གཉིས་ཕན་མཉམ་ལས་ལ་ཤུགས་སྣོན་བརྒྱབ་ནས་གོ་ལ་ཧྲིལ་པོའི་ནུས་རྒྱུ་ཕྱོགས་སྒྱུར་ལ་སྐུལ་འདེད་བཏང་བ།
ཅི་སའེ་དབྱི·ཙོར་ཐན།
ཉེ་བའི་ལོ་ཤས་རིང་། ཀྲུང་གོའི་ནུས་རྒྱུ་གསར་པའི་ཐོན་ལས་འཕེལ་རྒྱས་མྱུར་པོ་ཕྱིན་ནས་གོ་ལ་ཧྲིལ་པོའི་ནུས་རྒྱུ་ཕྱོགས་སྒྱུར་ལ་སྒུལ་ཤུགས་གལ་ཆེན་མཁོ་འདོན་བྱས་ཡོད། ཀྲུང་གོའི་གློག་སྒུལ་རླངས་འཁོར་ལ་ཇུས་འགོད་འདུ་ཤེས་དང་སྤྱོད་མཁན་གྱི་ཉམས་ལེན་སོགས་ཀྱི་ཐད་འགྲན་རྩོད་ཀྱི་ལེགས་ཆ་ལྡན་ཡོད་པས་འཛད་སྤྱོད་པའི་ཁས་ལེན་ཐོབ་ཡོད། ཀྲུང་གོའི་ནུས་རྒྱུ་གསར་པའི་ཐོན་ལས་འཕེལ་རྒྱས་མྱུར་པོ་ཕྱིན་པ་དེ་ནི“ཀྲུང་གོའི་རིག་ནུས་བཟོ་སྐྲུན”གྱི་རྒྱབ་སྐྱོར་ཤུགས་ཆེན་ལས་ཕན་པ་ཐོབ་པ་ཞིག་ཡིན་པ་དང་། དེ་ནི་ཀྲུང་གོའི་ཐོན་སྐྱེད་ནུས་ཤུགས་གསར་མ་འཕེལ་རྒྱས་ཀྱི་ཞིབ་ཕྲའི་མཚོན་ཚུལ་ཞིག་རེད།
ཀྲུང་གོས་ཚན་རྩལ་གསར་གཏོད་ཀྱི་ཆུ་ཚད་མཐོ་རུ་ཤུགས་ཆེན་བཏང་བར་གྲུབ་འབྲས་མངོན་གསལ་དོད་པོ་ཐོབ་ཡོད། འཛམ་གླིང་དཔལ་འབྱོར་གྱི་ཁྱབ་ཁོངས་སུ་ཀྲུང་གོ་གོ་ལ་ཧྲིལ་པོའི་ཚན་རྩལ་གསར་གཏོད་ཀྱི་འབྱུང་གནས་གལ་ཆེན་དང་འཛམ་གླིང་གི་དཔལ་འབྱོར་འཕར་བའི་སྒུལ་ཤུགས་ཀྱི་འབྱུང་ཁུངས་གལ་ཆེན་ལ་གྱུར་ཡོད་པས། སྲོལ་རྒྱུན་གྱི་ཚོང་ཟོག་ཙག་ཙིག་དང་། ཁྱིམ་སྤྱོད་གློག་ཆས། ཉིན་མཁོའི་དངོས་རྫས་སོགས་ཕྱིར་གཏོང་བྱེད་པ་ཙམ་ག་ལ་ཡིན། རྒྱལ་ཁབ་ཁག་གི་འཛད་སྤྱོད་པས་ཀྲུང་གོའི་ཁེ་ལས་ཀྱིས་ཐོན་སྐྱེད་བྱས་པའི་ཚན་རྩལ་མཐོ་བའི་ཐོན་རྫས་མང་པོ་ཞིག་གི་སྤུས་ཚད་རྩེ་གྲ་ཡིན་པའི་ཁར། རིན་གོང་གི་ལེགས་ཆ་དང་ཞབས་ཞུའི་ལེགས་ཆ་ལྡན་ཡོད། དེའི་ནང་ནས་གློག་སྒུལ་རླངས་འཁོར་ནི་དཔེ་མཚོན་མངོན་གསལ་དོད་པོ་ཞིག་ཡིན་པ་ཤེས་རྟོགས་བྱུང་ཡོད།
ཀྲུང་གོའི་གློག་སྒུལ་རླངས་འཁོར་ཡོ་རོབ་ཀྱི་ཁྲོམ་རར་ཞུགས་པ་དེས་འགྲན་རྩོད་བཟང་པོར་སྐུལ་འདེད་གཏོང་བར་ཕན་ཐོགས་ཡོད། དེས་ཡོ་རོབ་ཀྱི་འཛད་སྤྱོད་པར་ཕན་ཐོགས་ཡོད་པ་མ་ཟད། གློག་སྒུལ་རླངས་འཁོར་ཡོ་རོབ་ཏུ་གང་མགྱོགས་ཁྱབ་གདལ་གཏོང་བར་ཡང་ཕན་ཐོགས་ཡོད། ཀྲུང་གོའི་ལས་རིགས་གཅིག་པའི་འགྲན་རྩོད་དང་མཉམ་ལས་ཀྱིས་ཡོ་རོབ་ཀྱི་རླངས་འཁོར་བཟོ་སྐྲུན་ཚོང་པས་ཐོན་ཁུངས་དེ་བས་མང་བ་ཞིབ་འཇུག་དང་གསར་སྤེལ་བྱེད་པར་སྐུལ་མ་གཏོང་གི་ཡོད་པས་ཁེ་ལས་དེ་དག་གི་འགྲན་རྩོད་ནུས་པ་ཆེ་རུ་འགྲོ་བར་ཕན་ཐོགས་ཡོད།
