ལྷོ་ཁས་སྐབས་དང་པོའི་ས་མཐོའི་བྱེ་སྒང་གཞོན་ནུའི་སྒྱུ་རྩལ་དུས་ཚིགས་གཉེར་བ།
ཟླ་9ཚེས་15ཉིན“ཟླ་འོད་ཡར་ཀླུང་ལ་འཕྲོས། དབྱངས་སྙན་བྱེ་སྒང་དུ་ཁྱབ”ཅེས་པ་བརྗོད་དོན་གཙོ་བོར་བྱས་པའི་ལྷོ་ཁའི་སྐབས་དང་པོའི་ས་མཐོའི་བྱེ་སྒང་གཞོན་ནུའི་སྒྱུ་རྩལ་དུས་ཚིགས་གྲ་ནང་བྱེ་སྒང་སྒྱུ་རྩལ་སྤྱི་གླིང་དུ་གཉེར་བ་རེད།
ཉིན་དེར་ས་མཐོའི་བྱེ་སྒང་གཞོན་ནུའི་སྒྱུ་རྩལ་དུས་ཚིགས་གླིང་ནང་གི་སྒྱུ་རྩལ་འགྲེམས་སྟོན་དང་བསམ་བཀོད་ཚོང་འདུས་དངོས་སུ་ཕྱི་ཕྱོགས་ལ་སྒོ་མོ་ཕྱེ་ནས། ལྷོ་ཁ་གྲོང་ཁྱེར་གྲ་ནང་རྫོང་གི་ཁྱད་ལྡན་ལག་ཤེས་ཐོན་རྫས་དང“རྒྱལ་ཁབ་ཀྱི་ས་ཁམས་མཚོན་རྟགས་སྲུང་སྐྱོང་ཐོན་རྫས”ཀྱི་མཚན་སྙན་ཐོབ་པའི་སྣམ་བུའི་སྒྱུ་རྩལ་འགྲེམས་སྟོན་བྱས་པར་ཡུལ་སྐོར་བ་དང་གྲོང་མི་མང་པོའི་ཡིད་དབང་བཀུག་ཡོད།
ཐེངས་འདིའི་སྒྱུ་རྩལ་དུས་ཚིགས་ཀྱི་བཀྲག་མདངས་འཚེར་ས་ཆེ་ཤོས་ཤིག་ནི་ཞིབ་མོའི་བློ་ཡིས་བཏོད་པའི“བྱེ་སྒང་གི་གར་སྟེགས”དང“ཉ་གང་ཟླ་བའི་གར་སྟེགས”ཡིན་པ་རེད། “བྱེ་སྒང་གི་གར་སྟེགས”ཐོག་ལྷོ་ཁའི་རྫོང་དང་ཆུས་ཁག་གི་མཚོན་བྱེད་རང་བཞིན་གྱི་རྒྱན་གོས་བརྗོད་དོན་གཙོ་བོར་བྱས་ནས“བྱེ་ཐང་གི་རྒྱན་གོས་ངོམ་སྟོན”གཟབ་རྒྱས་བྱས་པ་དང་། ལྷོ་ཁའི་མངོན་མིན་རིག་གནས་ཤུལ་བཞག་གི་གླུ་གར་འགྲེམས་འཁྲབ་དང་ཡར་ཀླུང་བཀྲ་ཤིས་ཞོལ་པའི་ལྷ་མོ་སོགས་སྲོལ་རྒྱུན་རིག་གནས་ལེ་ཚན་རེས་མོས་ངང་འཁྲབ་པར། ལྟད་མོ་བས་སྒྱུ་རྩལ་མྱོང་རོལ་བྱེད་པ་དང་ཆབས་ཅིག ལྷོ་ཁའི་གཏིང་ཟབ་པའི་རིག་གནས་ཀྱང་མྱོང་རོལ་ཐུབ་ཡོད། ས་སྲོས་སུ་སླེབས་པ་དང་སྦྲགས་གྲགས་ཅན་གྱི་གཞས་པ་གཞས་མ་མང་པོས“ཉ་གང་ཟླ་བའི་གར་སྟེགས”ཐོག་འཁྲབ་སྟོན་བྱས་ནས་ལྟད་མོ་བར་སྲོལ་རྒྱུན་དང་དར་བཟོ་མཉམ་འདྲེས་ཀྱི་མིག་ཡིད་རྣ་བའི་སྟོན་མོ་ཞིག་བཤམས་ཡོད།
གུང་གཞོན་སྡེ་ཚོགས་ལྷོ་ཁ་གྲོང་ཁྱེར་ཨུ་ལྷན་གྱི་ཧྲུའུ་ཅི་ཧོང་ཧྭ་ཡིས། ད་ཐེངས་ཀྱི་བྱེད་སྒོ་གཉེར་བའི་དམིགས་ཡུལ་ནི་བྱེ་སྒང་སྤྱི་གླིང་གི་རང་བྱུང་གི་ཡིད་དབང་འགུགས་ཤུགས་དང་སྐུལ་ཁྲིད་ཀྱི་ནུས་པར་བརྟེན་ནས་དུས་རབས་རང་བཞིན་དང་། ལང་ཚོའི་སྣང་བ། རྒྱུན་མཐུད་ཆོག་པ། ཕྱིར་དར་ཐུབ་པ་བཅས་ཀྱི་ལྷོ་ཁ་གྲོང་ཁྱེར་གྱི་རིག་གནས་ཡུལ་སྐོར་སྤུས་རྟགས་གསར་རྐྱང་ཞིག་བཏོད་དེ། མི་དེ་བས་མང་བས་སྒོ་དབྱེ་དང་། ཡིད་ཆེས། ཤེས་དཔལ་བཅས་ཀྱི་སྤྱི་ཚོགས་རིང་ལུགས་དེང་རབས་ཅན་གྱི་ལྷོ་ཁ་གསར་པ་ཞིག་ཤེས་རྟོགས་ཐུབ་པར་བྱ་རྒྱུ་དེ་ཡིན་ཞེས་བཤད་པ་རེད།