“ཁྲི་སྟོང་འདུ་འགོད”ཀྱི་ཉམས་མྱོང་སློབ་སྦྱོང་དང་བེད་སྤྱོད་བཏང་ནས་ལོ་ལེགས་བྱུང་བའི་ཀྲུང་གོར་བསྔགས་བརྗོད་བྱེད། “ཀྲུང་གོའི་ཞིང་པའི་ལོ་ལེགས་དུས་ཆེན”ཐེངས་བདུན་པ་དུས་ཐོག་ཏུ་ཤར་བ་རེད།

དེ་ནི་ཞིང་པ་དུང་ཕྱུར་མང་པོའི་དུས་ཆེན་ཡིན་ལ་མཉམ་ཤུགས་གཅིག་ཏུ་བསྒྲིལ་ཏེ་གྲོང་གསེབ་ཕྱོགས་ཡོངས་ནས་དར་རྒྱས་ལ་སྐུལ་འདེད་གཏོང་བའི་སྐར་ཁུང་ཞིག་ཀྱང་རེད།

“ཀྲུང་གོའི་ཞིང་པའི་ལོ་ལེགས་དུས་ཆེན”ཐེངས་བདུན་པ་འཆར་ལ་ཉེ་བའི་སྐབས་སུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྒྱལ་ཡོངས་ཀྱི་རྒྱ་ཆེའི་ཞིང་པ་དང“ཞིང་གསུམ”འཐབ་ཕྱོགས་སུ་ལས་ཀ་བྱེད་མཁན་བློ་མཐུན་ཚོར་དུས་ཆེན་གྱི་རྟེན་འབྲེལ་དང་ཟོལ་མེད་ཀྱི་འཚམས་འདྲི་གནང་ཞིང་། ཁོང་གིས“ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བར་ངེས་པར་དུ་རྒྱུན་སྲིང་ལྷོད་མེད་ངང་ཞིང་ལས་ཀྱི་རྨང་གཞི་བརྟན་དུ་བཏང་ནས་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་གཏོང་དགོས”ཞེས་ནན་བཤད་གནང་བ་རེད། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི《གཏན་འབེབས》ནང“‘ཁྲི་སྟོང་འདུ་འགོད’ཀྱི་ཉམས་མྱོང་སྤྱད་དེ་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་གཏོང་བའི་ཕུགས་ཕན་ལམ་སྲོལ་འཐུས་སྒོ་ཚང་དུ་གཏོང་དགོས”ཞེས་བསྟན་ཡོད།

ལོ་ལེགས་ཀྱི་རྒྱུགས་ལན་བཏབ་ནས། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་འདེགས་སྐྱོར་ནུས་ལྡན་བྱས་པ།

འབྲུ་རིགས་བདེ་འཇགས་ཡོང་བར་བྱེད་པ་ནི“རྒྱལ་ཁབ་ཀྱི་དོན་ཆེན”ཡིན་ཞིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“འབྲུ་རིགས་དང་གལ་ཆེའི་ཞིང་ལས་ཐོན་རྫས་བརྟན་པོ་དང་བདེ་འཇགས་ངང་མཁོ་སྤྲོད་འགན་ལེན་བྱེད་པ་ནི་ཐོག་མཐའ་བར་གསུམ་དུ་ཞིང་ལས་རྒྱལ་ཁབ་སྟོབས་ཆེན་འཛུགས་སྐྲུན་བྱེད་པའི་དོན་ཆེན་དང་པོ་རེད”ཅེས་ནན་བཤད་གནང་བ་རེད།

མིག་སྔར། རྒྱལ་ཡོངས་ཀྱི་ས་གནས་ཁག་ཏུ་གཞི་ཁྱོན་ཆེ་བའི་སྟོན་བསྡུའི་ལས་ཀ་གཅིག་རྗེས་གཉིས་མཐུད་ངང་ཚུགས་ཡོད།

