ཟླ་9ཚེས་16ཉིན། དུས་ཡུན་ཉིན་5ཡི་2024ལོའི་ཀྲུང་གོ་རྒྱལ་སྤྱིའི་ཞབས་ཞུའི་ཉོ་ཚོང་ཚོང་འདུས(གཤམ་དུ་ཞབས་ཞུའི་ཉོ་ཚོང་ཚོང་འདུས་ཞེས་བསྡུ་རྒྱུ)པེ་ཅིང་རྒྱལ་ཁབ་གྲོས་ཚོགས་ལྟེ་གནས་སུ་མཇུག་འགྲིལ་ཞིང་། བོད་ཀྱི་འཐུས་མི་ཚོགས་པས་ཞབས་ཞུའི་ཉོ་ཚོང་ཚོང་འདུས་ཀྱི་ལས་སྟེགས་འདིར“སྲིད་གཞུང་ཚོགས་པ་དང་འགྲེམས་གྲོས་ཚོགས་པ་ཟུང་འབྲེལ(འགྲེམས་ཚོང་ཚོགས་པ་དང་ཚོང་འགུགས་ཚོགས་པ་ཟུང་འབྲེལ)བྱེད་པའི་རྣམ་པར་བརྟེན་ནས་བོད་རང་སྐྱོང་ལྗོངས་ཀྱི་ཉོ་ཚོང་ཚོགས་པ་བཙུགས་ཏེ་འགྲེམས་ཚོགས་ལ་ཞུགས་པ་རེད། བོད་ཀྱི་འགྲེམས་ཁང་དུ་ཁྱད་ལྡན་ཐོན་ལས་དང་། དངུལ་རྩའི་ཞབས་ཞུ། ཁྱད་ལྡན་རིག་གནས་ཡུལ་སྐོར་བཅས་ཀྱི་འགྲེམས་ཁུལ་ཆེན་པོ་གསུམ་ཡོད་ཅིང་། ས་མཐོའི་ཁྱད་ལྡན་ཐོན་རྫས་སྣ་ཁ་100ལྷག་ཙམ་ཟིན་པ་དེ་དག་གིས་རྒྱལ་ཁབ་ཕྱི་ནང་གི་ཚོང་པ་མང་པོའི་ཡིད་དབང་འཕྲོག་ཡོད་པ་དང་། ཁོང་ཚོས་འགྲོ་མཚམས་ཡང་ཡང་བཞག་ནས་མཉམ་ལས་ཀྱི་གོ་སྐབས་བཟང་པོ་ཐུན་མོང་ཐོག་གླེང་བ་རེད། ད་ཐེངས་ཀྱི་ཞབས་ཞུའི་ཉོ་ཚོང་ཚོང་འདུས་སུ་བོད་ཀྱི་འཐུས་མི་ཚོགས་པས་ཞབས་ཞུའི་ཉོ་ཚོང་ཁྱབ་ཁོངས་ཀྱི་དམིགས་བསལ་ལེགས་ཆ་དང་མངོན་མེད་སྟོབས་ཤུགས་ཧ་ཅང་ཆེན་པོ་མངོན་པར་བྱས་པས། སྤུས་རྟགས་ཀྱི་ཤུགས་རྐྱེན་ནུས་པ་ཆེ་རུ་དང་ཁྲོམ་རའི་ཁྱབ་འགྱེད་ནུས་པ་ཆེ་རུ་གཏོང་བའི་སྐར་ཁུང་གལ་ཆེན་ཞིག་ཏུ་གྱུར་ཡོད།

