2024ལོའི་བོད་ཀྱི“ཀྲུང་གོའི་ཞིང་པའི་ལོ་ལེགས་དུས་ཆེན”འཕྱོངས་རྒྱས་རྫོང་གི་ཚོགས་ར་གཙོ་བོའི་འགོ་ཚུགས་མཛད་སྒོར་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རྣམ་གྲངས“འཕྱོངས་རྒྱས་འཇུ་བྲོ”འཁྲབ་བཞིན་པ།

གཞིས་རྩེ་གྲོང་ཁྱེར་པ་སྣམ་རྫོང་དཔའ་རྩལ་ཤང་གི་ཞིང་པས་ནས་བརྔ་བཞིན་པ།

ལྷོ་ཁ་གྲོང་ཁྱེར་གྲ་ནང་རྫོང་གྲ་ཕྱི་ཤང་རྣམ་སྲས་གླིང་གྲོང་ཚོར་ནས་བརྔ་བའི་ལས་ལ་བྲེལ་བཞིན་པ།

ཟླ་9ཚེས་22ཉིན་ནི་ལུགས་རྙིང་ལོའི་སྟོན་མཉམ་གྱི་དུས་ཚིགས་རེད་ལ། “ཀྲུང་གོའི་ཞིང་པའི་ལོ་ལེགས་དུས་ཆེན”ཐེངས་བདུན་པའང་རེད། ཉིན་ཤས་བསྟུད་མར། རང་ལྗོངས་ཀྱི་ས་གནས་ཁག་གིས་བྱེད་སྒོ་སྣ་ཚོགས་སྤེལ་ནས་མཉམ་དུ་ལོ་ལེགས་ལ་རྟེན་འབྲེལ་ཞུ་བ་དང་དགའ་སྤྲོ་མཉམ་དུ་རོལ་བཞིན་མཆིས།

ལོ་ལེགས་ཀྱིས་ཕྱུག་པའི་ཉིང་ཁྲིར་ས་ཆ་སྦར་མཐིལ་ཙམ་ཡང་གསེར་རྡོག་རྡོག་ཅིག་དང་མཚུངས་ཤིང་། ཉིང་ཁྲིའི་ལོ་ལེགས་ནི་ནས་དང་མ་རྨོས་ལོ་ཏོག་ཙམ་མ་ཡིན་པར། ད་དུང་ནགས་ཁྲོད་དུ“ནོར་བུས”ཁེངས་པ་དེ་རེད། ས་བབ་མཐོ་ཚད་སྨི་3200ཟིན་པའི་ཆིང་ཀང་ནགས་ཁྲོད་དུ། བྲག་ཡིབ་ཆུས་ཉིང་ཁྲི་གྲོང་རྡལ་ཉང་ངུ་གྲོང་ཚོའི་རི་སྐྱེས་ཀོ་ཤ་འཐུ་ཐེངས་གཉིས་པར་སླེབས། མདོག་དམར་ནག་གི་ཀོ་ཤ་དག་ཉི་འོད་འོག་བཀྲག་མདངས་རྒྱས། ནགས་ཁྲོད་དུ་རི་སྐྱེས་ཀོ་ཤ་འདེབས་པ་ལས་གདོད་མའི་ནགས་ཚལ་དང་སྔོ་ཁེབས་ལ་གཏོར་སྐྱོན་མི་ཕོག་པར། དེ་ལས་ལྡོག་སྟེ་འདོད་མའི་ཁོར་ཡུག་དང་མཉམ་གནས་ཀྱི་འབྲེལ་བ་བཟང་པོ་ཞིག་ཆགས་ཐུབ། “ནགས་ཁྲོད་དུ་རི་སྐྱེས་ཀོ་ཤ་འདེབས་འཛུགས་བྱེད་པ་དེ་ས་ཞིང་དང་ནགས་ས་བཟུང་སྤྱོད་བྱེད་མི་དགོས་ཁར་མི་རྣམས་ལ་སྒོ་རྩ་ནས་ཡོང་འབབ་གསོག་ཐུབ་པ་དེ་རེད། ཀོ་ཤ་དེ་དག་ལ་ལྟ་སྐབས་རྐང་གཉིས་གསུམ་གྱིས་སླེལ་པོ་ཁེངས་པ་མ་ཟད། སྤུས་ཚད་ཀྱང་ཧ་ཅང་ཡག་པོ་ཡོད”ཅེས་ཉང་ངུ་གྲོང་ཚོའི་ཏང་ཀྲི་པུའི་ཧྲུའུ་ཅི་ལྷག་པ་དོན་གྲུབ་ཀྱིས་འཛུམ་དམུལ་དམུལ་ངང་བཤད། ཉིན་གཅིག་ལས་ལ་བྲེལ་བར་ཀོ་ཤ་སོས་པ་རྒྱ་མ་800ལྷག་ཙམ་བྱུང་བ་དང་དེའི་ཐོག་སྐམ་གསེད་ཐོག་མར་བྱས་པའི་ཀོ་ཤ་སྐམ་པོ་རྒྱ་མ་500ཡོད། འདི་ལོ་ནགས་ཁྲོད་དུ་རི་སྐྱེས་ཀོ་ཤ་འདེབས་འཛུགས་བྱས་པར་ཉང་ངུ་གྲོང་ཚོའི་མང་ཚོགས་ལ་ཡོང་འབབ་སྒོར་ཁྲི་10ལྷག་ཙམ་བྱུང་ཡོད།