ཀྲུང་གོའི་ནུས་རྒྱུ་གསར་པའི་ཐོན་ལས་ཀྱི“ཐོན་ནུས་ཆེ་དྲགས་པ”ཟེར་བ་ནི་བརྗོད་གཞི་རྫུན་མ་ཞིག་རེད། དོན་དངོས་ཐོག་གོ་ལ་ཧྲིལ་པོའི་ནུས་རྒྱུ་གསར་པའི་ཁྲོམ་ར་རྒྱུན་ཆད་མེད་པར་ཆེ་རུ་ཕྱིན་པ་དང་བསྟུན་ནས་ནུས་རྒྱུ་གསར་པའི་ཐོན་རྫས་མཁོ་སྤྲོད་ཆེས་ཆེར་འདང་གི་མེད། འཕེལ་རྒྱས་འགྲོ་བཞིན་པའི་རྒྱལ་ཁབ་མང་པོ་ཞིག་ནི་ཀྲུང་གོའི་ནུས་རྒྱུ་གསར་པའི་ཐོན་རྫས་ཀྱི་མངོན་མེད་ཁྲོམ་ར་ཡིན་པ་དང་རྒྱལ་ཁབ་དེ་དག་ལ་ཀྲུང་གོའི་སྤུས་ལེགས་ནུས་རྒྱུ་གསར་པའི་ཐོན་རྫས་ཀྱི་དགོས་མཁོ་ཆེན་པོ་ཡོད།
ཧང་ག་རི་ནི་ཤར་ཕྱོགས་དང་ནུབ་ཕྱོགས་རྒྱལ་ཁབ་ཀྱི་ཕན་ཚུན་སྦྲེལ་མཐུད་ལ་སྐུལ་འདེད་གཏོང་མཁན་ནུས་ལྡན་ཞིག་ཡིན་ལ“རྒྱུད་གཅིག་ལམ་གཅིག”མཉམ་སྐྲུན་ནང་ཧུར་ཐག་ཞུགས་མཁན་ཞིག་ཀྱང་རེད། ཧང་ག་རི་དང་ཀྲུང་གོ་ནུས་རྒྱུ་གསར་པ་སོགས་ཁྱབ་ཁོངས་ཀྱི་གཉིས་ཕན་མཉམ་ལས་བྱས་པར་ཧང་ག་རིར་ལས་ཞུགས་ཀྱི་ལས་གནས་འབོར་ཆེན་མཁོ་འདོན་བྱས་པ་དང་ཧང་ག་རིའི་དཔལ་འབྱོར་འཕར་བར་སྐུལ་མ་ཐེབས་ཡོད་ལ། ཧང་ག་རི་དང་ཀྲུང་གོ་རྒྱལ་ཁབ་གཉིས་དབར་གྱི་མི་ཆོས་རིག་གནས་སྤེལ་རེས་ལ་ཤུགས་སྣོན་རྒྱག་པ་དང་དམངས་སེམས་གཅིག་མཐུན་ལ་སྐུལ་འདེད་གཏོང་བར་ཡང་ཕན་ཐོགས་ཡོད།
ཀྲུང་གོ་ནི་འཛམ་གླིང་དཔལ་འབྱོར་འཕར་བའི་སྒུལ་ཤུགས་གལ་ཆེན་ཞིག་ཡིན། “ཀྲུང་གོའི་རིག་ནུས་བཟོ་སྐྲུན”གྱིས་མི་མངོན་པའི་ནུས་པ་དེ་བས་ཆེ་བ་བཏོན་ཏེ་འཛམ་གླིང་ལ་སྤུས་ལེགས་ཐོན་རྫས་རྒྱུན་མཐུད་བཏོན་ནས་རྒྱལ་ཁབ་ཁག་གི་ལྗང་མདོག་འཕེལ་རྒྱས་ལ་འདེགས་སྐྱོར་ཐུབ་རེ་ཡོད། ཀྲུང་གོས་རིན་གོང་འཚམ་པོའི་ཐོག་ནས་འཛམ་གླིང་ལ་སྤུས་ཚད་མཐོ་བའི་ནུས་རྒྱུ་གསར་པའི་ཐོན་རྫས་མཁོ་འདོན་བྱས་པ་དེ་ནི་འཛམ་གླིང་ལ་ཕན་པའི་གཏམ་བཟང་ཞིག་རེད། ཕྱོགས་ཁག་གིས་ཀྲུང་གོའི་ནུས་རྒྱུ་གསར་པའི་ཐོན་ལས་འཕེལ་རྒྱས་ལ་དགའ་བསུ་ཞུ་བ་དང་། ཀྲུང་གོ་དང་གཉིས་ཕན་མཉམ་ལས་ལ་ཤུགས་སྣོན་རྒྱག་པ། འགྲན་རྩོད་བཟང་པོ་བྱེད་པ། གོ་ལ་ཧྲིལ་པོའི་ནུས་རྒྱུའི་ཕྱོགས་སྒྱུར་ལ་ཐུན་མོང་ཐོག་སྐུལ་འདེད་གཏོང་བ། གནམ་གཤིས་འགྱུར་ལྡོག་ལ་ཁ་གཏད་གཅོག་པ་བཅས་བྱེད་དགོས།
(རྩོམ་པ་པོ་ནི་ཧང་ག་རིའི་ས་ཙུའོ་ཏེ་ཝེ་ཀེ་ཞིབ་འཇུག་ཁང་གི་ཆབ་སྲིད་དབྱེ་ཞིབ་ལྟེ་གནས་ཀྱི་ཀྲུའུ་རེན་ཡིན)