ཚེས་25ཉིན། 2024ལོའི་གོ་ལ་ཧྲིལ་པོའི་གྲངས་འཛིན་ཚོང་དོན་དངོས་མང་སྟོན་ཚོགས་སྐབས་གསུམ་པ(གཤམ་དུ“གྲངས་འཛིན་དངོས་མང་སྟོན་ཚོགས”ཞེས་བསྡུ་རྒྱུ)ཧང་ཀྲོའུ་འགྲེམས་ཚོགས་ལྟེ་གནས་ཆེན་པོར་འགོ་ཚུགས་པ་རེད།

རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་རྡོ་རྗེ་ཚེ་སྒྲུབ་ཀྱིས་བོད་ཀྱི་འཐུས་མི་ཚོགས་པའི་སྣེ་ཁྲིད་དེ་འགོ་ཚུགས་མཛད་སྒོར་ཞུགས་ནས་རང་ལྗོངས་ཀྱི་ཁེ་ལས་འགྲེམས་ཚོགས་ལ་ཞུགས་པའི་གནས་ཚུལ་མཁྱེན་རྟོགས་ཞིབ་ཕྲ་གནང་བ་རེད།

སྐབས་འདིའི་གྲངས་འཛིན་དངོས་མང་སྟོན་ཚོགས་ཀྱིས“གྲངས་འཛིན་ཚོང་དོན་གོ་ལ་ཧྲིལ་པོར་ཁྱབ”ཅེས་པ་བརྗོད་དོན་གཙོ་བོར་བྱས་ནས་ཚེས་29ཉིན་བར་འཚོག་རྒྱུ་རེད། ཕྱོགས་བསྡུས་འགྲེམས་ཁུལ་1དང་། དར་གོས་ལམ་བུའི་དྲ་ཐོག་ཚོང་དོན་དང་། མི་ཐབས་རིག་ནུས། རིག་ལྡན་གྲོང་ཁྱེར་སོགས་ཁྱད་ལྡན་གྲངས་འཛིན་ཐོན་ལས་འགྲེམས་ཁུལ་8བཙུགས་ཡོད། རང་ལྗོངས་ཀྱིས་གྲངས་འཛིན་ཁེ་ལས་འགྲེམས་སྟོན་ལ་ཞུགས་རྒྱུ་སྒྲིག་འཛུགས་ཐེངས་དང་པོ་བྱས་ནས་གྲངས་འཛིན་ཚོང་དོན་འགྲེམས་ཚོགས་ལ་ཞུགས་མཁན་ཁེ་ལས“གཅིག་ཀྱང་མེད་པའི”ལོ་རྒྱུས་མཇུག་འགྲིལ་བ་རེད།

འགོ་ཚུགས་པའི་ཉིན་དེར། རང་ལྗོངས་ཀྱི་ཁེ་ལས་གཉིས་ཀྱིས་བློ་ཁོག་ཆེན་པོས་གྲངས་འཛིན་དཔལ་འབྱོར་འཕེལ་རྒྱས་ཀྱི་ལམ་བུ་འཚོལ་མཁན་བྱས་ཏེ། ཡིག་སྒྱུར་དང་སྐད་སྒྲ་མཉམ་སྒྲིག་སོགས་བྱེད་ནུས་མང་པོ་གཞི་གཅིག་ཏུ་འདུས་པའི་མཆོག་ནོར་རིག་ནུས་སྨྱུ་གུ་དང་། རིག་ནུས་སྐད་སྒྲའི་བྱི་བརྡ། རིག་ནུས་གཏམ་རྒྱུད་འཕྲུལ་ཆས་སོགས་བོད་ཀྱི་གྲངས་འཛིན་དཔལ་འབྱོར་གྱི་གྲུབ་འབྲས་གཅིག་སྡུད་འགྲེམས་སྟོན་བྱས་པ་རེད།