སྟོན་ཟླ་དགུ་པའི་ལྷོ་ཁ་ལྷོ་བྲག་གི་གང་སར་ལོ་ལེགས་ཀྱི་དགའ་སྤྲོའི་རྣམ་པས་ཁེངས་ཤིང་། ལྷོ་བྲག་རྫོང་གི“ཀྲུང་གོའི་ཞིང་པའི་ལོ་ལེགས་དུས་ཆེན”ཐེངས་བདུན་པ་དང་སྟོན་དུས་ཀྱི་གྲོང་ཚོའི་དགོང་ཚོགས་ཀྱི་བྱེད་སྒོ་རབ་དང་རིམ་པ་སྤེལ་ཡུལ་དུ་རྫོང་དམངས་ཁྲོད་སྒྱུ་རྩལ་ཚོགས་པ་དང་། གྲོག་རོང་རོལ་དབྱངས་ཚོགས་པ། དེ་བཞིན་སྲིད་འཛིན་གྲོང་ཚོའི་རིག་རྩལ་འཁྲབ་སྟོན་རུ་ཁག་བཅས་ཀྱིས་སྤྲོ་སེམས་འཁོལ་པོས་འཁྲབ་སྟོན་བྱས་པ་དང་། དགའ་སྤྲོ་འཁོལ་བའི་ཞབས་བྲོ་དང་། སྙན་འཇེབས་ལྡན་པའི་གླུ་དབྱངས། དགོད་བྲོའི་གཏམ་གླེང་སོགས་ལེ་ཚན་རེས་མོས་ངང་འཁྲབ་སྟོན་བྱས་པར་ལྟད་མོ་བ་ཚོའི་དགའ་བསུ་ཡང་ཡང་ཐོབ་ཡོད་པ་རེད། རིག་རྩལ་འཁྲབ་སྟོན་ཁྲོད་ད་དུང་བྱ་དགའ་ཡོད་པའི་ཤེས་བྱའི་འགྲན་བསྡུར་ཡང་ཡོད་པའི་ནང“ཞིང་གསུམ”དང་། མིའི་འཚོ་སྡོད་ཁོར་ཡུག་བཅོས་སྒྲིག གྲོང་གསེབ་དར་རྒྱས་སོགས་ཀྱི་ཤེས་བྱའི་ནང་དོན་ཚུད་ཡོད་པ་དང་། འགྲན་བསྡུར་བྱེད་སྒོའི་བྱ་དགའ་གྱ་ནོམ་ཡོད་པས་མང་ཚོགས་དེའི་ནང་ཧུར་ཐག་ཞུགས་པའི་ཡིད་དབང་བཀུག་ནས་བྱེད་སྒོ་ཧྲིལ་པོ་དེ་བས་འཁྲུག་ཆ་དོད་དུ་ཕྱིན།

ཉེ་ཆར། གཞིས་རྩེ་གྲོང་ཁྱེར་དིང་རི་རྫོང་ཤེལ་དཀར་གྲོང་རྡལ་གནས་བསམ་གྲོང་ཚོས“དྲག་རྩལ་འགྲན་བསྡུར་ལ་སྐུལ་འདེད་གཏོང་བ་དང་ནུས་རྩལ་ངོམ་ནས་ལོ་ལེགས་ལ་རྟེན་འབྲེལ་ཞུ་བ”བརྗོད་དོན་གཙོ་བོར་བྱས་ཏེ་ནས་བརྔ་བསྡུའི་འགྲན་བསྡུར་བྱས་ནས“ཀྲུང་གོའི་ཞིང་པའི་ལོ་ལེགས་དུས་ཆེན་ཐེངས་བདུན་པར”རྟེན་འབྲེལ་ཞུས་པ་རེད། ཞོགས་པ་སྔ་པོ་ནས་གྲོང་མི་ཚོ་གཅིག་རྗེས་གཉིས་མཐུད་ངང་ཞིང་ཁའི་ནང་ཡོང་བ་དང་། འགྲན་བསྡུར་ལ་ཞུགས་མཁན་བདམས་ཐོན་པ་ཚོས་ཕུ་ཐུང་བརྫེས་ནས་ངར་ཤུགས་སྒྲིམས་ཏེ་འགྲན་བསྡུར་ལ་ཞུགས་པ་རེད། འགྲན་བསྡུར་འགོ་ཚུགས་པ་ཁྱབ་བསྒྲགས་བྱས་པ་དང་བསྟུན་ནས་བདམས་ཐོན་པ་7གྱིས་འཁྱེར་བདེའི་བརྔ་བསྡུ་འཕྲུལ་ཆས་འཁྱེར་ནས་ཞིང་ནང་དུ་བསྐྱོད། འགྲན་རའི་ཕྱི་རོལ་གྱི་ལྟད་མོ་བ་ཚོའི་ཤུགས་རྒྱོབ་ཤུགས་རྒྱོབ་ཅེས་པའི་སྐད་དང་བསྟུན་ནས་འགྲན་རའི་ནང་གི་བདམས་ཐོན་པ་ཚོས་རྗེས་ལུས་ཐེབས་དོགས་དང་དཔའ་ངར་ཆེར་སྐྱེད་ཀྱིས་སྔོན་ལ་ཚར་བར་བྱས་པ་དེ་ལས་གསོན་ཉམས་དོད་ལ་སྤྲོ་སྣང་ལྡན་པ་དང་ལོ་ལེགས་བྱུང་བར་མཉམ་དུ་རྟེན་འབྲེལ་ཞུ་བའི་རྣམ་པ་ཞིག་མངོན་བཞིན་མཆིས། འགྲན་བསྡུར་མཇུག་འགྲིལ་རྗེས་སྒྲོག་འགྲེལ་པས་དེ་གར་ཡོད་པའི་མང་ཚོགས་ལ་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་སྒྲོག་འགྲེལ་བྱེད་པ་དང་། ཏང་གི་དམངས་ཕན་སྲིད་ཇུས་ལ་འགྲེལ་བཤད་རྒྱག་པ། མི་རིགས་མཐུན་སྒྲིལ་ཡར་ཐོན་གྱི་དྲིལ་བསྒྲགས་སློབ་གསོ་སྤེལ་བ་བཅས་བྱས་ནས། ཏང་གི་གསུང་སྒྲ“མི་སེར་དཀྱུས་མའི་ཁྱིམ་དུ་ཁྱབ་པར”བྱས་པ་རེད།

ཉིན་ཤས་བསྟུད་མར། ནག་ཆུ་གྲོང་ཁྱེར་འབྲི་རུ་རྫོང་གིས“མི་རིགས་མཐུན་སྒྲིལ་གྱི་མཉམ་ཤུགས་གཅིག་ཏུ་སྒྲིལ་བ་དང་། དང་བླངས་ཞབས་ཞུར་བརྟེན་ནས་སྟོན་འབྲུ་བསྡུ་རོགས་བྱེད་པའི”བརྗོད་དོན་གཙོ་བོའི་བྱེད་སྒོ་གསར་གཏོད་བྱས་ནས་སྤེལ་ཞིང་། ནུབ་རྒྱུད་འཆར་གཞིའི་དང་བླངས་པ་དང་བུད་མེད་དང་བླངས་པ་སོགས་སྒྲིག་འཛུགས་ཀྱིས་རླན་ཆུ་ཤང་ས་དམར་གྲོང་ཚོར་བསྐྱོད་དེ་ངལ་རྩོལ་ནུས་ཤུགས་མེད་པའི་ཁྱིམ་ཚང་ལ་ནས་བརྔ་བསྡུ་བྱེད་རོགས་བྱས་པ་དང་། སྟོན་བསྡུའི་རྒྱ་ཁྱོན་མུའུ་2ལེགས་སྒྲུབ་བྱས་ཏེ་ལོ་ཏོག་རྒྱ་མ་1500ཙམ་ཐོན་ནས“མང་ཚོགས་ལ་བྱ་བ་དངོས་སྒྲུབ་པ”དོན་ཐོག་ཏུ་འཁྱོལ་བ་བྱས་པ་དང་ཆབས་ཅིག སྟོན་བསྡུའི་ཁྲོད་ཞིང་འབྲོག་མང་ཚོགས་ཀྱིས་ཏང་དང་སྲིད་གཞུང་གི་ཐུགས་ཁུར་དང་དྲོ་སྐྱིད་ཏན་ཏིག་ཚོར་བར་བྱས་ཡོད།