ཧྲན་ཏུང་ཏེ་ཀྲོའུ་གྲོང་ཁྱེར་ཆི་ཧོ་རྫོང་ཧྭ་ཏན་གྲོང་རྡལ་ལའོ་ཀྲང་གྲོང་ཚོའི་ཡུལ་མི་ལི་ཀྲེན་ཧྲོང་གིས་རང་ཁྱིམ་གྱི་ཞིང་ནང་ནས་དགའ་ཚོར་ཆེན་པོས“སྐྱེ་འཚར་ལ་གཟིགས་དང་། ཡང་ལོ་ལེགས་རེད་འདུག”ཅེས་བརྗོད།

རྒྱུན་དུ་སྐྱེལ་འདྲེན་ལས་ཀ་བྱེད་མཁན་ལི་ཀྲེན་ཧྲོང་གྲོང་ཚོར་ལོག་ཉུང་ཉུང་ཡིན། ཁོང་གིས་རང་ཁྱིམ་གྱི་ས་ཞིང་མུའུ་20ལྷག་ཙམ་ལ་དོ་སྣང་དེ་ཙམ་བྱེད་ཁོམ་མེད།

ཞིང་ནང་གཡོག་བྱེད་པས་ས་ཞིང་ལ་ལྟ་རྟོག་བྱེད་ཀྱི་ཡོད་པས། ཞིང་ཁའི་ཐོན་འབབ་འགན་ལེན་ཡོད་ལ། ལོ་མཇུག་ལ་ད་དུང་བགོ་འགྲེམས་ཀྱང་ཡོད་ཅེས་ལི་ཀྲེན་ཧྲོང་གིས་ཐབས་མཆོག་བརྗོད།

“ཞིང་ནང་གཡོག་བྱེད་པ”ཟེར་བ་འདི་ཡང་སྙིང་སུ་ཡིན་ནམ།

“རྨོ་འདེབས་དང་འགོག་སྲུང་བརྔ་བསྡུ་བཅས་ཀྱི་བརྒྱུད་རིམ་ཧྲིལ་པོ་གཅིག་འཐུས་རྣམ་པའི་ཚབ་གཉེར་བྱས་ནས་ཞིང་དུད་ཀྱིས་སེམས་ཁྲལ་སྤུ་ཙམ་ཡང་བྱེད་དགོས་ཀྱི་མེད” མཐོ་ཚད་མི་དང་སྙོམས་པའི་མ་རྨོས་ལོ་ཏོག་གི་ཞིང་ནང་ནས་གློ་བུར་དུ་མི་ཞིག་དོན་ཡོང་བ་ཁོང་གི་མིང་ལ་ཕེང་ཀྲི་ཧྥེ་ཟེར་ཞིང་། ཁོང་ནི་ཧྲན་ཏུང་ལུའུ་ཐན་ཧྲང་ཕིང་ཞིང་ལས་ཞབས་ཞུ་ཚད་ཡོད་ཀུང་སིའི་ཞིང་ལས་ལག་རྩལ་མི་སྣ་ཞིག་རེད། ཁོང་ནི་ལི་ཀྲེན་ཧྲོང་གིས་བརྗོད་པའི“ཞིང་ནང་གཡོག་བྱེད་པ”ཟེར་བ་དེ་རེད།

ཞིང་ལས་སྤྱི་ཚོགས་ཅན་གྱི་ཞབས་ཞུའི་མ་ལག་མགྱོགས་མྱུར་འཐུས་སྒོ་ཚང་དུ་བཏང་ཚེ། གཞི་ནས་ཞིང་དུད་ཆུང་ངུར་ཞབས་འདེགས་དང་སྐུལ་ཁྲིད་ཡག་པོ་བྱེད་ཐུབ།

2023ལོར་ལའོ་ཀྲང་གྲོང་ཚོའི“ཨུ་ལྷན་གཉིས”ཀྱིས་ཆེད་ལས་ཀྱི་ཞིང་ལས་ཞབས་ཞུའི་ཁེ་ལས་ནང་འདྲེན་བྱས་ཏེ་ཞིང་དུད་འབྲིང་ཆུང་དང་ཐར་ཐོར་ཞིང་དུད་ལ་བརྒྱུད་རིམ་ཧྲིལ་པོའི་ས་ཞིང་ཚབ་གཉེར་ཞབས་ཞུ་བསྒྲུབ་རྒྱུའི་ཐག་བཅད་པ་རེད།

ས་ཞིང་ཚབ་གཉེར་གྱི་སྤུས་ཚད་འགན་ལེན་བྱ་ཆེད། ལའོ་ཀྲང་གྲོང་ཚོས་ཆེད་མངགས་ལྟ་སྐུལ་ཚོགས་ཆུང་བཙུགས་ཁར། ཞིང་དུད་ཀྱི་འཐུས་མི་བདམས་ཏེ་སོན་འདེམས་དང་རྨོ་ཞིང་སོགས་ཀྱི་བརྒྱུད་རིམ་ནང་ཞུགས་སུ་བཅུག ད་དུང་ཕེང་ཀྲི་ཧྥེ་ཡིས་མ་གནས་ཀྱི་གསལ་ཐོ་བཟོས་ནས་དུས་ཐོག་ཏུ་ཡོངས་བསྒྲགས་བྱེད་ཀྱི་ཡོད།

