ཤིན་ཧྭ་གསར་འགྱུར་ཁང་པེ་ཅིང་ནས་ཟླ་9ཚེས་24ཉིན་གློག་འཕྲིན་འབྱོར་གསལ། ཚེས་24ཉིན། རྒྱལ་ཡོངས་ཀྱི་བདེ་འཇགས་ཐོན་སྐྱེད་དང་སྟོན་དགུན་གཉིས་ཀྱི་ནགས་ཚལ་དང་རྩྭ་ཐང་གི་མེ་ཟོན་མེ་གསོད་ཀྱི་བརྙན་ལམ་ཚོགས་འདུ་པེ་ཅིང་དུ་འཚོགས་ཤིང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཀྲང་གོ་ཆིང་ཚོགས་འདུར་ཕེབས་ནས་གསུང་བཤད་གནང་བ་དང་། ཀྲུང་གུང་ཀྲུང་དབྱང་ཧྲུའུ་ཅི་ཁྲུའི་ཧྲུའུ་ཅི་རྒྱལ་དོན་ཨུ་ཡོན་ཝང་ཞའོ་ཧུང་གིས་ཚོགས་འདུ་གཙོ་སྐྱོང་གནང་བ་རེད། ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་དང་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་ལག་བསྟར་གཏིང་ཟབ་བྱེད་པ་དང་ཙུང་ལི་ལི་ཆང་གི་བླང་བྱ་དོན་འཁྱོལ་བྱས་ཏེ། གནད་དོན་གྱི་སྟོན་ཕྱོགས་ཆེན་པོ་དང་གོ་ཆོད་པའི་བྱ་ཐབས་ཀྱི་ཐོག་ནས་བདེ་འཇགས་ཐོན་སྐྱེད་དང་ནགས་ཚལ་དང་རྩྭ་ཐང་གི་མེ་ཟོན་མེ་གསོད་ལས་དོན་ལ་དམ་འཛིན་ཏན་ཏིག་བྱས་ཏེ་ལས་འཛོལ་ཚབས་ཆེན་དང་ཧ་ཅང་ཚབས་ཆེན་མ་བྱུང་སྔོན་འགོག་མཐའ་གཅིག་ཏུ་བྱེད་དགོས་པའི་ནན་བཤད་བྱས་པ་རེད།

ཚོགས་འདུའི་ཐོག་ནན་བཤད་བྱས་དོན། གཟབ་ནན་བཙན་འཐབ་ཀྱིས་བདེ་འཇགས་ཐོན་སྐྱེད་ཀྱི་རྩ་བཅོས་འགག་སྒྲོལ་གྱི་ལོ་གསུམ་བྱ་སྤྱོད་ལ་སྐུལ་འདེད་གཏོང་བ་དང་། སོལ་རླངས་དང་གློག་སྒུལ་སྦག་སྦག་སོགས“བྱ་བ་གཅིག”གི་འཁོར་འབྲེལ་ཧྲིལ་པོའི་བདེ་འཇགས་བཅོས་སྒྲིག་རྒྱུན་མཐུད་གཏིང་ཟབ་ཏུ་གཏོང་བ། གཏེར་རིའི་བདེ་འཇགས་ཀྱི་བྱེད་ཐབས་ནན་པོ་བརྒྱད་དོན་འཁྱོལ་ནན་པོ་བྱེད་པར་སྐུལ་འདེད་ཤུགས་ཆེན་གཏོང་བ། ཉེན་ཡོད་རྫས་འགྱུར་དངོས་རྫས་དང་། ཨར་ལས། དྲོད་སྲུང་རྒྱུ་ཆ་བཅས་ཀྱི་བདེ་འཇགས་ལྟ་འདོམས་ལ་སྔར་བས་ཤུགས་སྣོན་རྒྱག་པ། འཕྲལ་སྡོམ་སྲོག་ཐར་གྱི“ཚེ་སྲོག་བགྲོད་ལམ”ནུས་ཤུགས་ཡོད་རྒུས་ཤར་གཏོང་བྱེད་པ། གཞི་རིམ་གྱི་མེ་ཟོན་བདེ་འཇགས་ཀྱི་ལྟ་འདོམས་ནུས་པ་ཆེ་རུ་ཧུར་ཐག་གཏོང་བ། བདེ་འཇགས་ཀྱི་མངོན་མེད་རྐྱེན་ངན་ཚབས་ཆེན་ཞིབ་བཤེར་དང་བཅོས་སྒྲིག་ནན་པོ་བཅས་བྱེད་དགོས། བདེ་འཇགས་ཐོན་སྐྱེད་ཀྱི་དཔྱད་ཞིབ་དང་སྐོར་ཞིབ་ནན་པོ་བྱས་ཏེ་ཚད་གཞི་དང་རིམ་སྤོར་ལ་བརྟེན་ནས་ཐོན་རྫས་དང་། ལས་གྲྭའི་སྤུས་ཚད། བདེ་འཇགས་ཚད་གཞི་དངོས་བཅས་མཐོ་རུ་བཏང་སྟེ་བདེ་འཇགས་ཐོན་སྐྱེད་ཀྱི་གཞི་རིམ་རྨང་གཞི་བརྟན་དུ་ཏན་ཏིག་གཏོང་དགོས།

ཚོགས་འདུའི་ཐོག་ནན་བཤད་བྱས་དོན། སྔོན་འགོག་ལ་གཞི་འཛུགས་པ་དང་མེ་ཁུངས་བཀག་སྡོམ་དང་མི་དམངས་ཀྱི་འགོག་སྲུང་འཛིང་རགས་ལ་དམ་པོར་དམིགས་ཏེ་ནགས་ཚལ་དང་རྩྭ་ཐང་གི་མེ་ཟོན་འགན་འཁྲི་དང་བྱེད་ཐབས་གཞི་རིམ་དུ་དོན་འཁྱོལ་བྱས་ནས་མེ་སྐྱོན་གྱི་ཉེན་ཁ་ཆུང་དུ་གང་ཐུབ་གཏོང་དགོས། སྔ་ཙམ་ཤེས་རྟོགས་དང་། ཐག་གཅོད་མྱུར་པོ། བསྐྱར་འབར་སྔོན་འགོག་བཅས་ལ་དམིགས་ནས་མེ་སྐྱོན་གྱི་བརྒྱུད་རིམ་ཧྲིལ་པོར་ཐག་གཅོད་བྱེད་པ་དང་ས་ཡུལ་དངོས་ཀྱི་བདེ་འཇགས་དམ་བསྒྲགས་ལ་ཤུགས་སྣོན་བརྒྱབ་སྟེ་མི་དམངས་མང་ཚོགས་དང་མེ་གསོད་བའི་ཚེ་སྲོག་བདེ་འཇགས་འགན་ལེན་བྱེད་དགོས། སྒྲིག་འཛུགས་དང་བཀོད་འདོམས་མ་ལག་སྟོབས་ཆེར་གཏོང་བ་དང་ཞན་ཆ་མགྱོགས་མྱུར་བསལ་ནས་ནགས་ཚལ་དང་རྩྭ་ཐང་གི་མེ་སྐྱོན་ཕྱོགས་བསྡུས་སྔོན་འགོག་དང་ཚོད་འཛིན་གྱི་་ནུས་པ་རྒྱུན་ཆད་མེད་པར་ཆེ་རུ་གཏོང་དགོས།