་སྐྱོང་གི་དགོས་མཁོ་བསྐངས་པ་དང་། ས་ཁོངས་ཀྱི་ཁྱད་ཆོས་དམ་འཛིན་བྱ་གཞིར་བྱས་ཏེ“གྲོང་གསེབ་དར་རྒྱས། འབྲི་གཡག་གཏའ་འཇོག་དངུལ་བུན”དང“བྱང་བུ་བཞིའི”ཡིད་རྟོན་ཆེ་རུ་གཏོང་བ་སོགས་ཀྱི་དངུལ་བུན་བཏོད་པ་རེད། ཞིང་འབྲོག་དུད་ཚང་གིས་དངུལ་བུན་སྤྱད་དེ་འདེབས་འཛུགས་དང་གསོ་ཚགས་ཀྱི་གཞི་ཁྱོན་ཆེ་རུ་བཏང་བ་དང་སྔོན་ཐོན་གྱི་ཐོན་སྐྱེད་ལག་རྩལ་དང་སྒྲིག་ཆས་ནང་འདྲེན་བྱས་ནས་ཞིང་འབྲོག་ལས་ཀྱི་ཐོན་སྐྱེད་ཀྱི་ལས་ཕྱོད་ཆེ་རུ་དང་སྤུས་ཚད་མཐོ་རུ་བཏང་བ་དང་ཆབས་ཅིག ཞིང་འབྲོག་མང་ཚོགས་ཀྱི་ཡོང་འབབ་མངོན་གསལ་དོད་པོས་འཕར་བར་སྐུལ་འདེད་བཏང་བ་རེད།