ཧེ་ལུང་ཅང་ཞིང་ཆེན་པེ་ཨན་གྲོང་ཁྱེར་ཨེར་ཅིང་གྲོང་རྡལ་ཙི་ཧོ་གྲོང་ཚོའི་ཞིང་ས་ནས་ལོ་ལེགས་ཀྱི་རྣམ་པ་མངོན། “ད་ལོ་གྲོང་ཚོས་པེ་ཏ་ཧོང་ཚོགས་པ་དང་མཉམ་ལས་བྱས་ནས་མཉམ་སྐྲུན་བྱས་ཡོད། མ་རྨོས་ལོ་ཏོག་འདི་དག་ལ་ལྟོས་དང་། སྐྱེ་འཚར་བཟང་ལ་འབྲུ་རྡོག་གིས་ཁེངས་འདུག”ཐོན་འབབ་ཚོད་རྩིས་བྱས་ན། གྲོང་ཚོ་འདིའི་མ་རྨོས་ལོ་ཏོག་མུའུ་རེའི་ཐོན་འབབ་རྒྱ་མ་1600ཟིན་རྒྱུ་ཡིན་པ་དེ་ན་ནིང་ལས་རྒྱ་མ་70འཕར་རྒྱུ་དང་། སྲན་ཆེན་མུའུ་རེའི་ཐོན་འབབ་རྒྱ་མ་400ཟིན་ནས་ན་ནིང་ལས་རྒྱ་མ་30འཕར་རྒྱུ་རེད་ཅེས་གྲོང་ཚོའི་ཏང་སྤྱི་ཁྱབ་ཀྲི་པུའི་ཧྲུའུ་ཅི་ཡན་ཀྲུང་ཅེས་བརྗོད།

ཙི་ཧོ་གྲོང་ཚོར་ལོ་ལེགས་ཡོང་བའི་གདེང་ཚོད་ནི་ཞིང་ལས་སྤྱི་ཚོགས་ཅན་གྱི་ཞབས་ཞུ་འཇུག་སྒོར་བྱས་པའི་ས་སྦོལ་མཉམ་ལས་ཀྱི་བྱེད་སྟངས་གསར་པ་ལས་བྱུང་བ་རེད། པེ་ཏ་ཧོང་ཚོགས་པས་ཤེས་ལྡན་པ་དང་། ལག་རྩལ། ཞིང་འཕྲུལ། དོ་དམ་སོགས་ཀྱི་ལེགས་ཆ་འདོན་སྤེལ་གང་ལེགས་བྱས་ཏེ་རྒྱལ་ཡོངས་ཀྱི་འབྲུ་རིགས་ཐོན་སྐྱེད་ཀྱི་ལེགས་ཆའི་ཁུལ་དུ་ས་ཁོངས་ཀྱི་ཞིང་ལས་ཞབས་ཞུ་ལྟེ་གནས་26བཙུགས་ནས་ས་ཆ་མང་པོར་ཁྱབ་འགྱེད་དང་ཞིང་དུད་ཆུང་བ་དེ་བས་མང་བར་སྐུལ་ཁྲིད་བྱས་ཡོད་པ་རེད།

“ད་ལོ་ང་ཚོས་ཨར་ཅིང་གྲོང་རྡལ་གྱི་རྨོ་ཞིང་མུའུ་ཁྲི་19.7ལ་ལག་རྩལ་ཞབས་ཞུ་ཁྱབ་པར་བྱས་པ་དང་། རིམ་དབྱེ་ངེས་གནས་ཀྱི་ཚད་འབེབས་ལུད་རྒྱག་དང་རྩ་རྡོག་འབུ་ཕྲའི་སྨན་གཏོར་སོགས་སྔོན་ཐོན་ལག་རྩལ་དཔེ་སྟོན་ཁྱབ་གདལ་བཏང་ཡོད།

ཡུལ་མི་རྣམས་ཀྱིས་སྔོན་ཐོན་འདེབས་འཛུགས་ལག་རྩལ་དང་དོ་དམ་བྱེད་སྟངས་ལ་ཁས་ལེན་བྱེད་ཚད་སྔར་བས་མཐོ་རུ་སོང་བ་དང་ང་ཚོའི་ཞབས་ཞུའི་མངགས་ཐོ་ཡང་ཇེ་མང་དུ་ཕྱིན་སོང”ཞེས་པེ་ཏ་ཧོང་ཚོགས་པ་པེ་ཨན་ཡན་ལག་ཀུང་སིའི་ཁྲང་ཧྲུའེ་ཧོ་ཞིང་ར་ཚད་ཡོད་ཀུང་སིའི་ཏང་ཨུད་ཀྱི་ཧྲུའུ་ཅི་དང་ཏུང་ཧྲི་ཀྲང་ཀྲུའུ་ཁུན་ཀྲི་ཡིས་སྤོབས་སེམས་ཆེན་པོས་བརྗོད།

