འདི་ནི་2022ལོའི་ཟླ་གསུམ་པར། ལྷ་སའི་ལྷོ་རི་སྤྱི་གླིང་གི་ནུབ་ངོས་སུ་ནགས་བཟོ་བྱེད་སྐབས་ལས་མི་ཚོས་ས་དང་སྡོང་ཕྲུག་ཁུར་ནས་རི་སྟེང་དུ་འཛེགས་པའི་རྣམ་པ་ཡིན་པ།

འདི་ནི་2024ལོའི་ཟླ་9ཚེས་1ཉིན། ཡུལ་སྐོར་བས་ལྷ་སའི་ལྷོ་རི་སྤྱི་གླིང་དུ་འཆམ་འཆམ་བྱེད་པའི་རྣམ་པ་ཡིན་པ།

ལྷ་སའི་ལྷོ་རི་སྤྱི་གླིང་ནི་ཕོ་བྲང་པོ་ཏ་ལའི་ལྷོ་ཕྱོགས་སུ་ཡོད། སྔོན་ཆད་ལྷོ་རིར་རྩྭ་རྩི་ཤིང་མི་སྐྱེ་བས་ས་གནས་དེ་གའི་མི་རྣམས་ཀྱིས“རི་སྐྱ་སྐྱ”ཞེས་འབོད་ཀྱི་ཡོད། འདི་ནི་སྔོན་ཆད་མི་མང་པོ་ཞིག་གི་བོད་ལྗོངས་ལྷ་སའི་བག་ཆགས་ཡིན་ཡང་སྲིད།

ཟླ་9ཚེས་1ཉིན། “གངས་ལྗོངས་ས་མཐོར་རྣམ་པ་གསར་པ་མངོན”ཞེས་པའི་བརྟག་ཞིབ་བཅར་འདྲི་ཚོགས་པ་དེ་གར་སྐྱོད་སྐབས་གང་སར་སྔོ་ལྗང་གོས་ཀྱིས་བཀླུབས་ཤིང་། བྱ་བྱིའུ་ཡི་གསུང་སྐད་ལྷང་ལྷང་གྲགས།

ལྷ་སའི་ལྷོ་རི་སྤྱི་གླིང་ནི་ལྷ་སའི་ལྷོ་རི་བྱང་རི་སྔོ་འགྱུར་ལས་གྲྭའི་གྲུབ་འབྲས་གལ་ཆེན་ཞིག་ཡིན། 2021ལོར། ལྷ་སའི་ལྷོ་རི་བྱང་རི་སྔོ་འགྱུར་ལས་གྲྭ་དེ་བོད་ཀྱི་གཞི་ཁྱོན་ཆེ་ཤོས་ཀྱི་ནགས་བཟོ་ནགས་སྐྱོང་འཛུགས་སྐྲུན་ལས་གྲྭར་བརྩིས་ནས་སྤེལ་འགོ་ཚུགས་ཤིང་། སྔོན་དཔག་བྱས་ན་2030ལོར་སླེབས་སྐབས། ནགས་བཟོ་ནགས་སྐྱོང་མུའུ་ཁྲི་206.72ཐུབ་རྒྱུ་ཡིན་པ་རེད།

རི་སྟེང་དུ་སྡོང་པོ་འཛུགས་རྒྱུ་ནི་ལས་སླ་པོ་ཞིག་གཏན་ནས་མིན།

ལྷོ་རིའི་ས་བབ་མཐོ་ཚད་སྨི་3600ནས་སྨི་4050བར་ཡོད་ལ་ཆ་སྙོམས་གཟར་ཚད་ཏུའུ་60ཟིན་པའི་ཁར། ད་དུང་རི་ལྡེབས་ཀྱི་ས་རིམ་ལས་60%ནས་70%བར་རྡོ་ཟེགས་ཡིན་པས། སྡོང་པོ་འཛུགས་དཀའ་བ་དང་། སྐྱེ་དཀའ་བ། བདག་སྐྱོང་དཀའ་བ་བཅས་ནི་ནགས་བཟོ་སྔོ་འགྱུར་གྱི“བཀག་རྡོ”ཞིག་ཏུ་གྱུར་ཡོད།

