ཧུའུ་ནན་ཞིང་ཆེན་ཀྲང་ཅ་ཅེ་གྲོང་ཁྱེར་སང་ཀྲི་རྫོང་ལུང་ཐན་ཕིང་གྲོང་རྡལ་གྱི་དམར་དམག་གྲོང་ཚོའི་གྲོང་མི་ཝུན་པོའོ་ཧྲེང་དང་དབྱང་ཡུས་མའེ་བཟའ་ཚོ་གཉིས་ཀྱི་ཉིན་དེའི་ཙུང་ཙིའི་འདབ་མ་འཐུ་བའི་ལས་ཀ་འཚར། ཀྱག་ཀྱོག་གི་རྡོ་ཧྲུག་ལམ་དེ་ཡུལ་ཟོག་ཕྱིར་དབོར་སའི་ལམ་བུ་འབའ་ཞིག་དེ་རེད།

དེ་རིང་ཙུང་ཙིའི་འདབ་མ་རྒྱ་མ་80བྲིན་ནས་སྒོར་400ཙམ་རག་བྱུང་། ལམ་ཡག་པོ་མེད་ན་དེ་འདྲ་བྲིན་མི་ཐུབ་ཅེས་ཝུན་པོའོ་ཧྲེང་གིས་མྱོང་ཚོར་ཟབ་མོས་བཤད།

སང་ཀྲི་ནི་དམག་སྤྱི་ཧོ་ལུང་གི་ཕ་ཡུལ་ཡིན་ལ། དམར་དམག་དཔུང་སྡེ་གཉིས་པ་རྒྱང་སྐྱོད་འགོ་འཛུགས་ས་དེ་ཡིན། དེ་གར་སྔོ་ལྗང་གིས་བརྒྱན་པའི་རི་བོས་ཕྱོགས་བཞི་བསྐོར་ཞིང་གྲོག་རོང་གཡང་གཟར་ཆེ།

2013ལོའི་ཟླ་11པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧུའུ་ནན་དུ་རྟོག་ཞིབ་གནང་སྐབས། ས་ཁུལ་དབུལ་པོ་དབུལ་སྒྲོལ་ཕྱུག་འགྱུར་ཡོང་བ་བྱེད་དགོས་ན། འགྲིམ་འགྲུལ་སོགས་རྨང་གཞིའི་སྒྲིག་བཀོད་ཀྱི་ཆ་རྐྱེན་ལེགས་སུ་གཏོང་རྒྱུ་དེ་ཧ་ཅང་གལ་འགངས་ཆེན་པོ་ཡིན་པས། དེའི་ཐད་ཤུགས་སྣོན་རྒྱག་པ་དང་མུ་མཐུད་རྒྱབ་སྐྱོར་བྱེད་དགོས་ཞེས་གསུངས་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སང་ཀྲི་རྫོང་དུ་མྱུར་བགྲོད་གཞུང་ལམ་དང་པོ་དང་མྱུར་བགྲོད་ལྕགས་ལམ་དང་པོ་སྔ་རྗེས་སུ་བསྐྲུན་ནས་རླངས་འཁོར་དང་མེ་འཁོར་ཤར་གཏོང་ཐུབ་པ་མ་ཟད། “ལོ་ལྔ་ཚན་བཅུ་གསུམ་པའི”རིང་རྫོང་ཡོངས་སུ་གསར་དུ་བསྐྲུན་པའི་གཞུང་ལམ་ལམ་ཐག་དེ་སྔོན་གྱི་ལོ་20ཡི་བསྡོམས་འབོར་ལས་བརྒལ་ཡོད་པ་རེད། ཉེ་བའི་ལོ་ཤས་རིང་། སང་ཀྲི་རྫོང་གིས་སླར་ཡང་མ་དངུལ་སྒོར་ཁྲི་ཆིག་སྟོང་ཙམ་བཏང་ནས་རྫོང་ཡོངས་ཀྱི་ཁྱབ་ཁོངས་སུ་ཙུང་ཙིའི་འདབ་མ་འཐུ་སར་སྐྱོད་སའི་ལམ་སྤྱི་ལེ་300ལྷག་ཙམ་བསྐྲུན་ཡོད།

འགྲིམ་འགྲུལ་ཆ་རྐྱེན་ལེགས་སུ་ཕྱིན་པ་དང་སྦྲགས། སང་ཀྲི་རྫོང་ལ་འཕེལ་རྒྱས་ཀྱི་གོ་སྐབས་གསར་པ་བྱུང་ཡོད། “སྔོན་མ་པའེ་ཧྲི་ཤིས་གྲོང་ཚོ་ཀྲང་ཅ་ཅེ་དང་ཐག་ཉེ་ཡང་། ཡུལ་སྐོར་ལས་རིགས་གཉེར་མི་ཐུབ་པའི་རྒྱུ་མཚན་ནི། འགྲོ་ལམ་ཡག་པོ་མེད་པས་ཡིན”ཞེས་ཙོའུ་མཱ་ཕིང་པའེ་རིགས་ཤང་པའེ་ཧྲི་ཤིས་གྲོང་ཚོའི་ཤན་ཁྲེང་གླིང་ཕྲན་མཛེས་ལྗོངས་ཁུལ་གྱི་མ་འཇོག་མཁན་ཧོའུ་ཞའོ་ཝུའེ་ཡིས་དེ་ལྟར་བཤད། ལོ་75ལ་སླེབས་པའི་གྲོང་མི་ཐན་ཚུའེ་དབྱིང་སྔོན་མ་ཉིན་ལྟར་ལ་ཀླུང་བརྒལ་ནས་ཀྲང་ཅ་ཅེར་ཚོང་རྒྱག་པར་འགྲོ་བས་ཕར་འགྲོ་ཚུར་འོང་བྱེད་པར་ཆུ་ཚོད་ཁ་ཤས་འགོར་གྱི་ཡོད། ད་ཆ་མཛེས་ལྗོངས་ཁུལ་རང་ཁྱིམ་གྱི་འགོ་རྩར་ཡོད་པས། ཁོང་གིས་ཞིང་པའི་སྤྲོ་སྐྱིད་ཁང་བརྒྱབ་པ་དང་ལོ་ལྟར་ཡོང་འབབ་སྒོར་ཁྲི་2ལྷག་ཙམ་ཡོང་གི་ཡོད། ད་ལོའི་དབྱར་ཁའི་གུང་གསེང་རིང་། མཛེས་ལྗོངས་ཁུལ་དུ་ཉིན་ལྟར་སྒེར་འཁོར་བཏང་ནས་ཡུལ་སྐོར་བྱེད་མཁན་2000ཙམ་སླེབས་ཡོད་པ་རེད།

ལམ་བུ་ཤར་གཏོང་ཐུབ་པས་ལས་རིགས་དར། སང་ཀྲི་ཡི་ཇ་ལོའི་ཐོན་རྫས་རིན་ཐང་2020ལོའི་སྒོར་དུང་ཕྱུར་2.9ནས་2023ལོའི་སྒོར་དུང་ཕྱུར་6.85བར་འཕར་ཅིང་། 2023ལོར་སང་ཀྲི་རྫོང་གི་ཡུལ་སྐོར་ཡོང་འབབ་དང་ཡུལ་སྐོར་མི་གྲངས་2019ལོ་ལས་ལྡབ་འཕར་བྱུང་ཡོད། ཉེ་བའི་ལོ་5ཡི་ནང་སང་ཀྲི་རྫོང་གི་གཞི་ཁྱོན་ཡན་གྱི་བཟོ་ལས་ཁེ་ལས་34ནས་56བར་མང་དུ་ཕྱིན་ཡོད།