ཉེ་ཆར་མཚོ་བོད་ལྕགས་ལམ་ཀླུ་མོ་སྔོ་རི་བབས་ཚུགས་སུ་ཀྲུང་གོ་ལྕགས་ལམ་མཚོ་བོད་ཚོགས་པ་ཚད་ཡོད་ཀུང་སི་ལྷ་སའི་རྨང་གཞིའི་སྒྲིག་བཀོད་དུམ་བུ་དང་ཀྲུང་གོ་ལྕགས་ལམ་ཅུས་བཅུ་གཉིས་པའི་བདག་སྐྱོང་ཀུང་སི་ནས་ཡིན་པའི་ལས་བཟོ་90ལྷག་ཙམ་ལམ་ཐིག་གི་གཞོགས་གཅིག་ཏུ་འཛོམས་ནས་ཀླུ་མོ་སྔོ་རིའི་བབས་ཚུགས་ཀྱི་སྲུབས་མེད་ལམ་ཐིག་སྒྱུར་བཀོད་ལས་དོན་སྤེལ་ཉེར་ཡོད་པ་དང་། ཨར་ལས་འགན་འཁུར་བ་ཀའོ་ཆན་ཧྲེང་གིས་ལས་ཀ་མ་བྱས་གོང་གི་ལས་བགོས་བཀོད་སྒྲིག་བྱས་པ་རེད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་མཚོ་བོད་ལྕགས་ལམ་གོར་ལྷ་དུམ་བུའི་བར་མཚམས་བརྒལ་བའི་སྲུབས་མེད་ལམ་ཐིག་སྒྱུར་བཀོད་ཨར་ལས་དེ་ཟླ་9ཚེས་1ཉིན་ནས་འགོ་ཚུགས་པ་དང་། ཟླ་11ཚེས་30ཉིན་ལས་མཇུག་འགྲིལ་རྒྱུའི་འཆར་གཞི་ཡོད་ཅིང་། དུས་ཡུན་ཉིན་90ཡི་རིང་མཚོ་བོད་ལྕགས་ལམ་གོར་ལྷ་དུམ་བུའི་ཁྱོན་བབས་ཚུགས་27གྱི་སྤྱི་ལེ་11.4ཟིན་པའི་ལམ་ལྕགས་བརྗེ་བའི་ལས་འགན་ལེགས་སྒྲུབ་བྱེད་དགོས་ཀྱི་ཡོད། བར་མཚམས་བརྒལ་བའི་སྲུབས་མེད་ལམ་ཐིག་སྒྱུར་བཀོད་ཨར་ལས་མ་བྱས་གོང་། ལྷ་སའི་རྨང་གཞིའི་སྒྲིག་བཀོད་དུམ་བུ་དེ་ཉིད་སྒྲིག་ཆས་དོ་དམ་ཚན་པ་ཞིག་ཡིན་པའི་ངོས་ནས་ཀྲུང་གོ་ལྕགས་ལམ་ཅུས་བཅུ་གཉིས་པའི་བདག་སྐྱོང་ཀུང་སིར་གཞོགས་འདེགས་བྱས་ཏེ་ཨར་ལས་སྒྲིག་འཛུགས་དང་། འགོག་སྲུང་མཉམ་འཛིན། མི་སྣའི་བདེ་འཇགས། སྤུས་ཚད་བསྐྱར་བཤེར་སོགས་ཀྱི་ཐད་ལག་རྩལ་ཇུས་གཞི་རྩིས་སྤྲོད་དོན་འཁྱོལ་དང་། ས་གནས་ས་ཐོག་གི་ཨར་ལས་དོ་དམ་ཚོད་འཛིན་ལ་ཤུགས་སྣོན། ཨར་ལས་ལ་གོ་རིམ་ལྡན་པའི་ངང་སྐུལ་འདེད་གཏོང་རྒྱུ་འགན་ལེན་བཅས་བྱས་པ་རེད།

“བར་མཚམས་བརྒལ་བའི་སྲུབས་མེད་ལམ་ཐིག་སྒྱུར་བཀོད་ཨར་ལས་བྱས་པ་བརྒྱུད། ལམ་ལྕགས་མཐུད་སྣེ་ཆེས་ཆེར་ཉུང་དུ་ཕྱིན་ནས་ལམ་ཐིག་སྒྲིག་ཆས་ཀྱི་སྤུས་ཚད་སྔར་བས་མཐོ་རུ་ཕྱིན་ཏེ་འགྲུལ་པ་ཕྱིར་སྐྱོད་པའི་སྐྱིད་སྣང་ཆེ་རུ་ཏན་ཏིག་འགྲོ་ཐུབ། དེ་དང་ཆབས་ཅིག་འཁོར་ཁང་ཚན་ཁག་ཚོགས་ཆུང་གི་ཉམས་བཟོའི་ལས་འབོར་ཡང་ཉུང་དུ་གཏོང་ཐུབ”ཅེས་ལྷ་སའི་རྨང་གཞིའི་སྒྲིག་བཀོད་དུམ་བུའི་ལས་དོན་ཉམས་བཟོ་ལག་རྩལ་ལྟེ་གནས་ཀྱི་ཀྲུའུ་རེན་གཞོན་པ་ཀན་ཧའེ་ཡུན་གྱིས་ངོ་སྤྲོད་བྱས།