ཟླ་9ཚེས་15ཉིན་2024ལོའི་པེ་ཅིང་གི་ཟླ་མཆོད་དུས་ཆེན་དང་རྒྱལ་སྟོན་དུས་ཆེན་གྱི་ལྒང་བཞུའི་སྤྲོ་གསེང་འདུ་ཚོགས་དམངས་ཚོགས་ལ་སྒོ་ཕྱེ་བ།

ཡང་ལོ་གཅིག་དུས་གཅིག་གི་ཟླ་མཆོད་དུས་ཆེན་འཆར་ཞིང་། མི་རྣམས་ཀྱིས་རང་ཡུལ་གྱི་ཁྱད་ཆོས་ལྡན་པའི་རིག་གནས་བྱེད་སྒོ་སྤེལ་ནས་དུས་ཆེན་ལ་བསུ་བ་ཞུས། ས་གནས་ཁག་དང་སྡེ་ཚན་ཁག་གིས་ཐབས་མང་མཉམ་སྤྱོད་ཀྱིས་མཁོ་སྤྲོད་ལ་འགན་ལེན་དང་ཟོག་གོང་བརྟན་པོ་ཡོང་བར་བྱས་པས་འཛད་སྤྱོད་ཁྲོམ་རར་གསོན་ཤུགས་ཀྱིས་ཁེངས།

རིག་གནས་དང་ཡུལ་སྐོར་ཁྲོམ་ར་ནས་གསོན་ཤུགས་མངོན་པ།

སྲོལ་རྒྱུན་གྱི་དམངས་སྲོལ་ལ་གཞི་ཚུགས་པ་དང་རིག་གནས་ཀྱི་རྣམ་པ་བཏོད་ཅིང་། ཟླ་མཆོད་དུས་ཆེན་རིང་ས་གནས་ཁག་གིས་རིག་གནས་དང་ཡུལ་སྐོར་གྱི་ཐོན་རྫས་གསར་པ་དང་། ལས་རྣམ་གསར་པ། རྣམ་པ་གསར་པ་བཅས་ཧུར་ཐག་བཏོད་དེ་འཛད་སྤྱོད་པའི་དགོས་མཁོ་མི་འདྲ་བ་དེ་བས་ལེགས་པའི་ངང་བསྐངས་ནས་དུས་ཆེན་གྱི་ཁྲོམ་རའི་གསོན་ཤུགས་འཕེལ་བར་བྱས་ཡོད།

ཅི་ལིན་ཞིང་ཆེན་ཁྲང་ཁྲུན་གྲོང་ཁྱེར་གྱི་ཅིང་གཡོད་ཐན་མཛེས་ལྗོངས་ཁུལ་དུ་གྱེན་འཕྱུར་ཆུ་མིག་ལས་རོལ་དབྱངས་ཀྱི་འགྱུར་ཁུག་དང་བསྟུན་ནས་མཁའ་དབྱིངས་སུ་ཆུ་འཕྱོ་བར་ཡུལ་སྐོར་བ་ཇི་སྙིད་ཅིག་གི་ཡིད་དབང་རབ་ཏུ་འཕྲོགས། ཐང་ཆེན་གྱི་དཀྱིལ་དུ་ཧེ་ལུང་ཅང་ནས་ཡིན་པའི་ཡུལ་སྐོར་བ་ཁྲེང་ཅ་མིན་དང་གྲོགས་པོ་ཚོས་འཁྲབ་སྟོན་མི་སྣ་དང་མཉམ་དུ་དྲན་རྟེན་པར་རྒྱག་བཞིན་མཆིས། “ལམ་ཐག་ངེས་ཅན་ཞིག་སྐྱོད་རིམ་བཞིན་བྱེད་སྒོ་གསར་པ་སྤེལ་བ་དང་འཕྲད་ཀྱི་འདུག དུས་ཆེན་གྱི་རྣམ་པ་ཧ་ཅང་ཟབ་མོ་འདུག”ཟླ་མཆོད་དུས་ཆེན་གྱི་གུང་གསེང་རིང་ཅིང་གཡོད་ཐན་མཛེས་ལྗོངས་ཁུལ་གྱིས་རིག་གནས་བསམ་བཀོད་ཀྱི་ཐེལ་ཙེ་གཟེད་པ་དང་མངོན་མིན་རིག་གནས་ཤུལ་བཞག་གི་ཚོང་འདུས་སོགས་བྱེད་སྒོ་སྣ་ཚོགས་ཇུས་འགོད་བྱས་ནས་ཡུལ་སྐོར་བའི་ཡུལ་སྐོར་ཉམས་ལེན་ཕུན་སུམ་ཚོགས་སུ་བཏང་ཡོད། ཁྲེན་ཅ་མིན་གྱིས“ང་ཚོས་ད་དུང་གུར་ཞིག་གཡར་ནས་ནགས་ཚལ་ཁྲོད་ཟླ་འོད་ལ་ལྟ་བར་འགྲོ་རྩིས་ཡོད”ཅེས་བཤད།

ཟླ་མཆོད་དུས་ཆེན་གྱི་གུང་གསེང་རིང་རང་རྒྱལ་གྱི་རིག་གནས་དང་ཡུལ་སྐོར་གྱི་དགོས་མཁོ་གཅིག་སྡུད་ཐོག་ཆེ་རུ་ཕྱིན་པས་ཡུལ་སྐོར་ཕྱིར་སྐྱོད་དེ་ཀུན་གྱིས་དོ་སྣང་བྱེད་པའི་གདམ་ག་ཞིག་ཏུ་གྱུར་ཡོད། ཟླ་མཆོད་དུས་ཆེན་གྱི་ངལ་གསོའི་ཉིན་དང་པོར་ཕྱིར་སྐྱོད་ཀྱི་ཚ་རླབས་འཕྱུར་ཞིང་། འགྲིམ་འགྲུལ་སྐྱེལ་འདྲེན་པུའི་གྲངས་གཞི་ལས་མངོན་པར། ཟླ་9ཚེས་15ཉིན་སྤྱི་ཚོགས་ཡོངས་ཀྱི་ས་ཁོངས་ལས་བརྒལ་ནས་འགྲོ་འོང་བྱེད་ཚད་མི་ཐེངས་ཁྲི་21592.4ཟིན་པ་དེ་2023ལོའི་དུས་མཚུངས་ལས་37.9%འཕར་ཡོད།

དུས་ཆེན་གྱི་མཉམ་འཛོམས་ལས་དྲོ་སྐྱིད་མངོན་པ།

ཟླ་མཆོད་དུས་ཆེན་གྱི་གུང་གསེང་རིང་ཨན་ཧུའེ་ཞིང་ཆེན་ཁྲུའུ་ཀྲོའུ་གྲོང་ཁྱེར་ཆོན་ཅའོ་རྫོང་དུ་གནས་པའི་སྒར་སྡོད་རྟེན་གཞིའི་འགྲུལ་རྒྱུན་ཆེས་ཆེར་མང་དུ་ཕྱིན་ཡོད། ཨན་ཧུའེ་ཅང་ཧའེ་སྐྱེ་ཁམས་ཡུལ་སྐོར་འཕེལ་རྒྱས་ཚད་ཡོད་ཀུང་སིའི་ཁྲིམས་མི་ཅང་ཞུའེ་ཧྥུང་གིས“དུས་ཆེན་རིང་ནང་མི་མཉམ་འཛོམས་བྱེད་འདོད་ཆེ་བས། ང་ཚོས་ཁྱིམ་ཚང་གི་ཡུལ་སྐོར་དང་ཕྲུག་ཁྲིད་ཡུལ་སྐོར་ལ་ལས་སྟེགས་བསྐྲུན་ནས་ཕྱི་རོལ་གྱི་བྱེད་སྒོ་ཕུན་སུམ་ཚོགས་པོ་ཞིག་སྤེལ་བ་ཡིན”ཞེས་བཤད། ཡུལ་སྐོར་བ་ཝུའུ་ཏི་ཡིས་ནང་མི་ཚང་མ་ཁྲིད་དེ་ཆེད་མངགས་རླངས་འཁོར་བཏང་ནས་དེ་གར་ཡོང་ཞིང་། ཁོང་གིས“དེའི་ཁོར་ཡུག་མཛེས་ཤིང་ལྟ་ན་སྡུག་ལ་བྱེད་སྒོའི་རྣམ་གྲངས་ཀྱང་མང་པོ་འདུག ནང་མི་ཚང་མ་དེ་གར་མཉམ་འཛོམས་བྱུང་བར་ཧ་ཅང་དགའ་པོ་བྱུང”ཞེས་བཤད།

