ཀྲུང་གོ་ནི་ཨ་ཧྥེ་རི་ཁའི་གྲོགས་པོ་བློས་ཐུབ་དང་ཨ་ཧྥེ་རི་ཁར་རོགས་རམ་མཁོ་སྐབས་ང་ཚོ་དང་མཉམ་དུ་ལངས་ཐུབ་པའི་གྲོགས་པོ་ཞིག་ཡིན་པས་ཨ་ཧྥེ་རི་ཁ་དང་ཀྲུང་གོའི་དབར་གྱི་མཉམ་ལས་ཀྱིས་རྒྱལ་སྤྱིའི་མཉམ་ལས་ལ་མིག་དཔེ་བསྟན་ཡོད།

ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ནི་ཨ་ཧྥེ་རི་ཁའི་རྒྱལ་ཁབ་ཀྱིས་ཀྲུང་གོ་དང་དངོས་སྒྲུབ་མཉམ་ལས་བྱེད་པའི་ལས་སྟེགས་ནུས་ལྡན་ཞིག་རེད། 2000ལོར་གླེང་སྟེགས་དེ་བཙུགས་ཚུན། ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་འཁོར་སྐྱོད་ནུས་པ་ཆེ་ལ་གྲུབ་འབྲས་གཡུར་དུ་ཟ་བ་ཐོབ་ནས་ཕྱོགས་གཉིས་པོའི་མི་དམངས་ལ་དངོས་དངོས་རྗེན་རྗེན་གྱི་ཕན་པ་བཏགས་ཡོད། ཀྲུང་གོ་ནི་ཨ་ཧྥེ་རི་ཁའི་གྲོགས་པོ་བློས་ཐུབ་དང་ཨ་ཧྥེ་རི་ཁར་རོགས་རམ་མཁོ་སྐབས་ང་ཚོ་དང་མཉམ་དུ་ལངས་ཐུབ་པའི་གྲོགས་པོ་ཞིག་ཡིན་པས་ཨ་ཧྥེ་རི་ཁ་དང་ཀྲུང་གོའི་མཉམ་ལས་ཀྱིས་རྒྱལ་སྤྱིའི་མཉམ་ལས་ལ་མིག་དཔེ་བཟང་པོ་ཞིག་བསྟན་ཡོད།

ང་ཀྲུང་གོར་འཚམས་འདྲིར་ཐེངས་མང་འགྲོ་མྱོང་ཡོད་ལ་པེ་ཅིང་དང་། ཧྲང་ཧའེ། ཧྲེན་ཀྲེན་སོགས་གྲོང་ཁྱེར་མང་པོར་འགྲོ་མྱོང་ཡོད། ཀྲུང་གོའི་མི་དམངས་རྣམས་རང་ཉིད་ཀྱི་རིག་གནས་ལ་དགའ་ཞེན་ཆེ་བ་དང་རང་རྒྱལ་ཁབ་ཀྱི་འཕེལ་རྒྱས་ཀྱི་གྲུབ་འབྲས་ལ་སྤོབས་པ་ཆེན་པོ་བྱེད་ཀྱི་ཡོད། ཐེངས་ཤིག ངས་སློབ་ཆུང་ཞིག་ལ་ལྟ་སྐོར་བྱེད་སྐབས་ང་རང་ཐན་ཙན་ནི་ཡ་ནས་ཡིན་པ་ཤེས་རྗེས། སློབ་མ་ཚོས་ཐན་ཙན་ལྕགས་ལམ་ཤེས་ཀྱི་ཡོད་ཅེས་ལམ་སེང་བཤད་བྱུང་། ཨ་ཧྥེ་རི་ཁའི་རྒྱལ་ཁབ་ཀྱིས་ཀྱང་མི་རབས་རྗེས་མར་ཨ་ཧྥེ་རི་ཁ་དང་ཀྲུང་གོའི་མཉམ་ལས་ཀྱི་ལོ་རྒྱུས་དང་ད་ལྟའི་གནས་ཚུལ་དེ་བས་ལེགས་པའི་སྒོ་ནས་ཤེས་རྟོགས་དང་ཨ་ཧྥེ་རི་ཁའི་འཕེལ་རྒྱས་ལ་རྒྱབ་སྐྱོར་བྱེད་པའི་ཐད་ཀྲུང་གོས་བཏོན་པའི་ནུས་པ་གལ་ཆེན་ཤེས་རྟོགས་ཐུབ་རྒྱུའི་རེ་བ་བྱེད་ཀྱི་ཡོད།