ཞབས་ཞུའི་ཉོ་ཚོང་ཚོང་འདུས་རིང་བོད་ཀྱི་འཐུས་མི་ཚོགས་པར་གྲུབ་འབྲས་མངོན་གསལ་དོད་པོ་ཐོབ་ཅིང་། པེ་ཅིང་དང་། ཐེན་ཅིན། ཧོ་པེ་གསུམ་གྱི་ཚོང་འགུགས་མ་འདྲེན་གྱི་བོད་རང་སྐྱོང་ལྗོངས་ཀྱི་རིམ་སྤེལ་བྱེད་སྒོའི་ཁྲོད་ཚེས་13ཉིན་འཚོགས་པའི་ལྗང་མདོག་བཟོ་ལས་དང་མཐོ་གསར་གྲངས་འཛིན་ཐོན་ལས་འོས་སྦྱོར་ཚོགས་འདུའི་ཐོག་ཁེ་ལས་དང་ཚན་པ་ལྔས་གན་རྒྱ་བཞག་པར་རྣམ་གྲངས་དང་མཉམ་ལས་གྲོས་མཐུན་གྱི་དངུལ་འབོར་སྒོར་དུང་ཕྱུར་10.2ཟིན་ཡོད། བོད་ལྗོངས་གངས་ལྗོངས་ས་མཐོའི་ཇ་ལས་ཚད་ཡོད་ཀུང་སིས་ཧེ་ལུང་ཅང་རང་བྱུང་ཁམས་སྐྱེ་དངོས་ཀྲུང་ལུགས་གསོ་རིག་ཐོན་ལས་ཚན་ཞིབ་ཁང་དང་མཉམ་ལས་གྲོས་མཐུན་བཞག་པ་ལས་འགྲེམས་ཞུགས་ཚོང་པ་མི་ཉུང་བར་འབྱུང་འགྱུར་འཕེལ་རྒྱས་ཆེན་པོ་ཡོང་རྒྱུ་ཡིན་པའི་རེ་བ་དེ་བས་ཀྱང་མཐོང་ཡོད། “ཞབས་ཞུའི་ཉོ་ཚོང་ཚོང་འདུས་སུ་ཧེ་ལུང་ཅང་གི་ཁེ་ལས་དང་མཉམ་ལས་བྱེད་རྒྱུ་བྱུང་བ་ནི་སྲིད་གཞུང་གིས་ང་ཚོའི་ཁེ་ལས་ལ་རོགས་རམ་བྱས་ནས་ཐོབ་པའི་གྲུབ་འབྲས་ཤིག་རེད” ཁེ་ལས་ཀྱི་འགན་འཁུར་བ་མཁྱེན་ལྡན་མ་ཁོའུ་ཡིས་ཞབས་ཞུའི་ཉོ་ཚོང་ཚོང་འདུས་ཀྱི་ལས་སྟེགས་ལ་བརྟེན་པའི་ཁར། འཐབ་ཇུས་མཉམ་ལས་ཀྱི་གྲོས་མཐུན་དོན་འཁྱོལ་ཧུར་ཐག་བྱས་ཏེ་ཇ་ལོ་འདེབས་འཛུགས་དང་། ལས་སྣོན། རིག་གནས་བརྒྱུད་སྤེལ་སོགས་ཁྱབ་ཁོངས་མང་པོའི་ཕྱོགས་ཡོངས་འཕེལ་རྒྱས་ལ་སྐུལ་འདེད་བཏང་ནས་སྤྱི་ཚོགས་ཀྱི་རིན་ཐང་དེ་བས་ཆེན་པོ་གཏོད་རྒྱུ་ཡིན་ཞེས་གདེང་ཚོད་ཆེན་པོས་བཤད།

བོད་ལྗོངས་མཁའ་འགྲུལ་གྱིས་མཁའ་ལམ་དྲ་བ་དང་། ཞབས་ཞུའི་ཐོན་རྫས། དམངས་ཕན་སྲིད་ཇུས། དེ་བཞིན་གནམ་གྲུའི་ནང་གི་བཟའ་བཅའ་བཅས་བཀྲག་མདངས་འཚེར་སར་བྱས་ཏེ་མཁའ་འགྲུལ་ཞབས་ཞུའི་ཡིད་དབང་འཕྲོག་ཤུགས་ཕྱོགས་ཡོངས་ནས་མངོན་པར་བྱས་ཡོད། དེ་འདྲ་བྱེད་པའི་དམིགས་ཡུལ་ནི་རྒྱལ་ཁབ་ཕྱི་ནང་གི་ཁྲོམ་ར་སྔར་བས་རྒྱ་ཆེར་གཏོང་བ་དང་འབྱུང་འགྱུར་རྒྱལ་སྤྱིའི་མཁའ་ལམ་དེ་བས་མང་པོ་བཏོད་ནས་བོད་དང་འཛམ་གླིང་དབར་ལ་འབྲེལ་གཏུག་གི་མཁའ་ཟམ་ཞིག་བསྐྲུན་རྒྱུ་དེ་རེད།

བོད་ལུགས་གསོ་རིག་འགྲེམས་སྟེགས་ཀྱི་མདུན་དུ་འཁྲུག་ཆ་ཧ་ཅང་དོད་ཅིང་། བོད་ལྗོངས་བདུད་རྩི་བོད་སྨན་མ་རྐང་ཚད་ཡོད་ཀུང་སིས་ཐོན་རྫས་རྩེར་སོན་འཁྱེར་ནས་འགྲེམས་སྟོན་ལ་ཞུགས་ཏེ་སྨན་ཁང་མང་པོ་དང་། སྒྲིག་གཞི་ཆེ་གྲས། རིགས་འབྲེལ་སྨན་ཚོང་ཁང་བཅས་དང་སྤེལ་རེས་གཏིང་ཟབ་བྱས་ནས་དེ་བས་རྒྱ་ཁྱབ་ཀྱི་མཉམ་ལས་གོ་སྐབས་བཙལ་ཡོད། ཁྲོམ་ར་པུའི་ཅིང་ལི་ལུའོ་ཅུན་གྱིས་ང་ཚོས་ཞབས་ཞུའི་ཉོ་ཚོང་ཚོང་འདུས་བརྒྱུད་བོད་ལུགས་གསོ་རིག་གི་མིང་གྲགས་དང་ཤུགས་རྐྱེན་སྔར་བས་ཆེ་རུ་བཏང་སྟེ། བོད་ལུགས་གསོ་རིག་རྒྱུན་འཛིན་དང་དར་སྤེལ་གཏོང་ཆེད་སྟོབས་ཤུགས་སྐྱེས་སུ་འབུལ་ཐུབ་རྒྱུའི་རེ་བ་བྱེད་ཀྱི་ཡོད་ཅེས་གསར་འགོད་པར་བཤད།