པེ་ཏ་ཧོང་ཚོགས་པའི་མངགས་ཐོ་གསར་པ་རྒྱུན་མཐུད་ངང་མང་དུ་ཕྱིན་པ་ནི་རང་རྒྱལ་གྱི་ཞིང་ལས་སྤྱི་ཚོགས་ཅན་གྱི་ཞབས་ཞུའི་སྤུས་ཚད་མཐོ་རུ་དང་ཁྱབ་རྒྱ་ཆེ་རུ་ཕྱིན་པའི་མཚོན་ཚུལ་ཞིག་ཡིན་ལ། ལོ་ལེགས་འབྲས་བཟང་གི་བཀྲག་མདངས་འཚེར་ས་ཞིག་ཀྱང་རེད། ད་ལོ་ཀྲུང་དབྱང་ནོར་སྲིད་ཀྱིས་ཆ་རྐྱེན་འཛོམས་པའི་ཞབས་ཞུའི་བྱེད་པོ་སྣ་ཚོགས་ལ་ཞིང་ལས་སྤྱི་ཚོགས་ཅན་གྱི་ཞབས་འདེགས་ཞུ་རྒྱུར་མུ་མཐུད་རྒྱབ་སྐྱོར་བྱས་ནས། འབྲུ་རིགས་དང་བཟའ་སྣུམ་གྱི་མུའུ་རེའི་ཐོན་ཚད་གཞི་ཁྱོན་ཆེན་པོས་མཐོ་རུ་གཏོང་རྒྱུ་དང་སྤུས་ཚད་མཐོ་ལ་ཐོན་འབབ་མང་བའི་ཁར་མ་གནས་གྲོན་ཆུང་དང་གྱོང་གུན་ཉུང་གཏོང་ལ་སྐུལ་འདེད་གཏོང་ཆེད་འདེགས་སྐྱོར་བྱ་རྒྱུ་རེད།

ད་ལོ་དབྱར་འབྲུའི་ཐོན་འབབ་རྒྱ་མ་དུང་ཕྱུར་2996ཟིན་པ་དེ་ལོ་གོང་མ་ལས་2.5%འཕར་ནས་ལོ་རྒྱུས་ཀྱི་ཟིན་ཐོ་གསར་པ་སླར་ཡང་བཏོད་ཅིང་། སྟོན་འབྲུར་ལོ་ལེགས་ཡོང་རེ་ཡོད། དེས་རྒྱལ་ཁབ་ཆེན་པོའི་འབྲུ་མཛོད་ལ་ལོ་ལེགས་ཡོང་རྒྱུར་རྨང་གཞི་བརྟན་པོ་བཏིང་བ་མ་ཟད། དཔལ་འབྱོར་བསྐྱར་འཕར་དང་ལེགས་ཕྱོགས་སུ་འགྲོ་བའི་རྣམ་པ་སྲ་བརྟན་དང་ཆེ་རུ་འགྲོ་བ་དང་དེ་བཞིན་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་འདེགས་སྐྱོར་ནུས་ལྡན་ཡང་བྱས་པ་རེད།

གནས་འཕྲོད་ལས་འཚམ་བྱུང་སྟེ། མཛེས་མཐུན་གྲོང་གསེབ་འཛུགས་སྐྲུན་ལ་གྲུབ་འབྲས་གསར་པ་ཐོབ་པ།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“སྟོབས་ཤུགས་གཅིག་སྡུད་ཀྱིས་མང་ཚོགས་ཀྱི་ཡོངས་ཁྱབ་དགོས་མཁོ་དང་སྒྲུབ་ཐུབ་པའི་དམངས་འཚོའི་བྱ་བ་དངོས་ཡག་པོ་བསྒྲུབས་ནས་མང་ཚོགས་ལ་མིག་མཐོང་ལག་ཟིན་ཐུབ་པར་བྱེད་དགོས”“གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་ཀྱི་མཛེས་རིས་གསར་པ་ཞིག་འབྲི་དགོས”ཞེས་གསུངས་པ་རེད།