“དུད་ཚང་གཅིག་ལ་ས་ཞིང་མང་བ”དེ“གྲོང་ཚོ་རེར་ས་ཞིང་གཅིག་སྡུད”བྱས་ནས་རགས་ལས་གཉེར་སྐྱོང་ནས་ཞིབ་ཚགས་དོ་དམ་བྱེད་པའི་བར་འགྱུར་ལྡོག་བཏང་བ་དེས་ས་ཞིང་བེད་སྤྱོད་ཡག་པོ་གཏོང་ཐུབ་པ་མ་ཟད། ད་དུང་ཞིང་པ་ཕྱུག་འགྱུར་ལམ་དུ་དྲངས་ཡོད། ད་ལོའི་དབྱར་བསྡུའི་རིང་། ལའོ་ཀྲང་གྲོང་ཚོས་གཅིག་སྡུད་ཚབ་གཉེར་བྱེད་དུ་བཅུག་པའི་ས་ཞིང་མུའུ་300ལ་ལོ་ལེགས་བྱུང་སྟེ། མུའུ་རེ་ནས་ཡོང་འབབ་སྒོར་1534བྱུང་བ་དང་ཞིང་དུད་ལ་བགོ་འགྲེམས་ཁྱོན་བསྡོམས་སྒོར་ཁྲི་4ལྷག་ཙམ་བརྒྱབ་ཡོད།

ཆི་ཧོ་རྫོང་དུ་ས་ཞིང་ཚབ་གཉེར་བྱེད་སྟངས་འདི་རིམ་བཞིན་དར་ཁྱབ་བྱུང་ཞིང་། ཆི་ཧོ་རྫོང་གི་འབྲུ་རིགས་ཀྱི་ལོའི་ཐོན་འབོར་སྤྱིར་ན་རྒྱ་མ་དུང་ཕྱུར་22ཡན་ཟིན་པ་དང་ལོ་7བསྟུད་མར་རྒྱལ་ཡོངས་ཀྱི་འབྲུ་རིགས་ཐོན་སྐྱེད་སྔོན་ཐོན་རྫོང་ལ་བདམས་ཡོད། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི《གཏན་འབེབས》ནང“སྟབས་བདེ་དང་ནུས་ཆེའི་ཞིང་ལས་སྤྱི་ཚོགས་ཅན་གྱི་ཞབས་ཞུའི་མ་ལག་འཐུས་སྒོ་ཚང་དུ་གཏོང་དགོས”ཞེས་བཏོན་ཡོད། ཆི་ཧོ་རྫོང་གིས་ཞིབ་ལས་ཅན་དང་ཆེད་ལས་ཅན་གྱི་འདེབས་འཛུཌ་བྱེད་སྟངས་ཁྱབ་གདལ་ཤུགས་ཆེན་བཏང་སྟེ་ཞིང་ལས་ཀྱིས་ཁེ་ལས་ལ་ཞབས་འདེགས་ཞུ་ལུགས་སྐྱེད་སྲིང་བྱས་ཤིང་། མིག་སྔར་རྫོང་ཡོངས་ལ་ཞིང་ལས་སྤྱི་ཚོགས་ཅན་གྱི་ཞབས་ཞུའི་སྒྲིག་གཞི་ཁྱོན་586ཡོད་པ་དང་། ཞིབ་ལས་ཅན་དང་ཆེད་ལས་ཅན་གྱི་འབྲུ་རིགས་འདེབས་འཛུགས་རྒྱ་ཁྱོན་མུའུ་ཁྲི་220ལྷག་ཙམ་ཟིན་པ། ཞིང་ལས་ཐོན་སྐྱེད་ཀྱི་ཕྱོཌ་བསྡུས་ཚབ་གཉེར་བྱེད་ཚད་91%ལྷག་ཙམ་ཟིན་ཡོད།

“དམའ་མཐའི་ཡོང་འབབ་སྟེང་བགོ་འགྲེམས་བསྡོམས་ན་སྒོར་ཁྲི་2ལྷག་ཙམ་ཡོད། དེའི་ཐོག་སྐྱེལ་འདྲེན་ཡོང་འབབ་བསྡོམས་ན། ལོ་ཧྲིལ་པོར་ཉུང་མཐར་ཡང་སྒོར་ཁྲི་13ཟིན་གྱི་ཡོད”ཚོད་རྩིས་བརྒྱབ་རྗེས་ལི་ཀྲེན་ཧྲོང་འཚོ་བར་ཡིད་ཆེས་ཀྱིས་ཁེངས་ཤིང་། ཁོང་གིས“ས་ཞིང་ལ་གཡོག་བྱེད་བྱེད་མི་དགོས་ཀྱང་། ང་ཚོས་ལས་མེད་དུ་སྡོད་མི་རུང་། ད་དུང་མུ་མཐུད་འབད་བརྩོན་བྱས་ཏེ་འཚོ་བ་དེ་ལས་སྐྱིད་པ་ཞིག་སྐྱེལ་ཐུབ་པ་བྱེད་དགོས”ཞེས་བརྗོད་པ་རེད།