སྐྱིད་གྲོང་རྫོང་ནི་བོད་ཀྱི་མཐའ་མཚམས་ཀྱི་འོད་མདངས་འཚེར་བའི་མུ་ཏིག་ལྟ་བུ་ཡིན་ཞིང་། འགྲེམས་ཁུལ་དུ་ཐུན་མོང་མ་ཡིན་པའི་རིག་གནས་ལྔ་དང་། ཕུན་སུམ་ཚོགས་པའི་རིག་གནས་བསམ་བཀོད་ཐོན་རྫས། མངོན་མིན་རིག་གནས་ཤུལ་བཞག་གི་ལག་ཤེས་བཟོ་རྩལ་ཐོན་རྫས་བཅས་ནི་འགྲེམས་ཚོགས་ཀྱི་བཀྲག་མདངས་འཚེར་སར་གྱུར་ཡོད། སྐྱིད་གྲོང་རྫོང་གི་རྫོང་དཔོན་གཞོན་པ་ཞུས་ཧྲུའུ་ཆང་གིས“རིག་གནས་ཡུལ་སྐོར་ཐོན་ལས་ནི་སྐྱིད་གྲོང་གི་ཀ་རྟེན་ཐོན་ལས་ཡིན། ང་ཚོས་ཞབས་ཞུའི་ཉོ་ཚོང་ཚོང་འདུས་ཀྱི་རྒྱལ་སྤྱིའི་གར་སྟེགས་ཆེན་པོ་དེ་བརྒྱུད་འཛམ་གླིང་ཡོངས་ལ་སྐྱིད་གྲོང་གི་དམིགས་བསལ་གྱི་ཡིད་དབང་འགུག་ཤུགས་དང་འཕེལ་རྒྱས་ཀྱི་གྲུབ་འབྲས་སྟོན་ཐུབ་རྒྱུའི་རེ་བ་བྱེད་ཀྱི་ཡོད”ཅེས་གསར་འགོད་པར་བཤད།

རང་སྐྱོང་ལྗོངས་ཚོང་དོན་ཐིང་ཚོང་དོན་ཞབས་ཞུ་དོ་དམ་ཁྲུའི་ཁྲུའུ་ཀྲང་ལི་ཁའེ་ཡིས“ད་ཐེངས་ཀྱི་ཞབས་ཞུའི་ཉོ་ཚོང་ཚོང་འདུས་སུ་རང་སྐྱོང་ལྗོངས་ཚོང་དོན་ཐིང་གིས་ཞབས་ཞུའི་ཉོ་ཚོང་ཁེ་ལས་14འགྲེམས་སྟོན་ལ་ཞུགས་རྒྱུའི་སྒྲིག་འཛུགས་བྱས་ནས་བོད་ཀྱི་ཞབས་ཞུའི་ཉོ་ཚོང་གི་ཁྱད་ཆོས་མངོན་པ་དང་ཚོང་དོན་ངོ་འཕྲད་གྲོས་མོལ་རྒྱ་ཁྱབ་བྱས་པར་ཕན་འབྲས་མངོན་གསལ་དོད་པོ་ཐོན་ཡོད། གོམ་སྟབས་རྗེས་མར། ང་ཚོས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་མུ་མཐུད་ལག་བསྟར་དོན་འཁྱོལ་གཏིང་ཟབ་བྱས་ཏེ། རང་ལྗོངས་ཀྱི་ཞབས་ཞུའི་ཉོ་ཚོང་རྒྱུན་མཐུད་དང་ཆུ་ཚད་མཐོ་བའི་སྒོ་དབྱེར་མུ་མཐུད་སྐུལ་འདེད་དང་བོད་ཀྱི་ཞབས་ཞུའི་ལས་རིགས་དང་ཞབས་ཞུའི་ཉོ་ཚོང་གི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུ་ཡིན”ཞེས་ངོ་སྤྲོད་བྱས།