ཧྲན་ཏུང་ཞིང་ཆེན་ཅ་ཞང་རྫོང་འཇའ་ཚོན་གཅེས་སེམས་ཨ་མའི་ཞབས་ཞུ་རུ་ཁག་གི་དང་བླངས་པ་8ཟླ་མཆོད་དུས་ཆེན་གྱི་གུང་གསེང་རིང་མཱ་ཚུན་གྲོང་རྡལ་གཅེས་སེམས་གློག་ཤུགས་སློབ་ཁང་དུ་བསྐྱོད་དེ་ཕྲུ་གུ་ཚོ་དང་མཉམ་དུ་ཟླ་མཆོད་བག་ལེབ་བཟོ་བ་དང་། ཤོག་དྲས་འདྲ་གཟུགས་བཟོ་བ། ལྒང་བཞུ་བཟོ་བ། གནའ་བོའི་སྙན་ངག་གྱེར་འདོན་བཅས་བྱས་པ་རེད། ཡུད་ཙམ་སོང་རྗེས་ཟླ་མཆོད་བག་ལེབ་དབྱིབས་ཀྱི་ལྒང་ཞུ་སྣ་ཚོགས་སློབ་ཁང་ནང་བཀལ་ནས་ཟླ་མཆོད་དུས་ཆེན་གྱི་རྣམ་པ་ཟབ་མོ་མངོན་པ་མ་ཟད། ཕྲུ་གུ་ཚོར་ཁྱིམ་ཚང་གི་དྲོ་སྐྱིད་ཀྱང་སྦྱིན་ཡོད།

ཁྲོམ་རའི་མཁོ་སྤྲོད་ལ་འགན་ལེན་ཡོད་པ།

ཟླ་མཆོད་དུས་ཆེན་གྱི་གུང་གསེང་རིང་། ཞིང་ཞོར་ཉོ་ཚོང་ཁྲོམ་ར་དང་ཟོག་ཉོ་ལྟེ་གནས་སུ་མི་ཚོགས་ཀྱིས་ཁེངས་པ་དང་། མཛེས་ལྗོངས་ཁུལ་ཆེ་གྲས་ཁག་དང་མི་སྣ་འདུ་འཛི་ཆེ་བའི་ས་ཁོངས་སུ་གློག་སྤྱོད་ཚད་མངོན་གསལ་དོད་པོས་འཕར་ཡོད། ས་གནས་ཁག་དང་སྡེ་ཚན་ཁག་གིས་ཁྲོམ་རའི་ལྟ་ཞིབ་ཚད་ལེན་ལ་ཤུགས་སྣོན་བརྒྱབ་ནས་དམངས་འཚོའི་ཚོང་ཟོག་གལ་ཆེན་གྱི་རིན་གོང་བརྟན་པོ་ཡོང་བ་དང་། འཚོ་བའི་མཁོ་ཆས་འདང་ངེས་ཡོད་པ། གློག་ཤུགས་མཁོ་འདོན་བདེ་འཇགས་དང་བརྟན་པོ་ཡོང་བ་བཅས་ལ་འགན་ལེན་བྱས་ཡོད།

ཧོ་ནན་ཞིང་ཆེན་ཀྲུང་མོའུ་རྫོང་དུ་གནས་པའི་དབན་པང་རྒྱལ་སྤྱིའི་ཞིང་ལས་ཐོན་རྫས་སྡེབ་ཚོང་ཁྲོམ་ར་ནི་དབུས་རྒྱུད་ས་ཁུལ་གྱི་ཞིང་ལས་ཐོན་རྫས་སྡེབ་ཚོང་ཁྲོམ་ར་ཆེ་ཤོས་ཀྱི་གྲས་ཤིག་རེད། ཟླ་9ཚེས་16ཉིན་ཉོ་ཚོང་ཁུལ་ཁག་ཏུ་ཉོ་ཆ་རྒྱག་པར་ཡོང་མཁན་ཚོང་འགྲུལ་གྱི་རྒྱུན་ཆད་རྒྱུ་མེད་ཅིང་། ཚོང་པ་ཞུས་ཕེ་ཧུང་གིས་ཐུམ་སྒྲིལ་སྤུས་ལེགས་བརྒྱབ་པའི་ཤིང་ཏོག་སྒམ་མང་པོ་རླངས་འཁོར་ནང་བླུག་བཞིན་མཆིས། “ཟླ་མཆོད་དུས་ཆེན་རིང་ཤིང་འབྲས་འཛད་སྤྱོད་ཀྱི་དགོས་མཁོ་ཆེན་པོ་ཡོད་པས་ང་ཚོས་སྔ་སྣུར་དུ་གྲ་སྒྲིག་ཡག་པོ་བྱས་ཏེ་ཁྲོམ་རའི་མཁོ་སྤྲོད་འདང་ངེས་ཡོང་བར་འགན་ལེན་བྱེད་ཀྱི་ཡོད”ཅེས་ཞུས་ཕེ་ཧུང་གིས་བཤད། དུས་ཆེན་རིང་ཀྲུང་མོའུ་རྫོང་གིས་གུང་གསེང་ཁྲོམ་རའི་ས་ཚིགས་མང་པོ་ནས་ལྟ་ཞིབ་ཚད་ལེན་བྱ་རྒྱུར་ཤུགས་སྣོན་བརྒྱབ་སྟེ་དུས་ཐོག་ཏུ་དངོས་ཟོག་གསོག་འཇོག་དང་རིན་གོང་ཁོང་དུ་ཆུད་པར་བྱས་ནས“ཚོང་ཟོག་མཁོ་སྤྲོད་ཀྱི་སྣེ་མོ”ནས“སིལ་ཚོང་སྣེ་མོའི”བར་གྱི་འཁོར་འབྲེལ་ཧྲིལ་པོའི་འཁོར་སྐྱོད་བརྟན་པོ་ཡོང་བར་འགན་ལེན་བྱས་ཏེ་མཁོ་ཚོང་གཉིས་དར་དང་དངོས་ཟོག་འབེལ་ལ་རིན་གོང་བརྟན་པོ་ཡོང་རྒྱུར་སྐུལ་འདེད་བཏང་ཡོད།

