འདི་ནི་ཉེ་ཆར་བོད་ལྗོངས་ནག་ཆུ་གྲོང་ཁྱེར་ཨ་མདོ་རྫོང་གི་སློབ་གྲྭ་འབྲིང་ཆུང་གི་སློབ་མ་ཚོས་ཨ་མདོ་གདང་ལའི་སྒྲིག་གཤོམ་ཁང་དུ་ལྟ་སྐོར་བྱས་ནས་གདང་ལའི་རྒྱུད་ཀྱི་ཀྲུང་ཧྭའི་ཕུལ་བྱུང་རིག་གནས་སློབ་སྦྱོང་དང་རྒྱུན་འཛིན་བྱས་ཏེ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྔར་བས་ཟབ་ཏུ་གཏོང་བཞིན་པ།

བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། ཀྲུང་གོ་གསར་པ་དབུ་བརྙེས་ནས་ལོ་75འཁོར་བར་རྟེན་འབྲེལ་ཞུ་བའི་མཚམས་སུ་ས་བབ་མཐོ་ཤོས་ཀྱི་སྒྲིག་གཤོམ་ཁང་སྟེ། ཨ་མདོ་གདང་ལའི་སྒྲིག་གཤོམ་ཁང་ཟླ་9ཚེས་27ཉིན་དངོས་སུ་སྤྱི་ཚོགས་ཀྱི་སྤྱི་དམངས་ལ་སྒོ་ཕྱེ་ཞིང་། དེ་ཡང་བོད་ཀྱིས་རི་བོའི་མིང་འགྲེམས་ཁང་ལ་བཏགས་པའི་བརྗོད་དོན་གཙོ་བོའི་སྒྲིག་གཤོམ་ཁང་ཐོག་མ་དེ་རེད།

ཨ་མདོ་གདང་ལའི་སྒྲིག་གཤོམ་ཁང་བོད་ལྗོངས་ནག་ཆུ་གྲོང་ཁྱེར་ཨ་མདོ་རྫོང་དུ་གནས་ཤིང་། དེར་ས་བབ་མཐོ་ཚད་སྨི་4700ཡོད་པ་དང་འགྲེམས་ཁུལ་དུ“ཁང་གསུམ་དང་ཐང་ཆེན་གཅིག”དང་། གདང་ལའི་བརྗོད་དོན་གཙོ་བོའི་སྒྲིག་གཤོམ་ཁང་། ཏང་འཛུགས་སྐྱོང་གི་བྱེད་སྒོ་ཁང་། རིག་གནས་བསམ་བཀོད་འགྲེམས་ཚོང་ཁང་། མི་རིགས་མཐུན་སྒྲིལ་གྱི་ཐང་ཆེན་བཅས་ཡོད་པར་རྒྱ་ཁྱོན་ལ་སྨི་ངོས་གྲུ་8936ཟིན་ཡོད་པ་རེད།

གདང་ལར་དམིགས་བསལ་གྱི་ཁྱད་ཆོས་གང་ཡོད་དམ། འགྲེམས་ཁང་དེར་གདང་ལའི་མིང་འདོགས་དགོས་དོན་གང་ཡིན་ནམ། དོགས་གནད་དེ་གདང་ལའི་སྒྲིག་གཤོམ་ཁང་ལ་ལྟ་སྐོར་བྱས་ཚེ་གཞི་ནས་ཤེས་ཐུབ།

མཚོ་བོད་གཞུང་ལམ་གྱི་རྒྱལ་ལམ་109བརྒྱུད་དེ་ཨ་མདོ་རྫོང་གྲོང་དུ་འབྱོར་སྐབས་ལམ་ཟུར་དུ་འགྱིང་ངེར་གནས་པའི་རྡོ་རིང་དང་ལྕགས་ལམ་དེ་ནི་འགྲོ་འོང་བྱེད་མཁན་རྣམས་ལ་མཚོ་བོད་ལམ་ཐིག་ཏུ་གསར་དུ་བསྐྲུན་པའི་གདང་ལའི་སྒྲིག་གཤོམ་ཁང་སྟོན་པ་ལྟ་བུར་སྣང་།

རྡོ་རིང་འཛུགས་པ་ནི་ཀྲུང་གོ་བས་བྱ་བ་གལ་ཆེན་ཐོ་འགོད་བྱེད་པའི་སྲོལ་རྒྱུན་གྱི་བྱེད་ཐབས་ཤིག་ཡིན་ཞིང་། ནག་ཆུ་གྲོང་ཁྱེར་ཨ་མདོ་རྫོང་ནི་བོད་ཀྱི་དྲན་གསོའི་རྡོ་རིང་མང་པོ་ཡོད་པའི་རྫོང་ཞིག་ཡིན་པ་དང་ཁྱོན་དྲན་གསོའི་རྡོ་རིང་དང་འཇིམ་བརྐོས་སུམ་ཅུ་ལྷག་ཙམ་ཡོད་པའི་ནང་། གདང་ལའི་རི་རྒྱུད་ཀྱི་གཞོགས་གཉིས་སུ་གནས་པའི་འབྲི་ཆུའི་ཆུ་འགོ་དང་རྒྱལ་མོ་རྔུལ་ཆུའི་ཆུ་འགོ་ཕུད། མཚོ་བོད་གཞུང་ལམ་གྱི་གདང་ལར་ད་དུང“རྡོ་རིང་ཚོམ་བུ”ཆུང་ཆུང་ཞིག་ཆགས་ཡོད། ཨ་མདོའི་ས་གཞི་ཆེན་པོར་འགྱིང་ངེར་གནས་པའི་མཛད་རྗེས་རྡོ་རིང་དེ་དག་གིས་གདང་ལའི་རི་རྒྱུད་ཀྱི་གལ་ཆེའི་རང་བཞིན་ར་སྤྲོད་བྱེད་པ་དང་། ཀྲུང་གོ་ཡོངས་དང་། བོད་ཡོངས། ནག་ཆུ་ཡོངས་བཅས་སུ་ཨ་མདོའི་ལོ་རྒྱུས་ཀྱི་ཕྱོགས་མཚམས་གལ་ཆེན་མངོན་པ་མ་ཟད། བོད་ཀྱི་འཕེལ་རྒྱས་ལོ་རྒྱུས་ཐོག་གི་གནམ་ས་གཏོད་པའི་བྱ་བ་གལ་ཆེན་ལ་ཡང་དཔང་པོ་བྱས་ཡོད། ཨ་མདོ་གདང་ལའི་སྒྲིག་གཤོམ་ཁང་གི་མདུན་དུ་འདྲ་བཟོ་བྱས་པའི་དྲན་གསོའི་རྡོ་རིང་དང་བརྐོས་བརྙན་ཁག་6འགྱིང་ངེར་གནས་ཡོད་ལ། མཚོན་རྟགས་རྡོ་རིང་2གསར་དུ་བཙུགས་ཡོད། འགྱིང་ངེར་གནས་པའི“མཛད་རྗེས་རྡོ་རིང”ཕུད་དེ་གར་ད་དུང་སྨི་25ཡོད་པའི་ལྕགས་ལམ་བཏིངས་ཡོད་པས། ཡུལ་སྐོར་བ་དང་ལྟ་སྐོར་བ་མང་པོ་ཞིག་དེ་གར་ཡོང་ནས་པར་ལེན་དང་ལྟ་སྐོར་བྱེད་ཅིང་། ལྕགས་ལམ་གྱི་འགྲམ་དུ་ད་དུང་འདྲ་བཟོ་བྱས་པའི་མཚོ་བོད་ལྕགས་ལམ་གདང་ལའི་དྲན་གསོའི་རྡོ་རིང་འགྱིང་ངེར་གནས་ཡོད།

གདང་ལའི་སྒྲིག་གཤོམ་ཁང་ལ་རྒྱ་ཁྱོན་སྨི་ངོས་གྲུ་1768ཡོད་ཅིང་། དེའི་ནང་པར་540དང་དངོས་རྫས་211ཡོད་པ་དང་། འགྲེམས་སྟོན་བྱ་ཡུལ་4རུ་སྒྲིག་གཤོམ་བྱས་པའི་དངོས་རྫས་མང་པོ་ཞིག་རྙིང་པ་ཤ་སྟག་ཡིན་པ་དང་སྤྱི་དམངས་ལ་འགྲེམས་སྟོན་བྱེད་ཐེངས་དང་པོ་རེད། འགྲེམས་ཁང་ནང་སྐྱོད་སྐབས་སྣུམ་ཚོན་རི་མོ་དང་། འདྲ་པར། 3Ｄབརྙན་ལམ། བྱེ་གཞོང་། སྲོག་ཆགས་ཀྱི་མ་དཔེ། རེག་ཐུག་བརྙན་ཤེལ་མཉམ་འགུལ་སོགས་སྒྲིག་གཤོམ་བྱེད་ཐབས་སྣ་ཚོགས་ལ་བརྟེན་ནས་ལྟ་སྐོར་བར་གདང་ལའི་རི་རྒྱུད་དང་། ཆུ་རྒྱུད། ལོ་རྒྱུས། མི་ཆོས་རིག་གནས། གཏམ་རྒྱུད། ངོ་མཚར་འཕོ་འགྱུར་བཅས་འགྲེམས་སྟོན་བྱས་ཡོད།

ཤེས་རྟོགས་བྱུང་བར་གཞིགས་ན། ཨ་མདོ་གདང་ལའི་སྒྲིག་གཤོམ་ཁང་ཟླ་9ཚེས་27ཉིན་ནས་བཟུང་སྤྱི་ཚོགས་ཀྱི་སྤྱི་དམངས་ལ་རིན་མེད་ངང་སྒོ་ཕྱེ་ཡོད་པ་རེད།