སི་ཁྲོན་ཞིང་ཆེན་ཆིང་ཧྲེན་རྫོང་ཧན་དབྱང་གྲོང་རྡལ་གྱི་ལོ་ངོ་སྟོང་གི་ལོ་རྒྱུས་ལྡན་པའི་གནའ་བོའི་གྲོང་རྡལ་ལ་གསོན་ཤུགས་གསར་པ་རྒྱས་པ་དེས་མཛེས་མཐུན་གྲོང་གསེབ་འཛུགས་སྐྲུན་བརྟན་པོའི་ངང་ཡར་རྒྱས་འགྲོ་བའི་དཔང་པོ་བྱས་ཡོད།

“ཕ་ཡུལ་དུ་ལོག་པ་ནི་གོ་སྐབས་ཡོད་པས་རེད”ཞོགས་པ་སྔ་པོ་ནས་ཧན་དབྱང་གྲོང་རྡལ་ཧན་དབྱང་ཁྲང་སྡེ་ཁུལ་གྱི་ཕ་ཡུལ་དུ་ལོག་ནས་ལས་གཏོད་བྱེད་མཁན་གཞོན་ནུ་ཏེང་ཝེ་ཡིས་རང་ཁྱིམ་གྱི་མྱུར་སྐྱེལ་ཞབས་ཞུའི་ས་ཚིགས་སུ་ལས་ཀ་བྱེད་ཅིང་། ཁོང་གིས“ལོ་ལེགས་དུས་ཆེན་གྱི་སྟོན་དུས་འཛད་སྤྱོད་དུས་ཚིགས་ཤར་རྗེས། གནའ་བོའི་གྲོང་རྡལ་གྱི་བ་དམ་དང་ཚ་ལུ་མ་སོགས་ཞིང་ཞོར་ཐོན་རྫས་ཀྱི་མངགས་ཐོ་མངོན་གསལ་དོད་པོས་མང་དུ་ཕྱིན་སོང”ཞེས་བཤད།

ཧན་དབྱང་གནའ་བོའི་གྲོང་རྡལ་ནི་གནའ་བོའི“ལྷོ་ཕྱོགས་ཀྱི་དར་གོས་ལམ་བུའི”ས་ཚིགས་གལ་ཆེན་ཞིག་རེད། དུས་རབས་གསར་པ་ཤར་ཚུན། ལོ་ངོ་སྟོང་གི་གནའ་བོའི་གྲོང་རྡལ་དུ་གྲོང་གསེབ་ཕྱོགས་ཡོངས་ནས་དར་རྒྱས་འགྲོ་བའི་དཔྱིད་རླུང་ལྡང་ཞིང་། ཆིང་ཧྲེན་རྫོང་གིས་གནའ་བོའི་གྲོང་རྡལ་སྲུང་སྐྱོང་དང་བེད་སྤྱོད་ལ་སྐུལ་འདེད་བཏང་ནས་གནའ་བོའི་སྐྲུན་དངོས་དང་གནའ་བོའི་ཡུལ་མིའི་སྡོད་ཁང་ལ་གཅིག་གྱུར་ཐོག་ཡིག་ཚགས་བཟོས་ནས་བྱང་བུ་བཀལ་ཏེ་སྲུང་སྐྱོང་བྱས་པ་དང་ཆབས་ཅིག་ཆུ་དང་། གློག སོལ་རླངས་སོགས་རྨང་གཞིའི་སྒྲིག་བཀོད་ཀྱི་ཞན་ཆ་ཕྱོགས་ཡོངས་ནས་བསལ་ཡོད་པ་རེད། གྲོང་གསེབ་འཛུགས་སྐྲུན་གྱི་བྱ་སྤྱོད་ལ་བརྟན་པོའི་ངང་སྐུལ་འདེད་བཏང་བས་ཡུལ་མི་རྣམས་ཀྱི་ཐོན་སྐྱེད་དང་འཚོ་བའི་ཁོར་ཡུག་ཇེ་ལེགས་སུ་ཕྱིན་ནས་གནའ་བོའི་གྲོང་རྡལ་དེ་ཉིད་གྲོང་གསེབ་ཏུ་ཡུལ་སྐོར་བྱ་ཡུལ་གཙོ་བོར་གྱུར་ཡོད།

