གསར་འགོད་པར་ཉེ་ཆར་བོད་རང་སྐྱོང་ལྗོངས་ཀྱི“ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་75འཁོར་བར་བསུ་བ་ཞུ་བའི”བརྗོད་དོན་གཙོ་བོའི་རིམ་སྤེལ་གསར་འགྱུར་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོགས་བྱུང་བར། ཀྲུང་གོ་གསར་པ་དབུ་བརྙེས་ནས་ལོ་75སོང་རིང་། ནག་ཆུ་གྲོང་ཁྱེར་གྱི་བྱ་གཞག་ཁག་མེད་པ་ནས་ཡོད་པའི་བར་དང་། ཆུང་བ་ནས་ཆེ་བའི་བར། ཉམས་ཞན་ནས་སྟོབས་ཆེའི་བར་བཅས་ཀྱི་འགྱུར་ལྡོག་ཕྱིན་ནས་ཆབ་སྲིད་བརྟན་ལྷིང་དང་། དཔལ་འབྱོར་འཕེལ་རྒྱས། རིག་གནས་དར་རྒྱས། སྤྱི་ཚོགས་བརྟན་ལྷིང་། སྐྱེ་ཁམས་བཟང་བ་བཅས་ཀྱི་རྣམ་པ་གསར་པ་ཞིག་མངོན་ཡོད་པ་རེད།

ལོ་75ཡི་རིང་། ནག་ཆུའི་དཔལ་འབྱོར་གྱི་སྟོབས་ཤུགས་མངོན་གསལ་དོད་པོས་ཆེ་རུ་ཕྱིན་ཞིང་། ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་1990ལོའི་སྒོར་དུང་ཕྱུར་2.95ནས་2023ལོའི་སྒོར་དུང་ཕྱུར་216.88བར་འཕར་བ་དང་། གཏན་འཇགས་རྒྱུ་ནོར་གྱི་མ་འཇོག་བསྡོམས་འབོར་1990ལོའི་སྒོར་དུང་ཕྱུར་0.3ནས་2023ལོའི་སྒོར་དུང་ཕྱུར་95.08བར་འཕར་བ། སྤྱི་ཚོགས་ཀྱི་འཛད་རྫས་སིལ་ཚོང་བསྡོམས་འབོར་1990ལོའི་སྒོར་ཁྲི་6446.83ནས་2023ལོའི་སྒོར་དུང་ཕྱུར་33.17བར་འཕར་བ། གྲོང་ཁྱེར་དང་གྲོང་རྡལ་གྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་1990ལོའི་སྒོར་1755.06ནས་2023ལོའི་སྒོར་52277བར་འཕར་བ། ཞིང་འབྲོག་པ་མི་རེའི་ཆ་སྙོམས་ཡོང་འབབ་ཁེར་གཙང་1990ལོའི་སྒོར་411.8ནས་2023ལོའི་སྒོར་18552བར་འཕར་བ། ནུས་རྒྱུ་གཙང་མའི་གློག་འདོན་འཕྲུལ་འཁོར་ནས་གློག་འདོན་ཚད་ཆན་ཝ་ཁྲི་67.68ཟིན་ནས་རིམ་རྩིས་བྱས་ན་དྲ་ཞུགས་གློག་ཚད་ཆུ་ཚོད་ཆན་ཝ་དུང་ཕྱུར་14.21ཟིན་པ་དང་རིམ་རྩིས་བྱས་ན་ཕྱིར་གཏོང་གློག་ཚད་ཆུ་ཚོད་ཆན་ཝ་དུང་ཕྱུར་1.87ཟིན་པ། ཞིང་འབྲོག་པའི་ཆེད་ལས་མཉམ་ལས་ཁང་1643བར་མང་དུ་ཕྱིན་ནས། ཞིང་འབྲོག་མང་ཚོགས་དུད་ཚང་ཁྲི་7.38དང་མི་ཁྲི་34.01ལ་ཁྱབ་འགྱེད་སྐུལ་ཁྲིད་བྱས་པ། བོད་ཀྱི་ཡུལ་ལུག་གི་ལེགས་ཆའི་ཁྱད་ལྡན་ཐོན་ལས་ཚོ་འདུས་དེ་ཉིད་ལྗོངས་ཡོངས་ཀྱི་རྒྱལ་ཁབ་རིམ་པའི་དུས་འབྲིང་གི་ལས་རྗེས་ཚོད་སྐོར་ལེགས་གྲུབ་བྱུང་བའི་རྣམ་གྲངས་དང་པོར་གྱུར་པ་དང་། ཉང་གཡག་འབྲི་གཡག་གསོ་ཚགས་རྟེན་གཞི་དེ་ཉིད་རྒྱལ་ཁབ་རིམ་པའི་གསོ་ཚགས་ཚད་ལྡན་ཅན་གྱི་དཔེ་སྟོན་ཁུལ་དུ་གཏན་འཁེལ་བྱས་པ། ཞིང་འབྲོག་ཐོན་རྫས་3ལ་རྒྱལ་ཁབ་ཀྱི་སྐྱེ་ལྡན་ཁས་ལེན་ཐོབ་པ་བཅས་རེད།

