“ཝུའུ་ཤང་གི་ཁྲེ་ལྷད་མེད་པ་མ་ཟད། འཚོ་བཅུད་ཀྱང་ཆེན་པོ་ཡོད”ཅེས་ཧྲན་ཤིས་ཞིང་ཆེན་ཁྲང་ཀྲེ་གྲོང་ཁྱེར་ཝུའུ་ཤང་རྫོང་ཧྲང་སི་ཤང་ལིང་ཐུའོ་གྲོང་ཚོའི་ཞིང་ནང་དུ་ཡུལ་མི་ཝུའེ་པའོ་ཡུས་ཀྱིས་མགོ་ལྕོག་ལྡེམ་པའི་སྙེ་མ་པར་དུ་བླངས་ཏེ་དྲ་གྲོགས་ཚོར་ས་གནས་དེ་ག་ནས་ཐོན་པའི་ཁྲེ་ངོ་སྤྲོད་བྱེད་བཞིན་མཆིས།

ཝུའུ་ཤང་ནི་དམག་སྡེ་བརྒྱད་པའི་སྤྱི་ཁྱབ་སི་ལིང་པུའི་གནས་ས་རྙིང་པ་ཡིན་པ་དང་2019ལོར་དབུལ་སྒྲོབ་ཐུབ་ནས་དབུལ་ཞྭ་ཕུད་ཡོད། ད་ཆ་དམག་སྡེ་བརྒྱད་པའི་འཚོ་བཅུད་ཡོང་ཁུངས་གཙོ་བོ་ཡིན་པའི་ཝུའུ་ཤང་གི་ཁྲེ་དྲ་ཐོག་ཚོང་དོན་འཕེལ་རྒྱས་ཀྱི་ཤར་རླུང་དང་བསྟུན་ནས་ས་གནས་ཁག་ཏུ་ཕྱིར་ཚོང་བྱས་པ་བརྒྱུད། ཁུལ་རྙིང་གི་མང་ཚོགས་འབབ་འཕར་ཕྱུག་འགྱུར་ཡོང་བར་སྐུལ་ཁྲིད་ཐུབ་ཡོད།

2016ལོར་ཝུའུ་ཤང་རྫོང་གིས་གྲོང་གསེབ་མང་ཚོགས་ལ་དྲ་ཐོག་ཚོང་དོན་གསོ་སྦྱོང་བྱེད་སྐབས་དབུལ་སྒྲོལ་ཐུབ་མ་ཐག་པའི་ཝུའེ་པའོ་ཡུས་ཀྱིས་མིང་ཐོ་བཀོད། “དྲང་པོ་བཤད་ན། གསོ་སྦྱོང་མ་བྱས་གོང་ངས་རིག་ནུས་ལག་ཐོགས་ཁ་པར་བེད་སྤྱོད་ཡག་པོ་བྱེད་ཤེས་ཀྱི་མེད”ད་ཆ་ཝུའེ་པའོ་ཡུས་ཀྱིས་སོ་ནམ་ལས་ལ་གཞོལ་ཞོར་དུ་བརྙན་པར་བླངས་ནས་དངོས་ཟོག་བཙོངས་པར་ལོ་གཅིག་གི་ཡོང་འབབ་སྒོར་ཁྲི་བདུན་བརྒྱད་ཟིན་གྱི་ཡོད།

“དེ་སྔོན་ཁྲེ་རྒྱ་མ་གང་ལ་སྒོར་3བྱས་ནས་འཚོང་གི་ཡོད། ད་ཆ་དྲ་ཐོག་ནས་ཕྱིར་ཚོང་བྱེད་ཀྱི་ཡོད་པས་བྲིན་ཁ་རྒྱུག་པ་མ་ཟད། རིན་གོང་ཡང་མཐོ་པོ་རག་གི་འདུག”ལིང་ཐུའོ་གྲོང་ཚོའི་ཏང་ཀྲི་པུའི་ཧྲུའུ་ཅི་ཀྲང་ཡུས་ཐང་གིས་གྲོང་ཚོའི་ནང་དྲ་ཐོག་ནས་ཁྲེ་ཕྱིར་ཚོང་བྱེད་མཁན་དུད་ཚང་20ལྷག་ཙམ་ཡོད་ཅེས་བཤད།

ལིང་ཐུའོ་གྲོང་ཚོའི་ཚོང་ཁང་ནང་ཐུམ་སྒྲིལ་བརྒྱབ་པའི་ཁྲེ་ཟོག་སྒྲོམ་ཐོག་གྲལ་སྟར་འགྲིག་པོར་བསྒྲིགས་འདུག ཉོ་མཁན་གྱིས་དྲ་ཐོག་ནས་དངུལ་སྤྲད་རྗེས་ཁྲེ་འདི་ག་ནས་བསྐུར་ཏེ་རྫོང་རིམ་པའི་སྦྲག་སྐྱེལ་ཟོག་འགྲེམས་ལྟེ་གནས་བརྒྱུད་རྒྱལ་ཡོངས་ས་གནས་ཁག་ཏུ་བསྐུར་གྱི་ཡོད།