2022ལོའི་ཟླ་11པར་ཐན་ཙན་ནི་ཡའི་ཙུང་ཐུང་ཧ་སང་གིས་ཀྲུང་གོར་རྒྱལ་དོན་འཚམས་འདྲི་གནང་བ་དེ་ནི་ཀྲུང་གོ་གུང་ཁྲན་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་ཉི་ཤུ་འཚོགས་རྗེས་ཀྲུང་གོ་ཕྱོགས་ཀྱིས་སྣེ་ལེན་ཞུས་པའི་ཨ་ཧྥེ་རི་ཁའི་རྒྱལ་ཁབ་ཀྱི་གཙོ་བདག་ཨང་དང་པོ་ཡིན་པ་དེ་ཐོག་ནས་ཐན་ཀྲུང་དབར་གྱི་འབྲེལ་བ་ཟབ་ཏུ་འགྲོ་ཚད་དང་ཨ་ཧྥེ་རི་ཁ་དང་ཀྲུང་གོའི་དབར་གྱི་འབྲེལ་བས་ཀྲུང་གོའི་ཕྱི་འབྲེལ་གྱི་སྤྱི་ཡོངས་ཁྲོད་བཟུང་བའི་གནས་བབ་གལ་ཆེན་གང་ལེགས་མངོན་གྱི་ཡོད། དེ་དུས་ཀྱི་འཚམས་འདྲིའི་རིང་རྒྱལ་ཁབ་གཉིས་པོའི་གཙོ་བདག་གིས་ཐན་ཀྲུང་འབྲེལ་བ་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བར་རིམ་སྤོར་བྱ་རྒྱུར་མོས་མཐུན་མགྲིན་གཅིག་ཏུ་གནང་བ་རེད།

ཐན་ཙན་ནི་ཡས་ཀྲུང་གོ་དང་མཉམ་དུ་གཉིས་ཁེ་གཉིས་ཕན་གྱི་མཉམ་ལས་ལ་མུ་མཐུད་ཤུགས་སྣོན་བརྒྱབ་ནས་ཆུ་ཚད་མཐོ་བའི་ཨ་ཧྥེ་རི་ཁ་དང་ཀྲུང་གོའི་ལས་དབང་གཅིག་མཐུན་ཚོགས་པ་འཛུགས་ཆེད་ལེགས་སྐྱེས་དེ་བས་ཆེ་བ་འབུལ་རྒྱུའི་རེ་སྒུག་བྱེད་ཀྱི་ཡོད། ང་ཚོས་ཀྲུང་གོ་དང་རྨང་གཞིའི་སྒྲིག་བཀོད་ཀྱི་མཉམ་ལས་ལ་ཤུགས་སྣོན་བརྒྱབ་ནས་ས་ཁོངས་ཀྱི་ཕན་ཚུན་སྦྲེལ་མཐུད་ལ་སྔར་བས་སྐུལ་འདེད་བཏང་སྟེ་འཕེལ་རྒྱས་ཀྱི་གོ་སྐབས་སྔོག་འདོན་གང་ལེགས་བྱེད་པ་དང་། བཟོ་ལས་ཅན་གྱི་མཉམ་ལས་ལ་ཤུགས་སྣོན་བརྒྱབ་ནས་ཀྲུང་གོའི་བཟོ་སྐྲུན་ལས་རིགས་འཕེལ་རྒྱས་དང་བཟོ་ལས་ཅན་ལ་སྐུལ་འདེད་གཏོང་བའི་ཉམས་མྱོང་དཔྱད་གཞིར་འཛིན་པ་དང་། བཟོ་ལས་གླིང་ཁུལ་འཛུགས་སྐྲུན་དང་ལག་རྩལ་མཐོར་འདེགས། ས་གནས་དེ་གའི་བཟོ་སྐྲུན་ལས་རིགས་འཕེལ་རྒྱས་བཅས་ལ་སྐུལ་འདེད་གཏོང་བ། མི་ཆོས་རིག་གནས་སྤེལ་རེས་ལ་ཤུགས་སྣོན་བརྒྱབ་ནས་རིག་གནས་དང་ཡུལ་སྐོར་གྱི་རྨང་གཞིའི་སྒྲིག་བཀོད་འཛུགས་སྐྲུན་ལ་སྐུལ་འདེད་གཏོང་བ་དང་། ཀྲུང་གོའི་ཡུལ་སྐོར་བ་དེ་བས་མང་བ་ཐན་ཙན་ནི་ཡར་ཡུལ་སྐོར་དུ་ཡོང་རྒྱུའི་ཡིད་དབང་བཀུག་ནས་དམངས་སེམས་གཅིག་མཐུན་ལ་སྐུལ་འདེད་གཏོང་བ་དང་། ཕན་ཚུན་དབར་རྒྱུས་མངའ་ལོན་ཟབ་ཏུ་གཏོང་བ། ལྗང་མདོག་མཉམ་ལས་ལ་ཤུགས་སྣོན་རྒྱག་པ་དང་། ཁོར་ཡུག་སྲུང་སྐྱོང་གི་ལག་རྩལ་ཁྱབ་གདལ་གཏོང་བ། རྒྱུན་མཐུད་རུང་བའི་འཕེལ་རྒྱས་ལ་སྐུལ་འདེད་གཏོང་བ་བཅས་བྱས་ནས་དེ་བས་ལྗང་མདོག་དང་དེ་བས་བདེ་ཐང་གི་འབྱུང་འགྱུར་ཕྱོགས་སུ་སྐྱོད་ཐུབ་པའི་རེ་སྒུག་བྱེད་ཀྱི་ཡོད།

(རྩོམ་པ་པོ་ནི་ཐན་ཙན་ནི་ཡའི་ཇུས་འདོན་ཚོགས་པའི་རྒྱལ་སྤྱིའི་སྲིད་ཇུས་ཞིབ་འཇུག་ལྟེ་གནས་ཀྱི་ཀྲུའུ་རེན་ཡིན་པ)