ལྷ་ས་གྲོང་ཁྱེར་ནགས་ལས་དང་རྩྭ་ཐང་ཅུས་ཀྱི་ཏང་ཙུའི་ཁོངས་མི་དང་རིམ་པ་གཉིས་པའི་བརྟག་ཞིབ་པ་ལི་པའོ་ཕིང་གིས“ས་དོང་ནི་རི་ལྡེབས་སུ་འདྲུ་དགོས་ལ་ས་ནི་ཐག་རིང་ནས་དབོར་ཡོང་དགོས། ཆུ་ཡང་སྐྱིད་ཆུའི་ནང་ནས་འདྲེན་དགོས” སྡོང་པོ་གཅིག་བཙུགས་ནས་སྐྱེ་དགོས་ཚེ་སྡོང་ཕྲུག་འདེམས་པ་དང་འཛུགས་པ་སོགས་ལས་ཀའི་ལྷུ་ཚིགས་37བརྒྱུད་དགོས་ལ་དེ་དག་ཚང་མ་ཚན་རྩལ་གྱི་རམ་འདེགས་དང་ཁ་འབྲལ་ཐབས་མེད་ཅེས་བཤད།

ནགས་ལས་རིགས་གཅིག་མཁས་ཅན་གྱིས་སྡོང་པོ་སྣ་ཁ་170ལྷག་ཙམ་གྱི་ནང་ནས་དེ་གར་འཚམ་ཤོས་དེ་བདམས་ཡོད། ས་དང་སྡོང་པོ་མི་མེད་གནམ་གྲུས་དབོར་གྱི་ཡོད། མི་མེད་གནམ་གྲུ་གཅིག་གིས་རྟ་དྲེལ་8ནས་14བར་གྱི་ལས་འབོར་སྒྲུབ་ཐུབ་པ་མ་ཟད་ད་དུང་མི་དང་ཁལ་རྟས་དབོར་བ་ལས་བདེ་འཇགས་དང་སྟབས་བདེ་བ་ཡོད།

ནགས་ཚལ་དང་རྩྭ་ཐང་བདག་སྐྱོང་བ་མང་པོའི་བློ་ཐབས་དང་འབད་བརྩོན་ལས་སྐྱ་ཐེར་ཐེར་གྱི་རི་རྒོད་སྔོ་ལྗང་གོས་ཀྱིས་བཀླུབས་ཤིང་། མཁའ་དབྱིངས་ནས་ཐུར་ལྟ་བྱས་ཚེ་སྐྱིད་ཆུའི་ངོགས་གཉིས་ཀྱི་རི་ཚོགས་ནི་ཁ་བཏགས་ལྗང་ཁུ་ཞིག་དང་གཉིས་སུ་མེད།

ད་ཆ་ལྷོ་རི་སྤྱི་གླིང་ནི་ལྷ་སའི་གྲོང་མི་དང་ཡུལ་སྐོར་བས་དགའ་ཤོས་བྱེད་པའི་སྤྱི་གླིང་དུ་གྱུར་ཡོད། ཉིན་རེར་སྤྱི་གླིང་ནང་ཡོང་ནས་རི་སྟེང་དུ་འཛེགས་མཁན་ཡུལ་སྐོར་བ་3000ནས་5000བར་ཡོད་པ་དང་དུས་ཆེན་དང་གུང་གསེང་རིང་10000ལས་བརྒལ་གྱི་ཡོད། གསར་འགོད་པས་དེ་གར་ཕྲུ་གུ་ཁྲིད་དེ་སྤྲོ་གསེང་གཏོང་མཁན་དང་། ཆེད་མངགས་བྱང་ཤར་ནས་དེ་གར་ཡོང་མཁན་ཡུལ་སྐོར་བའང་ཡོད་པ་མཐོང་བྱུང་།

