རྒྱ་མཚོས་བར་མ་ཆོད་པའི་མཛའ་མཐུན་ཟབ་མོ།
ལིན་ནན།
ཉིན་ཤས་གོང་ཀྲུའུ་ཞི་ཞི་ཅིན་ཕིང་གིས་པེ་ཅིང་མི་དམངས་ཚོགས་ཁང་ཆེ་མོར་ཀྲུང་གོར་2024ལོའི་ཀྲུང་ཧྥེའི་མཉམ་ལས་གླེང་སྟེགས་པེ་ཅིང་དབུ་ཚོགས་ལ་ཕེབས་པའི་སེ་ཧྲེར་གྱི་ཙུང་ཐུང་ལཱ་མུའུ་ཁཱ་ལཱ་ཝང་དང་མཇལ་འཛོམས་གནང་ཞིང་། རྒྱལ་ཁབ་གཉིས་པོའི་གཙོ་བདག་གིས་ཀྲུང་གོ་དང་སེ་ཧྲེར་གྱི་འབྲེལ་བ་དེ་འཐབ་ཇུས་རོགས་ཟླའི་འབྲེལ་བར་རིམ་སྤོར་བྱ་རྒྱུའི་ཁྱབ་བསྒྲགས་གནང་ཡོད།
ཀྲུང་གོ་དང་སེ་ཧྲེར་རྒྱལ་ཁབ་གཉིས་རྒྱ་མཚོ་ཆེན་པོའི་མཐའ་གཉིས་སུ་ཆགས་ཤིང་། མཛའ་གྲོགས་ཀྱི་འབྲེལ་བ་བཙུགས་ནས་འགྲོ་འོང་བྱས་པ་བརྒྱུད་རྒྱ་མཚོས་བར་མ་ཆོད་པའི་མཛའ་གྲོགས་འབྲེལ་བ་ཟབ་ཏུ་སོང་ཡོད། ཀྲུའུ་ཞི་ཞི་ཅིན་ཕིང་གིས་ཙུང་ཐུང་ལཱ་མུའུ་ཁཱ་ལཱ་ཝང་དང་མཇལ་འཛོམས་གནང་སྐབས་ཀྲུང་སེ་རྒྱལ་ཁབ་གཉིས་པོའི་འབྲེལ་བ་ནི་རྒྱལ་ཁབ་ཆེན་པོ་དང་ཆུང་ངུའི་དབར་གྱི་ཟོལ་མེད་ཀྱི་མཛའ་མཐུན་དང་། འདྲ་མཉམ་མཉམ་གནས། ལྟ་རེས་སྐྱོང་རེས། གཉིས་ཁེ་གཉིས་ཕན་བཅས་ཀྱི་དཔེ་མཚོན་ཅིག་ཡིན་ཞེས་གསུངས་ཡོད། ཙུང་ཐུང་ལཱ་མུའུ་ཁཱ་ལཱ་ཝང་གིས་སེ་ཀྲུང་དབར་གྱི་མཛའ་གྲོགས་ནི་ཕན་ཚུན་བརྩི་འཇོག་དང་གཉིས་ཁེ་གཉིས་ཕན་ལ་བརྟེན་ནས་བྱུང་བ་ཞིག་ཡིན་པས་རྒྱལ་ཁབ་གཉིས་པོའི་འབྲེལ་བ་ད་བར་འཕེལ་རྒྱས་ཡག་པོ་བྱུང་ཡོད་ཅེས་གསུངས་ཡོད།
ཀྲུང་གོ་ནི་ཨ་ཧྥེ་རི་ཁའི་རྒྱལ་ཁབ་ཁག་གི་རང་བྱུང་གི་གྲོགས་པོ་ཡག་པོ་དང་། རོགས་ཟླ་ཡག་པོ། སྤུན་ཟླ་ཡག་པོ་བཅས་ཡིན། ཀྲུང་ཧྥེའི་མཉམ་ལས་ནི་ལྷོ་ལྷོ་མཉམ་ལས་ཀྱི་དཔེ་མཚོན་ཞིག་རེད། ཀྲུང་གོ་ཕྱོགས་ཀྱིས་ཐོག་མཐའ་བར་གསུམ་དུ་ཀྲུའུ་ཞི་ཞི་ཅིན་ཕིང་གིས་བཏོན་གནང་བའི་ཨ་ཧྥེ་རི་ཁར་ལྷག་བསམ་ཟོལ་མེད་འཛིན་པའི་སྲིད་ཇུས་ཀྱི་འདུ་ཤེས་དང་ཡང་དག་པའི་བདེན་ཁེའི་ལྟ་བ་རྒྱུན་འཁྱོངས་བྱས་ཏེ། ཨ་ཧྥེ་རི་ཁའི་རྒྱལ་ཁབ་ཁག་དང་མཐུན་སྒྲིལ་མཉམ་ལས་ལ་ཤུགས་སྣོན་རྒྱག་རྒྱུ་དེ་ཀྲུང་གོའི་ཕྱི་འབྲེལ་གྱི་སྔོན་སྤེལ་ཁ་ཕྱོགས་སུ་བརྩིས་ཡོད། ཀྲུང་ཧྥེས་ཆབ་སྲིད་ཐད་ཕན་ཚུན་ཡིད་ཆེས་བྱེད་ཚད་ཟམ་མི་ཆད་པར་ཟབ་ཏུ་གཏོང་བ་དང་། ཁྱབ་ཁོངས་ཁག་གི་དངོས་སྒྲུབ་མཉམ་ལས་རྒྱ་ཆེར་གཏོང་བ། དམངས་སེམས་གཅིག་མཐུན་ཡོང་རྒྱུར་སྐུལ་འདེད་གཏོང་བ་བཅས་བྱས་ཏེ་དངོས་དངོས་རྗེན་རྗེན་གྱི་མཉམ་ལས་ཀྱི་ཕན་པ་ཕྱོགས་གཉིས་པོའི་མི་དམངས་ལ་ཐོབ་པར་བྱེད་ཀྱི་ཡོད།
སེ་ཧྲེར་ནི་ཨ་ཧྥེ་རི་ཁ་དང་ནུབ་ཧིན་རྡུ་རྒྱ་མཚོ་ཆེན་པོའི་རྒྱལ་ཁབ་གལ་ཆེན་ཞིག་རེད། ཀྲུང་སེ་རྒྱལ་ཁབ་གཉིས་པོའི་དབར་སྲོལ་རྒྱུན་མཛའ་གྲོགས་ཟབ་མོ་ཡོད། སེ་ཧྲེར་རོགས་སྐྱོར་བྱེད་མཁན་ཀྲུང་གོའི་སྨན་བཅོས་རུ་ཁག་གིས་བྱམས་སེམས་དང་ལག་རྩལ་ལ་བརྟེན་ནས་ས་གནས་དེ་གའི་དམངས་ཚོགས་ལ་བདེ་སྐྱིད་བསྐྲུན་པ་དང་། ཁུང་ཙི་སློབ་གླིང་གིས་རྒྱ་ཡིག་སློབ་ཁྲིད་དང་ཀྲུང་སེའི་རིག་གནས་སྤེལ་རེས་ལ་སྐུལ་འདེད་ཧུར་ཐག་བཏང་བ། ཀྲུང་གོའི་མ་འཇོག་ཁེ་ལས་ཀྱིས་ས་གནས་དེ་གའི་དཔལ་འབྱོར་འཕེལ་རྒྱས་ལ་རོགས་སྐྱོར་བྱས་པ་བཅས་ལས་རྒྱལ་ཁབ་གཉིས་པོའི་མི་དམངས་དབར་ཉིན་རེ་བཞིན་ཕན་ཚུན་རྒྱུས་མངའ་དང་འཆམ་མཐུན་དུ་འགྱུར་བཞིན་ཡོད།
2024ལོའི་ཀྲུང་ཧྥེའི་མཉམ་ལས་གླེང་སྟེགས་པེ་ཅིང་དབུ་ཚོགས་ཐོག་ཀྲུང་ཧྥེའི་མཉམ་ལས་ཀྱི་འཆར་གཞི་གསར་པ་བཀོད་ནས་དུས་རབས་གསར་པའི་ཀྲུང་ཧྥེའི་འབྲེལ་བའི་འཕེལ་རྒྱས་ལ་སྒུལ་ཤུགས་གསར་པ་བསྣན་ཡོད་ལ། ཀྲུང་སེའི་འབྲེལ་བ་འཕེལ་རྒྱས་གཏིང་ཟབ་འགྲོ་རྒྱུར་གོ་སྐབས་གསར་པའང་བསྐྲུན་ཡོད། ཀྲུང་གོ་ཕྱོགས་ཀྱིས་སེ་ཧྲེར་ཕྱོགས་དང་མཉམ་དུ་འཐབ་ཇུས་རོགས་ཟླའི་འབྲེལ་བ་འཛུགས་རྒྱུ་དེ་འགོ་འཛུགས་ས་གསར་པར་བརྩིས་ནས་གཅིག་སེམས་གཅིག་སྦྲེལ་དང་། ཁྱབ་ཁོངས་ཁག་གི་མཉམ་ལས་ཀྱི་མངོན་མེད་སྟོབས་ཤུགས་སྔོག་འདོན་གང་ལེགས་བྱེད་པ། དངོས་སྒྲུབ་མཉམ་ལས་ཀྱི་གྲུབ་འབྲས་གསར་པ་གཏོད་པ། ཀྲུང་གོ་དང་སེ་ཧྲེར་གྱི་འབྲེལ་བ་རྒྱུན་མཐུད་འཕེལ་རྒྱས་འགྲོ་བར་སྐུལ་འདེད་གཏོང་བ་བཅས་བྱས་ནས་རྒྱལ་ཁབ་གཉིས་པོའི་མི་དམངས་ལ་ཕན་པ་དེ་བས་མང་པོ་འདོགས་རྒྱུ་རེད།
(རྩོམ་པ་པོ་ནི་སེ་ཧྲེར་དུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཡིན)