འདི་ལོ་ནི་ཨེ་ཀྲུང་དབར་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་བཙུགས་ནས་ལོ་10འཁོར་བའི་ལོ་ཞིག་ཡིན་ལ“ཨེ་ཀྲུང་རོགས་ཟླའི་ལོ”ཡང་ཡིན་པས་རྒྱལ་ཁབ་གཉིས་པོས་ཆབ་སྲིད་དང་། ཚོང་དོན། མ་འཇོག རིག་གནས། ཡུལ་སྐོར་སོགས་སྐོར་གྱི་སྤེལ་རེས་མཉམ་ལས་ཀྱི་བྱེད་སྒོ་རབ་དང་རིམ་པ་སྤེལ་རྒྱུ་ཡིན་པ་རེད། འདི་ལོའི་ཟླ་5པར་ཨེ་ཅིབ་ཀྱི་ཙུང་ཐུང་སའེ་ཤིས་ཀྱིས་ཀྲུང་གོར་རྒྱལ་དོན་འཚམས་འདྲི་གནང་ཞིང་། རྒྱལ་ཁབ་གཉིས་པོའི་གཙོ་བདག་གིས་ཕྱོགས་གཉིས་པོའི་འབྲེལ་བར་དམིགས་པ་དང་། ཁྱབ་ཁོངས་ཁག་གི་མཉམ་ལས་ཟབ་ཏུ་གཏོང་བ། ཕྱོགས་མང་སྒྲོམ་གཞིའི་འོག་གི་མཐུན་སྦྱོར་ལ་ཤུགས་སྣོན་རྒྱག་པའི་ཐད་གྲོས་མོལ་བྱས་པ་དང་འབྲེལ་ཐུན་མོང་ཐོག་དོ་ཁུར་བྱེད་པའི་རྒྱལ་སྤྱི་དང་ས་ཁུལ་གྱི་གནད་དོན་ཐད་དགོངས་འཆར་བརྗེ་རེས་ཀྱང་གནང་བ་རེད། རྒྱལ་ཁབ་གཉིས་པོའི་གཙོ་བདག་གིས་འདི་ལོའི་ཟླ་དང་པོར་ཕྱོགས་གཉིས་པོས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དང་ཨ་རབ་ཨེ་ཅིབ་སྤྱི་མཐུན་རྒྱལ་ཁབ་དབར་གྱི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བའི་ལག་བསྟར་རྩ་གནད(2024ནས་2028ལོ་བར)》ཐོག་མིང་རྟགས་བཀོད་པར་བསྔགས་བརྗོད་གནང་བ་རེད། རྩ་གནད་དེས་ཉེ་བའི་ལོ་ཤས་རིང་རྒྱལ་ཁབ་གཉིས་པོའི་འབྲེལ་བ་འཕེལ་རྒྱས་ཐད་ཐོབ་པའི་དངོས་གཉེར་གྱི་གྲུབ་འབྲས་རྨང་གཞིར་བྱས་པ་དང་དེ་ནི་ཕྱོགས་གཉིས་པོའི་འབྲེལ་བ་འཕེལ་རྒྱས་གཏོང་བ་དང་འབྲེལ་ཆུ་ཚད་དེ་བས་མཐོ་བའི་ཐོག་མཐོར་འདེགས་བྱེད་པའི་ལམ་རིས་ཤིག་རེད། ཨེ་ཀྲུང་ཕྱོགས་གཉིས་པོས་ད་དུང་འབྱུང་འགྱུར་ལོ་ཤས་ནང་ཐོན་ལས་རང་ཡུལ་ཅན་དུ་འགྱུར་རྒྱུ་དང་ལག་རྩལ་གཞན་སྒྱུར་ལ་སྐུལ་འདེད་གཏོང་རྒྱུ་དེ་རྒྱལ་ཁབ་གཉིས་པོས་མཉམ་ལས་བྱེད་པའི་སྔོན་སྤེལ་ཁ་ཕྱོགས་སུ་བརྩི་རྒྱུའི་མོས་མཐུན་བྱས་པ་རེད།