ཏེང་ཝེ་ཡི་མྱུར་སྐྱེལ་ས་ཚིགས་ནི་གྲོང་གསེབ་ཡུལ་སྐོར་གྱི་ཚ་རླབས་འཕྱུར་བའི་དཔང་པོ་ཞིག་རེད། ཁོང་གིས“ཡུལ་སྐོར་བ་མང་དུ་ཕྱིན་པ་དང་ལྷག་པར་དུ‘ཁྲེས་ཁུར་ཡུལ་སྐོར་བ’མང་པོ་ཞིག་གིས་ང་ཚོའི་ལག་ཤེས་བཟོ་རྩལ་ཐོན་རྫས་དང་ཁྱད་ལྡན་ཐོན་རྫས་ཉོས་ནས་མྱུར་སྐྱེལ་བརྒྱུད་ཕ་ཡུལ་ལ་སྐུར་གྱི་ཡོད། ང་ཚོའི་ལས་འབོར་ཟླ་རེར་མངགས་ཐོ་60ཙམ་ནས་2000ལྷག་ཙམ་བར་མང་དུ་འགྲོ་གི་འདུག”ཅེས་བཤད།

ད་ལོ་ནས་བཟུང་། ས་ཁུལ་ཁག་དང་སྡེ་ཚན་ཁག་གིས་ས་གནས་ཁག་གི་དོན་དངོས་དང་ཞིང་པའི་དགོས་མཁོར་གཞིགས་ཏེ་གྲོང་གསེབ་ཀྱི་ཐོན་ལས་འཕེལ་རྒྱས་དང་། གྲོང་གསེབ་འཛུགས་སྐྲུན། གྲོང་གསེབ་བཅོས་སྐྱོང་གི་ཆུ་ཚད་བཅས་མཐོ་རུ་གཏོང་རྒྱུ་དེ་གྲོང་གསེབ་ཕྱོགས་ཡོངས་ནས་དར་རྒྱས་འགྲོ་བར་སྐུལ་འདེད་གཏོང་བའི་གཙོ་གནད་ལས་འགན་དུ་བརྩིས་ནས། སྟོབས་ཤུགས་གཅིག་སྡུད་ཀྱིས་མང་ཚོགས་ལ་མིག་མཐོང་ལག་ཟིན་གྱི་བྱ་བ་དངོས་ཁག་གཅིག་ཡག་པོ་བསྒྲུབས་པས་གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་འཛུགས་སྐྲུན་ལ་ཕན་འབྲས་གསར་པ་ཐོན་ཡོད།

གསོན་ཤུགས་ཀྱིས་ཁེངས་པའི་གྲོང་གསེབ་ལས། ཡུལ་མི་ཚོས་སྒྱུར་བཅོས་དང་འཕེལ་རྒྱས་ཀྱི་གྲུབ་འབྲས་དེ་བས་མང་བ་མཉམ་སྤྱོད་ཐུབ་པ།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ཞིང་ལས་རྒྱལ་ཁབ་སྟོབས་ཆེན་འཛུགས་སྐྲུན་བྱེད་པར་ནུས་ལྡན་ལག་ཆ་ནི་ཚན་རྩལ་ལ་ཐུག་པ་དང་འགག་རྩ་ནི་སྒྱུར་བཅོས་ལ་བརྟེན་དགོས”“ཞིང་པའི་ཡོང་འབབ་མང་དུ་གཏོང་རྒྱུ་དེ‘ཞིང་གསུམ’ལས་དོན་གྱི་ལྟེ་བའི་ལས་འགན་དུ་བརྩི་རྒྱུ་མཐའ་འཁྱོངས་བྱས་ནས་ཐབས་བརྒྱ་ཇུས་སྟོང་གིས་ཞིང་པའི་འབབ་འཕར་ཕྱུག་འགྱུར་གྱི་ཐབས་ལམ་ཡངས་སུ་གཏོང་དགོས”ཞེས་ནན་བཤད་གནང་ཡོད།