ལོ་75ཡི་རིང་། ནག་ཆུ་གྲོང་ཁྱེར་གྱི་རྨང་གཞིའི་སྒྲིག་བཀོད་ཉིན་རེ་བཞིན་འཐུས་སྒོ་ཚང་དུ་ཕྱིན་ཞིང་། གཞུང་ལམ་དང་། ལྕགས་ལམ། སྣུམ་རླངས། འོད་སྐུད། གློག་ཤུགས། མྱུར་བགྲོད་བཅས་སྲོག་ཐིག་དྲུག་ལས་གྲུབ་པའི“མཁའ་ལམ་བར་ཁྱམས”འདི་གར་ཁྱབ་ཡོད། 2023ལོའི་ལོ་མཇུག་བར་གྲོང་ཁྱེར་ཡོངས་ཀྱི་གྲོང་གསེབ་གཞུང་ལམ་དུ་རླངས་འཁོར་ཤར་གཏོང་ཐུབ་པའི་ལམ་ཚད་སྤྱི་ལེ་29173.85ཟིན་པ་དང་ནག་ཆུ་གྲོང་ཁྱེར་གྱི་གྲོང་ཁུལ་གཙོ་བོའི་འཛུགས་སྐྲུན་རྒྱ་ཁྱོན་2015ལོའི་སྤྱི་ལེ་ངོས་གྲུ་13ནས་ད་ཆའི་སྤྱི་ལེ་ངོས་གྲུ་29.77བར་ཆེ་རུ་ཕྱིན་པ་དང་། རྫོང(ཆུས)དང་ཤང(གྲོང་རྡལ)དུ་5Ｇབརྡ་རྟགས་ཁྱབ་ཚད་100%ཟིན་པ། གློག་དྲ་གཙོ་བོ་རྫོང(ཆུས)ཚང་མར་ཁྱབ་པ་དང་མང་ཚོགས་ཀྱི་གློག་སྤྱོད་ཁྱབ་ཚད་70.15%ཟིན་པ། གྲོང་གསེབ་ཀྱི་འཐུང་ཆུའི་ལས་གྲྭ་ཁག་13160ལག་ལེན་བསྟར་བ། གྲོང་ཁྱེར་ཡོངས་ཀྱི་རྫོང(ཆུས)ཁག་གི་སྲིད་གཞུང་གནས་ཡུལ་དང་དེ་བཞིན་གཙོ་གནད་ཤང་དང་གྲོང་རྡལ་གྱི་གྲོང་ཁྱེར་འཛུགས་སྐྲུན་གྱི་འགྲོ་ལམ་དང་། ཆུ་འདྲེན་ཆུ་འབུད། དྲོད་རླངས་མཁོ་འདོན། གད་སྙིགས་ས་སྦས་སོགས་ཀྱི་རྨང་གཞིའི་སྒྲིག་བཀོད་ལེགས་སུ་ཆེས་ཆེར་ཕྱིན་ཡོད།

ལོ་75ཡི་རིང་། ནག་ཆུ་གྲོང་ཁྱེར་གྱིས་དམངས་ལ་བདེ་སྐྱིད་བསྐྲུན་རྒྱུ་དེ་སྲིད་དོན་ལས་རྗེས་ཆེ་ཤོས་སུ་བརྩིས་ནས་སེམས་ནུས་ཡོད་རྒུས་མང་ཚོགས་ལ་བྱ་བ་དངོས་སྒྲུབ་པ་དང་དཀའ་གནད་བསལ་ཏེ། རིམ་རྩིས་བྱས་ན“ཐུན་མོང་གཉིས”ཀྱི་འབད་འབུངས་རུ་ཁག་1329བཙུགས་པར་མི་ཁྲི་2ལྷག་ཙམ་ཡོད་པའི་ནང་མི་3939ལས་ཞུགས་ཐུབ་པ་དང་འབབ་འཕར་སྒོར་ཁྲི་2693.3བྱུང་བ་དང་། ས་བབ་མཐོ་བའི་སློབ་གྲྭ་191ལ་དྲོད་རླངས་མཁོ་འདོན་ཡོངས་ཁྱབ་བྱུང་བ། ནག་ཆུ་གྲོང་ཁྱེར་སྨན་རྩིས་ཁང“ཀ་པ་རིམ་པ་གསུམ་པའི”མི་རིགས་སྨན་ཁང་དུ་གྲུབ་འབྲས་ཐོབ་པའི་ངང་འཛུགས་གཏོད་བྱས་པ་དང་གྲོང་ཁྱེར་དང་གྲོང་གསེབ་ཀྱི་གྲོང་མི་སྨན་བཅོས་འགན་བཅོལ་ནང་ཞུགས་ཚད་ལོ་བཞི་བསྟུད་མར་99%ཡན་བརྟན་པོ་བྱུང་བ། གཞི་རྩའི་རྒན་གསོ་འགན་བཅོལ་ནང་ཞུགས་ཚད་98%ཡན་རྒྱུན་འཁྱོངས་ཐུབ་པ་དང་དཀའ་ངལ་ཡོད་པའི་མང་ཚོགས་ཀྱི་རོགས་སྐྱོབ་ཁ་གསབ་དངུལ་སྒོར་དུང་ཕྱུར་2.05དོན་འཁྱོལ་བྱས་པ་བཅས་རེད།

ལོ་75ཡི་རིང་། ནག་ཆུ་གྲོང་ཁྱེར་གྱི་སྐྱེ་ཁམས་ཁོར་ཡུག་རྒྱུན་མཐུད་ལེགས་སུ་ཕྱིན་ཞིང་། རིགས་ཁག་གི་རང་བྱུང་སྲུང་སྐྱོང་ཁུལ་18དང་། རྒྱལ་ཁབ་སྤྱི་གླིང་1 རྒྱལ་སྤྱིའི་འདམ་ར་གལ་ཆེན་1 རྒྱལ་ཁབ་འདམ་རའི་སྤྱི་གླིང་6 རྩྭ་ཐང་རྒྱལ་ཁབ་སྤྱི་གླིང་1བཅས་བསྐྲུན་པར་རང་བྱུང་སྲུང་སྐྱོང་ཁུལ་གྱི་སྤྱིའི་རྒྱ་ཁྱོན་སྤྱི་ལེ་ངོས་གྲུ་ཁྲི་33.12ཟིན་ནས་ལྗོངས་ཡོངས་ཀྱི་རང་བྱུང་སྲུང་སྐྱོང་ཁུལ་རྒྱ་ཁྱོན་གྱི་54.2%བཟུང་བ་དང་། བོད་ལྗོངས་ནག་ཆུའི“གཙང་ཆུའི་ཆུ་འགོའི”སྲུང་སྐྱོང་གླེང་སྟེགས་སྐབས་དང་པོ་གྲུབ་འབྲས་ཐོབ་པའི་ངང་གཉེར་བ། ནག་ཆུ་གྲོང་ཁྱེར་དང་ལྷ་རི་རྫོང་གིས་རྒྱལ་ཡོངས་ཀྱི་སྐྱེ་ཁམས་ཤེས་དཔལ་འཛུགས་སྐྱོང་དཔེ་སྟོན་ཁུལ་ཁག་བདུན་པ་གྲུབ་འབྲས་ཐོབ་པའི་ངང་བཏོད་པ། ཁོར་ཡུག་མཁའ་རླུང་ལེགས་པའི་ཉིན་གྲངས་ཀྱི་བསྡུར་ཚད་99%ཡན་ཟིན་པ། ཆུ་དཔོན་མཚོ་དཔོན་ལམ་ལུགས་དང་ནགས་དཔོན་ལམ་ལུགས་ཕྱོགས་ཡོངས་ནས་དོན་འཁྱོལ་བྱས་ཏེ་སྐྱེ་ཁམས་ལས་གནས་ཁྲི་8.79དང་རིགས་ཁག་གི་སྐྱེ་ཁམས་སྲུང་སྐྱོང་གི་བྱ་དགའི་ཁ་གསབ་དངུལ་སྒོར་དུང་ཕྱུར་17.71དོན་འཁྱོལ་བྱས་པ། གཉན་ཆེན་ཐང་ལྷའི་མཐོ་གྲང་སྤང་ལྗོངས་ཀྱི་སྐྱེ་ཁམས་སླར་གསོ་དང་ཕྱོགས་བསྡུས་བཅོས་སྐྱོང་ལེགས་གྲུབ་ཟིན་ནས་རྩྭ་ཐང་གི་སྐྱེ་ཁམས་སླར་གསོ་མུའུ་ཁྲི་139.02བཅོས་སྐྱོང་བྱས་པ་དང་རིམ་རྩིས་བྱས་ན་ལྗོན་ཤིང་སྣ་ཚོགས་རྐང་ཁྲི་51.09བཏབ་པ། “ཐཱན་ཚད་མཐོ་ཤོས”ཀྱི་བྱ་སྤྱོད་གཏིང་ཟབ་སྤེལ་བ་དང་། རྩྭ་སའི་ཐཱན་བསྡུས་ཉོ་ཚོང་ཚོད་ལྟ་མུའུ་ཁྲི་400བྱས་པ། གསང་དབང་གཡུ་རྩེའི“ཐཱན་མེད”གྲོང་རྡལ་ཆུང་ངུའི་རྣམ་གྲངས་ཚོད་ལྟའི་ལག་བསྟར་བྱས་པ། གྲོང་ཁུལ་དུ་ས་འོག་ཚ་ནུས་ཀྱི་དྲོད་རླངས་དངོས་སུ་མཁོ་འདོན་བྱེད་འགོ་ཚུགས་པ། དྭངས་གཙང་དྲོད་རླངས་མཁོ་འདོན་བྱེད་ཚད་38%ཟིན་པ་བཅས་རེད།