སེ་འབྲུའི་མེ་ཏོག་པིང་ཧུའུ་སྡེ་ཁུལ་བཞད། མི་རིཌ་མཐུན་སྒྲིལ་ཁྱིམ་ཚང་གཅིག་ལྟར་བརྩེ།
—— མཚོ་སྣ་གྲོང་ཁྱེར་གྱི་གཞོན་ནུ་དབྱང་ཀྲོའུ་ལ་བསྐྱོད་པའི་སྐོར་བཀོད་པ།
ཉེ་ཆར། ཕུགས་འདུན་ཡིད་ལ་བཅངས་པའི་གཞོན་ནུ་ལོ་ཆུང་ཁག་གཅིག་མཚོ་སྣ་གྲོང་ཁྱེར་ནས་ཐོན་ཏེ་སྤྱིར་བཏང་མིན་པའི་འགྲུལ་བཞུད་ལ་ཞུགས། ཁོང་ཚོ་རི་ཆུ་ཁྲི་སྟོང་བརྒལ་ནས་ལོ་རྒྱུས་ཡུན་རིང་ལ་རིག་གནས་ཀྱི་འོད་སྟོང་འཕྲོ་བའི་དབྱང་ཀྲོའུ་གྲོང་ཁྱེར་དུ་བསྐྱོད་དེ“སེ་འབྲུའི་མེ་ཏོག་པིང་ཧུའུ་སྡེ་ཁུལ་བཞད། མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ”ཞེས་པ་བརྗོད་དོན་གཙོ་བོར་བྱས་པའི་ཞིབ་འཇུག་སློབ་སྦྱོང་གི་སྤེལ་རེས་བྱེད་སྒོར་ཞུགས་པ་རེད།
བྱེད་སྒོའི་ཉིན་དེར། ཞོགས་པར་ཉི་མའི་འོད་ཟེར་ས་གཞིར་འཕྲོས་མཚམས་སུ་དབྱང་ཀྲོའུ་གྲོང་ཁྱེར་གྲོང་བྱང་ཁྲོམ་གཞུང་གི་པིང་ཧུའུ་སྡེ་ཁུལ་དུ་དམིགས་བསལ་གྱི་དགའ་བསུ་ཞུ་བའི་མཛད་སྒོ་ཞིག་འཚོགས་ཤིང་། “གངས་ལྗོངས་ས་མཐོ་ནས་ཡོང་བའི་ཕྲུ་གུ་ཚོར་དགའ་བསུ་ཞུ”ཞེས་གྲོང་བྱང་ཁྲོམ་གཞུང་པིང་ཧུའུ་སྡེ་ཁུལ་གྱི་ཏང་དམངས་ཞབས་ཞུ་ལྟེ་གནས་སུ་པིང་ཧུའུ་སྡེ་ཁུལ་ཏང་ཨུད་ཀྱི་ཧྲུའུ་ཅི་ཏའེ་མོང་དང་ཐའེ་དབྱང་ཡུས་ཏང་ཀྲི་པུའི་ཧྲུའུ་ཅི་ཧྲུའུ་ཧྥང་ཅུན་གྱིས་སྤྲོ་སེམས་འཁོལ་བའི་ངང་བསུ་བ་ཞུས་ནས་ཡུལ་དེར་ཐོག་མར་སླེབས་པའི་མཚོ་སྣའི་དགེ་སློབ་ཚོར་ཕ་ཁྱིམ་དུ་ལོག་འདྲའི་ཚོར་སྣང་སྦྱིན་པ་རེད། ཧྲུའུ་ཅི་ཏའེ་མོང་གིས“འདི་ག་ནི་ཁྱེད་ཚོའི་ཁྱིམ་གཉིས་པ་ཡིན། དབྱང་ཀྲོའུ་རུ་འཚོ་བ་སྐྱེལ་རིང་ཁྱེད་ཚོ་ཉིན་ལྟར་སྤྲོ་ཞིང་སྐྱིད་པའི་རེ་བ་ཡོད”ཅེས་མཛའ་བརྩེའི་ངང་བཤད།
དེ་རྗེས་ཚང་མ་སྡེ་ཁུལ་གྱི་མཉམ་སྤྱོད་མེ་ཏོག་ལྡུམ་རར་བསྐྱོད་ནས་དོན་སྙིང་ཟབ་མོ་ལྡན་པའི་ཤིང་འཛུཌ་བྱེད་སྒོ་སྤེལ་འགོ་ཚུགས། དང་བླངས་པའི་གཞོགས་འདེགས་འོག་མཚོ་སྣ་དང་དབྱང་ཀྲོའུ་ཡི་ཕྲུ་གུ་ཚོས་མཉམ་དུ་མཛའ་གཅུགས་མཚོན་པའི་ལྕང་མ་མང་པོ་བཙུགས།
དབྱར་གཞུང་གི་ཉི་འོད་དང་ཕྲུ་གུ་ཚོའི་སེམས་རྩ་འཁོལ་པོ་ལས་དབྱང་ཀྲོའུ་ཀྲུའུ་ཡུས་མཚོ་ཁུག་སྲོག་ཆགས་གླིང་དེ་དགོད་སྒྲས་ཁེངས་པའི་དགའ་ཚལ་ཞིག་ཏུ་གྱུར་ལ། སྲོག་ཆགས་གླིང་དེ་ནས་མཚོ་སྣ་གྲོང་ཁྱེར་གྱི་ཕྲུ་གུ་ཚོར་རང་བྱུང་རྟེན་མཛོད་ཁང་དུ་སླེབས་པ་ལྟ་བུའི་སྣང་བ་བྱུང་།
