ཤིན་ཧྭ་གསར་འགྱུར་ཁང་ནན་ཉིང་ནས་གློག་འཕྲིན་འབྱོར་གསལ། ཚེས་24ནས་28ཉིན་བར། ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་དངོས་མང་སྟོན་ཚོགས་སྐབས་21པ་ཀོང་ཤིས་ནན་ཉིང་དུ་གཉེར་བ་རེད། དངོས་མང་སྟོན་ཚོགས་ཐོག་ཧྲང་ཧའེ་རླངས་འཁོར་སྤྱི་སྤྱོད་ཝུའུ་ལིང་འགྲེམས་སྟེགས་ལས་ལྟད་མོ་བ་མང་པོའི་ཡིད་དབང་འཕྲོག་པ་དང་གསར་དུ་ཡོངས་བསྒྲགས་བྱས་པའི་ནུས་རྒྱུ་གསར་པའི་མ་འོངས་མོ་ཊའི་འཁོར་དབྱིབས“ཨེ་ཤེ་ཡ་ཤར་ལྷོའི་མནའ་འབྲེལ་གྱི་འོད་སྣང”ཞེས་པ་དེ་གླེང་གཞིར་གྱུར་ཡོད་པ་རེད། ཧྲང་ཧའེ་རླངས་འཁོར་སྤྱི་སྤྱོད་ཝུའུ་ལིང་རྟགས་ཅན་དང་བརྒྱུད་སྤེལ་གྱི་སྤྱི་ཁྱབ་ཅིང་ལི་ཀྲོའུ་ཞིང་གིས་ཡོངས་བསྒྲགས་ཚོགས་འདུའི་ཐོག་རླངས་འཁོར་དེར“ཨེ་ཤེ་ཡ་ཤར་ལྷོའི་མནའ་འབྲེལ་གྱི་འོད་སྣང”ཞེས་མིང་བཏགས་པ་དེ་ཐོག་ནས་ཀུང་སིས་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་ཀྱི་ནུས་རྒྱུ་གསར་པའི་རླངས་འཁོར་ཐོན་ལས་སྒྱུར་བཅོས་ལ་རྒྱུན་མཐུད་རམ་འདེགས་དང་སྐུལ་འདེད་གཏོང་བའི་ཆོད་སེམས་དང་འཕེལ་རྒྱས་ཀྱི་ཁ་ཕྱོགས་མངོན་ཡོད་ཅེས་བརྗོད་པ་རེད།

ཧྲང་ཧའེ་རླངས་འཁོར་སྤྱི་སྤྱོད་ཝུའུ་ལིང་ནི་ཀྲུང་གོའི་ནུས་རྒྱུ་གསར་པའི་རླངས་འཁོར་གྲགས་ཅན་མང་པོ་ཞིག་གིས་ཧིན་རྡུ་ཉི་ཞི་ཡ་དང་དེ་བཞིན་ཨེ་ཤེ་ཡ་ཤར་ལྷོའི་རྒྱལ་ཁབ་གཞན་དག་གི་ནུས་རྒྱུའི་ཕྱོགས་སྒྱུར་ལ་སྐུལ་འདེད་གཏོང་བའི་བསྡུས་རིས་ཤིག་རེད། ཆི་རུའེ་དང་། ཀོང་ཆི་ཨའེ་ཨན། ནཱ་ཏྲ་ལ་སོགས་ནུས་རྒྱུ་གསར་པའི་རླངས་འཁོར་ནི་ཀྲུང་གོའི་ཐོན་སྐྱེད་ནུས་ཤུགས་གསར་མའི་མིང་བྱང་གལ་ཆེན་གྱི་གྲས་ཤིག་ཡིན་པའི་ཆ་ནས། རིམ་གྱིས་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་ཁག་གི་ཁྱིམ་ཚང་ཁྲི་སྟོང་མང་པོས་སྤྱོད་བཞིན་ཡོད་པ་རེད།

ཉེ་བའི་ལོ་ཤས་རིང་། ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་ཀྱིས་བསྐྱར་སྐྱེས་ཐུབ་པའི་ནུས་རྒྱུའི་འཕེལ་རྒྱས་ལ་ཡོངས་ཁྱབ་ཐོག་མཐོང་ཆེན་པོ་བྱེད་ཀྱི་ཡོད། ཧིན་རྡུ་ཉི་ཞི་ཡའི་ཀྲུང་གོའི་ཧྭ་གློག་པཱ་ལི་གླིང་ཕྲན་གློག་ཁང་ནས་ཁམ་ཕུ་ཁྲེའི་ཨེ་ལེ་སའེ་སྨད་རྒྱུད་ཀྱི་ཆུ་ཤུགས་གློག་ཁང་བར་དང་། ཐེ་ལན་གྱི་ཧྲི་ལིང་ཐུང་ཆུ་རགས་ཕྱོགས་བསྡུས་འཕྱོ་གཟུགས་འོད་ཤུགས་རྣམ་གྲངས་ནས་ཝེ་ཐེ་ནམ་གྱི་ཅ་ལའེ་ཀྲའོ་ཝ་300ཟིན་པའི་རླུང་གློག་རྣམ་གྲངས་བར་སོགས་ཀྲུང་གོའི་ལག་རྩལ་གྱིས་ཨེ་ཤེ་ཡ་ཤར་ལྷོའི་རྒྱལ་ཁབ་ཀྱི་དམངས་ཚོགས་ལ་དེ་བས་གྲོན་ཆུང་དང་། བརྟན་པོ། དྭངས་གཙང་བཅས་ཀྱི་གནོད་མེད་གློག་ནུས་སྤྱོད་ཐུབ་པ་བྱུང་ཡོད།

ཁམ་ཕུ་ཁྲེའི་ལྷོ་ནུབ་རྒྱུད་ཀྱི་ཀེ་ཀུང་ཞིང་ཆེན་དུ། ཀྲུང་གོ་ཧྭ་གློག་མ་རྐང་ཚད་ཡོད་ཀུང་སིས་མ་དངུལ་བཏང་ནས་བསྐྲུན་པའི་ཨེ་ལེ་སའེ་སྨད་རྒྱུད་ཀྱི་ཆུ་ཤུགས་གློག་ཁང་གིས་འདི་ལོའི་ཟླ་9ཚེས་1ཉིན་བར་རིམ་རྩིས་བྱས་ན་གློག་གཏོང་ཚད་ཆན་ཝ་ཆུ་ཚོད་དུང་ཕྱུར་114ལྷག་ཙམ་ཟིན་ཡོད་པ་རེད། དེ་ནི་ཀྲུང་གོའི་ཧྭ་གློག་ཀུང་སིས་ཕྱི་རྒྱལ་དུ“འཛུགས་སྐྲུན་དང་། གཉེར་སྐྱོང་། རྩིས་སྤྲོད(ＢＯＴ)”ཀྱི་རྣམ་པའི་ཐོག་ནས་མ་འཇོག་གསར་སྤེལ་བྱས་པའི་ཆུ་ཤུགས་གློག་ཁང་དང་པོ་དེ་ཡིན་ཞིང་། དེའི་སྒྲིག་སྦྱོར་བྱས་པའི་འཕྲུལ་འཁོར་ནས་གློག་གཏོང་ཚད་ཆན་ཝ་ཁྲི་33.8ཟིན་པ་དང་ལོ་རེར་ཆ་སྙོམས་གློག་གཏོང་ཚད་ཆན་ཝ་ཆུ་ཚོད་དུང་ཕྱུར་10ཙམ་ཟིན་ནས་ཁམ་ཕུ་ཁྲེའི་གློག་ཤུགས་མཁོ་སྤྲོད་དཀོན་པའི་རྣམ་པ་ཞི་ལྷོད་དུ་ཤུགས་ཆེན་ཕྱིན་ཡོད་པ་རེད།

ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་ཀྱི་ནུས་རྒྱུ་ཕྱོགས་སྒྱུར་གྱི་མི་མངོན་པའི་སྟོབས་ཤུགས་ལས་ཀྱང་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་དངོས་མང་སྟོན་ཚོགས་སུ་ཐོག་མར་ཞུགས་པའི་ནུས་རྒྱུའི་ཀུང་སི་ཁག་གཅིག་གི་ཡིད་དབང་བཀུག་ཡོད། ཀོང་ཤིས་ནས་ཡིན་པའི་ཀྲུང་གོ་ཚན་རིག་ཁྱབ་གདལ་རིག་ལྡན་ནུས་རྒྱུ་ཚད་ཡོད་ཀུང་སིས་ད་ཐེངས་ཀྱི་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་དངོས་མང་སྟོན་ཚོགས་བརྒྱུད་ཀུང་སིས་རང་བརྟེན་ཞིབ་བཟོ་བྱས་པའི་སྒུལ་ཤུགས་གློག་རྫས་ཐོན་རྫས་དང་དེ་བཞིན་རིག་ནུས་རྣམ་པའི་ཁྱིམ་ཚང་གི་གསོག་ནུས་དང་ཚོང་སྤྱོད་ནུས་གསོག་ཐོན་རྫས་སོགས་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རྒྱལ་ཁབ་དེ་བས་མང་བར་ཁྱབ་གདལ་གཏོང་རྒྱུའི་རེ་བ་ཡོད་ཅེས་བཤད་པ་རེད། “དེ་སྔ་ང་ཚོས་ཁྲོམ་ར་གཙོ་བོ་ཡོ་རོབ་དང་ཨ་རི་ས་ཁུལ་ལ་དམིགས་པ་དང་ད་ཆ་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་ཀྱིས་ཀྱང་ནུས་རྒྱུ་གསར་པའི་ཐོན་ལས་འཕེལ་རྒྱས་དང་ནུས་རྒྱུ་གསར་པའི་ཐོན་རྫས་བཀོལ་སྤྱོད་ལ་སྐུལ་འདེད་ཤུགས་ཆེན་གཏོང་བཞིན་ཡོད་པ་དེ་ནི་ཁེ་ལས་ཀྱི་ངོས་ནས་བརྗོད་ན་གོ་སྐབས་གལ་ཆེན་ཞིག་རེད”ཅེས་ཀུང་སིའི་དབུ་བཞུགས་ལག་བསྟར་དཔོན་ཧོང་ཙུང་ཐེན་གྱིས་བཤད།