“ཟླ་མཆོད་དུས་ཆེན་གྱི་གུང་གསེང་ནི་ཚོང་ར་དང་སྒོ་རྩིས་ཚོང་ཁང་དུ་བྲིན་ཚོང་བྱེད་མང་བའི་དུས་ཚིགས་ཡིན། ཉིང་ཞ་ཡིས་བྲིན་ཚོང་གི་བྱེད་སྒོ་རབ་དང་རིམ་པ་ཐེངས་134སྤེལ་བ་དང་འབྲེལ་དམངས་འཚོའི་ཚོང་ཟོག་གལ་ཆེན་མཁོ་སྤྲོད་ལ་འགན་ལེན་དང་རིན་གོང་བརྟན་པོ་ཡོང་བའི་ལས་དོན་ཧུར་ཐག་བསྒྲུབས་ནས་རིགས་ཁག་གི་ཐོན་རྫས་གྲ་སྒྲིག་འདང་ངེས་དང་རིན་གོང་བརྟན་ལ་སྤུས་ཚད་ལེགས་པོ་ཡོང་བར་འགན་ལེན་བྱས་ཡོད”ཉིང་ཞ་ཧུད་རིགས་རང་སྐྱོང་ལྗོངས་ཚོང་དོན་ཐིང་ཁྲོམ་ར་མ་ལག་འཛུགས་སྐྱོང་ཁྲུའི་ཁྲུའུ་ཀྲང་ཚའོ་ཞན་ཧུང་གིས། མིག་སྔར་རང་སྐྱོང་ལྗོངས་ཀྱི་གཙོ་གནད་ལྟ་ཞིབ་ཚད་ལེན་གྱི་སྡེབ་ཚོང་ཁྲོམ་ར་8དུ་གྲབས་གསོག་བྱེད་ཚད་ཏུན་4000ཡན་ཟིན་པ་དེའི་ཐོག་འཁོར་རྒྱུག་ཁེ་ལས་གཞན་དག་གི་མཛོད་ཉར་བསྡོམས་ན་དེས་ཉིང་ཞའི་གཟའ་འཁོར་གཅིག་གི་ཁྲོམ་རའི་མཁོ་སྤྲོད་སྐོང་ཐུབ་ཀྱི་ཡོད། དེ་དང་ཆབས་ཅིག་ལྟ་སྐུལ་ཞིབ་བཤེར་བྱེད་ཤུགས་རྒྱུན་ཆད་མེད་པར་ཆེ་རུ་བཏང་ནས་འཛད་སྤྱོད་པས་དུས་ཆེན་རིང་ཉོ་དུས་བློ་བདེ་བ་དང་། ཟ་དུས་བློ་བདེ་བ། སྤྱོད་དུས་བློ་བདེ་བ་བཅས་ཡོང་བ་བྱ་རྒྱུ་ཡིན་ཞེས་བཤད།

ཟླ་མཆོད་དུས་ཆེན་གྱི་གུང་གསེང་རིང་རིག་གནས་བྱེད་སྒོ་སྣ་ཚོགས་ཡོད་པ་དང་དམངས་སྲོལ་མྱོང་རོལ་ཕུན་སུམ་ཚོགས་པས། སྲོལ་རྒྱུན་རིག་གནས་ཀྱི་ཡིད་དབང་འཕྲོག་ཤུགས་གང་ལེགས་མངོན་པ་དང་། མཛེས་ལྗོངས་ཁུལ་དུ་མི་ཚོགས་མང་བ་དང་། ཁྲོམ་རའི་མཁོ་སྤྲོད་འདང་ངེས་ཡོད་པ། དཔལ་འབྱོར་འཕེལ་རྒྱས་ཀྱི་གསོན་ཤུགས་འཕེལ་བ་བཅས་ཡོད་པ་རེད།

(འདི་ག་ཚགས་པར་གྱི་གསར་འགོད་པ་ཝང་ཤིན་གཡོད་སོགས་བཅར་འདྲི་དང་རྩོམ་འབྲིར་ཞུགས་ཡོད)