ཉེ་བའི་ལོ་ཤས་རིང་། ཨེ་ཀྲུང་རྒྱལ་ཁབ་གཉིས་པོས“རྒྱུད་གཅིག་ལམ་གཅིག”གི་གྲོས་འགོ་དང་ཨེ་ཅིབ་ཀྱི“2030ལོའི་རྒྱུན་མཐུད་ཆོག་པའི་འཕེལ་རྒྱས་ཀྱི་ཕུགས་འདུན”སྦྲེལ་མཐུད་གཏིང་ཟབ་བྱ་རྒྱུར་ཐུན་མོང་ཐོག་སྐུལ་འདེད་བཏང་བ་དང་རྒྱལ་ཁབ་གཉིས་པོའི་མཉམ་ལས་རྒྱུན་མཐུད་གཏིང་ཟབ་ཏུ་འགྲོ་རྒྱུར་སྐུལ་འདེད་བཏང་ཡོད། རྒྱལ་ཁབ་གཉིས་པོས་གྲུབ་འབྲས་གཟེངས་སུ་ཐོན་པའི་མཉམ་ལས་རབ་དང་རིམ་པ་བྱས་པ་དཔེར་ན། སྨྱུང་སྲུང་ཟླ་བའི་ཉིན་བཅུའི་གྲོང་ཁྱེར་གྱི་གློག་ཤུགས་ཅན་གྱི་ལྕགས་ལམ་བསྐྲུན་པ་དང་། ཀྲུང་ཨེའི་ཐའེ་ཏ་སུའུ་དབྱི་ཧྲི་དཔལ་འབྱོར་ཚོང་དོན་མཉམ་ལས་ཁུལ་དུ་མ་འཇོག་བྱས་པ། ཨེ་ཅིབ་ཀྱི་སྲུང་སྐར་ཨང་2པ་འཕེན་གཏོང་བྱས་པ་སོགས་རེད། ཨེ་ཤེ་ཡའི་རྨང་གཞིའི་སྒྲིག་བཀོད་མ་འཇོག་དངུལ་ཁང་ནང་ཨེ་ཅིབ་ཞུགས་པ་དང་འབྲེལ་དངུལ་ཁང་དེའི་2023ལོའི་ལོ་ཚོགས་གྲུབ་འབྲས་ཐོབ་པའི་ངང་འཚོགས་པ་རེད།

རྒྱལ་སྤྱིའི་གནད་དོན་གལ་ཆེན་མང་པོའི་ཐད་ཨེ་ཀྲུང་དབར་ཕན་ཚུན་བསམ་ཤེས་དང་ཕན་ཚུན་རྒྱབ་སྐྱོར་བྱེད་ཀྱི་ཡོད། ཀྲུང་གོ་ཕྱོགས་ཀྱིས་བཏོན་པའི་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོར་ཨེ་ཅིབ་ཕྱོགས་ཀྱིས་བསྔགས་བརྗོད་བྱེད་ཀྱི་ཡོད། དེ་ནི་མཉམ་འབྲེལ་རྒྱལ་ཚོགས་ཀྱི་2030ལོའི་རྒྱུན་མཐུད་ཆོག་པའི་འཕེལ་རྒྱས་ཀྱི་གྲོས་རིམ་ལ་སྐུལ་འདེད་མགྱོགས་མྱུར་གཏོང་རྒྱུར་ཕན་ཐོགས་ཡོད་པའི་གོ་ལ་ཧྲིལ་པོའི་རང་བཞིན་གྱི་གྲོས་འགོ་ཞིག་ཡིན་པས། ཨེ་ཅིབ་ཕྱོགས་ཀྱིས་གྲོས་འགོ་དེའི་སྒྲོམ་གཞིའི་འོག་གི་ཁྱབ་ཁོངས་ཁག་གི་མཉམ་ལས་ནང་མུ་མཐུད་ཧུར་ཐག་ཞུགས་རྒྱུ་ཡིན་པ་རེད། ཀྲུང་གོ་ཕྱོགས་ཀྱིས་བཏོན་པའི་གོ་ལ་ཧྲིལ་པོའི་བདེ་འཇགས་གྲོས་འགོར་ཨེ་ཅིབ་ཕྱོགས་ཀྱིས་བསྔགས་བརྗོད་བྱ་རྒྱུ་དང་ཀྲུང་གོ་ཕྱོགས་དང་མཉམ་དུ་འཛམ་གླིང་གི་ཞི་བདེ་དང་བདེ་འཇགས་སྲུང་སྐྱོང་ལ་དམིགས་ནས་སྤེལ་རེས་མཉམ་ལས་ལ་ཤུགས་སྣོན་རྒྱག་འདོད་ཡོད། ཀྲུང་གོ་ཕྱོགས་ཀྱིས་བཏོན་པའི་གོ་ལ་ཧྲིལ་པོའི་ཤེས་དཔལ་གྲོས་འགོར་ཨེ་ཅིབ་ཕྱོགས་ཀྱིས་བསྔགས་བརྗོད་བྱེད་ཀྱི་ཡོད་ལ། ཀྲུང་གོ་ཕྱོགས་དང་འདྲ་བར་ཤེས་དཔལ་མི་འདྲ་བར་བརྩི་འཇོག་བྱས་ནས་ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་རྒྱུར་ཤུགས་སྣོན་རྒྱག་དགོས་པའི་ངོས་འཛིན་བྱེད་ཀྱི་ཡོད།

(རྩོམ་པ་པོ་ནི་ཨེ་ཅིབ་པེ་ཉི་སུའུ་ཝུའེ་ཧྥུའུ་སློབ་ཆེན་གྱི་ཆབ་སྲིད་རིག་པའི་དགེ་རྒན་ཆེ་མོ་བ་ཡིན་པ)