ཨན་ཧུའེ་ཞིང་ཆེན་ཧྥེང་དབྱང་རྫོང་ཞའོ་ཀང་གྲོང་ཚོར་གསོན་ཤུགས་གསར་པ་འཕེལ་བ།

ཡུལ་བབ་དང་བསྟུན་ནས་གྲོང་གསེབ་ཀྱི་མཉམ་སྡེབ་དཔལ་འབྱོར་གསར་པ་འཕེལ་རྒྱས་བཏང་སྟེ་ཐོན་ཁུངས་རྒྱུ་ནོར་ལ་སྒྱུར་བ་དང་། མ་དངུལ་རྐང་དངུལ་ལ་སྒྱུར་བ། ཞིང་པ་རྐང་བདག་ལ་སྒྱུར་བ་བཅས་བྱས་ནས་གྲོང་གསེབ་ཀྱི་ས་ཞིང་གི“དབང་གསུམ་ལོགས་འཛུགས”སྒྱུར་བཅོས་ཀྱིས་རྣམ་པ་མང་ཞིང་གཞི་ཁྱོན་འོས་འཚམ་ལྡན་པའི་གཉེར་སྐྱོང་ལ་སྐུལ་འདེད་བཏང་བ་དང་ཞའོ་ཀང་གྲོང་ཚོས་ཕྱོགས་ཡོངས་ནས་སྒྱུར་བཅོས་ཟབ་ཏུ་བཏང་སྟེ། ཞིང་ལས་དང་གྲོང་གསེབ་དེང་རབས་ཅན་ལ་སྒུལ་ཤུགས་ཆེན་པོ་བསྣན་ཡོད།

ལོ་ལེགས་ཀྱི་དུས་སུ་ཐོན་འབབ་སྐོར་གླེང་སྐབས་གྲོང་མི་ཁྲེང་ཡུས་སུང་གིས། “གྲོང་ཚོའི་མཉམ་སྡེབ་དཔལ་འབྱོར་མ་རྐང་ལ་ཞུགས་པས་ད་ལོ་མི་རེར་ཁེ་སྤོགས་སྒོར་700བྱུང་བ་དང་ཁྱིམ་གྱི་ས་ཞིང་མུའུ་10འབྲུ་འདེབས་དུད་ཆེན་ལ་བརྒྱུད་བཤུག་བྱས་པས། ལོ་གཅིག་ལ་ས་ཞིང་བརྒྱུད་བཤུག་གི་མ་དངུལ་སྒོར་6000ལྷག་ཙམ་ཡོད་པའི་ཁར་ངའི་གླ་པ་རྒྱུག་པའི་ཡོང་འབབ་བསྣན་ན་དེ་སྔོན་ལས་མང་བ་འདུག”ཅེས་དགའ་སྤྲོའི་ངང་བཤད།

ཞའོ་ཀང་གྲོང་ཚོའི་ཏང་ཨུད་ཀྱི་ཧྲུའུ་ཅི་དང་པོ་ལི་ཅིན་ཀྲུའུ་ཡིས“ཞའོ་ཀང་གྲོང་ཚོའི་གསར་གཏོད་འཕེལ་རྒྱས་ཀུང་སི་དང་ཞའོ་ཀང་གྲོང་ཚོའི་ཡུལ་སྐོར་མ་འཇོག་ཀུང་སི་སོགས‘གྲོང་ཚོ་དང་ཁེ་ལས་གཞི་གཅིག’གི་ཁེ་ལས་གཅིག་རྗེས་གཉིས་མཐུད་ངང་བཙུགས་པ་དང་ཐོན་ལས་ཀྱི་བརྟེན་ས་ཡོད་པར་བརྟེན། གཞོན་ནུ་དེ་བས་མང་བས་གྲོང་ཚོར་རང་ཉིད་ཀྱི་ཆེད་ལས་ལ་བརྟེན་ནས་བྱ་གཞག་འཕེལ་རྒྱས་བཏང་བས་གྲོང་ཚོའི་འཕེལ་རྒྱས་ཀྱི་གསོན་ཤུགས་སྔར་བས་ཆེ་རུ་ཕྱིན་ཡོད”ཅེས་ངོ་སྤྲོད་བྱས་པ་དང་། ཁོང་གིས། ན་ནིང་ཡུལ་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་34900དང་གྲོང་ཚོའི་མཉམ་སྡེབ་དཔལ་འབྱོར་གྱི་ཡོང་འབབ་སྒོར་ཁྲི་1420བྱུང་ཡོད་ཅེས་བཤད།

