ཁྲིམས་གཏན་འཁེལ་བའི་རྒན་ཡོལ་ཞུ་བའི་ལོ་ཚད་ནར་འགྱངས་བྱེད་པའི་སྒྱུར་བཅོས་ཀྱི་རྩ་དོན་གལ་ཆེན་ཁོང་དུ་ཡང་དག་ཆུད་པར་བྱེད་དགོས།
ཟླ་9ཚེས་13ཉིན། ཁྲིམས་གཏན་འཁེལ་བའི་རྒན་ཡོལ་ཞུ་བའི་ལོ་ཚད་རིམ་བཞིན་ནར་འགྱངས་བྱ་རྒྱུའི་སྐོར་གྱི་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་ཐོག་བརྡས་ཐག་བཅད་ནས་གྲོས་འཆམ་བྱུང་བའི་གཏན་འབེབས་ནང“ཁྲིམས་གཏན་འཁེལ་བའི་རྒན་ཡོལ་ཞུ་བའི་ལོ་ཚད་རིམ་བཞིན་ནར་འགྱངས་བྱེད་པའི་ཐད་གོམ་སྟབས་ཆུང་ངུས་ལེགས་སྒྲིག་དང་། བབ་བསྟུན་ལག་བསྟར། རིགས་དབྱེ་སྐུལ་འདེད། གཅིག་གྱུར་འཆར་འགོད་དང་ཕྱོགས་ཡོངས་ལ་ལྟ་རྟོག་བཅས་ཀྱི་རྩ་དོན་མཐའ་འཁྱོངས་བྱེད་དགོས”ཞེས་ཁ་གསལ་བཏོན་ཡོད། སྒྱུར་བཅོས་ཀྱི་རྩ་དོན་གལ་ཆེན་ཁོང་དུ་ཡང་དག་ཆུད་པར་བྱེད་པ་དེས་ང་ཚོས་ཁྲིམས་གཏན་འཁེལ་བའི་རྒན་ཡོལ་ཞུ་བའི་ལོ་ཚད་ནར་འགྱངས་བྱེད་པའི་སྒྱུར་བཅོས་ལ་ཕྱོགས་ཡོངས་དང་། དོན་དངོས་དང་མཐུན་པ། ཡང་དག་པ་བཅས་ཀྱི་སྒོ་ནས་གོ་བ་ལེན་རྒྱུར་ཕན་ཐོགས་ཡོད།
ཁྲིམས་གཏན་འཁེལ་བའི་རྒན་ཡོལ་ཞུ་བའི་ལོ་ཚད་ནར་འགྱངས་བྱེད་པའི་སྒྱུར་བཅོས་ཀྱི་རྩ་དོན་གལ་ཆེན་ནི། ཐབས་ལམ་མང་པོ་ནས་མང་ཚོགས་ཀྱི་དོ་ཁུར་བྱེད་སར་རྒྱུས་ལོན་དང་། ཕྱོགས་མང་པོའི་བསམ་འཆར་ནན་ཏན་ངང་ཉན་པ། གནས་བབ་ལ་དབྱེ་ཞིབ་དང་བརྡར་གཅོད་གཏིང་ཟབ་བཅས་བྱས་པའི་རྨང་གཞིའི་ཐོག་གྲུབ་པ་ཞིག་ཡིན་ཞིང་། སྒྱུར་བཅོས་ཀྱི་དགོས་ངེས་རང་བཞིན་དང་། དགོས་གཏུག་རང་བཞིན། ལག་བསྟར་བྱེད་འཐུས་རང་བཞིན། བཀོལ་སྤྱོད་ཆོག་པའི་རང་བཞིན་བཅས་ལ་སྤྱི་འདོམས་བསམ་གཞིགས་བྱས་ཡོད།
ཁྲིམས་གཏན་འཁེལ་བའི་རྒན་ཡོལ་ཞུ་བའི་ལོ་ཚད་ནར་འགྱངས་བྱེད་པའི་སྒྱུར་བཅོས་ཀྱི་རྩ་དོན་གལ་ཆེན་ལས་སྒྱུར་བཅོས་ཀྱི་སྟབས་བསྟུན་རང་བཞིན་དང་བསྟུན་མཁས་རང་བཞིན་གསལ་པོར་མཚོན་གྱི་ཡོད། དེའང“གོམ་སྟབས་ཆུང་ངུས་ལེགས་སྒྲིག”ཐོག་ནས་སྒྱུར་བཅོས་ནི་གོམ་པ་རིམ་བགྲོད་ཀྱིས་བྱེད་པ་ཞིག་ཡིན་པ་མཚོན་ཞིང་། རྒན་ཡོལ་ཞུ་བའི་ལོ་ཚད་ལམ་སེང་ལོ་ཁ་ཤས་ནར་འགྱངས་བྱེད་པ་ཞིག་མིན་པར་ཟླ་བ་ཁ་ཤས་རེར་རྒན་ཡོལ་ཞུ་བའི་ལོ་ཚད་ཟླ་བ་གཅིག་རེ་ནར་འགྱངས་བྱེད་ཀྱི་ཡོད་པས་བལྟོས་བཅས་ཀྱིས་སྙོམས་པོ་ཡོད་པ་མཚོན་གྱི་ཡོད། “སྟབས་བསྟུན་ལག་བསྟར”ཐོག་ནས་སྒྱུར་བཅོས་ཀྱིས་མི་ཚང་མས་ངེས་པར་དུ་ནར་འགྱངས་བྱས་རྗེས་ཀྱི་ཁྲིམས་གཏན་འཁེལ་བའི་རྒན་ཡོལ་ཞུ་བའི་ལོ་ཚད་ལ་སླེབས་ཚེ་གཞི་ནས་རྒན་ཡོལ་ཞུ་ཆོག་པ་བཙན་ཤེད་ཀྱིས་གཏན་འབེབས་བྱས་པ་མིན་པར། སྲིད་ཇུས་ཀྱི་གཏན་འབེབས་དང་མཐུན་པའི་ཆ་རྐྱེན་འོག་ལས་བཟོས་བབ་བསྟུན་ངང་རྒན་ཡོལ་ཞུ་བའི་དུས་ཚོད་ནར་འགྱངས་བྱེད་ཆོག་ལ། ཡང་བབ་བསྟུན་ངང་སྔ་སྣུར་དུ་རྒན་ཡོལ་ཞུས་ནའང་ཆོག་པ་མཚོན་གྱི་ཡོད། ཕྱོགས་ཡོངས་ནས་བལྟས་ཚེ། སྒྱུར་བཅོས་དེས་མི་ཚོགས་སྣ་ཚོགས་དང་གནས་ཚུལ་མི་འདྲ་བར་བསམ་གཞིག་གང་ལེགས་བྱས་ནས་སྐུལ་འདེད་ཏན་ཏིག་བཏང་བ་མ་ཟད། བརྟན་པོ་དང་གཟབ་ནན་ཡང་བྱས་ནས་ངལ་རྩོལ་པས་རྒན་ཡོལ་ཞུ་བའི་ལོ་ཚད་རང་རྟེན་གདམ་ག་བྱེད་པའི་བར་མཐོངས་ཆེ་རུ་བཏང་ཡོད་པ་རེད།