ལྷོ་རི་བྱང་རི་སྔོ་འགྱུར་ལས་གྲྭ་ལག་ལེན་བསྟར་བས་མི་རིགས་ཁག་གི་མང་ཚོགས་ཀྱིས“ལྗང་མདོག”གི་ཕན་བདེ་དེ་བས་མང་པོ་ལོངས་སུ་སྤྱོད་ཐུབ་ཡོད།

མིག་སྔའི་བར་འབྲེལ་ཡོད་སྡེ་ཚན་གྱིས་མི་ཐེངས་ཁྲི་600ལྷག་ཙམ་སྒྲིག་འཛུགས་བྱས་ཏེ་ལྷོ་རི་བྱང་རི་སྔོ་འགྱུར་ལས་གྲྭ་འཛུགས་སྐྲུན་ལ་ཞུགས་པས་ཞིང་འབྲོག་པར་ཡོང་འབབ་སྒོར་དུང་ཕྱུར་20ཙམ་བྱུང་ཞིང་། སྤྱི་གླིང་དུ་ནགས་སྲུང་བ་མི་ཉུང་བ་ཞིག་བསྡུས་ཡོད། ཁོང་ཚོའི་ཟླ་ཕོགས་ཉུང་མཐར་ཡང་སྒོར་4000ཟིན་གྱི་ཡོད། ཞིང་འབྲོག་མང་ཚོགས་དེ་བས་མང་པོར་ལས་ཀ་བརྟན་པོ་རག་ནས་ཡོང་འབབ་འགན་ལེན་བྱུང་ཡོད་ཅེས་ལྷ་སའི་ལྷོ་རི་སྤྱི་གླིང་དོ་དམ་ཁྲུའི་འགན་འཁུར་བ་ཉི་མ་རྡོ་རྗེས་བཤད།

ངོ་སྤྲོད་བྱས་པར་གཞིགས་ན། ལྷོ་རི་བྱང་རི་སྔོ་འགྱུར་ལས་གྲྭ་ཡོངས་སུ་ལེགས་གྲུབ་བྱུང་རྗེས་ལྷོ་རི་སྤྱི་གླིང་600མང་དུ་ཕྱིན་པ་དང་མཚུངས་ཀྱི་ཡོད་པ་རེད།

ལོ་30ལྷག་ཙམ་གོང་བོད་དུ་ཡོང་ནས་མི་ཚེ་ཧྲིལ་པོ་ནགས་ཚལ་དང་རྩྭ་ཐང་བྱ་གཞག་ལ་ཕུལ་མཁན་ལི་པའོ་ཕིང་ནི་ལྷ་སའི་སྐྱེ་ཁམས་ཁོར་ཡུག་ལེགས་སུ་ཕྱིན་པའི་དཔང་པོ་ཞིག་ཡིན། འབྱུང་འགྱུར་སྐོར་གླེང་སྐབས། ཁོང་གིས“ཁྱེད་ཀྱིས་གཟིགས་དང་། ལོ་ལྔའི་རྗེས་སུ་ལྷ་སའི་ཁོར་ཡུག་དེ་བས་ལེགས་ངེས་རེད”ཅེས་སྤོབས་པ་ཆེན་པོས་བཤད།

“ལོ་ལྔའི་ནང་རི་ཀླུང་སྔོ་འགྱུར་དང་ལོ་བཅུའི་ནང་ལྷ་ས་སྔོ་འགྱུར”གྱི་བསམ་བཀོད་དེ་ནགས་བཟོ་ནགས་སྐྱོང་བ་ཚོས་འབད་འཐབ་ལྷོད་མེད་ལ་བརྟེན་ནས་དོན་འཁྱོལ་ཐུབ་སྟེ“ལྗང་མདོག་གི་ཁ་བཏགས”མུ་མཐུད་སྐྲུན་བཞིན་ཡོད་པ་རེད།