མཚོ་སྣ་གྲོང་རྡལ་སློབ་ཆུང་ལོ་རིམ་ལྔ་པའི་སློབ་མ་པད་མ་ལྷ་འཛོམས་ཀྱིས“དེ་རིང་ངས་འདི་ནས་དུས་རྒྱུན་དཔེ་དེབ་ཐོག་ནས་མཐོང་བའི་སྲོག་ཆགས་མང་པོ་མཐོང་བྱུང་། ཐེངས་འདིར་སྲོག་ཆགས་གླིང་དུ་བསྐྱོད་དེ་ཐག་ཉེ་ནས་སྲོག་ཆགས་དེ་དག་མཐོང་བ་མ་ཟད། རང་ཉིད་ཀྱི་ཚེ་སྲོག་དང་རང་བྱུང་ཁམས་ལ་བཅངས་པའི་གུས་སྐྲག་དང་གཅེས་སྐྱོང་གི་བརྩེ་སེམས་ཀྱང་འཕེལ་བྱུང”ཞེས་བཤད།
ཕྱི་དྲོར་མཚོ་སྣ་གྲོང་ཁྱེར་གྱི་སློབ་ཆུང་སློབ་མ་ཚོ་རེ་སྒུག་ཆེན་པོ་བྱེད་པའི་ཚན་རྩལ་ཕོ་བྲང་དུ་བསྐྱོད། སྦྱོར་ར་ཤང་སློབ་ཆུང་ལོ་རིམ་ལྔ་པའི་སློབ་མ་ཨོ་རྒྱན་ཚེ་རིང་གིས་སེམས་འགུལ་ཐེབས་པའི་ངང“གནས་འདི་ནས་ང་རང་ལ་ཡུལ་དུས་ལས་བརྒལ་ནས་འཇིག་རྟེན་གཞན་ཞིག་ཏུ་སླེབས་པ་ལྟ་བུའི་ཚོར་སྣང་བྱུང”ཞེས་བཤད།
“ད་རེས་ཀྱི་བྱེད་སྒོ་ལས་མཛའ་མཐུན་གྱི་གྲོགས་པོ་རྙེད་པ་མ་ཟད། རང་ཉིད་ཀྱི་མཐོང་རྒྱ་ཡང་ཆེ་རུ་ཕྱིན་ལ། སེམས་ནང་དུ་མི་རིགས་མཐུན་སྒྲིལ་དང་ཚན་རིག་ལ་དགའ་ཞེན་གྱི་ས་བོན་ཞིག་བཏབ་བྱུང་། ཕ་ཡུལ་དུ་ལོག་རྗེས་ངས་ངེས་པར་དུ་སློབ་སྦྱོང་ཡག་པོ་བྱས་ཏེ་ཤེས་བྱ་དང་སྟོབས་ཤུགས་ལ་བརྟེན་ནས་མེས་རྒྱལ་དར་རྒྱས་ཡོང་ཆེད་རང་ཉིད་ཀྱི་སྟོབས་ཤུགས་སྐྱེས་སུ་འབུལ་རྒྱུ་ཡིན”ཞེས་མཚོ་སྣ་གྲོང་རྡལ་སློབ་ཆུང་ལོ་རིམ་ལྔ་པའི་སློབ་མ་ཀུན་དགའ་བཀྲ་ཤིས་ཀྱིས་ཚོར་སྣང་ཟབ་མོའི་ངང་བཤད།
ད་རེས་ཀྱི་བྱེད་སྒོའི་འགན་འཁུར་བ་མཚོ་སྣ་གྲོང་ཁྱེར་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་རྡོ་བསྟན་གྱིས“མཚོ་སྣ་གྲོང་ཁྱེར་གྱི་ཕྲུ་གུ་ཚོའི་ངོས་ནས་བརྗོད་ན། ད་རེས་དབྱང་ཀྲོའུ་རུ་བསྐྱོད་པ་ནི་མཐོང་ཚོར་དང་སེམས་ཁམས་ཀྱི་སྟོན་མོ་གཟབ་རྒྱས་ཤིག་ཡིན་པ་མ་ཟད། མི་རིགས་མཐུན་སྒྲིལ་གྱི་སློབ་གསོ་གཏིང་ཟབ་ཞིག་དེ་བས་ཀྱང་ཡིན། ཁོང་ཚོས་འདི་གར་རིག་གནས་མི་འདྲ་བའི་ཡིད་དབང་འཕྲོག་ཤུགས་མྱོང་ཚོར་བྱས་ལ། ཕན་ཚུན་བརྩི་འཇོག་དང་བསྟུན་མཁས་བྱེད་ཤེས་པ་མ་ཟད། བརྗེད་པར་དཀའ་བའི་བརྒྱུད་རིམ་འདི་ལས་སློབ་སྦྱོང་ལ་འབད་བརྩོན་བྱེད་པར་ལྕག་སྐུལ་ཆེན་པོ་ཐེབས་ངེས་རེད”ཅེས་བཤད།