རྫོང་དུ་རྫོང་ཡོངས་ཀྱི་དྲ་ཐོག་ཚོང་དོན་ལ་ཞབས་འདེགས་ཞུ་བའི“དྲ་ཐོག་ཚོང་དོན་ས་ཚིགས”ཏེ་རྫོང་རིམ་པའི་དྲ་ཐོག་ཚོང་དོན་སྤྱི་པའི་ཞབས་ཞུའི་ལྟེ་གནས་ཡོད། གྲོང་ཚོའི་ཚོང་ཁང་ཆུང་ངུའང་དྲ་ཐོག་ཚོང་ཁང་གི་གྲོང་ཚོ་རིམ་པའི་ཞབས་ཞུའི་ས་ཚིགས་ཡིན་པ་དང་དྲ་ཐོག་ཚོང་ཁང་གི་ཆེད་ལས་གསོ་སྦྱོང་ཐོབ་པའི་ཚོང་ཁང་གི་སྦྱིན་བདག་དེ་ཡུལ་མིར་ཞབས་འདེགས་ཞུ་བའི“ཚོང་ཁང་གི་ཞབས་ཞུ་བར”གྱུར་ཡོད། མིག་སྔའི་བར་ཝུའུ་ཤང་རྫོང་གིས་གྲོང་ཚོ་རིམ་པའི་ཞབས་ཞུའི་ས་ཚིགས་182བསྐྲུན་པ་དང་གྲོང་གསེབ་ཏུ་དྲ་ཐོག་ཚོང་དོན་གྱི་ཞབས་ཞུ་ཁྱབ་ཚད་90%ཡན་ཟིན་ཡོད།

ཝུའུ་ཤང་རྫོང་དྲ་ཐོག་ཚོང་དོན་སྤྱི་པའི་ཞབས་ཞུའི་ལྟེ་གནས་སུ་རྫོང་དྲ་ཐོག་ཚོང་དོན་གཞུང་ལས་ཁང་གི་ཀྲུའུ་རེན་གཞོན་པ་ཧའོ་ཤུས་ཏུང་གིས་ཟླ་འདིའི་དྲ་ཐོག་ཚོང་དོན་གྱི་ཉོ་ཚོང་གནས་ཚུལ་ལ་དབྱེ་ཞིབ་བྱེད་བཞིན་འདུག ཝུའུ་ཤང་རྫོང་གིས་དྲ་ཐོག་ཚོང་ཁང་དེ“སྤྲིན་ཚོམ་ཝུའུ་ཤང”གི་ཉོ་ཚོང་སྤྲིན་སྟེགས་དང་སྦྲེལ་མཐུད་བྱས་ནས་དྲ་ཐོག་ཚོང་དོན་གྱི་གཅིག་སྡུད་གཞི་རྟེན་གཏོད་པ་དང་། དྲ་ཐོག་ཚོང་དོན་ས་ཚིགས་དང་། ཐོན་ལས་རྟེན་གཞི། ཞིང་དུད། གྲོང་ཚོ་རིམ་པའི་ཞབས་ཞུ་བ་བཅས་ཟུང་དུ་འབྲེལ་བའི་བྱེད་སྟངས་སྤྱད་དེ་ཞིང་ལས་ཐོན་རྫས་ཕྱིར་ཚོང་བྱེད་པར་རམ་འདེགས་བྱ་རྒྱུ་རེད། “ཕྱིར་ཚོང་གྲངས་ཚད་ངེས་ཅན་ཟིན་པའི་ཚོང་དུད་ལ་ང་ཚོས་ཁ་གསབ་བྱ་དགའ་སྤྲོད་ཀྱི་ཡིན”ཞེས་ཧའོ་ཤུས་ཏུང་གིས་བཤད།

2023ལོར་ཝུའུ་ཤང་རྫོང་གི་དྲ་ཐོག་ཚོང་དོན་གྱི་ཉོ་ཚོང་དངུལ་འབོར་སྒོར་དུང་ཕྱུར་3.5ཟིན་པའི་ནང་ཝུའུ་ཤང་གི་ཁྲེ་དང་ཝུའུ་ཤང་གི་ཁམ་བུ་སོགས་ཞིང་ལས་ཐོན་རྫས་ཀྱི་དྲ་ཐོག་ཕྱིར་ཚོང་ཡོང་འབབ་སྒོར་དུང་ཕྱུར་1ལྷག་ཙམ་ཟིན་པ་དང་། དྲ་ཐོག་ཚོང་དོན་ཐོན་ལས་ཀྱིས་ཞིང་དུད་ཁྲི་2ལྷག་ཙམ་ལ་ཐད་ཀར་སྐུལ་ཁྲིད་ཐུབ་ནས་དུད་ཚང་རེར་ཆ་སྙོམས་འབབ་འཕར་སྒོར་5000ལྷག་ཙམ་བྱུང་ཡོད།

ཉེ་ཆར། ཝུའེ་པའོ་ཡུས་ཀྱིས་བརྙན་ལམ་བཟོ་སྟངས་སྦྱངས་ནས་སྟོན་བསྡུའི་སྐབས་ཀྱི་གནས་ཚུལ་ཐད་གཏོང་བྱ་རྒྱུའི་གྲ་སྒྲིག་བྱེད་བཞིན་འདུག ཝུའུ་ཤང་དུ་ཝུའེ་པའོ་ཡུས་དང་འདྲ་བའི་ཞིང་པ་དེ་བས་མང་པོས་དྲ་ཐོག་ཚོང་དོན་བརྒྱུད་ཞིང་ལས་ཐོན་རྫས་ཕྱིར་ཚོང་བྱས་ནས་འབབ་འཕར་གྱི་ཐབས་ལམ་རྒྱ་ཆེར་བཏང་དང་གཏོང་བཞིན་ཡོད།