རྒྱལ་ཡོངས་ལ་རྒྱང་ལྟ་བྱས་ན། སྒྱུར་བཅོས་དང་ཚན་རྩལ་གཉིས་ཀྱི་སྐུལ་འདེད་ལ་བརྟེན་ནས་གྲོང་གསེབ་འཕེལ་རྒྱས་ཀྱི་སྒུལ་ནུས་གསར་པ་ཆེ་རུ་ཕྱིན་ཡོད་ཅིང་། རྒྱལ་ཡོངས་ཀྱི་ཞིང་ལས་ཚན་རྩལ་ཡར་ཐོན་གྱི་ལེགས་སྐྱེས་ཕུལ་ཚད་63.2%ཟིན་པ་དང་། ཞིང་ལས་སྐྱེ་དངོས་རྨོ་བསྡུ་ཕྱོགས་བསྡུས་འཕྲུལ་ཆས་ཅན་དུ་འགྱུར་ཚད་74%ལྷག་ཙམ་ཟིན་པ། ཞིང་ལས་སྐྱེ་དངོས་རང་བརྟེན་འདེམས་གསོའི་སོན་རིགས་ཀྱི་རྒྱ་ཁྱོན་གྱི་བསྡུར་གྲངས་བཟུང་ཚད་95%ལྷག་ཙམ་ཟིན་ཡོད་པ་བཅས་རེད། སྒྱུར་བཅོས་ལས་སྒུལ་ཤུགས་འཕེལ་བ་དང་གསོན་ཤུགས་སྦྱིན་པས་རེས་སྐོར་གཉིས་པའི་ས་ཞིང་འགན་གཙང་ལེན་ཡུན་ཐིམ་རྗེས་སླར་ཡང་ལོ་30རིང་དུ་གཏོང་བའི་ཚོད་ལྟར་བརྟན་པོའི་ངང་སྐུལ་འདེད་བཏང་བས། རྒྱལ་ཡོངས་ཀྱི་ཁྱིམ་ཚང་གིས་འགན་གཙང་བླངས་པའི་རྨོ་ཞིང་གི་ས་ཞིང་གཉེར་སྐྱོང་དབང་ཆ་བརྒྱུད་བཤུག་བྱེད་ཁྱོན་མུའུ་དུང་ཕྱུར་5.7ལྷག་ཙམ་ཟིན་ཡོད། ཡངས་ཤིང་རྒྱ་ཆེ་བའི་གྲོང་གསེབ་ནས་སྐྱེ་སྟོབས་ཀྱི་དཔལ་རབ་ཏུ་འབར་ཏེ་ཞིང་པ་དུང་ཕྱུར་མང་པོས་སྒྱུར་བཅོས་དང་འཕེལ་རྒྱས་ཀྱི་གྲུབ་འབྲས་དེ་བས་མང་བ་མཉམ་སྤྱོད་བྱེད་བཞིན་ཡོད།

ད་ལོའི་ལོ་སྟོད་དུ་རྒྱལ་ཡོངས་ཀྱི་གྲོང་གསེབ་ཀྱི་ཡུལ་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་11272ཟིན་པ་དེ་ལོ་གོང་མའི་དུས་མཚུངས་ལས་6.6%དངོས་སུ་འཕར་ནས། འཕར་ཚད་དེ་གྲོང་ཁྱེར་དང་གྲོང་རྡལ་གྱི་ཡུལ་མི་ལས་བརྒྱ་ཆའི་གྲངས་2.1གིས་མགྱོགས་པ་ཡོད་པ་རེད།